LWIKÖÖ 'BƆGƲ 20
20
'Zwiföaa 'kadɩ nɛ: -Mɔ 'nyɛ-a Zezwi 'gba 'nɩ?
1'Ylɩ -bhlʋ, Zezwi-e -ma -Lagɔbudu 'kadʋ 'mö nɩkpa -Lagɔwɛlɩ ngli 'pa 'le, ɔ-ɔ 'yɛ 'tɩtɩɛ -tɩtɩ -sa 'le, 'n -Lagɔbʋbɔngwaa 'bhitɩbhangwa-a, -Lagɔɔ gböö nglipangwa -yɛ 'zwiföaa nɩkpazɔgblʋɩ 'sɔ jio-o -bha ghlɩ. 2'N wa jio-a ngli 'jɩbha, wa nɛ naa: “-Ɩ la'a 'bhuo -n -wʋ-ɔ -la nʋ 'le, -mɔɔ nglɩ mö -n -wʋɩ bhe nʋnʋ 'le 'nɩ? Gba -a -n ka-a -la -mɔ -nyɛmöa-a 'nɩ?” 3Wa gba-a sa'a, Zezwi nɛ -bha wa de naa: “A nglu n 'kaya 'yɛ na-a ngli 'jɩbha.” 4Ɔ nɛ naa: “-Mɔ tia la-a Za naa, ɔ mö ɔ 'yɛ nɩkpa badize 'nɩ? -Lagɔ la-a 'nɩɩ bhlɩ'ɩ nɩkpa-a? A -sanɩ'ɩ 'dɩ.” 5Ɔ 'jɩbhʋa-a -sɩbha ngli, 'n wa ji-a yɩlɩ 'mö mö, wa nɛ: “-A -yɛ -sɩka'a gba naa -Lagɔ tio -bha nʋ-ɔ, sa'a ɔ ji-a gba naa: Ɛ -yɛ -sɩbha glɩnɩ-ɛ, 'manɩɛ yɛ a 'nɩɔ la 'mö-a dlɩ 'wʋ -ka 'nɩ? 6-A -yɛ 'yɛ nʋ naa nɩkpa tio la-a nʋ-ɔ, nɩkpa 'bhuo -ji sɛ naa, Za -Lagɔɔ 'mögbanɩnyɔ la -bhaa yɛ, tɩkpaku wa -jiya-a 'mö 'lɩbhaa.” 7Wa 'bhö-a yɩlɩ 'mö, wa nɛ -bha Zezwie de naa: “-Ɔ tia Za -a 'nɩɔ -nɩ -ji.” 8Wa gba-a sa'a, Zezwi nɛ naa: “Ɛ -yɛ -sɩbha glɩnɩ-ɛ, -ɔɔ 'nglɩ 'mö n -wʋ-ɔ na-a -ɩ la'a nʋnʋ 'le, n 'na 'kɔ 'yɛ na-a 'nglɩ -dɩ.”
Libhonʋngwa -wa kla-a wa 'bhitɩbha nyanɩ 'möö 'nine
9Zezwi gba-a sa'a wa de 'bhë-ë, nɩkpa bhuo -wa su la-a -bha, 'n ɔ jua-a nine la'a 'panɩ, ɔ nɛ: “'Likpï -ɩɩ 'jʋ wa nʋ-a dwivɛ 'wʋ nɛ, ɩ 'lagblɛ nɩkpɛ -bhlʋ zʋ -bha. 'N ɔ ji-a 'lagblɛ la'a libhonʋngwa 'mö palɩ, wa -kɛɛ -sa ɔ -nyʋa 'sɔ 'yɛ dlinɩɛ yɛ. Ɔ palʋa-a -sɩbha 'mö 'bhë, 'n ɔ ji-a lowlu 'kadʋ 'wʋ mö. 10-Sasade nyini-a, 'n nɩkpɛ la'a ji-e -ma libhonʋngwaa 'bhɛyɩ ɔ nyɩgbajʋlʋ -bhlʋ tia, wa 'yɛ dlinɩ, wa 'kɔ -nɩ ɔ -li 'ye 'nyɛɛ yɛ. Nyɩgbajʋlʋ la'a nyini-e -ma, libhonʋngwa gbloo-a 'wʋ, bhɔtɔ wa bhɔtɔɔ -bha 'bhë, 'n wa jio-a kpëti, wa 'nɩɔ-ɔ -lu 'ye 'nyɛ. 11'N 'lagblɛlowli ji-a ɔ nyɩgbajʋlʋ -mʋmɔ tia. Ɔ nyini 'yɛ-a -nɩ -ma, 'n wa jio-a 'wʋ gblo, 'n wa jio-a bhɔtɔ, 'n wa jio-a -di zia, 'bhë 'n wa jio-a kpëti, wa 'nɩɔ-ɔ 'yɛ -nɩ -lu 'ye 'nyɛ. 12'N ɔ ji-a ta -lɔ tia. Ɔ nyini-e -ma, wa gbloo-a 'wʋ, wa bhɔtɔ-a, yawʋ wa 'katɔ-a 'bhë 'n wa jio-a kpëti. 13'Lagblɛlowli yɩlɩɩ-a 'wʋ ɔ nɛ naa: Sa n ji-e la'a 'mö zʋzʋnʋɔ 'nɩ? Ɩ -yɛ sa'a 'mö -wʋ-ɔ, na dlɩɛ sɛkagu n ji-e -ma tia, ɔ -yɛ -ma nyini, na dlɩ naa, wa ji ɔ nganɔ -gömö -ka. 14'N ɔ ji-a ɔ 'gu tia. Ɔ nyini-e -ma, wa yɩlɩɔ-a, 'n wa ji-a 'dɩ 'nyɛnyɛnɩ, wa nɛ naa: -Ɔ ji-a zʋma ɔ -tɩbhaa gugbë 'wʋ 'libhïë mɔ-ɔ -la, a-a 'lɩbhɔ ɔ 'yɛ tlɩ -a 'yɛ 'lagblɛ 'wʋ 'libhï. 15Wa 'libhïɔ-a 'wʋ, wa -nyɔɔ 'wlʋ-ɔ -ma 'lagblɛ'ɛ, 'n wa jio-a 'lɩbha, 'n ɔ ji-a tlɩ. Abha n 'jɩbha 'mö-ö sa'a ngli naa: Libhonʋngwa la'a -wa nʋ-ɔ -sa, sa 'lagblɛlowli jua-a 'mö köbhaköbhanɩɛ 'nɩ? 16Ɔ -yɛ ji-e, 'mʋa libhonʋngwa 'bhuo, 'lɩbha ɔ jua -bha wa 'yɛ tlɩ, 'bhë ɔ 'yɛ 'mɛ 'lagblɛ libhonʋngwa -mʋmʋa 'ye 'nyɛ.” Zezwi gba-a sa'a, wa 'bhuo nɛ naa: “Ɩ 'na-a 'plɩ -sɩbha -nɩ.”
17Zezwi yɩlʋa-a 'wʋ, ɔ nɛ -bha wa de naa: “-Ma -Lagɔwɛlɩɛ 'bɔgʋ 'möö wɛlɩköbhë la'a -a 'cɛlɩɔ-ɔ -ma, -a nʋ-a:
Tikpë -a 'sɩbhasɩbhangwa nʋ la-a a'a -laa -la glɩnɩ-ɛ,
ma-a zʋ-a -buduo jijekwa.
18'Ma tikpë -mɔ -kaa 'wlu gla,
bhli ɔ ji -bha ɔ 'yɛ tlɩ.
-Mɔ a -yɛ 'yɛ -gömö bhlinɩ-ɛ,
'lɩbha a jio -bha-a,
slɛ 'ma 'ninee zɔmö 'nɩ?”
19-Lagɔbʋbɔngwaa 'bhitɩbhangwa -yɛ -Lagɔɔ gböö nglipangwa 'sɔ -ji sɛ naa, wa yɛ Zezwi 'pa-a nine la'aa yɛ, wa 'jɩbha la wa 'kɔ -bha -gaganɩlɩ'ɩ köbha 'bhë-ë, nɩkpa wa -wʋ-a -gu 'lee yɛ, wa 'nɩɔ-ɔ köbha.
Zezwi nɛ naa: Wa 'pɛnɩ lepoo mëni
20Ɩ yɛ 'n wa -wʋ-a Zezwi 'ji yawʋ 'namanɩ 'le. 'N wa ji-a nɩkpa tia wa 'yɛ -bha ɔ 'ji 'klʋ 'möslɛnɩngwaa -li nʋ, wa 'kɔ -vuu nimï 'pa, ɔ -yɛ ɔ nglie wɛlɩ 'mö dlʋnʋ wa 'kɔ -ma -gwlɩnyininyɔ 'kadɔ dlɩ'ɩ kwa. 21'N nɩkpa la'a ji-a mö. Wa nyini-e -ma, wa nɛ -bha Zezwie de naa: “-Abhitɩbha, -a -ji sɛ naa, vaa -n gba-a nɩkpaa de, sa nɩkpɛ ji -wʋ -nn -gu ɔ 'ji, -na nglipalɩ nɩkpa 'bhuo ɩ slɛmanɩ-a dlɩ 'mö, sa -Lagɔ 'jɩbha-a nɩkpa 'yɛ namö, sa ɩ -wʋ-a 'dɛdɛ'ɛ -sɩbha -n pʋa-a ngli. 22-N -kaya köbhë la'a -gömö dlɩ 'mö slɛmanɩɛ yɛ -a ji -bha. Dʋdʋnyininyɔ 'kadɔ Sezalɩ nɛ -a 'pɛnɩ lepoo mëni. 23'Mɛ lepoo mëni la'a, -a 'pɛnɩɛ 'nɩɩ, bhlɩ'ɩ -aa 'pɛnɩɛ -nɩ? Sa -Lagɔwɛlɩ gba-a köbhë la'aa de 'nɩ?” Zezwi jɩblɩnɩ-a wa -dabhlie zɔmö, ɔ nɛ naa: 24“A la'a gbɔkwa.” Wa -lɔ-a, 'n ɔ jua-a ngli 'jɩbha, ɔ nɛ naa: “La'a gbɔkwa la'a -gömö, -mɔɔ 'wlukple -yɛ -mɔɔ nglɩ sɔ-ɔ glɩ-ɛ la'a 'nɩ?” Wa nɛ: “Dʋdʋnyininyɔ 'kadɔ Sezalɩɛ -li -bha.” 25Wa gba-a sa'a Zezwi nɛ -bha wa de naa: “-Ɩ yɛ-a dʋdʋnyininyɔ 'kadɔ Sezalɩɛ -li-e, a 'nyɔ 'ye, -ɩ -yɛ-a -Lagɔɔ -li-e, a 'nyɩ 'yɛ -Lagɔ 'ye.” 26-Bha nɩkpa 'bhuoo 'ji 'klʋ Zezwi gba-a sa'a wa de, wɛlɩ -mɩɛ 'bhë 'mö wa 'kɔ gbʋ köbhanɩ, wa 'nɩɩ-ɩ yɩlɩ. Ɔ nglie wɛlɩ ngli ɩ mönʋa-aa yɛ, ngu wa zʋ-a yɛ, wa'a -lɛ-a 'mö gbʋ -dɩ.
'Kudungwaa gluwlʋgbʋ
27Ma Zelwizalɛmö, nɩkpaa -zakpa -möma -wʋ-ɔ -ma, 'ma wa la-a sadwisɩɛ. Sa'a wa pa-a nɩkpa ngli naa, nɩkpɛ -yɛ tlɩ ɔ 'na 'ylɩ -bhlʋ glu 'wlʋ. Wa gla'aa nɩkpa ja ghlɩ-ɛ -bha Zezwi, 'n wa jio-a ngli 'jɩbha. 28Wa nɛ naa: “-Abhitɩbha, -ɩ Moyizɩ 'cɛlɩ-a -aa yɛ mɩ-ɛ la'a naa:
Nɩkpɛ -yɛ -dagu -ka,
'mɔ -dagu la'a -yɛ 'nglɔ kwa,
ɔ -nyɔɔ 'sɔ nɩ 'gu ghlɩ ɔ -yɛ tlɩ-ɛ,
nɩkpɛ la'a 'libhï ɔ -daguo 'kuzlenglɔ 'wʋ,
ɔ -nyɔɔ 'sɔ 'yɛ ɔ 'nglɩ 'mö 'gu gwalɩ,
ɔ -dagu -ɔ tlɩ-a 'yɛ ngëyi -ka.
29-Dagwienyɩbhɛlɩgwie -ngbisɔ, 'n wa glɩ-ɛ -bha. 'Yizi kwa-a 'nglɔ, ɔ -nyɔɔ 'sɔ 'nɩ-ɛ 'gu ghlɩ, 'n ɔ ji-a tlɩ. 30-31'N 'sɔ -lɔ ji-a 'kuzlenglɔ 'wʋ 'libhï, ɔ -nyɔɔ 'sɔ 'nɩ-ɛ 'gu ghlɩ, 'n ɔ ji-a tlɩ. 'N ta -lɔ ji-a 'mɔ nglɔ kwa. -Sɩbha -mʋabha 'bhuo 'libhï-a 'kuzlenglɔ la'a 'wʋ -bhlʋ -bhlʋ, wa -nyɔɔ 'sɔ 'nɩ-ɛ 'gu ghlɩ, 'n wa 'bhuo ji-a tlɩ. 32Wa tlɩ-a 'bhë, 'n nglɔɔ 'bhë ji 'yɛ-a -nɩ tlɩ. 33Wa -ngbisɔ -kpɔ kɔ la'a 'nglɔ 'mö nyini 'bhë-ë, 'kudungwa -yɛ-a 'mö glu 'wlʋ-ɔ, -mɔɔ 'nglɔ ɔ ji-a 'mö-ö -bha wa 'bhuo gla'a glɩnɩɛ 'nɩ?”
34Zezwi nɛ naa: “-Sɩka'aa pɩ la'a möö nyɩbhɛlɩ -yɛ 'ngwlɩ 'sɔ, kwakwanɩ wa kwakwanɩ -bha. 35-Lagɔ -yɛ nɩkpa 'bhuo glu -sa-a, -wa ʋ ji-a -ma ʋ nyininyinipɩ 'wʋ sɛ zʋɔ, wa 'na-a 'mö kwakwanɩ. 36-Wʋʋ yɛ-a, wa 'na-a 'mö tlɩ 'sɔ, -Lagɔzuzukuo swɩ wa ji-a -wʋɔ. -Lagɔ -sʋa-a gluo yɛ, ʋ 'bhëë 'gwie wa glɩnɩ-a 'mö -bha. 37-Ʋ -yɛ-a 'kudungwaa gluwlʋgbʋ-ɔ, Moyizɩɛ 'bhë mɔ-ɔ -sa-a ʋ 'dɩ naa, 'dɛdɛɛ -bha. -Ma -Lagɔwɛlɩɛ 'bɔgʋ 'mö la -Lagɔ ghlanɩ-ɛ -ma 'gbagbako 'mö Moyizɩ 'wʋ, 'n ʋ ji-a ɔ de gba-a, Moyizɩ nɛ -bha -Lagɔɔ de naa:
Ablaamöö -Lagɔ, Izaköö -Lagɔ, Zakɔpöö -Lagɔ.
Moyizɩ la-a -sɩbha -Lagɔ, zɔmö ɩ ka -bha. 38-Wʋʋ yɛ-a, -Lagɔ 'nɩ-ɛ 'kudungwaa -Lagɔ, -bhlɩbhlɩngwaa -Lagɔɔ -bha. 'Mʋa nɩkpa la'a, 'dɛdɛ'ɛ wa yɛ tlɩ 'bhë, -bha -Lagɔ -nɩ de -bhlɩ wa -bhlɩ-ɛ -bhla 'kɔmʋʋ.” 39Zezwi gba-a sa'a, -Lagɔɔ gböö nglipangwa gla'aa nɩkpa -mʋmʋa -wa -wʋ la-a -bha, wa nɛ -bha ɔ de naa: “-Abhitɩbha, -ɩ -n gba-a -la mɩ -bha.” 40Wa 'bhö-ö -bha, wa'a -la-a 'mö 'jɩbha wa 'kɔ wɛlɩköbhë -mömaa yɛ ngli 'jɩbha.
Puanyɔ -ɔ -Lagɔ -sa-a -bha -mɔɔ gu-a 'nɩ?
41'N Zezwi jua 'yɛ-a -nɩ ngli 'jɩbha naa: “Puanyɔ -ɔ -Lagɔ -sa-a -bha, 'manɩɛ yɛ wa 'yɛ bhe nʋ naa Davidɩɛ gu -bha 'nɩ? 42N -tɔnʋ Davidɩɛ 'bhë mɔ-ɔ gba sa'a -ma -Lagɔɔ bhlɩnɩlʋɩɛ 'bɔgʋ 'mö naa:
-Aa -Tɩbha -Lagɔ nɛ -bha na Nyininyɔɔ de naa:
Glɩ la'a na linɩkpɛsɔ pɩa 'bɩ yɛ,
43n -kamö -na tʋngwa 'bhuo 'ye 'nyɛ
-n 'kʋa kpli -gömö zʋ.
44Puanyɔ -ɔ -Lagɔ -sa-a -bha 'mɔ Davidɩ la-a ɔ Nyininyɔ. Ɔ 'bhë -wʋɔ la'a -bhla -nɩ ɔ Nyininyɔ la 'le 'bhë-ë, samɩ ɔ ji-e 'mö-a ɔ 'gu 'mö glɩglɩnɩɛ 'nɩ?”
Zezwi nɛ naa: A 'na-a zʋ 'kwlɩsɔkangwa -nɩ
45Nɩkpa bhuo-o su la-a -bha -wʋ-a 'yukwli pönɩ 'le, Zezwi nɛ -bha ɔ 'wʋbhlinɩngwaa de naa: 46“A möna -bha -Lagɔɔ gböö nglipangwaa de 'mö, -wa 'jɩbha-a wa 'yɛ -ziabanɩ 'mö -ka, wa -nyɩɩ 'yɛ 'wʋ binɩ, -wa 'jɩbha-a wa 'kʋa -glodu'u bhalɩnɩ, -wa -yɛ -ma -Lagɔbudi'i pla, -wa 'jɩbha-a wa 'yɛ 'yugakpï -gömö sɛ glɩ-ɩ, wa -kʋa 'pɩpɩ 'wʋ lili yɛ wɔzɩ-ɛ, -wa sa-a -bha 'yugabhli. 47Wa -yɛ -Lagɔ -bɛlɩ 'pa 'le -wʋ, nɩkpa 'yɛ wa 'dɩɛ dɩ -saa yɛ, -bɛlɩvʋkɔ wa pa -bha. -Sɩbha wa nʋ-a 'bhë, nɩkpaa yʋlʋnʋngwa -bha. 'N wa li-a 'kuzlengwlɩ 'mö. 'Dɩɛ -dɩ n nyɛya -bha naa: 'Mʋa nɩkpa la'a, -zijle -Lagɔ jua-a tunʋɔ, 'mö a ji-a 'tɛ-ɛ.”
നിലവിൽ തിരഞ്ഞെടുത്തിരിക്കുന്നു:
LWIKÖÖ 'BƆGƲ 20: BNT96
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Bete New Testament © Bible Society of Côte d'Ivoire 1996
