Nuk 11
11
Nekpɨne ni Jisɛs ákɛɛ ɛsika ɛkɨgha njɔm
1Ɛfo ɛbi, Jisɛs ára kak njɔm ka mfom. Nden yi akɨnɛ, nnɛ ɛkan ɛjɛ ɛwi ɛtɔɛ si, “Ntaa, kpɨne war ka ɛkɨgha njɔm ɛsika Jɔn ákpɨne asɔgba ayɛ.”
2Akpɨne abɔɔ si, “Ɛkpɨna kak njɔm, ba rak si,
“ ‘Nsɔjɨrɛ,
nɔŋɔ nɛkɨgha ɛjɔn ɛkɛɛ mbiŋ ɛya,
ɛton ɛba ɛbaa.
3Kɛɛ war ɛjom ji ɛnɛghɛ ka ɛfo biku biku.
4Tam sighi war ka abibia nsɔn ɛyɨrɛ,
ɛsika war ɛrɛ tɨmɛ ɛsik anɛ ba ára né war abibia nsɔn.
Krɛ nɔŋɔ war ɛgbɔ ka nɛgara.’ ”
5Jisɛs afɨna akpɨne abɔɔ si, “Yɛ́nnɛ ka ɛbɨŋɔ ɛja yɔ afɛnɛ ntɛm, yɔ amu ka njo ɛyɛ ka ɛtiŋi ɛnokon si ‘Nno, kpɨnɛm mgba brɛd ɛsaa, 6atubsi ntɛm ɛnwuŋa ami baa, ka nkpem ji nkɛɛ anɛ.’ 7Ka ntɛm ɛwɛ ásaa ka nna ɛkpɔ ára akpiɛ si, ‘Krɛ mɛ feghe ayɔ si mmi sisi mgbaŋa mbu, ka abɔɔ bɨŋa anɔŋ ka niŋa ára nanan. Mmam mkpɛ tam maŋ si mma nkɛa jiku.’ 8Ka Jisɛs átɔ abɔɔ si ɛjɔn ga yi manom nyɔ arɨghɛ tam akɛɛ brɛd nyi ka mbaa ɛtɛm, ɛfegheayɔ ɛjɛ ɛsɛrɛ ntɛm ɛwɛ atam akɛɛ jiku jiku ji yɛ asɛbɛ.
9“Ka nɔŋɔ ntɔ war: ba bɔɔ si ákɛɛ war kɛɛ, ba sɛb si ɛyɛ yɛɛ, ba gbak si mbunjo ɛjibi-jibi ɛkɛɛ war. 10Atubsi nnɛ yɔku yɔ abɔɔ, akɛɛ kɛɛ, ka nnɛ yɔku yɔ asɛbɛ ayɛyɛ, nnɛ ya agbɨgha ka mbu njo, ɛjibi-jibi ɛkiɛ.
11“Nse jiŋ ka ɛbɔŋo ɛjɨrɛ yɔ mmɔ ɛwɛ abɔɛ si akɛɛ nnya anab ka yɛ ára kɛɛ nnyɔɔ? 12Kasɛ yɛnnɛ yɔ mɔɔ abɔɛ si akɛɛ ɛji nkɔk, yɛ akɛɛ nnaŋta? 13Arena war abibi anɛ ɛnyi ka ɛkɛɛ abɔɔ ɛbrɛ atiŋa nsɔn, ɛru naŋ ka Nnsɔja yɔ áre ka bɛsɔ arɨghɛ kɛɛ anɛ ba asɛbɛ Nɛfɛb Ɛsɔwɔ?”
Jisɛs ka ma njɛ
14Jisɛs ára kama njɛ nyi yi ané nnɛ yɔ ágbɔ ɛmum. Ɛsika ɛjɛ bi ɛru, ɛmum ji ɛjam nɛrɨgha ntɔrɔ, ka bɛji ɛkpɔ anɛ. 15Bantɨŋi asasa fa arag si, “Ara kɨghɔ nɛyɔ mmɔa nton ajɛ yɔ abɨŋi si Bɛnsɛbub akama ajɛ.” 16Anɛ bantiŋɨ agárɛ si atɔ́ŋɔ abɔɔ ndéŋe ka ɛjom ji ɛru ka bɛsɔ kasɔŋ abɔɔ agbɛrɛ si yɛ áre nnɛ Ɛsɔwɔ.
17Jisɛs, ágbɛrɛ ji ɛre abɔɔ ka netem ka atɔ abɔɔ: “Ɛjɨbɛ jiku ji ɛbaŋa, ɛrɛsaa ka nɛgaŋa, ɛgbɨghɔgbɔ. Ka nna njo ya asá ka nɛgaŋa asama sama. 18Árena yi Nton-ajɛ ami baŋa ára fɨna anɔk ka bɛji ɛbɛ, ɛné naŋ ka ɛton ɛbɛ ɛyimi? Ji sɛrɛ ka ndɨgha na, ɛru ni war ɛrɨgha si mmɛ ŋkɔ nɛyɔ Bɛnjɛbub yɔ áre nton ajɛ nkama ajɛ. 19Maŋ ána yi mmɛ nda ŋkɨghɔ nɛyɔ Bɛnjɛbub nkama ajɛ, anɛ ba ayɔb ka nɨrɛ ga ba ara tɨmɛ akama ajɛ ákɔ nɛyɔ ka faŋ akama abɔɔ? Nɔŋɔ abɔɔ ákpé bɛnam bi. 20Ka ana mfɨne ɛbɔ Ɛsɔwɔ nkama ajɛ, ɛru si ɛtono Ɛsɔwɔ ɛmi war si.
