Luk 3
3
Tha Jon 'e fa'arongoa imole ki keka kwaima'akwali ma'asia fulalana Kraest
(Matiu 3:1-12; Mak 1:1-8; Jon 1:19-28)
1'Ana taafulu ma limafa ngali na tha Taebirias 'e Sisa, tha Pontias Paelat ka 'inoto faafia Jiudia, ma tha Herod ka 'inoto#3:1 Na tetrak 'e lio sulia te'e moringa 'ana te'e provins na kera ukalia ana fai fa moringa faafia 'i Galili, ma tha Filip na do'orana ka 'inoto faafia 'i 'Iturea bia 'i Trakonaetis, ma tha Lisanias ka 'inoto faafia 'i Abilin. 2Si manga 'eri la'u bo'o tha 'Anas ma tha Kaeafas keero'a Aofia ni fo'a 'i Jerusalem, ba'elana tha God ka fula mai sana tha Jon kaluwane tha Sakaraea, si manga 'e too 'i laa na fanua kwasi. 3Ma Jon ka lae 'i laa na fanua ki na too kaakalia kafo 'eri 'i Jodan, maka fa'ataloa si fa'arongoa sulia manata akelelaa fasia ta'alaa kera ki, fasi keka babtaesi, fasia tha God ka manatalubea ta'alaa kera ki. 4'E 'uria si ba'ea ki 'i laa buka tha profet 'Aesaea 'e kedaa#'Aesaea 40:3-5 'una 'eri,
“Lingana te'e wane 'e 'ai 'i laa na fanua kwasi ka 'una 'eri,
‘kwaithathai 'ana tala ma'asia tha Lord!
Muka kokotoa tala 'i fana!
5Muka fa'afungua kurua ki, ma muka demasia tolo ki ma fa ua ki.
Muka 'olosia tala keeke'o ki, ma muka dolofia tala ki na 'e kwarula.
6Ma imole ki sui keki rikia na tha God kai fa'amaruki kera.’ ”
7Imole 'oro ki kera lae mai sana tha Jon fasi keka babtaes. Ma tha Jon ka ba'e 'una 'eri fada, “Kamalu'a na ba'ekwa tolo ki ne'e! Tei na fa'arongo kamalu'a na muka thaka fasia na kwaakwa'ea tha God na kai fula?. 8Muka ilia doo ki na 'e faatania mulu manata oli na'a fasia abulata'alaa kamalu'a ki! Ma a'i musi manata 'una 'eri 'i laa na liomulu'a, ‘Kamali'a wane mili futa mai 'ana kwalafaa tha Abraham ki ne'e, 'e 'afeta'i ta kwaakwa'ea fasia tha God kai fulato'omali'a.’ Ku fa'arongo kamalu'a, 'e kwaiakura bana fana tha God kai ngalia fau ne'e ki, maka thaungania bana kwalafana tha Abraham fasida! 9Na kiikila 'e ni na'a 'aena 'ai ki sui, na 'ai ki na a'i si fungu 'ana fo'edoo na 'e le'a ki, keki kasida ma keki 'uu 'anida 'i laa na era.”
10Imole 'eki keka soeto'ona tha Jon keka 'una 'eri, “Sui 'una 'eri, taa 'ana na miki ilia?”
11Ma nia 'e lu'uda ka 'una 'eri, “Tei bana na too 'ana ta roo si maku, 'oki falea ruana fana ta wane na si too 'ana ta si doo. Ma laalae ta wane na 'e too 'ana fanga, 'oki tolingia bia ta wane na a'i si too 'ana ta si fanga.”
12Tei wane ki na raa kera keki koni malefo fana takisi, kera fula la'u bo'o mai ura babataesilaa, ma keka soeto'ona, keka 'una 'eri, “Wane ni kwaifa'amanatai 'ae, taa na miki ilia?”
13Ma tha Jon 'e lu'uda ka 'una 'eri, “Muka konia bamalu'a si malefo na tala'ana si malefo na biibirangaa 'e gani uria, 'e a'i musi gani ka talua la'u si malefo 'eri.”
14Ma tei wane 'ana firua ki, keka soeto'ona la'u bo'o keka 'una 'eri, “Ma kamali'a 'ufita, taa na miki ilia?”
Ma nia ka ba'e 'una 'eri 'i fada, “Musi su'ungania ta wane ura falelana malefo famalu'a. Ma a'i musi lole faafia ta wane. Ma manatamalu'a kai eneno'a bana sana malefo na kera usi kamalu'a 'ania.”
15Na imole ki na kera lio ma'etala ma'asia fulalana mai nga Kraest ba, manatada ka rofe, keka fiia 'ada tha Jon na'a to'o nga Kraest ba neri. 16Sui, tha Jon ka lu'uda ka 'una 'eri, “Nau ku baptaesim kamalu'a 'ana kafo, ma wane na kai fula mai na 'e ba'ita ka talu nau. Ma nau mena kwasi tala'ana lukelana sadolo nia ki. Ma nia kai baptaesim kamalu'a 'ana Ano'edoo Abu ma 'ana era. 17Nia 'e ra'u 'ana si thakwe 'ai na sokara 'e nii gwauna, uria na kai ukalia na mige'e #3:17 Wit 'e 'uria rais sui taa migana 'e ba'ita ma keka manggaa ura fulaoa fana bekalaawit fasia na 'ungana, ma kai ofua mige'e doo 'eki 'i laa na biu ni alu doo nia ki. Sui ka na'area na 'ungana wit 'eki laa na era na 'e tharu, ma tootoo si mae.” 18Ma tha Jon ka ngata sulia si Fa'arongoa le'a 'eri 'i sada 'ana si omale'ewane 'oro ki, ma nia ka ngata fiifii 'i sada fasi keka taalaa birangada. 19Sui tha Jon 'e ngatafia tha Herod na wane'inoto#3:19 Tetrak 'e ura ta premier sui ta kera ukalia provins 'eri 'ana fai moringa, tetrak ka lio sulia ta te'e moringa 'eri, sulia tha Herod 'e folia ni Herodias, kuke'e do'orana tha Filip. Ma nia ka ilia doo ta'a 'oro ki la'u bo'o. 20Ma ka safua la'u si doo 'eki sui, tha Herod ka fono faafia tha Jon 'i laa lo'okafo.
