मत्ती 27
27
येशूला पिलातस दोन्दु क्यालाते
(मर्कूस १५:१; लूका २३:१; यूहन्ना १८:२८)
1थेमे नाम लानामेई ङोमुका थेरू जम्मा ओङाते छ्ये छ्ये पूजारीताङ यहूदीओन छ्ये छ्ये मि गाङेकी येशूला सेता फाप्क्यो सिन बात डिक्पा खासुङ। 2थेमे थेला ठाकीन रोमी गेल्बो हाकिम पिलातस ओत्सादु खेरगीन थे लाःक्तु सोम्पे खासुङ।
यहूदा झुण्डे खाईन स्याप्ते बात
(शक्ति काम १:१५-१९)
3येशूला सेत्च्या ओङदुक्लो सिन थेला धोका तेरकान्ते यहूदेकीङ थोसुङ। थेमे थेकी ओहो, ङेनी आउदी मेलेबा कामका खाबाक्वा सिन गोमा थे खोरोङगी लाबाते चाँदी डबल खालज्यीकताङ च्युताम्बा खुरगीन छ्ये छ्ये पूजारीताङ यहूदीओन छ्ये छ्ये मिलाराङ ग्युरला तेराला थेबा ओत्सादु ख्योल्सुङ। 4थेमे थेकी थेबाला “छ्याःङ दोष मेताते मिला ङे थाराङ धोका बिन्दुक, ङेनी पापका खादुक,” सिन सिरजीन थेबेकीचेन “ङ्योकोनलाका च्यि सिते? था खोरोङ जेसुकै खि,” सिन सिदुक। 5थेमे यहूदाचेन थे चाँदी डबलतेबा थेरू परमेश्वर मन्दिरदुराङ ग्याङ क्युरगीन गाल्गीन च्याकीन झुण्डे खाईन स्यिसुङ।
6थे थोक खाईन गाल्नामेकी छ्ये छ्ये पूजारीकी थे डबलतेबा तुकीन “दि पैसा मन्दिर ढुकुटी नाङ लुबा मेङगो। दोक खिता परमेश्वर नियमताङ मिडिगो। च्यिला सासीन दिनी मि ज्यानगी मोलका ईन,” सिन बात खासुङ। 7थेमे थे पैसा च्यि खित्च्ये सिन ठो खाईन थेबेकी ज्येन लुङबे मि रो दिक्पाला सिन कुमाले स्यीङ ङ्योसुङ। 8थोगी थोरूमसाकोङ थे स्यीङला “ठागी स्यीङ” सिन सिओ। 9थेबेकी थोक खानामेई परमेश्वर बात खित्कान्ते यर्मियेकी गोमाका दोक सिन टिबाते बात साबा च्योकराङ ओङसुङ। थेकी च्यि साबा ओताने सासीन “दि मि लाईदु पैसा थोई तेरा ठीक ईन्ताका सिन मोल खित्जीन इस्राएलीओनगी थेला चाँदी डबल खालज्यीकताङ च्युताम्बा मोले खाबा ओतान। 10थेमे तिरी थेबेकी थे पैसेकी कुमाले स्यीङ ङ्योसुङ। दोक खाईन थेबेकी प्रभु परमेश्वरगी ङाला साबा च्योकराङ खाईन थे स्यीङ ङ्योबा ओतान,” सिन साबा ओतान।#यर्मिया ३२:६-९; जकरिया ११:११-१२
पिलातसकी येशूला सेत्च्येते हुकुम बिन्दाते
(मर्कूस १५:२-१५; लूका २३:२-५,१३-२५; यूहन्ना १८:३३-१९:१६)
11थेमे येशूला थे खोरोङ दोन्दु क्याल्नामेकी रोमी गेल्बो हाकिम पिलातसकी थेला “च्यि खो यहूदीओन गेल्बो ईन?” सिन ठिसुङ। ठिजीन थेकी “ङा यहूदीओन गेल्बो ईन सिन खुईराङ सासुङ,” सिन सिदुक। 12थेमे थेरूङ छ्ये छ्ये पूजारीताङ यहूदीओन छ्ये छ्ये मिकी दिकी दोक दोक खासुङ सिन दोष लै खिन येशूकी खाराङ माक्याबाते कामताङ बात खासुङ सिन पिलातसला लाःप्सुङ। थेबेकी थोक खित्जीनोङ येशूकी खानामा बातज्यीगोङ मातेन्सुङ। 13थोक खाईन थे छ्याःङ मिसिरा खाईन देता थोङगीन पिलातसकी थेला “दिबेकी खाबाते बात खुई माथोसुङाना च्यिन्दे? च्यिला खो खाराक्पाराङ देत्कीते?” सिन सासुङ। 14थोक सिरजीनोङ दिबेकी ङाला थाराङ दोषकामा लै खाबाते ईन सिन बातज्यीगोङ मिसिरा खाईन थे खाराक्पाराङ देता थोङजीन पिलातसला झन अचम्ब लासुङ।
