انجیلِ مَتی 14
14
قتلِ یحیی تعمید دهندَه
1دِ او زِمُو آوازَه عیسی وِ گوشِ هیرُودیسِ حاکِم رَسِس، 2وَ او وِ زیردَس‌یا خُوش گُت: «یَه یحیی تعمیددهندَه‌آ کِه دِ مُردَه‌یا زِنَه بی‌یَه، وَ سی یِنَه‌آ کِه ایی قدرت‌یا معجزَه‌آوَر دِ او کار می‌کَه.»
3سی یَکِه هیرُودیس وِ خاطرِ هیرودیا کِه وِرَز یَه زِئنَه بِرارِش فیلیپُس بی، یحیی نِه گِرِتی وَ او نِه وَنی وِ هُلِفدُو. 4سی یَکِه یحیی وِ او می‌گُت: «حِلال نی کِه تو وا ایی زَ بوئی.» 5هیرُودیس می‌حاس یحیی نِه بَكُشَه، اما دِ مردِم زَلَه‌ش مِی‌رَت، سی یَکِه مردِم یحیی نِه یِه پِیغَمَر دُونِسِن.
6اما هِه کِه روزِ تولدِ هیرُودیس رَسِس، دختِرِ هیرُودیا دِ مِمُونی رَقصِص وَ چِنُو دِلِ هیرُودیسِ نِه شاد کِرد 7کِه قِسَم حَرد هَر چی باحا وِ او بِئَه. 8دختِر هَم وِ تحریکِ داآش گُت: «سَرِ یحیی تعمیددهندَه نِه هِه ایچِه دِ طَوَقی بِه وِ مِه.» 9پاتشا ناراحت بی، اما سی قِسَمی کِه حَردی وَ وِ احترامِ ممُونیاش، هُد کِرد كِه سَرِ یحیی نِه بِئَن وِش. 10او کسُونی نِه کِل کِرد، سَرِ یحیی نِه دِ هُلِفدُو دِ تَن جِگا کِردِن، 11وَ وه نِه دِ طَوَقی اُوِردِن وَ دَن وِ دُختِر، وَ او هَم وَه نِه بُرد وِ تِه داآش. 12شاگردیا یحیی اُومان وَ لَشِ یحیی نِه وِرداشتِن وَ وِ خاک سِپُردِن. وَ اوسِه رَتِن وَ وِ عیسی خَوَر دَن.
خوراک دِئِه وِ پنج‌هزار نفر
13هِه کِه عیسی یَه نِه اِشنَفت، سُوارِ قایق بی، دِ اوچِه رَت وِ یِه جا غَلوَتی. اما مردِم واخَوَر بییِن وَ دِ شهریا خُوشُو پا پیادَه دِ دُمِ او رائی بییِن. 14هِه کِه عیسی دِ قایق پیادَه بی، جمعیتِ زیادی نِه دی وَ دِلِش وِ حالِ وِنُو سُوخت، وَ مریض‌یاشُو نِه شفا دَه.
15نِزیکِ اِیوارَه، شاگردیا اُومان وِ تِه‌ش وَ گُتِن: «ایچِه جا پَرتی اَ، وَ دیروقت هَم هی، مردِمِ نِه رائی کُو تا وِ آبادی‌یا ایی هورَه رُوئَن وَ سی خُوشُو خوراک بَخَرَن.» 16اما عیسی وِشُو گُت: «لازم نی مردِم رُوئَن. شِما خُوتُو وِشُو خوراک بِئیت.» 17شاگردیا گُتِن: «ویچِه چیئی جُز پنج نُو وَ دو ماهی ناریم.» 18عیسی گُت: «وِنُو نِه وِ تِه مِه بیاریت.» 19بعد وِ مردِم گُت کِه ری سُوزِلُونی‌یا بَنشینَن. اوسِه پنج نُو وَ دو ماهی نِه گِرِت وَ سِیل کِرد وِ آسمُو، برکت دَه، اوسِه نُونیا نِه کُت كِرد وَ وِ شاگردیا دَه وَ وِنُو هَم وِ مردِم دَن. 20همَه حَردِن وَ سیر بییِن وَ دِ حیردَه‌یا باقی‌مَنَه، دُوازَه سَلَه پُر بی. 21شِمارِ وِنُو کِه حَردِن، بِغیرِ زَنُو وَ بَچُو، پنج هزار پیا بی.
رَه رَتِه‌نِ عیسی وِ ری اُو
22عیسی آزِعی هِه دِ او حال كِه مردِمِ نِه مرخص می‌کِرد، شاگردیا نِه وادار کِرد سُوارِ قایق بوئَن وِرَز عیسی رُوئَن وِ اولانِ دریا . 23عیسی هِه کِه مردِمِ نِه مرخص کِرد، خُوش رَت وِ كُوء تا دِ تَنیائی دعا بَکَه. هِه کِه بی وِ شُو، عیسی دِ کُوء تَنیا بی. 24دِ ایی موقَع، قایق دِ حُشکی خیلی دیر بیئی وَ موج‌یا سخت مِی‌زَن وِ قایق، سی یَکِه بای، خِلافِ جهتِ قایق می‌اُوما. 25نِزیکِ ساعتِ چهارِ صُو، عیسی دِ حالی کِه ری اُو قدم می‌زَه، رَت والا اُونُو. 26هِه کِه شاگردیا او نِه دِ حال رَه رَتِه دِ ری اُو دیئِن، زرتِلاق بییِن، وَ قارَنِن، گُتِن: «یَه یِه روح اَ»، 27اما عیسی آزِعی وِشُو گُت:«دِل داشتوئیت، مِنِم، زَرتِلاق نوئیت!»
28پطرس جُئُو دَه:«آقا، اَر خُوتی، وِ مِه هُد کُو، تا مِه هَم ری اُو بیام وِ تِه‌ت.» 29عیسی گُـت: «بیا!» اوسِه پطرس دِ قایق اُوما وِ هار، وَ ری اُو، والا عیسی اُفتا وِ رَه. 30اما هِه کِه شدتِ بایِ نِه دی، زَرتِلاق بی، دِ حالی کِه داشت مینِ اُو غرق مِوی، قارَن: «آقا، نجاتِم بِه!» 31عیسی آزِعی دَسِ خُوشِه دراز کِرد وَ او نِه گِرِت وَ گُت: «اِ كَم ایمُو، سی چی شِک كِردی؟» 32هِه کِه اُومان وِ مینِ قایق، بای حُفتی. 33وِنُو کِه دِ قایق بییِن، عیسی نِه پِرَسِش کِردِن، گُتِن: «وِ راسی کِه تو کُرِ خدائی.»
شفا مریض‌یا دِ جِنیسارِت
34وَ هِه کِه رَسِسِن وِ ساحلی هَنی، دِ دیارِ جِنیسارِت پیادَه بییِن. 35مردِمُونِ اوچِه عیسی نِه اِشناختِن، کَسُونی نِه کِل کِردِن وِ گِردِ او دیار، وَ مریض‌یا نِه اُوِردِن وِ تِه عیسی. 36وِنُو دِ عیسی خواهِشت می‌کِردن اِجازَه بِئَه تا هِه تَنیا دَس بَنیئَن وِ گوشَه رَداش، هَر کَه دَس می‌نِئا، شفا می‌گِرِت.
നിലവിൽ തിരഞ്ഞെടുത്തിരിക്കുന്നു:
انجیلِ مَتی 14: NLB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
@ 2024 Korpu Company