मत्ती 19
19
फेम्मे तोङच्येते बात
(मर्कूस १०:१-१२)
1दि गाङे बात खाईन सिन्नामेकी येशूबा गालीलदुकी यर्दन चाङबो फारकेनपा यहूदिये अञ्चलपा गाल्सुङ। 2मुन्तीसरी मि थे तिरी तिरी तिङ ङ्याकीन ख्याम्सुङ। थेबे नाङ नाबा ओतातेबा गाङेला थेकी ठाक्पा खाईन बिन्सुङ।
3थेमे कोई कोई फरिसी पाटी मिओन येशू ओत्सादु वाकीन थे सेम तेइनकामा “सुइँदेकी खइँदा बातला मन परे माक्यासीन फेम्मेतेला तोङा परमेश्वर नियमताङ डिगीताना मिडिक्ते?” सिन सासुङ। 4थोक सिरजीन थेकी “च्यि ख्योकोनगी परमेश्वर नियमला दि बात पढे खाबा मेतरो? चुक सासीन परमेश्वरगी मि जोजीनराङ ख्योओ मिज्यीकताङ फेम्मे मिज्यीक खाईन जोबाते ईन। 5थेमे थेजीनराङ थेकी ‘थोगीराङ मि दाक्पोन आबा आमाताङ ठाल्ला फेम्मेतेताङ ङ्योम्बुराङ देताला डुइओ। थेमे थेबा ङिबो जीउज्यीकराङ ओङगो,’ सिन साबा ओतान। 6थोगी ख्योओ मिताङ फेम्मे मिचेन जीउ ङि च्योक मेन, जीउज्यीकराङ ईन। थोक खाईन परमेश्वरगीराङ ख्योओ मिताङ फेम्मे मिला जीउज्यीकराङ ओङला ङ्योम्बुराङ देताला जोबाते ईन्देकी थेबा ठाला मेङगो, ज्येनगी डेलाङ मेङगो,” सिन सिदुक। 7लोईन थेबेकी “थोक ईन्सीन मोशेकीचेन च्यिला परमेश्वर नियमला ‘फेम्मे तोङा छोल्कान्तेबेकी फर्स्ये टिकीन बिन्नामेकी तोङा ओङगो,’ सिन साबाते ईन्दे ओना?” सिन सासुङ। 8थेमे थेकी “ख्योकोन परमेश्वर बात ङेन्दा सेम मिक्किकान्ते मि ईन्देकीराङ मोशेकी फेम्मे तोङा छोल्कान्तेबेकी फर्स्ये टिकीन बिन्नामेकी तोङा ओङगो सिन साबाते ईन। तर गोमा परमेश्वरगी मिओन थेमे जेसुकै जोजीनचेन थोक खाला फेम्मे तोङच्येते बात छ्याःङ ओतराङ मेतान। 9थोगी ङा ख्योकोनला च्यि सिते सासीन सुइँदेकी फेम्मेते ज्येन मित्ताङ लै खाबा मेत्सीनोङ थेला ताङगीन ज्येन खुला लिच्युङ सासीन थेकी रन्डीबाजी खाबाते ईन। थेमे सुइँदेकी थोक खाईन ताङाते फेम्मे मिला खुला लिच्युङ सासीन थेकीङ रन्डीबाजीराङ खाबाते ईन,” सिन सिदुक।
10थेकी दि बात सानामेई चेलातेबेकी “फाङमा खानामेई ख्यावा फेम्मे बात गुरूकी साबा च्योकराङ ईन्सीन बरू फाङमा मिक्किता खाला देताराङ लेमु दुका,” सिन सासुङ। 11थोक सिरजीन थेकी “फाङमा मिक्किता खाला देत्च्येते बात मि गाङे लाईदु मेन। सु सु फाङमा मिक्किता खाला देता थुप्कीका दि बात थेबे लाईदुकामा ईन। 