15थेमे बातज्यीक च्यि सासीन निस्तार चाडगी बेलाला लोई ठाङमा रोमी गेल्बो हाकिमगी जेलदुकी कैदीज्यीकला तोङच्ये चलन ओतान। मिओनगी सुला ताङला नाङ सिका थेकी होथेलाराङ तोङा फाप्कीन ओतान। 16थे बेलाला थेरू बारब्बा सिराज्यीक आउदी ज्यीबा लाङच्या मेलेबा मि जेलदु ओतान। 17थोगी पिलातसकी थेरू जम्मा ओङगीन वाबाते मि गाङेला “लो ख्योकोनबरी थोलो सुला थोङ सिते? बारब्बाला थोङना दि ख्रीष्ट ईन साबाते येशूला थोङे?” सिन ठिसुङ। 18काल्बा च्योक मि येशू छ्य्वापा लै खाबा थोङगीन छ्ये छ्ये मिकी स्येदाङगी थाराङ थेला थेरू खुलाबाते ईन सिन छ्या स्येकीन थेकी थोक साबा ओतान। 19थेमे पिलातस अड्डादुराङ देता ओते बेलाला फेम्मेतेकी थेला “थे छ्याःङ गल्ती मेताते मिला छ्याःङ मेलेबा माकेत। च्यिला सासीन थे मिला सजाय बिन्सीन आउदी मेलेबा ओङगो सिन ङे दाङ ग्वाका मेलेबाज्यीक मिलाम थोङसुङ,” सिन लोन ताङसुङ।
20थेजीनसाकला छ्ये छ्ये पूजारीताङ यहूदीओन छ्ये छ्ये मिकी थेरू जम्मा ओङाते मि गाङेला लुकीन “पिलातसकी सुला तोङच्ये सिन ठिसीन ख्योकोन गाङेकी येशूला मेन, बारब्बाला थोङ। येशूलाचेन सेताराङ फाप्क्यो सिन सिसा,” सिन खोपरोङ लाःक्तु लाकीन सिन्दा ओतान। 21थेमे पिलातसकी लोईन थेबाला “ख्योकोन दि मेन्दा ङि मि नाङ खाङला थोङ सिते?” सिन ठिजीन थेबा गाङेकी “बारब्बाला थोङ,” सिन छेरा खासुङ। 22थोक खित्जीन पिलातसकी “थोक ईन्सीन दि ख्रीष्ट ईन साबाते येशूलाचेन च्यि खिसे ओना?” सिन सिरजीन थेबा गाङेकी “दिला सेता फाप्क्यो। दिला स्यिङगी थामला टाँए खाला सेत,” सिन झन कस्स्ये खाईन छेरा खासुङ। 23थोक सिरजीन पिलातसकी “ख्योकोन च्यिला दोक खाला छेरा खिते? दि मिकी च्यि मेलेबा काम खाला दुकारो?” सिन ल्वा चाल्सुङ। ईन्सीनोङ थे बातला नामज्योकराङ मेसेता खाईन थेबाबरी “थेला तोङा मेङगो, थेला स्यिङगी थामला टाँए खाला सेत,” सिनकामा झन मिता खाच्या खाला छेरा खिन फिराला स्यूसुङ। 24थेकी जे खित्जीनोङ छ्याःङ सीप लै माक्यासुङ। बरू थेरू मिओनगी हूलदङ्गाका मच्चे खाओङ सिराच्योक गालेकी थेकी गाङे दोन्दु लाक्पा ठुत्कीन “लो ख्योकोन दि बात छ्या स्येबा खि, दि गल्तीराङ मेताते मिला सेताते ङेते छ्याःङ दोष मेत। दिला सेत च्युताते ख्योकोनगीराङ ईन,” सिन सासुङ। 25थोक सिरजीनोङ थेबा गाङेकी खाज्यीकराङ खाईन “लो ओङगो, ओङगो। थेला सेतातेला खइँदा मेलेबा ओङसीन ङेत्ताङ ङी सन्तानलाराङ ओङस्यीत,” सिन सासुङ। 26थोगी पिलातसकी बारब्बाला जेलदुई ताङसुङ। थेमे येशूलाचेन कोर्रा लै खाला च्याला स्यिङगी थामला टाँए खाला सेत सिन मिल्टेरीओनला बिन्गीन ताङसुङ।
