LWIKÖÖ 'BƆGƲ 22
22
Zwida -yɛ Zezwie tʋngwa 'sɔ yɛ ɔ 'lɩbhalɩbhayɩlɩ pɛ
1'Zwiföaa pɩpɩ 'kadɛ wa la-a gïyikwlaa 'möwlʋpɩpɩ -ɛɛ 'bhlibhlizlɩ wa li-a 'fʋlo -ʋ 'nɩ-a 'pluplungakpɩ 'mö -ka, ʋ de -wʋ la-a nyini 'le. 2-Lagɔbʋbɔngwaa 'bhitɩbhangwa -yɛ -Lagɔɔ gböö nglipangwa 'sɔ, nɩkpa wa -wʋ-a -gu 'lee yɛ, sa wa 'yɛ 'mö zʋzʋnʋ wa 'yɛ Zezwi 'lɩbha, 'mɩ wa -wʋ la-a 'nama 'le.
3Zezwie tiatiangwa gla'aa nɩkpɛ -bhlʋ wa la-a Zwida Isɩkaliɔtɩ, 'n 'jinylozuzukuo 'bhitɩbha Sata jio-a dlɩ zɔmö pla. 4Ɔ -sɔ-a 'wʋ, 'n ɔ ji-e -ma -Lagɔbʋbɔngwaa 'bhitɩbhangwa -yɛ -Lagɔbudu 'kadʋɔ ngokʋngwaa 'bhitɩbhangwa 'sɔ ghlɩ. Sa ɔ jua-a Zezwi cɛ'ɛ 'pɛlʋ 'mö 'papanɩɛ 'n ɔ -nyʋa 'sɔ ji-a ɩ yɩlɩ pɛ. 5Ɔ 'nyʋa-a -sɩbha 'dɩ-ɛ, 'mʋna-a 'lɩbhʋa-a tenyi, wa nɛ mëni wa jio-a ɩ 'wlumö 'nyɛɛ. 6'N ɔ jiɩ-a 'wʋ nglu. Tɛnɩ-a 'mö -bha, sa ɔ 'yɛ-a zʋ ɔ 'yɛ Zezwi 'pɛlʋ 'pa 'mɩ ɔ -wʋ la 'mö-a 'nama 'le.
Zezwie 'wʋbhlinɩngwa yɛ 'pɩpɩɛ -li göganɩ
7'Zwiföaa pɩpɩ 'kadɛ la'a -ɛɛ zlɩ wa li-e -sɩbha 'fʋlo -ʋ 'nɩ-a 'pluplungakpɩ 'mö -ka, n wa lɩbha-a 'bhlangɔgbɔtɩ wa -kɩɩ bʋbɔnʋ 'bhë, 'n wa linɩɩ-a debhlʋ, ʋ 'bhlibhlide nyini -bha. 8'N Zezwi ji-a Piɛlɩ -yɛ Za 'sɔ tia, ɔ nɛ naa: “A mö a 'yɛ lili pi -a 'yɛ li.” 9Wa nɛ naa: “La -n 'jɩbha-a -a 'kɩ pinɩ 'nɩ?” 10Ɔ nɛ: “A mö -ma Zelwizalɛmö, a -yɛ 'gbë 'mö pla tɔngʋ-ɔ, nɩkpɛ -su-a 'nyulaki, 'mɔ a -nyɔɔ 'sɔ ji-a gbënɩɛ, a 'namɔ 'bɩ, 'ligbë -aa 'wʋ ɔ ji-a pla, a pla -bha. 11A gba sa'a -bha 'ligbëlowlie de naa: -Abhitɩbha nɛ, -buduköbhë -aa 'mö ɔ -yɛ ɔ 'wʋbhlinɩngwa 'sɔ ji-a gïyikwlaa 'möwlʋpɩpɩ 'bhlinɩɛ wa 'yɛ debhlʋ linɩ, la a -wʋ-a 'nɩ? 12A -yɛ sa'a ɔ de gba, 'mɔ nɩkpɛ la'a -ma ɔ -buduo ghayɩ ɔ jiya-a -buduköbhë 'kada -bhlʋ de -slʋnʋɔ, a ka kpï 'mö -ma a 'mö 'göganɩɔ, -ma a ji-a gïyikwlaa 'möwlʋpɩpɩɛ lili pinɩɛ.” 13Wa mö-a, sa 'bhë Zezwi gbɩ la-a 'tɩ, -sɩbha wa ghlɩɩ -bha. 'N wa ji-a gïyikwlaa 'möwlʋpɩpɩɛ lili pi.