12मिकी फाङमा मिक्किच्येते कारण खुदुक खुदुक ओङगो। च्यि सासीन कोईचेन केजीनमेईराङ फेम्मे मित्ताङ ङ्योम्बु देता मुथुप्च्या ओङगीन केबेकी खित्सादु थेबा फाङमा मिक्किता खाला देत्क्यो। कोईलाचेन गोमा सरसौंदोराङ ओत्सीनोङ तिरीकामा ज्येन मिकी फेम्मे मित्ताङ ङ्योम्बु देता मुथुप्च्या जोबेकी होथोक्तेबेकीङ फाङमाराङ मिक्किओ। तर कोईचेन जुनी खाङ स्वर्गे राज्य कामकामा खिता थुप्स्यीत सिनोङ फाङमा मिक्किता खाला देत्च्येते ईन। फाङमा मिक्किता खाला देत्च्येते बात थोक मिक्किता खाला देता थुप्कान्तेबे लाईदुकामा ईन,” सिन सिदुक।
येशूकी फिजाओनला आशी बिन्दाते
(मर्कूस १०:१३-१६; लूका १८:१५-१७)
13थेमे कोई कोईकी येशूकी खोपरोङ फिजाओनला लाक्पा ज्याक्ला प्रार्थना खाला तेरस्यीत सिन थे ओत्सादु खुला लिच्युङ। थेरू फिजाओन खुलाङा थोङगीन चेलातेबेकीचेन “फिजाओनते दुरू छ्याःङ काम मेत, थेबाला दुरू खुला माङ,” सिन थाप्सुङ। 14तर येशूकीचेन “फिजाओनला दुरू खुला माङ सिन माङार। थेबाला ङा ओत्सादु ओङ छ्युत। दि फिजाओन थेमे होदिबा च्योकराङ ङा ङाराङ ईन सिराच्योक मिक्किकान्ते मिओनराङ स्वर्गे राज्यने स्यूक्पा ङेत्क्यो,” सिन सिदुक। 15थेमे थेकी थे फिजाओन लाक्तु लाक्पा ज्यागीन प्रार्थना खाईन बिन्गीन च्याकीन थेरूई गाल्सुङ।
सम्पत्तिताङ नोमुङ मिसिन्च्येते जुनी बात
(मर्कूस १०:१७-३१; लूका १८:१८-३०)
16थेमे मिज्यीगी येशू ओत्सादु वाकीन “गुरू, नोमुङ मिसिन्च्येते जुनी ङेताला ङे च्यि च्यि लेमु काम खिता फाप्कीते लाप्ला नाङना,” सिन सासुङ। 17थोक सिरजीन थेकी “लेमुते कामगी बात खुई ङात्ताङ माठिसीन ओङगो। लेमु सिरातेनी परमेश्वरकामा ईन। थोगी खोल्ला नोमुङ मिसिन्च्येते जुनी ङेता सेम ओत्सीन परमेश्वरगी बिन्दाते छ्ये छ्ये नियम ङेन्ला थेरू खि साबा च्योकराङ खि,” सिन सिदुक। 18थेमे थे मिकी “खाङ नियम साबे गुरू?” सिन ठिजीन थेकी “मि सेता मेङगो, रन्डीबाजी खिता मेङगो, क्वा मेङगो, मेन्दे बातला सुङलाङ दोष लै खिता मेङगो, 19आबा आमाला मान खिता फाप्क्यो थेमे दाक्पोन ज्यानला माया खिता च्योकराङ खाला ज्येनलाङ ङिङज्ये खिता फाप्क्यो सिन साबाते नियमराङनी ईन,” सिन सिदुक। 20थोक सिरजीन थे आदो स्याराते मिकी “गुरू, दि नियमनी ङे गाङे ङेन्दा ओत। था थोरूम ज्येनतोक काम ङे च्यि खिता फाप्कीते?” सिन सासुङ। 21थेमे थेकी “खोल्ला परमेश्वरगी खि साबा साबा च्योककामा खाला साँच्चीराङ नोमुङ मिसिन्च्येते जुनी ङेता सेम लाङगीदुक सासीन था गाल्ला खोरोङते ओताते जति जेसुकै च्वाला पैसाचेन दुक्पा ङेताते मिओनला गोला बिन। थोक खासीन खुई मिनला स्वर्गने नोमुङ सिन्ला तोरला मोन्डोच्येते स्वर्गे सम्पत्ति जम्मा ओङला देत्क्यो। ङे थाल्ला साबाच्योक खाला खोरोङचेन ङात्ताङ ख्योम,” सिन सिदुक। 22थोक सानामेई थे मि छ्येत सेत्कीन थेरूई दाक गाल्सुङ। च्यिला सासीन थे आउदी छ्युक्पु ओतान।