येशूला मिल्टेरीओनगी खिस्यी खाबाते
(मर्कूस १५:१६-२०; यूहन्ना १९:२-३)
27थेमे थे रोमी गेल्बो हाकिम मिल्टेरीओनगी थेरूकी येशूला रोमी गेल्बो हाकिम पिलातस खाम्बादु खेरसुङ। थे खाम्बाला प्रेटोरियम सिन ओतान। थेमे थेरू ओताते ज्येन मिल्टेरीओनलाङ गाङेला थेरू जम्मा खासुङ। 28थेमे थेबेकी येशूकी खोन्दा ओताते खोलाक टोल्गीन आउदी मोर्मुते लाक्तु खोन्च्येते खोलाक कोन्सुङ। 29थोकराङ खाईन चाङगी बुटे श्रीपेज जोकीन गोःला कोन्गीन बिन्सुङ। थेमे गेल्बोकी खुरच्येते डन्डी सिन लाःक्तु फेर्काज्यीक बिन्गीन गुर्बु खाला से खिन “यहूदीओन गेल्बो काल्बासाक सोन्स्यीत, खुईते जय जय ओङस्यीत,” सिन खिस्यी खासुङ। 30थेमे छ्यिम्तोर देइन गोमा बिन्दाते फेर्केकीराङ गोः लाकनामाराङ गोः लाकनामा ग्याप्सुङ। 31थोक खाईन खिस्यी खाईन सिन्नामेकी थेबेकी थेला कोन्दाते खोलाक टोल्गीन थे खोरोङ खोलाकराङ कोन्गीन बिन्सुङ। थेमे थेरूकी थेला स्यिङगी थामला टाँए खाला सेताला खेरसुङ।
येशूला स्यिङगी थामला टाँए खाबाते
(मर्कूस १५:२१-३२; लूका २३:२६-४३; यूहन्ना १९:१७-२७)
32थेमे येशूला टीला डुइन डुइनलाराङ लामला थेबेकी साइरेनीपे शिमोन सिराते मिला ठेत्सुङ। थेमे मिल्टेरीओनगी थेलाराङ जुम्गीन येशूला टाँए खाला सेत्च्येते स्यिङगी थाम जबरजस्ती कुरगीन खेरसुङ। 33थोक खाईन थेबा गलगथा सिरसादु ख्योल्सुङ। गलगथा साबाते खप्पर ठाउँ साबाते ईन। 34थेरू ख्योल्नामेकी थेबेकी येशूला ठीबा लुक्पाते अंगूर छ्याङ थुङ सिन बिन्सुङ। तर चाखे खाईन ताकीन लट्टे खित ज्युत्च्येते दुका सिन छ्या स्येनामेई थेकी थे थुराङ माथुसुङ। 35थेमे मिल्टेरीओनगी थेला लाक्पा काम्बाला काँटी ग्याप्कीन स्यिङगी थामला टाँए खाईन लाङसुङ। थोक खानामेई थेबेकी येशू खोलाक सु सुला खाङ खाङ फाप्च्या ईन्दाका सिन चिट्ठा ग्याप्कीन गोकीन खासुङ। 36थेमे थेबा येशूला स्युङाला थेरूराङ देत्सुङ। 37थेला च्यिला सेताते ईन्दे सिन स्यिङगी पाटीज्यीकला “दि यहूदीओन गेल्बो येशू ईन” सिन टिकीन गोः तेङने स्यिङगी थामला ठोके खाईन ज्याक्पा ओतान। 38थेमे मिल्टेरीओनगी डाँका मेरा ङिलाङ येशूला च्योकराङ खाईन थे फारताङ छुरला स्यिङगी थाम रेरेला टाँए खासुङ।