Zezwi yɛ -Lagɔlulu sɛ -la
14Lilide nyini-a, 'n Zezwi -yɛ ɔ tiatiangwa 'sɔ ji-e -bha linɩde sɛ glɩ-ɩ. 15Wa 'yɛ lie ji-e, Zezwi nɛ naa: “Sa na dlɩ 'jɩbha la-a tenyi n nyɛya 'sɔ 'yɛ gïyikwlaa 'möwlʋpɩpɩ la'aa lili li 'bhë n 'yɛ yʋlɔ -sɩbha-a la'a. 16-Wʋʋ yɛ-a, n nyɛya 'sɔ 'na-a 'mö gïyikwlaa 'möwlʋpɩpɩɛ lili -mɩmɩ debhlʋ linɩ 'sɔ 'n ɩ zɔmö nɩ -lɛ -ma -Lagɔɔ nyininyinipɩ 'wʋ 'wʋ 'wlenɩ 'bhë.” 17'N ɔ ji-a dwivɛkɔpʋ 'wʋ 'libhï, ɔ bhalɩ-a ʋ yɛ -Lagɔ 'bhë-ë, ɔ nɛ naa: “A 'libhïʋ 'wʋ a 'yɛ 'nɩma. 18-Wʋʋ yɛ-a, 'dɩɛ -dɩ n nyɛya-a naa: Tɛnɩ la'a -zɩnɩ'ɩ, n 'na nʋ -mʋmʋ 'nɩma 'sɔ 'n -Lagɔɔ nyininyinipɩ 'yɛ-a ji.”
19-Bha -gömö, 'n ɔ ji-a 'fʋloko 'wʋ 'libhï, ɔ bhalɩ-a a yɛ -Lagɔ 'bhë, 'n ɔ jia-a 'mö -dɩdɩnɩ 'n ɔ jua-a 'ye 'nyɛ, ɔ nɛ naa: “'Fʋloko la'a, na ku [n ji-a a 'wlumö -Lagɔ bʋbɔnʋɔ, mʋ -bha. A nʋ -sɩbha, -ɩ n nʋ-a a yɛ a dlɩ 'yɛ -bha ɩ de pö 'kɔmʋʋ.” 20Wa bhɩa-a lilie 'ji, 'n ɔ ji-a dwivɛkɔpʋ 'wʋ 'libhï 'sɔ, 'n ɔ jua-a 'ye 'nyɛ, ɔ nɛ naa: “Dwivɛ-ɛ la'a, na dlu -ʋ ji-a a 'wlumö sɛ 'suluo, -ʋ glɩnɩ-a -Lagɔ -yɛ nɩkpa 'sɔɔ -ghöbhanɔ -lulu, mʋ-ɔ la'a.]
21-Ma ɩ 'mö, li le -a -wʋ-ɔ la'a, nɩkpɛ -ɔ ji'i-e -ma na tʋngwa cɛ'ɛ 'pɛlʋ 'paa, 'mɔ n -nyɔɔ -wʋ-ɔ la'a cɛ -gömö fafanɩ 'le. 22-Ɩ -Lagɔ 'jɩbha-a Nɩkpɛɛ 'Guo de, mɩ-ɩ ji-a 'wʋ 'wlenɩɛ ɔ 'yɛ tlɩ. -Ma ɩ 'mö, nɩkpɛ -ɔ 'pɔ 'mö-ö -ma -nɩ ɔ tʋngwa cɛ'ɛ 'pɛlʋ, ɔ nʋ ngazɩli.” 23Zezwi gba-a sa'a 'n wa ji-a ngli 'jɩbhajɩbhanɩ naa: “La'a -aa gla'a -mɔ bhɛlɩ-a ɔ 'yɛ -ɩ -la nʋ 'nɩ?”
Zezwie tiatiangwa nɛ naa: -Mɔ -yɛ-a wa gla'aa 'kadɔ 'nɩ?