Tha Jisas 'e babtaesi
(Matiu 3:13-17; Mak 1:9-11)
21Si manga na imole 'oro ki kera babtaesi, tha Jisas ka babtaesi la'u bo'o. Ma si manga nia 'e fo'a, na lofothalo ka 'ifi, 22ma Ano'edoo Abu ka sifo mai faafi nia mala ta fa bola. Ma si linge'edoo fasia 'i thalo loo ka 'una 'eri, “'oe na kaluwane liiliothaua nau. Ku se'ethaathala 'asia na'a suli 'oe.”#Jenesis 22:2; Sams 2:7; 'Aesaea 42:1
Na talisibaraa sulia kwalafaa tha Jisas
(Matiu 1:1-17)
23Si manga Jisas 'e fula na'a 'ana ulu taafulu fa ngali, nia ka thafalia na'a raa nia. Ma imole ki sui keka sosa 'ada nia wela tha Josef,
Tha Josef kaluwane tha Hilae,
24Hilae kaluwane tha Matthat,
Matthat kaluwane tha Lifae,
Lifae kaluwane tha Melkae,
Melkae kaluwane tha Janae,
Janae kaluwane tha Josef.
25Josef kaluwane tha Matathaeas,
tha Matathaeas kaluwane tha 'Emos,
tha 'Emos kaluwane tha Neham,
tha Neham Kaluwane tha 'Esla,
tha 'Esla kaluwane tha Nagae.
26Tha Nagae kaluwane tha Maath,
tha Maath kaluwane tha Matathaeas,
tha Matathaeas kaluwane tha Semein,
tha Semein kaluwane tha Josek,
tha Josek kaluwane tha Joda.
27Tha Joda kaluwane tha Joanan,
tha Joanan kaluwane tha Risa,
tha Risa kaluwane tha Serababel,
tha Serababel kaluwane tha Sialtiel,
tha Sialtiel kaluwane tha Nirae.
28Tha Nirae kaluwane tha Melkae,
tha Melkae kaluwane tha 'Adae,
tha 'Adae kaluwane tha Kosam,
tha Kosam kaluwane tha 'Elmadam,
tha 'Elmadam kaluwane tha Era.
29Tha Era kaluwane tha Josua,
tha Josua kaluwane tha 'Eliesa,
tha 'Eliesa kaluwane tha Jorim,
tha Jorim kaluwane tha Mathat,
tha Mathat kaluwane tha Lifae.
30Tha Lifae kaluwane tha Simion,
tha Simion kaluwane tha Jiuda,
tha Jiuda kaluwane tha Josef,
tha Josef kaluwane tha Jonam,
tha Jonam 'e futa 'atha 'Elaeakim.
31Tha 'Elaeakim kaluwane tha Milia,
tha Milia kaluwane tha Mena,
tha Mena kaluwane tha Matatha,
tha Matatha kaluwane tha Nethan,
tha Nethan kaluwane tha Deved na wane 'inoto.
32Tha Deved na kaluwane tha Jesi,
tha Jesi kaluwane tha 'Obed,
tha 'Obed kaluwane tha Boas,
tha Boas kaluwane tha Salmon,
tha Salmon kaluwane tha Nason.
33Tha Nason kaluwane tha 'Aminadab,
tha 'Aminadab kaluwane tha 'Admin,
tha 'Admin kaluwane tha 'Anae,
tha 'Anae kaluwane tha Hesron,
tha Hesron kaluwane tha Peres,
tha Peres kaluwane tha Jiuda.
34Tha Jiuda kaluwane tha Jakob,
tha Jakob kaluwane tha 'Aesak,
tha 'Aesak kaluwane tha 'Abraham,
tha 'Abraham kaluwane tha Tera,
tha Tera kaluwnae tha Neho.
35Tha kaluwane tha Sirag,
tha Sirag kaluwane tha Riu,
tha Riu kaluwane tha Pileg,
tha Pileg kaluwane tha 'Eba,
tha 'Eba kaluwane tha Sela.
36Tha Sela kaluwane tha Keinan,
tha Keinan kaluwane tha 'Afaksad,
tha 'Afaksad kaluwane tha Sem,
tha Sem kaluwane tha Noa,
tha Noa kaluwane tha Lamek.
37Tha Lamek kaluwane tha Methusala,
tha Methusala kaluwane tha 'Inok,
tha 'Inok kaluwane tha Jered,
tha Jered kaluwane tha Mahelalel,
tha Mahelalel kaluwane tha Kenan.
38Tha Kenan kaluwane tha 'Inos,
tha 'Inos kaluwane tha Seth,
tha Seth kaluwane tha Adam, kaluwane tha God.
നിലവിൽ തിരഞ്ഞെടുത്തിരിക്കുന്നു:
Luk 3: MLU
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2024, SITAG