Kejadian 2
2
1Nan nya kaluk awan ke tana ke sarea isi kasuda yasanadi. 2Muntu Alatala kamo yasasuda boat, barenang mo Diri pang ano kapitu kalis sarea boat ade ka yaboat nan. 3Karing Alatala beang berka lako ano kapitu nan ke yasanadi ano nan dadi ano ade ka yaseka ling Diri ma dadi ano ade kusus, ling pang ano kapitu nan Alatala barenang kalis sarea kaboat nan. 4aDadi nan nya kaluk riwayat Alatala yasanadi awan ke tana.
Adam ke Hawa pang Taman Eden
4bMuntu ALATALA Tuhan yasanadi awan ke tana, 5nopoda tua apa-apa pang dunia, ke nopoda ade tumung pang lenang, ling ALATALA Tuhan nopoka sateri ujan ke nopoda tau boat tana nan. 6Konang ada rebin ade entek kalis bao dunia ke yasabasa sasir tana.
7ALATALA Tuhan yapina tau salaki nan kalis au tana, karing yatiup mo iak ade beang katelas ola idung. Nan nya kaluk tau salaki nan bauʼ telas.
8ALATALA Tuhan yapina taman pang ano siup, yanansi pang Eden. Pang taman nan yaolo tau salaki ade ka yasanadi nan. 9Teris ALATALA satumung mo sarea rupa puin kalis dalam tana, ade balong tugita ke nyaman tukakan bua. Selin ke nan, ALATALA Tuhan yasatumung si ampo pang tenga-tenga taman nan, puin ade beang katelas lamin yakakan bua, ke puin ade beang pangeto luk ade balong ke ade jahat lamin yakakan bua.
10Ada sopo berang ade barereng ola Eden ke yasangai taman Eden nan. Karing berang nan barereng lis kalis Eden ke kabagi dadi empat berang. 11Berang ade mula kalis empat berang nan basingin Pison, yanansi ade barereng maleo sasir tana Hawila, pang ada emas. 12Emas kalis negeri nan murni benar; pang ana ada damar ade mampis, ke batu permata ade basingin krisopras. 13Berang ade kadua kalis empat berang nan basingin Gihon, yanansi berang ade barereng maleo sasir tana Kus. 14Berang ade katelu basingin Tigris barereng pang ola ano siup Asyur, ke berang ade kaempat yanansi Efrat.
15ALATALA Tuhan yaolo mo tau salaki nan pang taman Eden mabau yaboat ke yajampang taman nan. 16Karing ALATALA Tuhan yaparinta tau salaki nan, "Sarea puin ade ada pang dalam taman ta bauʼ mukakan bua, 17konang puin ade beang pangeto ade jahat ke ade balong, naʼ mukakan bua, ling lamin mukakan, ano nan mesti mumate."
18Bafirman ALATALA Tuhan, "Nongka balong lamin manusia nan telas mesa. Ya Kupina dengan ade tulung nya ade kena riri ke nya." 19ALATALA Tuhan yabawa mo sarea binatang ade ka yasanadi lako tau salaki nan mabau yagita ling Alatala me luk tau salaki nan yasasingin sarea binatang nan. Dadi me luk ka yasasingin ling tau salaki nan, nan mo ade dadi singin masing-masing binatang nan. 20Manusia nan yabeang singin lako pio-pio pang bao awan ke sarea binatang ade pang darat, yanansi binatang ade yapatik ke binatang gamang, konang tawa nya diri nonda ade kena riri dadi dengan ade bauʼ tulung nya.
21Teris ALATALA Tuhan sangelap mata tau salaki nan. Muntu tau salaki nan kamo lap mata, yaete mo sala sopo tolang endeng ling Alatala, karing yatampal mo bakat nan ke isi parana nya. 22Ke kalis tolang endeng ade ka yaete ling ALATALA Tuhan kalis tau salaki nan, yapina mo sopo tau sawai, teris yabawa lako tau salaki nan. 23Karing beling mo tau salaki nan,
"Ta nya, tolang kaling tolang kaku, ke isi kalis isi kaku.
Nya ta ya kusasingin sawai ling nya ka yaete kalis tau salaki."
24Nan bua sarea tau salaki ya bilin mo inaʼ bapak lalo basaiʼ ke sawaiʼ, mabau sadua taunan basaiʼ dadi sopo.
25Sadua taunan basangkaro, tau salaki nan ke sawaiʼ, konang nongka kangila.
നിലവിൽ തിരഞ്ഞെടുത്തിരിക്കുന്നു:
Kejadian 2: SMW
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©️2025 The Seed Company