39थोक खाईन येशूला स्यिङगी थामला टाँए खाबाते थोङगीन थेरू ओङकान डोकान मिओनगीचेन खोल्ला ठोकस्यिङ सिराच्योक खिन 40“ए खोनी परमेश्वर मन्दिर राम्ला च्याला ङीमा सुमला ज्वा थुप्क्यो सिन सिरकान्तेराङ मेनरो? लो खो पक्काराङ परमेश्वर फुज्युङ ईन्सुङ सासीन थे स्यिङगी थामदुकी देमा फाप्ला वाला खोरोङला सोन्दा खि। लोते ओना खो खजोते ईन्दाका,” सिन खिस्यी खासुङ। 41थोकराङ खाईन छ्ये छ्ये पूजारी, धर्मे गुरूओनताङ यहूदीओन छ्ये छ्ये मिकीङ 42“दिला तोना, दिकी ज्येन ज्येनलानी सोन च्युत्सुङ। तर थे खोरोङला सोन्दा खिता थुपाते खोइ? लो दि पक्काराङ इस्राएलीओन गेल्बोराङ ईन्सीन था दि स्यिङगी थामदुकी सानामा फाप्ला थे खोरोङला सोन्दा खित्स्यीत। थोक खासीन ङुरूङ दिला थेराङ ईन्दा दुका सिन पत्ते खिताप। 43दि परमेश्वरगी थे खोरोङला लेमु खाला तेइओ सिरकान्ते ईन। थेमे दिचेन दि खोरोङराङ परमेश्वर फुज्युङ ईन सिन ख्याम्गीन ओतान। दिकी साबा च्योकराङ ईन्सीन लोते ओना दिला परमेश्वरगी खजो जोए खित्च्या ईन्दाका तेइ,” सिन खिस्यी खासुङ। 44थेमे थेत्ताङ ङ्योम्बुराङ टाँए खाबाते डाँका ङिबोकीङ येशूला सिरासम्म मनपरी सासुङ।
येशू स्याप्ते बात
(मर्कूस १५:३३-४१; लूका २३:४४-४९; यूहन्ना १९:२८-३०)
45थेमे ङीम्मु बाह्र बजेमेकी तीन बजेसाक लुङबा खाङ मुन्दाक जिङी गाल्सुङ। 46थेमे तीन बजे नाङपा येशूकी कस्स्ये खाईन “एली, एली, लामा सबखथनी?” सिन सासुङ। दोक साबाते “ए परमेश्वर, ए परमेश्वर, खो ङात्ताङ थाल्ला च्यिला ठाले?” साबाते ईन। 47थेकी थोक साबा थोकीन च्यि साताका सिन लेमु खाईन माखोबेई थेरू थेला च्यि च्यि ओङगीका सिन ताकीन देता ओताते कोई कोईकीचेन “उ तोना, दिकीनी एलियालाका कातोङाला स्यूसुङ,” सिन सासुङ। 48थेमे थेबे नाङ दोक्पोईकीचेन छ्य्वाकीन गाल्गीन खोलाक टालोज्यीक किर्बुते छ्याङगी नाङ न्वाकीन बागी टुप्पोला ठील्गीन च्याकीन येशूला थुङा बिन्सुङ। 49थेकी थोक खित्जीन ज्येनतेबेकीचेन “गुसा गुसा, दिला थे स्यिङगी थामदुकी पाप्ला सोन ज्युताला एलिया खजो ओङच्या ईन्दाका तेइसो,” सिन सिदुक। 50थेमे येशू लोईन कस्स्ये खाईन छेरा खाईन ग्याङ स्यिसुङ।
51येशू स्यापज्यीकताङराङ चुक ओङसुङा सासीन परमेश्वर मन्दिर नाङदु क्योराते पर्दा ईनेकी मिमासाकराङ टुक्रा ङि गाल्गीन राल्सुङ। दोस्यिककामा मेन, थेजीन सेदेर्मु गाल्सुङ, ठाःकओनोङ खासुङ। 52थोकराङ खाईन फुकतेबाङ खाकीन गोमाबा स्यिइन थेङला ज्याक्पाते परमेश्वर सन्तान काल्बेईला परमेश्वरगी सोम्बो लोक च्युत्सुङ। 53थेमे थेबा फुगी नाङलेकी थेन्गीन च्याकीन तिरी येशूङ सोम्बो लोक्नामेकी परमेश्वर सार सिरच्येते यरूशलेम नाङपा गाल्सुङ। थेरू थेबाला मि काल्बेईकी थोङसुङ।