23थे मि थोक खाईन गाल्नामेई येशूकी चेलातेबाला “ङा ख्योकोनला दि बात सिओ। चुक सासीन छ्युक्पुते मिओनला स्वर्गे राज्यने स्यूक्पाला आउदी दुक्पा ओङगो। 24दि बात ङेन। छ्युक्पुते मिओनला परमेश्वर राज्यने स्यूक्पा भन्दानी बरू ऊँट जोदाज्यीक ओत्सीनोङ थेला खापकी मिकनापेकी ज्युरा सजिलो ओङोङ,” सिन सिदुक। 25थेकी थोक सिरजीन छक्क परे खिन चेलातेबेकी “थोक ईन्सीनका स्वर्गे राज्यने सु स्यूक्पा थुप्कीते ओना?” सिन ठिसुङ। 26ठिजीन थेकी थेबा ओत्सापाला ताकीन “मि छ्युक्पु ओङला कि धर्म खाला स्वर्गे राज्यने स्यूक्पा मुथुबो। मिकी खिता मुथुप्च्येते दि काम परमेश्वरगी सजिलो खाला खिओ। थेकी खिता मुथुप्च्येते छ्याःङ मेत,” सिन सिदुक।
27दि बाततेबा थोनामेई पत्रुसकी “गुरू, खुई चेला ओङला ख्याम्बे लाईदु ङ्योकोनगीनी ङेराङते ओताते जति गाङे ताङाप। थेमे था ङ्योकोनगीचेन च्यि ङेत्कीते?” सिन सिदुक। 28थोक सिरजीन थेकी चेलातेबा गाङेला “ईन ईन, ख्योकोनगी च्यि खाबा ओते सिन ङाला गाङे छ्या ओत। ङा ख्योकोनला चुक सिते सासीन दि जुग सिन्गीन स्वर्गे राज्य पूरो खाईन वानामेई परमेश्वर ओत्सादुई वाबाते मि ङा गेल्बो देत्च्येते सिंहासनदु देत्ला राज्य खित्जीन ख्योकोनगीङ सिंहासन च्युन्ङी लाक्तु देत्ला ङात्ताङराङ राज्य खिता ङेत्क्यो। थेमे ख्योकोनगी इस्राएलीओन थर च्युन्ङीला राज्य खाला न्याय खिओ। 29ङे बात ङेन्ला ङात्ताङ ख्याम्बे लाईदु खाम्बा कि आबा आमा कि आज्यो न्वा आज्यी नुमु कि फुज्युङ फुमु कि जग्गा जिमीन तोङकान्तेबाला परमेश्वरगी आबा आमा, आज्यो न्वा आज्यी नुमु, फुज्युङ फुमु च्योक्तेताङ खाम्बा थेमे जग्गा जिमीन ज्येनोङ झन काल्बेई तेरग्यो। थेमे थेबेकी नोमुङ मिसिन्च्येते जुनीङ ङेत्क्यो। 30थेमे दि बादोङ ङेन। थरिङोला ज्येनगी दिङ सु ईन्देरो सिराच्योक ठाने खाबाते मिओन तिरी छ्ये ओङगो। थरिङोला छ्ये ओतातेबाचेन तिरी छ्ये मेङगो,” सिन सिदुक।
നിലവിൽ തിരഞ്ഞെടുത്തിരിക്കുന്നു:
मत्ती 19: JUL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 1992 Wycliffe Bible Translators Inc. All rights reserved.