24-Ma Zezwie tiatiangwa gla'a, 'n kpɛnɩkpɛnɩɛ ji-e -ma 'wlʋ. -Ma wa gla'aa nɩkpɛ -mɔ ji-a 'kadɔ glɩnɩɛ gbʋ wa kpɛnɩ-a 'mö. 25'N Zezwi jua-a ngo'o palɩ, ɔ nɛ naa: “A -ji sɛ naa, ma'a 'pɩ 'wʋ-ɔ, dʋdʋnyiningwa -glaswɩ'ɩ wa nyini-a nɩkpa, 'bhë -wa wa nyini-e -sɩbha, 'n wa lʋa-a -lie -lie nʋngwa. 26Abhaa -nɩ-ɛ, a 'na-a nʋ -sɩbha -nɩ. -Ma a gla'a -ɔ glɩnɩ-a 'yizi, ɔ 'libhï ɔjɩ -göpöguo swɩ 'wʋ, -ɔ nyini-a ɔ 'libhï ɔjɩ nyɩgbajʋlʋɔ swɩ 'wʋ. 27Nɩkpa 'sɔ -yɛ -bha glɩ, -bhlʋ -yɛ lie ji -mɔbha -kɔɔ lili dlɩ'ɩ sɛ zʋ, -bha wa 'sɔɔ gla'a -mɔ -yɛ-a 'kadɔ 'nɩ? Ɛ'ɛ -lɛ bhe -ɔ wa zʋ-a lili dlɩ'ɩ yɛ mɔ? A -yɩlɩ'ɩ -lɛ na-a 'wʋ, la'a a gla'a, ɔ zʋ-a -mɔbha lili dlɩ'ɩ yɛɛ swɩ n -wʋ -bha. 28Abhaa -nɩ-ɛ, -ma na yʋlɔyʋlʋɛ 'bhuo 'mö a nɩ'ɩ-ɛ 'bɩ 'bhö-ö, 'n n nyɛya 'sɔ -bhlinɩ-a 'wʋ 'kɔmʋʋɔ yɛ, 29sa -Lagɔ zʋ'ʋ-a ʋ nyininyinipɩ 'wʋɔ Nyininyɔ 'kadɔ 'wʋ-ɔ, -sɩbha n jiya 'yɛ na-a 'bhli 'nyɛ-ɛ n nyɛya 'sɔ -a 'yɛ nyini. 30-Ma na nyininyinipɩ 'wʋ, n nyɛya 'sɔ -a 'yɛ-a debhlʋ linɩ, 'n -a 'yɛ-a debhlʋ 'nɩmanɩ, a 'yɛ-ɛ -bha nyininyinikpï -gömö sɛ glɩ-ɩ, a 'yɛ Izlayɛlɩɛ -gligbï kugbïa 'sɔ -kpɔ -zijli tunʋ.”
Zezwi nɛ naa, Piɛlɩ ji-a ɔ -jijigbʋ 'mö kpɛnɩɛ
31'N Zezwi ji-a Simo Piɛlɩ 'ji gö, ɔ nɛ naa: “Simo, Simo -Lagɔ yɛ 'jinylozuzukuo 'bhitɩbha Sata 'ji 'tati 'bhë, a 'kaya 'sɩkaa swɩ 'ji -sa. 32-Ma ɩ 'mö, n yɛ -na 'wlumö -Lagɔ -bɛlɩ 'pa 'bhë na dlɩwʋkakɩɛ -jimö-ö dlɩ zɔmö bhɩaa yɛ. -N -yɛ ligba, 'bhë -na dlɩ -yɛ -bha na -gömö nimï ji-e, zʋ -na -dagwie -mʋabha dlɩ 'mlɩ.” 33Piɛlɩ nɛ naa: “Nyininyɔ, n pö na -nɩ jɩ 'wʋ 'gamö, n -nyɛmö 'sɔ wa -kaya-a -die 'mö 'pa, ɛ ji tlɩtlɩɛ 'bhë glɩnɩ, n -nyɛmö 'sɔ ji na-a debhlʋ tlɩnɩ.” 34Piɛlɩ gba-a sa'a, Zezwi nɛ -bha ɔ de: “Piɛlɩ, 'dɩɛ -dɩ n -nyɛmö-ö sa'a naa, bhla -kɔkɔbhɛlʋ 'yɛ gbʋɔ mö, -n yɛ 'wʋ ta na -jijigbʋ 'mö kpɛnɩ.”
