মথি 7
7
আপ্রই তাংচাগু সুয়েংসাং পিইচা
(লূক ৬:৩৭,৩৮,৪১,৪২)
1“নাংরো লুঃউরোমা আপ্রইকো রাঃরো মিনিংগেকি, যাফুলিছুগি নাংরো আপ্রইকোলি মকৈংরাঅং, 2আক্রংগা যা পুয়েং নাংরো লুঃউগো আপ্রই খ্যারি, য়াং পুয়েং নাংরোগুলি আপ্রই খ্যাফু, অর যা পুয়েং নাংরো খ্রাং পিইরিলি, য়াং পুয়েংলি নাংরোগু খ্রাং পিইফু।”
3“নাংরো কোঃ ঞিং ম্যাকচিমা ম্যাকখিইগুরা ম্রাংরিব্যা, প্রফুছুগি কোঃ ম্যাকখি তদংগো যাফু মাম্রাংলিঃ?” 4নাক ম্যাকচিমা যাখা ম্যাকখি তদং হিকরি, য়াংখা যা পুয়েং প্যাংরো নাক ঞিংগো প্ররিলি, ‘লাঃ, নাক ম্যাকচিইগা ম্যাকখিগু থুওয়েবৈমি’? ক্রংসুউদ! 5পাথামা কুঃ ম্যাকচিইগা ম্যাকখিইগো সেসেং প্যাংউকসিই, য়হ্লকপ্রিইমারা নাক ঞিং ম্যাকখিগু থুওয়েফুচা আহ্লাপা ম্র্র্র্রাংমি।
6“যাচা মাঙ্গালা হিকরি, য়াংচাগো খুয়িইগু মিপিইগি। ওয়াক হ্রিইগা নাংরো ক্যকম্রেকো (রত্ন) মাক্রাংগি। যাফুলিছুগি য়াংসুউরো য়াংচাগু নাংবলৈমি অর রেং লুঃরো নাংরোগু কঃরো খাঃবলৈমি।”
ছুউক তংচাগু সুয়েংসাং পিইচা
7“তংগি, নাংরোগু পিইমি; হ্রাগি রাঃমি; তুয়েংখাগু খককে, নাংরো কিজু হ্লপিইমি।” 8যাসুউরো লুঃরি, য়াংসুউরো আলুংসুউ রাঃরি; যাসুউ হ্রারিলি, য়াংসুউ রাঃরি; অর যাসুউ তুয়েংখা খকতিলি, য়াংসুউ কিজু তুয়েংখা হ্লপিইরি। 9নাংরোমা যাসুউ তয়ক হিকরিলি, কুঃ সাঃ ভংমুক তংগি ক্যকখিই পিইরি? 10অর ঙাঃ তংগি ম্রিং পিইরি। 11নাংরো মকং ফ্রইপতয়ং কুঃ সাঃ-সিমিংগু আকং আকং ওয়েং পিইরি, ছুগি যাসুউরো নাংরোমা গংখাং ফুংমা ফাখাংগো তংরি ছুগি, ফাখাংগা য়াংসুউরোগু আকং আকং ওয়েং পিইফু য়াংচাগা প্রসামাক্যাব্যা! 12নাংরো লুঃউরোগা যা পুয়েং আসুং রাঃখ্যাংলি, য়াং পুয়েং লুঃউরোগু সুংগে। দিঃচা ফ্রইতি মোশি ক্যাংওয়েমা অর রিসিইরোমা আরাং চাঃগা।
আঙিশ্যি লেংখুওয়া
13“আশ্যি লেংখুওয়াগা ওয়ংগে, আক্রংগা যা লেংগা লাঃগি প্যাকফুলিঃ লেংখুওয়াচা আগ্রিই অর লেংলি আঃকি। লুঃউম্যারোচা য়াংচাগারা ওয়ংগেতিব্যা।” 14ছুগি যা লেংচা আকং লঃগাদুঃ য়ুউ লাঃরি, য়াং লেং লেংখুওয়াচা আশ্যি, লেংলি আশ্যি। কংগং আন্হই লুঃউ য়াং লেংগু হ্রা রাঃরি।
ক্রংসুউদ রিসিরোগু যা পুয়েং সিকফুলি:
(লূক ৬:৪৩,৪৪)
15“ক্রংসুউদ রিসিরোগু য়ুউরো সিঃধিরেকে। য়াংসুউরো নাংরোবাদুঃ সাংফ ছুয়িই ম্যাকহ্নানা লাঃরি, য়িগিলি চিই আথিঃমাচা য়াংসুউরো কিগুরুক ঞ্যংব্যা।” 16য়াংসুউরো লঃগামা কাইংগু ম্রাংরো, য়াংসুউরোগু সিকমিব্যা। উকখ্রোংমা চব্যসিই অর ক্রংখ্রঃ চুউবাংমা সাবুওয়েসিই সিইরি লঃ? 17য়াংচা পুয়েং তাবাংমক্যুয়েং আকং আপাংমা অাকং আসিই সিইরি অর মকং আপাংমা মকং আসিই সিইরি। 18আকং আপাংমা মকং আসিই অর মকং আপাংমা আকং আসিই তাখালি মিসিই। 19যা আপাংমা আকং আসিই মিসিইলি, য়াং আপাংগু খুওয়েরো মিংমা থিঃরি। 20য়জংকিজু প্ররি, ক্রংসুউদ রিসিইরো বাওয়ামা যা কাইং ম্রাংরিলি, য়াংচানা য়াংসুউরোগু সিকহ্নইমিব্যা।
সাগ্রাফুংদুঃ যাসুউ ওয়ংনৈংফুলি?