21“Jisɛs ará agara na si, nkpakoro, akpe na nsɔn ya afɨne anɔk ka nnɛ nnɛ yɔku amama ababa ɛtik ɛjɛ kasɔŋ jiku erɛtan. 22Nnɛ yɔ akoro na agaɛ ábá na ama tabɛ nɛyɔ ka nsɔn abii ɛyɛɛ kprɔb yi ɛkonokpo, nnɛ nyɔ atábɛ nɛbɛnɛ ɛnɛ.
23“Nnɛ yɔku yɔ árɛ jɔn ka nɨŋa áre nnɛ ɛjiŋ ɛwuŋa, ka nnɛ yɔku yɔ árɛ jɔna átɔbɔm atoŋo nsɔn ara sama mfom.
24“Nden yi ɛbibi njɛ amɨna ruu ka bɛji nnɛ, ára bɛmɛ bɛmɛ asɛb mfom bi asiayɔ, ka áyɛɛm. Ka yi árɛ yɛɛ, ara rɨgha si ‘Mfɛnɛ ka njo ɛyɨŋa yi nduu.’ 25Amɨna kruu, ayɛɛ ka ámi fɛŋɛ njo áfɔm. 26Ara mughu amá kɔ ajɛ asimma ya abɨbi agáɛ ama nam ájɔn fa. Ka nekpené nnɛ nyɔ ɛbibi ɛga ka ɛgbɔghambaa.”
27Ɛsika Jisɛs ara rak na, maŋka ɛwi ka ɛbɔŋɔ abeŋe gbogbo si, “Nɛnɔbɔ ɛre ka nnɛ yɔ áwɛna afɨna ákɛa nɛbɛn ni ɔyaaba.” 28Jisɛs ara tóŋɛ ntɔrɔ si, “Nɛnɔbɔ ɛre ɛkɛ anɛ ba áyɔghɔ ntɔro Ɛsɔwɔ afɨna anem ka ntɔrɔ arɨgha.”
Ndeŋe ya Jona
29Ɛsika anɛ ara bɨgha na akpɛnɛkpɛnɛ, Jisɛs ajam nɛtɔ abɔɔ si, “Anɛ ba nɛmaŋ ka ɛyiŋ abibib: asɛbɛ nɛyɛ ndeŋe, ka áyɛ̀m ya aga yi fa ya Jona, Ɛsɔgba Ɛsɔwɔ. 30Ɛsika Jona ajɔnɔ ndeŋe akɛɛ anɛ ba Ninɛbɛ, na yɔ Mɔanɛ yɔ Ɛsɔwɔ ató ajɔnɔ akɛɛ anɛ ba eyiŋ nji. 31Maŋka yɔ ajɔnɔ nton ka Ɛtiopiya amɨna nyimi ka ɛfo bɛnam agɨgha anɛ ba nɛmaŋ ane abɔɔ agbɔ bɛnam, atubsi aru ka ndaba mbaa ama yɔk nɛgbɛrɛ ɛjom Sɔnɔmɔn; ka nɛmaŋ nnɛ ya agaa Sɔnɔmɔn are mfa. 32Anɛ ba Ninɛbɛ agaa anɛ ba ɛyiŋ nji atubsi ayáŋa nɛwɛmɛ nden yi áyɔghɔ ji Jona atɔ abɔɔ; ka nɛmaŋ nnɛ yɔ afaŋa aga Jona áre mfa.
33“Nnɛ arem yɔ amɔnɔ ngon ára kɔ abar, kasɛ akɔ ɛjom abɨno, si ara kɨno ka ɛjom ji ɛyirɛ yɨrɛ kasɔŋ anɛ ayɛɛ mfom. 34Amar ya áre ɛfɔŋɔ akɛɛ bɛji nnɛ: amar anɔbɔ na bɛji ɛtɨmɛ ɛnɔnɔb. 35Ba bába kasɔŋ ɛfɔŋɔ ji ɛre war ka bɛji ɛrɛ yaŋa ɛjiŋi. 36Ɛrena yi beji ɛba kpakpa ɛkpe ɛfɔŋɔ, ɛru si ɛyɨgha ya na ka ngon ɛrɛ yɨgha ɛkɛ ɛfɔŋɔ.”