Zezwi nɛ: -Ɔ -yɛ-a 'mö ɔ -lu -ka ɔ 'libhïʋ 'wʋ
35Ɔ nɛ 'yɛ -bha wa de naa: “La do'o n 'kaya-a la'a tiaa ji, n nʋ-ɔ naa: A 'na-a -su mëni -nɩ, a 'na-a -su -kputu -nɩ, a 'na-a -su -gbabɔ -nɩ-ɛ, -bhaa do'o a 'yɛ-a mö -lu a bɔ-a 'nɩ-ɩ?” Wa nɛ: “'Bhëbhë, -aa-a -lu -bhlʋ 'tɩɛ 'bhë bɔ.” 36Ɔ nɛ: “-Sɩka'a-a 'mö, -ɔ -yɛ mëni -ka ɔ 'libhie 'wʋ, -ɔ -yɛ -kputu -ka, ɔ 'libhïʋ 'wʋ 'gamö. -Mɔ nɩ 'ligblɛ -ka, ɔ 'pa ɔ 'mökalu 'pɛlʋ ɔ 'yɛ -nɩ ɔ -leyi pɩa. 37-Wʋʋ yɛ-a, sa'a n gba-a sa'a a de naa: Wɛlɩköbhë -a 'cɛlɩɔ-ɔ -ma -Lagɔwɛlɩɛ 'bɔgʋ 'mö -a nʋ-ɔ naa: 'Kulɩbhanyɔɔ swɩ'ɩ wa jio-a köbha-a, na de a ji-a 'wʋ 'wlenɩɛ. -Ɩ la'a 'bhuo -ɩ 'cɛlɩɔ-a na yɛ -ma -Lagɔwɛlɩɛ 'bɔgʋ 'mö, ɩ 'wʋwlenɩde yɛ 'yɛ nyini 'bhë.” 38Zezwi gba-a sa'a, wa nɛ naa: “Nyininyɔ, yie, -a -su la'a 'ligbla 'sɔ.” Ɔ nɛ: “Ɩ -ga-a 'mö -sɩbha cɛ.”
Zezwi yɛ -Lagɔ -bɛlɩ 'pa
39Zezwi -sɔ-a 'wʋ, ɔ 'wʋbhlinɩngwa -ganɩɔ, sa ɔ mö la-a -ma Olivieswie -gɔgɔgbʋ 'klʋ 'kɩkɩ, 'n ɔ -nyʋa 'sɔ ji-e -sɩbha -ma mö.
40Wa nyini-e -ma, ɔ nɛ -bha wa de naa: “A 'pa -Lagɔ -bɛlɩ a ji-e Sataa -mapapɩɛ 'mö bhlinɩ.” 41Ɔ 'pa-a -bha wa yawʋ ɔjɩ nimï, 'n ɔ ji-a -kokomunigbö glu 'pa, 'n ɔ ji-a -Lagɔ -bɛlɩ 'pa. 42Ɔ nɛ: “-Atʋ -Lagɔ, dlukalʋ n ji-e la'a möna, n -bhiamö yawʋ, 'pʋ -bha na yawʋ nimï, mɩ -bha 'bhë-ë, -ɩ -n 'jɩbha-a ɩ tʋnʋ 'wlu, na -li 'na-a tʋnʋ 'wlu -nɩ.” [ 43Ɔ-ɔ sa'a -bɛlɩ 'pa 'le, -Lagɔzuzuko -bhlʋ -Lagɔ tia-a 'n a jio-a 'wʋ ghlanɩ a 'kɔ dlɩ 'mlɩ zʋɔ yɛ. 44Dlɩ -wʋɔ ngo ye 'le 'n ɔ ji-a -Lagɔ -bɛlɩ 'pa kplokplo, slʋ -ʋ 'wlʋɔ-a 'mö -ʋ bhli-a dʋdʋkpata'a, ʋ 'ta -bhlee dluo 'ta.] 45Ɔ bhɩa-a -bɛlɩpapʋ 'ji, 'n ɔ ji-a 'wʋ -sɔ, 'n ɔ ji-e -ma ɔ 'wʋbhlinɩngwa yawʋ nimï mö. 46Ɔ ghlʋa-a -bha, ɔ nɛ naa: “'Manɩɛ yɛ a -wʋ bhe ngɔmö 'le 'nɩ? A -sɔ 'wʋ, a 'yɛ -Lagɔ -bɛlɩ 'pa, a ji-e Sataa -mapapɩɛ 'mö -bhlinɩ.”
Wa yɛ Zezwi köbha
47Zezwi ka wɛlɩ la'a ngli, 'n nɩkpaa -zakpa ji-e -bha ghlanɩ. Zwida, -ɔ -yɛ la-a ɔ tiatiangwa kugbïa 'sɔ gla'aa -bhlʋ, ɔ -ganɩ nɩkpa la'a 'yu. Ɔ nyini-e -bha Zezwi yawʋ, 'n ɔ jio-a 'wʋ bhli. 48Zezwi nɛ -bha ɔ de: “Zwida, 'wʋbhlibhlie nya -n 'panɩ-a Nɩkpɛɛ 'Gu -ma ɔ tʋngwa cɛ'ɛ 'pɛlʋɔ?” 49Zezwi gba-a sa'a, -ɩ jio-a ghlɩɛ 'n ɔ 'wʋbhlinɩngwa -mʋabha ji-a ɩ sɛ jɩblɩnɩ. Wa nɛ: “Nyininyɔ, -a 'pʋa 'ligbla 'nɩ-ɩ?” 50-Bha -gaganɩlɩ'ɩ, 'n wa gla'aa nɩkpɛ -bhlʋ ji-a -Lagɔbʋbɔnyɔ 'kadɔɔ nyɩgbajʋlʋ 'ligblɛ nya linɩkpɛsɔ -yukwli 'wlu -dɩ. 51'N Zezwi jua-a gbʋ 'wʋ -dɩ, ɔ nɛ: “'Bhëbhë, a 'nɩgbö, a 'na-a nʋ -sa -nɩ.” 'N ɔ ji-a nɩkpɛ la'aa 'yukwliköbhë cɛ zʋ 'n ɔ jio-a göpö.
52Nɩkpa -wa jio la-a köbha kwla'a, -Lagɔbʋbɔngwaa 'bhitɩbhangwa-a, -Lagɔbudu 'kadʋɔ ngokʋngwaa 'bhitɩbhangwa -yɛ 'zwiföaa nɩkpazɔgblʋɩ 'sɔ, 'n Zezwi jua-a ngli 'jɩbha, ɔ nɛ naa: “'Kulɩbhanyɔ n glɩnɩ-a, a wʋ'ʋ-a köbha kwla'a ji 'le, 'n a -su-a 'ligbla -yɛ -pɛ 'sɔɔ? 53Sa zlɩ zɩ-a, -sɩbha n nyɛya 'sɔ -wʋ-ɔ -ma -Lagɔbudu 'kadʋ 'mö, a nɩ'ɩ-ɛ -ma köbhanɩ. -Ma ɩ 'mö, a -yɛ Sataa 'mötɛnɔ 'sɔɔ de-e nyini-e la'a -nɩ.”
Piɛlɩ yɛ Zezwie -jijigbʋ 'mö kpɛnɩ
54'N wa ji-a Zezwi köbha, wa -suo 'n wa jio-o -ma -Lagɔbʋbɔnyɔ 'kadɔɔ 'ligbë'ë kwa. Piɛlɩ -ganʋa, ɔ namö -ma nimï nimï 'n wa ji-a mö.
55Wa nyini-e -ma, 'n wa ji-e -bha 'ligbë -nyɩdɩ -kosu 'ji -dɩ. Wa glɩ -bha ʋ yawʋ, Piɛlɩ ji-a, 'n ɔ ji-e -bha wa gla'a sɛ glɩ-ɩ. 56Ɔ glɩ -bha -kosu la'aa yawʋ 'n nyɩgbajʋlʋnglɔ -bhlʋ jio-a yɩlɩ. Ɔ jɩlɔ-a -daan, ɔ nɛ naa: “Nɩkpɛ -la, Zezwi ɔ -nyɔɔ 'sɔ -bhlinɩ la-a 'wʋ.” 57'N Piɛlɩ ji-a kpɛnɩ, ɔ nɛ -bha 'nglɔɔ de naa: “Nɩkpɛ -la n 'nɩɔ 'na-a -ji.” 58'Bie -lɛ gwlɛ-a 'mö -sɛ, 'n nɩkpɛ -mʋmɔ ji-a Piɛlɩ yɩlɩ. Ɔ nɛ -bha ɔ de: “-Nmö -la, -n-n la -ma -na nɩkpa -la gla'a 'gamö.” Piɛlɩ nɛ: “'Lɩlɩlɩ, n'n -ma na-a wa gla'a -wʋ.” 59'Glie -bhlʋɔ swɩ 'plɩ-a, 'n nɩkpɛ -mʋmɔ ji-a gbʋ -dɩ, ɔ nɛ: “'Dɛdɛ'ɛ nɩkpɛ -la -yɛ Zezwi 'sɔ -bhlinɩ la-a 'wʋ. -Wʋʋ yɛ-a, Galileyi -bha.” 60Piɛlɩ nɛ -bha nɩkpɛ la'aa de naa: “-Abhiyi, 'manɩgbʋɔ 'bhë -n -wʋ -la gba 'le, n 'nʋ -ji.” Ɔ ka 'mɩ wɛlɩ ngli, -bha -gaganɩlɩ'ɩ 'n -kɔkɔbhɛlʋ ji-a gbʋ. 61Nyininyɔ Zezwi 'bhɩlɔ-a 'mö, 'n ɔ ji-a Piɛlɩ 'wʋ yɩlɩ. Wɛlɩ -ɩ ɔ gba la-a ɔ de naa: “-Zɩnɩ'ɩ, bhla -kɔkɔbhɛlʋ 'yɛ gbʋɔ mö, -n yɛ 'wʋ ta na -jijigbʋ 'mö kpɛnɩ-ɛ,” 'n Piɛlɩɛ dlɩ ji-e -bha ɩ de bhlinɩ. 62Ɔ 'wlʋɔ-a 'pɩ, 'n ɔ ji-a dlɩjiliswɩ'ɩ wi.
Wa yɛ Zezwi -di zia
63Nɩkpa -wa -wʋ la-a Zezwi ngo -kʋ 'le, wa -wʋɔ 'lɩbha 'le 'bhë, 'n wa palɩɔ-a gla. 64Wa gɔ-a 'jie 'klʋ, 'n wa jio-a ngli 'jɩbha, wa nɛ: “Nʋ -Lagɔɔ 'mögbanɩnyɔɔ -li, -ɔ 'pa-a -na de -dɩɔ 'nglɩ.” 65'N wa jio 'yɛ-a 'jinylɔwɛlɩɛ -bebe -mɩmɩ gbanɩ.
'Zwiföaa -zijlitungwa 'kadɩ yɛ Zezwi -zijle tunʋ
66Zlɩ zɩ-a, wa nɩkpazɔgblʋɩ -yɛ -Lagɔɔ gböö nglipangwa 'sɔ, -Lagɔbʋbɔngwaa 'bhitɩbhangwa 'gamö, 'n wa ji-a 'wlu 'titanɩ, 'n wa ji-a Zezwi nɩkpa 'wʋ tia, wa -nyɔɔ 'yɛ ji, wa 'kɔ -zijle tunʋɔ yɛ. 67Wa -nyɔɔ ji-a, 'n wa jio-a ngli 'jɩbha naa: “-N -yɛ Puanyɔ -ɔ -Lagɔ -sa-a -bha glɩnɩ-ɛ, -sanɩya 'dɩ.” Ɔ nɛ naa: “N -yɛ nʋ 'mɔ n glɩnɩ-a nʋ-ɔ, a 'na 'kɩ 'dɩ la. 68N kaya 'yɛ ngli 'jɩbha, a 'na na wɛlɩ -gömö -sa. 69-Ma ɩ 'mö, tɛnɩ-a 'mö la'a, -ma -Lagɔ -ʋ -wʋ-ɔ -ma -Lagɔtapɛ'ɛɛ linɩkpɛsɔ pɩa 'bɩ Nɩkpɛɛ 'Gu ji-e 'mö-a sɛ glɩɛ.” 70Ɔ gba-a sa'a wa nɛ: “Ɩ yɛ -Lagɔɔ Gu -n glɩnɩ-ɛ 'mö-a?” Ɔ nɛ: “'Mɩ a 'bhï -sa-a -la ngli, 'mɔ n glɩnɩ -bha.” 71Wa nɛ: “Wɛlɩ -ɩ 'kɔ-a gbʋ köbha-a a-a 'na-a yɩlɩɩ-a 'mö yɛ -nɩ. Ɔ 'bhëë nglie wɛlɩ 'mɩ -a 'nʋ-ɔ -la.”
നിലവിൽ തിരഞ്ഞെടുത്തിരിക്കുന്നു:
LWIKÖÖ 'BƆGƲ 22: BNT96
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Bete New Testament © Bible Society of Côte d'Ivoire 1996
