Va'Atəŋ 11
11
Gəlaməɓayən na Babilon
(11:1-9)
Gəla mələklək na Babel
1Aka dələv va asan, ma taka yi, əpel məstakayi. 2Gala ɗiy adawzaraŋ kəlammba pay nampum, arahaŋ təki məpəlayya aka dələv na Sine'ar, yaŋ assoŋ də gəla adaka. 3Apeleŋ awalaŋ zit na: «Mədamə, məbaysəm menekeɗe, məzlegin a movoro.» Menekeɗe agəla gərma, membezleŋ ka nawsleren waleŋti. 4Yaŋ anəhaŋgə: «Məmpa səm walaŋgəla-metiŋ də gəla-ləklək hã kiyən dəne'gən aza disiŋ. Sləmam dəgilgəni vasna mətray na aka dəlvafuŋ ɓa.»
5Yawe aprikik vi kawla walaŋgəla-metiŋ gəm gəla-ləklək məs kirtin Adam adarkaŋ naka. 6Yawe amna: «Awle, ɗiyiŋ asapaŋgək taka, ma taka, ya aŋki wəza maddaabəŋ neti! Kakaŋ zəga tay nawtekit dəɗɗa an aɗɗumon ɓa! 7Mədamə, miprik səmə, məzlzlaɓan səm ma neti, adaprəmanən an adawpeleŋ aza zit ɓa!» 8Sədak Yawe atəraygit aka dələv gboŋgu, aziwginənək wərka walaŋgəla-metiŋ naka. 9Vini məlvan na, Babel, vi sədaki Yawe azlzlaɓan əpel nammba dələv pakə, gəm sədaki Yawe atəraygit ɗiy aka dələv gboŋgu.
Təŋ səza Sem aza Abram
(11:10-32)
10Iya na mazlalwã Sem yaŋka: wəzva na Sem agəɗək səkat, gala awa Arpaksat, wəzva sula sə dərɓaga buwən məvekeveke. 11Səza awa Arpaksat na, Sem azəvək, səkat sle'i, awək kirin mezeŋgleket dit muguluŋgiti.
12Arpaksat duwa Sela aka tay də əzva kaklaw hoku kiyən sle'. 13Dərɓaga muwa Sela, Arpaksat azəvək səkat poɗo də hoku, awək kirin mezeŋgleket dit muguluŋgiti.
14Sela agəɗək wəzva kaklaw hoku, yaŋ awa Eber. 15Dərɓaga uwa na Eber na, Sela azəvək, səkat poɗo də hoku, awək kirin mezeŋgleket dit muguluŋgiti.
16Eber azəvək kaklaw hoku kiyən poɗo, yaŋ awa Peleg. 17Dərɓaga Eber awa Peleg, azəvək səkat poɗo də kaklaw hoku, awək kirin mezeŋgleket dit muguluŋgiti.
18Peleg azəvək kaklaw hoku, yaŋ awa Rewu. 19Dərɓaga muwa Rewu na, Peleg azəvək səkat sula də vaytak, awək kirin mezeŋgleket dit muguluŋgiti.
20Rewu azəvək kaklaw hoku kiyən sula, awa Serug. 21Sə dərɓaga muwa Serug, Rewu azəvək səkat sula də buhul, awək kirin mezeŋgleket dit muguluŋgiti.
22Serug azəvək kaklaw hoku, yaŋ awa Nahor. 23Dərɓaga muwa Nahor, Serug azəvək səkat sula awək kirin mezeŋgleket dit muguluŋgiti.
24Nahor azəvək kaklaw sula kiyən vaytak, yaŋ awa Terah. 25Dərɓaga muwa Terah, Nahor azəvək səkat də kəlaw kiyən vaytakə, awək kirin mezeŋgleket dit muguluŋgiti.
26Terah azəvək kaklaw buhul, awa Abram, Nahor gəm Haran.
27Mazlalwã Terah yaŋka: Terah awak Abram, Nahor gəm Haran. Haran awak Lot. 28Haran amtək daabəŋ ki Terah afəni, aka dələv nan a Ur dələv net mə Kaldiyeɗi. 29Abram də Nahor akayaŋgək gili; ga Abram dawyətən na Saray, ga Nahor na, Milka, wətən Haran, afit may Milka dət Yiska. 30Saray ndarzlayəktə, tərah muzliya ɓa.
31Terah agəmək Abram wətəni, Lot, wətən Haran, wətən wətəni, dət Saray atəni, ga Abram wətəni, agilyoŋ dənɗaŋ sə Ur net mə Kaldiyeɗi, kawmbat aka dələv na Kana'an. Agapaŋgək a Haran, assoŋ adaka. 32Terah azəvək səkat sula də sle'i, amtə a Haran.
നിലവിൽ തിരഞ്ഞെടുത്തിരിക്കുന്നു:
Va'Atəŋ 11: GB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
All right reserved