Mothi 1
1
Probhu Jisu Khrisṭoaʹ gusṭi tâlika
(Luk 3:23-38)
1Jisu Khrisṭodo Dâud Gusṭirenkane ar Dâuddo Abraham Gusṭiren âdmikane. Jisu Khrisṭoaʹ bongsonaʹ tâlikanaʹ boi.
2Abrahamren hopontetʹdo Isahakkane,
Isahakren hopontetʹdo Jakobkane,
Jihuda ar âniren boihakodo Jakobren hopontetʹkanako,
3Jihudaren hopontetʹdo Peroskane ar Serehoren engat tahekane Tamor,
Perosren hopontetʹdo Hisron,
Hisronren hopontetʹdo Ram,
4Ramren hopontetʹdo Omminadob,
Omminadobren hopontetʹdo Nohoson,
Nohosonren hopontetʹdo Salmon,
5Salmonren hopontetʹdo Boyos, âniren engat tahekane Rahob,
Boyosren hopontetʹdo Obed, âniren engat tahekane Ruth,
Obethren hopontetʹdo Jisoy,
6Jisoyren hopontetʹdo raja Dâud.
Dâudren hopontetʹdo Solomon âniren engatdo tahekane Uriren râṛi girthân,
7Solomonren hopontetʹdo Rohobiam,
Rohobiamren hopontetʹdo Obio,
Obioren hopontetʹdo Asa,
8Asaren hopontetʹdo Jihosafoṭ,
Jihosafoṭren hopontetʹdo Joram,
Joramren hopontetʹdo Usio,
9Usioren hopontetʹdo Jothom,
Jothomren hopontetʹdo Ahos, Ahosren hopontetʹdo Hiskio,
10Hiskioren hopontetʹdo Monosi,
Monosiren hopontetʹdo Amon,
Amonren hopontetʹdo Josio,
11Josioren hopontetʹdo Jiknio ar âniren boihako Israyel jât Bâbil disâmre bundi hisâbte idiko somaire nakodo janamlenako.
12Jiknioren hopontetʹ Solṭieldo Israyel jât Bâbilre bundiketeʹ idi tayom niaʹ janam holentaya,
Solṭielren hopon Surubbâbil,
13Surubbâbilren hopontetʹdo Âbihudkane,
Âbihudren hopontetʹdo Iliakimkane,
Iliakimren hopontetʹdo Asorkane,
14Asorren hopontetʹdo Sadokkane,
Sadokren hopontetʹdo Âkhimkane, Âkhimren hopontetʹdo Ilihudkane,
15Ilihudren hopontetʹdo Iliasorkane,
Iliasorren hopontetʹdo Mottonkane, Mottonren hopontetʹdo Jakobkane,
16Jakobren hopontetʹdo Josefkane
nâi Josefgi Moriomren jaoekane.
Nâi Moriomaʹ laiʹre Jisuoaʹ janam holentaya, ekedo Khrisṭo men hoʹa.
17Nengkaketeʹ Abraham khoiʹ Dâud dhâbiʹ coddo piṛhi, Dâudaʹ tayomte Bâbilre bundiketeʹ idiko somai dhâbiʹ coddo piṛhi, Ar Bâbilre bundi tayom khoiʹ Khrisṭo dhâbiʹ coddo piṛhi.
Probhu Jisu Khrisṭoaʹ janam
(Luk 2:1-17)
18Jisu Khrisṭoaʹ janam nengkaketeʹ holentaya. Josef salaʹ Jisuren engat Moriomaʹ tilâk holentaya, kheʹ ângkinaʹ baplanaʹ ṭhik lahare pobitro attaoaʹ suktite Moriomdo hamallene. 19Josefdo dhârmik âdmi tahekane, kheʹ ânitedo âdmiko samnere Moriom bang giuʹsoilaʹ namlede, anate ânitedo baibaite âni bâgiketeʹ cagenheʹ mente ṭhikkede.
20Josef jâkhni nako cintuʹsane tâkhni probhuren miṭiʹ sorgodute sapnare sodorketeʹ metakidie, "Josef, Dâudren hopontetʹ, Moriom baplaite alo botoroʹam, karon âniaʹ laiʹre Eke sirjukane Ânido pobitro attaoaʹ suktite sirjukane. 21Âniren miṭiʹ kora gidrâ hoʹtaiheʹ. Amte Âniaʹ nutumdo Jisu#1:21 Girik bhasate Jisudo Jihosoi metayako, akaṭaʹnaʹ orthodo hoʹkana Issorte bacokoe. dohetaimahaʹ, karon Ânite aiʹren âdmiko akoaʹ pap khoiʹ bacokoheʹ."
22Nako sanam holena jate nâbi talate Probhu niâ katha menlede ana puronoʹa. 23"Miṭiʹ kuâri kurigidrâ hamaloʹheʹ, ar âniren miṭiʹ kora gidrâ hoʹtaiheʹ, Âniaʹ nutum doho hoʹhaʹ Immanuel. Niâ nutumnaʹ manedo hoʹkana, "Abo saote Issor."
24Probhuren sorgodutte jemon hukum malidie, Josefdo jâpitʹ khoiʹ beretʹketeʹ engkagi rikâkede. Ânite Moriom baplakidie. 25Kheʹ gidrâoaʹ janam bang hoʹ dhâbiʹ âni suliʹ bang milulene. Tayomte Josefte gidrâoaʹ nutumdo dohokeʹtaye Jisu.
നിലവിൽ തിരഞ്ഞെടുത്തിരിക്കുന്നു:
Mothi 1: EKL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©️2025 Bible Students Fellowship of Bangladesh