(লূক ১৩:২৫-২৭)
21“যাসুউরো ঙাগো ‘ফোরা, ফোরা’ প্ররি য়াংসুউরো আলুংসুউ গংখাং ফুং নেংঙাইংদদুঃ রকহ্নইংফুছুব মিহিক, ছুগি যাসুউ ঙামা গংখাংমা হিকচা ফাখাং ছেংদাগু ক্যাংরি, য়াংসুউরো রকহ্নইফু।” 22য়াংরাকমা লুঃউম্যারোচা ঙাগো প্রফু, ‘আস্যাং, আস্যাং, কোঃবাং নাঃমিনা ঙারো রিসিই ফ্রইরো চাঃগা মপ্রলিঃ লঃ? কোঃবাং নাঃমিনা ঙারো মকং নেঃকো ঙাং মুথুউলিঃ লঃ? কোঃবাং নামিঃনা যে যে এংঅফুয়ি অলুক মুলুকলিঃ লঃ?’ 23য়াংখা ঙা প্রব্রং প্রফুুচাগা, ‘ঙা নাংরোগু মিসিক। আপ্যাকরো! ঙা নেংগা প্যককেলিঃ।’
লুঃউম্যুও হ্নইচে
(লূক ৬:৪৭-৪৯)
24“য়জংকিজু প্ররি, খ্যাংসুউমুছু ঙামা দিঃ আলুং চাঃগারোগু নাঃথংলো ক্যাংরি য়াংসুউচা প্রলৈন্হইঅং তয়ক পৈঞাস্যাং, যাসুউচা ক্যক আথাকমা কোঃ ইংগু ছকলিইরি।” 25নক্কা মুঃও রুওয়ালিরি, ঢঃ ফ্রলিরি, লিই থাঃলিরি অর য়াং ইংচা মুঃও-মুঃদৈংমা ক্যালিরি; য়িগিলি য়াং ইংচা মাপ্যাকলি আক্রংগা য়াংচাচা ক্যক আথাকমা লুকলিইরি। 26খ্যাংসুউমুছু ঙামা দিঃ আলুং চাঃগারোগু নাঃমুথং, মাক্যাং য়াংসুউচা প্রলৈন্হইঅং তয়ক পৈঞা মিহিক লুঃউ, যাসুউচা সিঃলিই প্রাংমা ইং ছকলিইরি। 27নক্কা মুঃও রুওয়ালিরি, ঢঃ ফ্রলিরি, লিই থাঃলিরি অর য়াং ইংচা মুঃও-মুঃদৈংমা ক্যালিরি; য়াংখা ইংচা প্যাক লাঃখারি। কংগং প্রফুমারা রাঅং ইংচা প্যাক লাঃখারি।
28যাখা যীশু চাঃগা ছুংলিইরি, য়াংখা লুঃউরোচা য়াংসুউ সুয়েংসাচাগু য়ুউরো এংঅগেলিরি। 29আক্রংগা যীশুচা কেইং ছারারোঞ্যং সুয়েংসাং মিপিই, প্রফুছুগি যাসুউমা তাওয়েং হিকরি, য়াং লুঃউপুয়েং সুয়েংসাং পিইলিইরি।
നിലവിൽ തിരഞ്ഞെടുത്തിരിക്കുന്നു:
মথি 7: BBSRMZ
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക