LWIKÖÖ 'BƆGƲ 21
21
'Pʋalɩbhakuzlenglɔ -bhlʋ yɛ ɔ dlɩɛ sɛkalu -Lagɔ 'nyɛ
1-Ma -Lagɔbudu 'kadʋ 'mö, -dakɔ -wʋ-ɔ -ma, wa -yɛ -Lagɔ mëni 'nyɛɛ ji, -ma ʋ 'mö wa palɩɛ-a yɛ. 'Ylɩ -bhlʋ Zezwi-e -ma -Lagɔbudu 'kadʋ 'mö, ɔ 'libhï-a 'wlu, lɩkangwaa -bɛ-ɛ -ma -dakɔ la'aa 'mö mëni sɛ palɩ 'le 'n ɔ jua-a yɩlɩ. 2'N ɔ ji 'yɛ-a 'pʋalɩbhakuzlenglɔ -bhlʋ yɩlɩ. 'Mɔ nglɔ la'a palɩ -ma -dakɔ 'mö gbɔkwie gbɔkwie 'sɔ yɛ. 3Zezwi nɛ: “'Dɩɛ -dɩ n nyɛya-a naa, 'pʋalɩbhakuzlenglɔ -la mëni ɔ palɩ-ɛ -ma -dakɔ 'mö yɛ, mɛ-ɛ -zu-a mɛ-ɛ zi-a lɩkangwa -la 'bhuoo -leyi 'wʋ. 4-Wʋʋ yɛ-a, lɩkangwa -mʋa -laa -nɩ-ɛ, mëni -ɛ 'kplanʋa la-a cɛ 'mɛ wa palɩ-ɛ -ma -dakɔ 'mö yɛ, 'kuzlenglɔɔ -nɩ-ɛ, -ɛ la'a 'bhuo ɔ ka la-a ɔ 'yɛ lie yɛ, 'mɛ ɔ 'nyɛ-a -Lagɔ.”
Zezwi yɛ -Lagɔbudu 'kadʋɔ sɛyɩlagbʋ gba
5Nɩkpaa 'jaja-a -wʋ la-a -Lagɔbudu 'kadʋɔ 'sɩbhanɩtɩkpa -yɛ ʋ 'möö -li wa bʋbɔnʋ-a -Lagɔ 'sɔɔ 'jinanɩdɩ -sa 'lee yɛ, Zezwi nɛ naa: 6“-Budu -ʋ a jɩnɩ-ɛ -la 'wʋ, -ʋʋ 'jinanɩdɩ a -wʋ-ɔ -la -sa 'le, 'ylɩ -bhlʋ ji-a jie, sɛ ʋ ji-a yɩla, ʋ tɩkpeyi -bhlʋɔ 'bhë 'na glu tʋ-ʋ.”
Zezwi yɛ 'pɩɛ sɛyɩlagbʋ gba
7Zezwi gba-a sa'a wa de-e, 'n wa jio-a ngli 'jɩbha, wa nɛ naa: “-Abhitɩbha, -ɩɩ gbʋ -n gba-a -la, -zlɩmɩ ɩ ji-a 'wʋ 'wlenɩɛ 'nɩ? Ɩ -yɛ 'wʋ 'wlenɩɛ ji sa -a jiɩ-a 'mö jɩblɩjɩblɩnɩɛ 'nɩ?”
8Zezwi nɛ naa: “A möna 'mö nɩkpa jiya-a yʋlʋ nʋ, -wʋʋ yɛ-a, nɩkpaa -bɛ ji-a na 'nglɩ -suo, wa 'yɛ-a ji wa 'yɛ-a nʋ naa, Puanyɔ -ɔ -Lagɔ -sa-a -bha 'mɔ wa glɩnɩ -bha nʋ, wa 'yɛ-a nʋ naa: 'Pɩɛ sɛyɩlade yɛ nyini 'bhë. Wa -yɛ -sɩbha gba-a, a 'na-a mʋa 'bɩ -nɩ. 9-Bhaa do'o, a -yɛ tʋɩ -ɩ wa -wʋ-a gwɩ 'le -yɛ 'jlagbö 'sɔɔ 'dɩ 'nʋ-ɔ, dlɩ 'na-a wʋlɔnʋya 'mö -nɩ, -wʋʋ yɛ-a, 'mɩ -ɩ la'a mɩ-ɩ ji-a tɛnyɩ 'yu -gaa 'bhë-ë, ɛ 'na -bha -gaganɩlɩ'ɩ 'pɩɛ sɛyɩlade glɩnɩ.”
10Ɔ nɛ -bha -gömö naa: “Nɩkpa, tʋ wa ji-a gwɩɛ, dʋdʋ -mʋmʋɔ -gömöö nɩkpa -yɛ -mʋmʋɔ -gömöö nɩkpa 'sɔ 'yɛ-a 'ji gëgënɩ wa 'yɛ-a tʋ gwɩ. 'N -glɔ -mʋmʋ -yɛ -glɔ -mʋmʋ 'sɔ 'yɛ 'yɛ-a gwɩ. 11Dʋdʋkpata ji-a tɛlɩɛ tenyi, dʋdʋɩ -mɩmɩɛ -gömö, ngɔmʋ 'yɛ-ɛ -ma ji, 'n gwi 'kadɩ 'yɛ-a nɩkpa 'lɩbha, nganɔɔ 'wʋbhïli ji-a nɩkpa 'wʋ ghlanɩɛ, 'n -li -mɩmɩ 'yɛ-a -ma nglagatapɛ'ɛ 'wʋ 'wlʋ.
Zezwi yɛ -Lagɔgwiee 'zwɩziagbʋ gba
12'Mɩ -ɩ la'a 'bhuo 'yɛ jie ji-e, köbha wa jiya -bha, wa 'kaya-a 'zwɩ zia. -Lagɔbudi'i wa jiya-a kwa, wa 'kaya -zijli tunʋ, wa 'kaya -die 'mö 'pa. Sa a glɩnɩ-a na -lʋaa 'wlumöö yɛ, -ma dʋdʋnyiningwa -yɛ -gwlɩnyiningwa 'kadɩ 'sɔɔ dlɩ'ɩ wa jiya-a kwa, wa 'kaya -zijli tunʋ. 13-Ɩ la'a 'bhuo kaya -sɩbha ghlɩ 'le -wʋ-ɔ, -bha a ji-a na 'dɩ -sanɩɛ. 14Wɛlɩ -ɩ a 'yɛ-a gba a 'yɛ ajɩ gbʋ -gömö -sa, a 'na-a nimïnɩɩ dlɩ cɛ -nɩ. 15-Bhaa do'o gbʋjinɩwɛlɩ na 'bhë jiya-a ngli 'paa, a -kɩɩ ngli -sa, a tʋngwa 'na 'kɩ -gömö -sa, wa 'na 'kɩ 'yɛ 'mö kpɛnɩ. 16A 'bhïë jɩɛ -tɩbhangwa, a -dangwa, a -dagwie, a -kosu 'jie nɩkpa -yɛ a 'tʋalɩbhangwa 'sɔ, mʋa-a jiya-a 'pɛlʋ 'paa 'n wa 'yɛ-a -ma a gla'aa nɩkpaa -bɛ 'lɩbha wa 'yɛ tlɩ. 17Sa a glɩnɩ-ɛ na -lʋaa yɛ, nɩkpa 'bhuo 'jɛbhɛlɩɛ wa jiya -bha. 18-Ma ɩ 'mö, a gla'aa -kakanɩkpɛ -bhlʋɔ 'bhëë nyukojeyi 'na dʋdʋ'ʋ bhli. 19Ɩ yɛ, la a ka-a yɛ a nyɔnʋ -bha cɛ, a -yɛ -ma dlɩ zʋ, 'mɩ a ji-a 'pʋpʋɛ ghlɩɛ.
Zezwi yɛ Zelwizalɛmöö sɛyɩlagbʋ gba
20Zlɩ -ɛɛ 'mö a ji-a tʋgwɩngwa Zelwizalɛmöö -die 'möpalɩlɩ yɩlɩ-ɛ, a jɩblɩnɩ sɛ naa, a sɛsade yɛ nyini 'bhë. 21-Bhaa do'o, -wa -yɛ -ma Zwidee dʋdʋ -gömö -wʋ, wa -gunʋ -ma -gɔgɔgbɩ nyɩdɩ, -mʋa -yɛ -ma Zelwizalɛmöö 'gbë 'mö -wʋ, wa 'wlʋ -ma wa 'yɛ fito, -wa -yɛ -ma -gligbï'ï -wʋ, wa tʋ-ʋ -ma wa 'na-a ji glɔ'ɔ -nɩ. 22-Wʋʋ yɛ-a, 'mɩ zlɩa la'a -Lagɔɔ kpasazlɩa -bha -bha nɩkpa -gömö. 'Mʋ yʋlɔyʋlʋ la'a -gömöö wɛlɩ bhuo -ɩ 'cɛlɩɔ-ɔ -ma -Lagɔwɛlɩɛ 'bɔgʋ 'mö, -bha ɩ ji-a 'wʋ 'wlenɩɛ. 23-Bhaa zlɩa la'a 'mö, nɩkplagangwlɩ -yɛ 'gwiee cɛɛkangwlɩ 'sɔɔ gbʋ ngazɩ'ɩ ʋ ji-a -bhïë tenyi. -Wʋʋ yɛ-a, zwɩ 'kadɛ -yɛ -Lagɔɔ yʋlʋ sɔ-ɔ ji-a dʋdʋ la'aa nɩkpa -gömö jie. 24-Mʋmʋa wa ji-a -gbla 'paa, wa 'yɛ-a -mʋmʋa swɩ -gömö gwanɩ wa 'kʋa-a -ma dʋdʋkpataa 'bhuo -gömö gïyikwla 'mö kwa. Lagangwa -wa 'nɩ-a -Lagɔ -ji, wa 'yɛ-a Zelwizalɛmö -gömö jinɩ, -sɩbha -daan la -Lagɔ -dɩ-a wa yɛ 'n -bha 'yɛ-a nyini.
Zezwi yɛ ɔ nimïjigbʋ gba
25-Bhaa do'o, nganɔɔ 'wʋbhïli ji-a jie. -Ma 'ylʋzalʋ 'mö, -ma 'cʋ 'mö, -ma -zɛlɩ 'mö, nganɔɔ 'wʋbhïli ji-e -ma ghlanɩɛ. Gïnyie -gbɔkɔlɩɛ -jiji ji-a kluo tenyie yɛ, dʋdʋkpata -gömöö nɩkpa 'bhuo dlɩ wa ji-a nimïë wa 'na zʋsɛ ghlɩ. 26-Li -ɩ ji-e ma'a dʋdʋkpata -gömö jie nɩkpa -kɩɩ dlɩ 'wʋ 'pa, nganɔ jua-a tlɩtlɩswɩ'ɩ 'lɩbhaa. -Wʋʋ yɛ-a, -ma nglagatapɛ 'wʋɔ -li 'bhuo 'mö ɩ ji-a gbʋgbɔɔ. 27-Mɩ la'a 'bhuo -yɛ plɩ 'bhë-ë, Nɩkpɛɛ 'Gu glɩ -bha gbiluko -gömö, ɔ-ɔ ji 'le 'n wa 'kɔ-a -ma ɔ 'mötɛnɔ 'kadʋ -yɛ ɔ 'ghlinɔ 'kadʋ 'sɔ 'mö yɩlɩnɩ. 28'Mɩ -ɩ la'a 'bhuoo jijie -yɛ tɛ-ɛ, a 'tamanɩ 'ji yawʋ, a 'libhï 'wlu, -wʋʋ yɛ-a, a yʋlɔyʋlʋɛ 'mösade nyini -bha.”
29Zezwi gba-a sa'a 'bhë-ë, 'n ɔ ji-a 'ji palɩ, ɔ nɛ naa: “Su wa la-a figösu, ʋ -yɛ swi -mɩbha 'bhuo 'sɔ a yɩlɩɩ -lɛ 'wʋ. 30Ɩ -yɛ tɔpɔ 'le -wʋ a -kɩɩ yɩlɩ, a 'bhï -ji sɛ naa, gude -wʋ-a nyini 'le. 31A -yɛ 'yɛ -sɩbha -nɩ 'mɩ nganɔɔ 'wʋbhïli la'aa jijilɩ yɩlɩ 'le -wʋ-ɔ, a jɩblɩnɩ sɛ naa, -Lagɔɔ nyininyinipɩ yɛ -kɔnyɩ nyininɩ 'bhë. 32'Dɩɛ -dɩ n nyɛya-a sa'a naa: -Sɩka'aa pɩ la'a 'möö nɩkpa -mʋmʋa 'na tlɩ 'n -ɩ la'a 'yɛ-a 'wʋ 'wlenɩ. 33-Lagɔtapɛ -yɛ dʋdʋkpata 'sɔ ji sɛ yɩla, na -nɩ nglie wɛlɩ 'na sɛ yɩla 'lɩlɩlɩ.
Zezwi nɛ naa: A pö ajɩ 'wʋ a 'yɛ -bha glɩ
34A möna 'mö, a 'na-a -ka lililibho -yɛ nʋnɩmalibho 'sɔ -nɩ. Ma'a 'pɩ 'wʋɔ dlɩpapʋ 'na-a yeya 'wlu 'mö -nɩ, na jijizlɩ jiya-a 'mö bhuluo. 35-Wʋʋ yɛ-a, sa wa'a la'a zibhï -sapʋ 'wlu 'mö -gbli, -sɩbha 'mɛ zlɩ ji-a dʋdʋkpata -gömöö nɩkpa 'bhuo 'mö bhuluo. 36-Ɩ la'aa yɛ, a -yɛ -bha glɩ a pö ajɩ 'wʋ. A 'pa -Lagɔ -bɛlɩ 'kɔmʋʋ 'mɩ -li la'aa de -yɛ nyini-e, a nɩma 'yɛ 'mö 'tɛ-ɛ a 'kɩ ngli 'wlʋ, a 'yɛ -bha Nɩkpɛɛ 'Guo 'ji 'klʋ 'nɩgbö.”
37Zlɩ -yɛ -ga 'n Zezwi 'panɩ-ɛ -ma -Lagɔbudu 'kadʋ 'mö nɩkpa -Lagɔwɛlɩ ngli. Sɛ -yɛ julu-o, 'n ɔ mö-ö -ma -gɔgɔgbʋ wa la-a Olivieswie -gɔgɔgbʋ 'klʋ gʋ-ʋ kwla'a. 38Zlɩgö -papa -yɛ ji-e, 'n nɩkpa ghlɩɔ-ɔ -ma -Lagɔbudu 'kadʋ 'mö, wa 'kɔ 'yukwli pönɩɛ yɛ.
നിലവിൽ തിരഞ്ഞെടുത്തിരിക്കുന്നു:
LWIKÖÖ 'BƆGƲ 21: BNT96
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Bete New Testament © Bible Society of Côte d'Ivoire 1996