Ɛbibib ɛkɛɛ ba Farasi ka ba Akpɨne ɛjighi ba Jus
37Ɛsika akɨnɛ ka ntɔrɔ, nnɛa Farasi átebɛ si ama nɛ ɛjom ka njo ɛyɛ. Atɔ́ŋɛ asi ga, ama jɔn nji ka ete, árɛ so abɔɔ ɛsika ba Jus ara né ka anɛ ɛjonɛnɛghɛ. 38Bɛji ɛkpɔ nnɛa Farasi nyɔ ka nɛyɛ ni ayɛɛ na si árɛ so abɔɔ.
39Ka Ntaa Jisɛs, yɔ ágbɛrɛ ji ɛreɛ ka netem, agara ba Farasi ka, “Anɛ ba ára sogho njama mmuk, ka ngbaŋgbaŋ esika nɛwɛmɛ ɛtɔŋɔ, atan ntera nna atubsi abɔɔ ásono ka ɛbara nkɔŋ ka abibia nsɔn. 40Akemɛ kɛmɛ anɛ! Ɛsɔwɔ bi ɛne njam saŋ ɛne nna? 41Jam ka nɛmaŋ so nna ɛya afɔm ka nɛkɛ ni wɔ ɔkɛɛ akpak anɛ kasɔŋ wɔ ɔfɔm kpakpa.
42“Ɛbibib ɛkɛɛ ba Farasi, ɛjɔn ga si ɛrɛ kɛɛ Ɛsɔwɔ mbaŋa ɛyɛ ya áre ɛja ɛji ka ɛbɔŋɔ ɛjom wobo ka abra nsɔn ɛgbɛ ɛtik nna ka arɛnɛ, asisɛ, agbɛngbɛn, aragasi abrakpra; ka ɛrɛ rɔbɔ nnam yi ka ɛkpé ɛkɛɛ nɛná, ɛfɨna ɛtan ntera nɛkɔrɔ Ɛsɔwɔ. Ba kɛɛ Ɛsɔwɔ mbaŋa ɛyɛ ka ba krɛ tan ntera nɛkpɨghe nam ka ɛtiŋi mbaa.
43“Ɛbibib ɛkɛɛ ba Farasi, atubsi ɛrɛ kɔrɔ war nɛjɔnɔ ka ágbɔghamba aji kasɔŋ ɛkɔ nɛkɨgha ka ɛkɔnɔ Jus, ka ka nɛkaa asɛ.
44“Nsi ɛbibib ɛkɛɛ war atubsi ɛre nna ka anam ji arɛ nem ndeŋe, yi anɛ ara akomo asiŋ, arɨma gbɛrɛ abaŋbɨŋa nsɔn yi ɛyɔb ga.”
45Nkpɨne ajighi ɛwi akpɛɛ si, “Nkpikpɨne, ɔmi war nyɛɛ ka ntɔrɔ yi ɔrigha na.” 46Jisɛs atɔɛ si, “Ɛbibi ji war anɛ ba ajighi ɛrɛ ne efaŋa faŋ! Ɛrɛ si anɛ nɛsɔn ni árɨghɛ ma asɔn ka ɛrimɛ kɔrɔ war si ɛtɔb abɔɔ asɔn.
47“Ɛbibib ɛkɛɛ war atubsi ɛrɛ sɨghi anam ɛkɛɛ Asɔgba Ɛsɔwɔ yɔ ba nsɔjɨrɛ áyono ka ɛmɨnɛ. 48Ɛru si ɛmi tama si abɔɔ ane ɛtiŋi ɛjom: ami yon asɔgba Ɛsɔwɔ, war ɛsi anam. 49Ɛruna ka Ɛsɔwɔ, ka nɛgbɛrɛ ɛnɛ arɨgha si, ‘Ntóo Asɔgba Ɛsɔwɔ ka Asɔgba mɔɔ Ɛsɔwɔ, yantiŋi ya war ɛyono ka baga ba war ɛne nɛyiri.’ 50Ɛtɔ́ŋɔ na ka ɛyiŋ nji ɛsɔnɔ anɔŋa Asɔgba Ɛsɔwɔ kprɔb ya ami yon, jam ka nden yi ɛyiŋ ɛjimɛ. 51Jam ka anɔŋ Eben si ka ya Sakariya, yɔ ayono ka nɛkaa ɛkan ka njoa njom.
52“Ɛbibib ɛkɛ ba Akpɨnɛ ɛjighi Mosis atubsi ɛtaba ɛgbɔghɔrɔ nɛgbɛrɛ nsɔn Ɛsɔwɔ. Ɛmi tɛn nɛnimɛ, ɛfɨna ɛgbaŋa anɛ ba anɔghɔ si anam si arɛnam.” 53Nden yi Jisɛs aru ka nina, ba Farasi ka ba Akpɨne ɛjighi afabɛ ka ɛbibi mbaa, abɔmɛ abɔmɔ ya anéɛ, 54abɔɔ akɨno ɛta fa abɔbɛ.
നിലവിൽ തിരഞ്ഞെടുത്തിരിക്കുന്നു:
Nuk 11: NDD-011
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©️2024 Luke Initiative for Scripture Translation