Mateghusi 3
3
Johannesi ghoMukadiyoghero noyiyaghura yendi
(Mark 1:1–8; Luk 3:1–9, 15–17; Joh 1:19–28)
1Mumayuwa gha ko kutanga kuyaghura Johannesi ghoMukadiyoghero mumamboreya ghaJudeya, 2no gha ningire eshi: “Mu piruke, yoyishi ghufumu ghodiwiru ne pepi ghu di.” 3Aye ne yoyu gha yaghurire muporofeta Jesaya apa gha ningire eshi:
“Diywi dina kwitha mumamboreya:
Mu roghithe ndhira dhaFumu,
mu mu ghorwere mayira ghendi.”
4Johannesi yu gha vatire yitere yoghuhuki ghongameno nongwama mumbunda dhendi. Yidya yendi ne dimba nowiki ghomuka. 5Mumayuwa ghogho, Jerusalema noJudeya yomuhe nomukunda ghoghuhe waJordani wa kongoshire kukwendi. 6Nawo ha tongononine maharwero ghawo no ha pwire kuyogha muJordani.
7Apa gha monine eshi wingi waWafarasayi naWasadusayi, kukwendi hana kwiya eshi gha wa yoghe, gha wa tongwerire eshi: “Mwayiyoka mwe, yidye ghana mu nyanyamitha mu tjire ghukenya ghushokuru? 8Mwime ndani mbuyo dhokuneghedha eshi muna piruka. 9No mwa ghayara mumwenu mwathinda ghuninga eshi: ‘Atwe twa kara naAbrahamu ghowihetu,’ yoyi ame na kumutongwera ngeno: Nyambi gha kona kutenda mawe gha kare hana Abrahamu. 10Kamo nako kare nga ka rara pamidhi dhoyitondo. Kehe thitondo thokudhira kwima mbuyo dhodhiwa, hana kuthiyeya no kuthivukumena mumudiro. 11Ame na kumuyogha nomeyu yoyi muna piruka, ene yu mbo gheya munyima dhange, gha kara nongcamu kupiterera me. Name mbadi na fumana kushutura makuha ghendi. Aye mbo ghana mu yogho naMupepo ghoKupongoka nomudiro. 12Munyara dhendi mo thi di thipuritho, no mbo ghana kenitha thindanda thendi roruheya no kutera tumbi wendi mukashete. Ene mungu, mbo ghana ghu tumekera mumudiro ghushidhimana.”
Diyoghero dyaJesusi
(Mark 1:9–11; Luk 3:21–22; Joh 1:31–34)
13Mumayuwa ghogha, ko kutunda Jesusi muGalileya gha yende kwaJohannesi kuJordani eshi gha ka mu yoghe. 14Ene Johannesi gha yerekire kukanana ghuninga eshi: “Ghuhunga ne ngo yowe sho ni yoghe. Owe ne ho ghu neya kukwange kemo?”
15Jesusi gha mu huthire eshi: “Ghuhunga ghu kone kuyitenda, yoyishi pamuhingo ghuno po sho tu rikanyithe ghuhunga ghoghuhe waNyambi.” Munyima ko kumutawedha.
16Jesusi gha pwire kuyogha no gha kandukire mumeyu. Kapupi kamanana ko kuyandhuruka diwiru, naJohannesi gha monine Mupepo waNyambi yira dikutji no wa temberire peghuru dhendi. 17Karo pa karire diywi dyokutunda mudiwiru edi dya ningire eshi: “Oyu ne yoMwanange ghomuhakwa, yo na menyamenyena.”
നിലവിൽ തിരഞ്ഞെടുത്തിരിക്കുന്നു:
Mateghusi 3: MHW1986
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Mbunga dhoBayibili dhaNamibia (Bible Society of Namibia) 1986