54येशू स्यिजीनसाक थेला स्युङाला देत्कान्ते मिल्टेरी क्याप्टेनताङ मिल्टेरीओनगी सेदेर्मु गालाते थेमे थेरू ओङाते ज्येन ज्येनोङ बात थोङगीन आते खिन “दिनी साँच्चीराङ परमेश्वर फुज्युङराङ दुका,” सिन सिदुक। 55थेरू फेम्मे मितेबाङ काल्बेई येशूला च्यि च्यि ओङच्या ईन्दाका सिन आदो थारीलाराङ देत्ला तेइन ओतान। थेबाचेन गालील अञ्चल नाङपेकीराङ येशूला गोच्येते मद्धत तेरगीन थेत्ताङराङ वाबा ओतान। 56थेबे नाङ मरियम मग्दलिनी, याकूबताङ योसे आमा मरियम थेमे जब्दी फुज्युङबा ङिबो आमाङ ओतान।
येशूला सासगास खाबाते
(मर्कूस १५:४२-४७; लूका २३:५०-५६; यूहन्ना १९:३८-४२)
57थेमे थे छोमु नाम स्योनामेई यूसुफ सिराते मिज्यीक थेरू लेप्सुङ। थे छ्युक्पुज्यीक ओतान। थेमे थे अरिमाथियापे मि ओतान। थेकीङ येशूला विश्वास खिताला स्यूबा ओतान। 58थेमे थेकी रोमी गेल्बो हाकिम पिलातस ओत्सादु गाल्गीन येशू रो खेरा नाङ सिन बिन्ती खासुङ। थेमे पिलातसकीङ येशू रो बिन्ला थोङ सिन मिल्टेरीओनला कोत्सुङ। 59थेमे यूसुफकी गाल्गीन थे रो लाकीन साम्बाते कार्मुते खोलाककी ठील्गीन 60फुकदु खेरगीन ज्याक्सुङ। थे फुकचेन यूसुफ थे खोरोङ स्यिनामेई ज्य्वाबाला सिन ठाःक ठुकीन जोबा ओतान। थे नाङ गोमा सुङगीङ रो ज्याक्पा मेतान। येशू रो ज्याक्नामेई थेकी जोदाज्यीक दो रिल्गीन थे फुगी गो टाले खाईन ज्यागीन च्याकीन गाल्सुङ। 61थेरू मरियम मग्दलिनीताङ ज्येनते मरियमोङ वाबा ओतान। येशू रोला थोक खाईन ज्यागीन गाल्नामेकीङ थेबाचेन काल्बासाक थे फुगी खादुराङ देत्सुङ।
येशू रो ज्याक्पाते फुक स्युङाला देताते
62ङारो च्योक्तेचेन सन्चारी फाप्कीन ओतान। थेमे थे छोमु छ्ये छ्ये पूजारीताङ फरिसी पाटी मिओनगी पिलातस ओत्सादु गाल्गीन 63“हजूर, बातज्यीक च्यि सासीन थे खोरोङ ख्रीष्ट ईन सिन मिओनला ढाँर खित्कान्तेकी थे सोम्बो ओत्जीनराङ ‘स्याप्ते ङीमा सुमगी छोमु ङा लोक्ला सोम्बो लोइओ,’ सिन साबाते बात ङ्योकोनला ठेम्बा लासुङ। 64थोगी ङीमा सुमसाक थे रो ज्याक्सादु लेमु खाला स्युङाला मिल्टेरीओन स्योक। थोक माक्यासीन थे चेलातेबेकी थे रो थेन्ला खेरला थेबेकी ‘येशू स्यिसादुकी सोम्बो लोक्तुक,’ सिन मिओनला साओङ। दोक ओङसुङलो सिन थोसीन मिओनला गोमा भन्दाङ झन मेलेबा खाला छक्के खाओङ,” सिन सिदुक। 65थेमे पिलातसकी थेबाला “लो मिल्टेरीओन खेर। थेमे ख्योकोनगी थुपासम्म लेमु खाला स्यु,” सिन सासुङ। 66थोगी थेबेकी मिल्टेरीओन खेरगीन फुगी गोनापा ज्याक्पाते दो सुइँदेकी थेन्सीन थाहा छ्येत्स्यीत सिन थेरू छाप ग्याप्कीन च्याकीन थेबाला स्युङ च्युत्कीन ज्याक्सुङ।
നിലവിൽ തിരഞ്ഞെടുത്തിരിക്കുന്നു:
मत्ती 27: JUL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 1992 Wycliffe Bible Translators Inc. All rights reserved.