LWIKÖÖ 'BƆGƲ 23
23
Wa yɛ Zezwi -ma -gwlɩnyininyɔ 'kadɔ Pilatɩ dlɩ'ɩ kwa
1-Zijlitungwa 'bhuo -sɔ-a 'wʋ, wa 'libhï-a Zezwi 'wʋ, 'n wa jio-o -ma Pilatɩ dlɩ'ɩ kwa. 2Wa -nyɔɔ nyini-e -ma, -bha Pilatɩɛ 'ji 'klʋ 'n wa jio-a 'jinylɔkïbhï -gömö 'pa. Wa nɛ naa: “Nɩkpɛ la'a, -aa -gwlɩ ɔ -wʋ-a ghayɩ 'pa 'lee yɛ -a köbhɔ -bha. Ɔ nɛ -bɛ 'na-a 'pɛnɩ lepoo mëni -nɩ. Ɔ nɛ 'yɛ naa: Puanyɔ -ɔ -Lagɔ -sa-a -bha -ɔ ji-a -aa dʋdʋnyininyɔ 'kadɔ zʋɔ, 'mɔ ɔ glɩnɩ -bha.” 3'N Pilatɩ jio-a ngli 'jɩbha, ɔ nɛ naa: “'Zwiföaa dʋdʋnyininyɔ -n glɩnɩ-a?” Zezwi nɛ: “'Mɩ -na 'bhë -sa-a -la ngli.”
4Zezwi gba-a sa'a, Pilatɩ nɛ -bha -Lagɔbʋbɔngwaa 'bhitɩbhangwa -yɛ nɩkpaa -zakpa-a glɩ la-a -bha 'sɔɔ de naa: “Nɩkpɛ -la wɛlɩköbhë -maa bhë-ë 'kɔ gbʋ köbha-a n 'nɩa-a na-a yɩlɩ.” 5Ɔ gba-a sa'a, wa nɛ naa: “Sa'a -a gba-a sa'a naa: Nɩkpɛ -la ɔ nglipalɩ -gwlɩ 'bhuo ɩ -wʋ-a ghayɩ 'pa 'le. -Ma ɔ tɛnɩ-a Galilee dʋdʋ -gömö -daan 'n ɔ ji-e ma'a Zwidee dʋdʋ -gömö nyini.”
Wa yɛ Zezwi -ma dʋdʋnyininyɔ Elodɩ dlɩ'ɩ kwa
6Wa gba-a sa'a, 'n Pilatɩ ji-a ngli 'jɩbha, Zezwi -yɛ galileyi glɩnɩɛ yɛ. 7Ɔ jɩblɩnɩ-a sɛ naa Elodɩɛ nyininyinidʋdʋ -gömöö nɩkpɛ Zezwi glɩnɩ -bha-a, ɔ nɛ wa kɔ -ma Elodɩ dlɩ'ɩ. 'Mɛ zlɩ la'a 'mö Elodɩɛ 'bhë-ë la -ma Zelwizalɛmö.
8Wa nyini-e -ma, Elodɩ yɩlɩ-a Zezwi-e, 'mʋna-a 'lɩbhɔ -bha, -wʋʋ yɛ-a, ɔ yɛ la Zezwie nʋnʋlie 'dɩ 'nʋ 'le gwlɛɛ yɛ, ɔ 'jɩbha ɔ 'kɔ la yɩlɩ, ɔ 'yɛ -bha -nɩ ɔ 'ji 'klʋ bhatɩ nɛ nʋnʋ. 9'N ɔ ji-a Zezwi 'kïbhïë -bɛ -gömö ngli 'jɩbha. -Ma ɩ 'mö, Zezwi 'nɩɔ-ɔ ngo'o palɩ. 10-Lagɔbʋbɔngwaa 'bhitɩbhangwa -yɛ -Lagɔɔ gböö nglipangwa 'sɔ, wa-a la -bha, gbɩ wa kwa-a Zezwi 'wʋ, 'ghli-i ɩ ghli-a tenyi. 11Elodɩ -yɛ ɔ 'slʋja 'sɔ palɩ-a Zezwi gla, wa zio-a -di, wa 'pɔ-a gbʋgblɩkaswɩ'ɩ 'jinanɩbana 'mö 'bhë-ë, 'n wa jio-o -ma Pilatɩɛ 'bhɛyɩ nimï kwa. 12'Mɛ zlɩ la'a -bhlʋ 'tɩɛ 'mö, Elodɩ -yɛ Pilatɩ sɔ -wa glɩnɩ la-a tʋngwa, 'tʋalɩbhangwa wa zʋ -bha.
Pilatɩ yɛ Zezwie 'lɩbhalɩbhagbʋ nglu
13Wa -yɛ Zezwi 'sɔ ji-e -ma Pilatɩɛ 'bhɛyɩ nimï-ë, 'n -mɔ la'a ji-a -Lagɔbʋbɔngwaa 'bhitɩbhangwa-a, -zijlitungwa -yɛ nɩkpa -mʋabha 'sɔ 'wlu 'titanɩ. Ɔ nɛ -bha wa de naa: 14“Nɩkpɛ la'a a nɛ -gwlɩ ɔ -wʋ-a ghayɩ 'pa 'le, la'a a 'bhïë 'ji 'klʋ -bha n 'jɩbhanɩɔ-ɔ la'a ngli. -Ma ɩ 'mö, gbʋ a -wʋɔ-ɔ la'a 'wʋ kwa 'le, wɛlɩköbhë -maa bhë 'kɔ gbʋ köbha-a n 'nɩɔ na-a yawʋ yɩlɩ. 15Elodɩ -ɔɔ 'bhɛyɩ n nʋ la-a wa kɔ, ɔ 'nɩɔ-ɔ 'yɛ -nɩ 'jinylɔköbhë yawʋ yɩlɩ, wʋ yɛ ɔ -lɔɔ-ɔ la'a ma'a na 'bhɛyɩ nimï. Ɩ yɛ nɩkpɛ -la, köbhë -ma ɔ 'yɛ 'mö tlɩ, n 'nɩa-a na-a yɩlɩ. 16Ɩ yɛ 'slʋja n ji-a 'dɩ 'nyɛɛ, wa 'kɔ 'sɛlɩ 'bhë, n 'kɔ 'ji 'tati.” [ 17'Kɩkɩ sa gïyikwlaa 'möwlʋpɩpɩ bhɩa-a, -sɩbha Pilatɩ 'tati-a -dienyɔ -bhlʋ 'ji.] 18Ɩ yɛ 'n wa 'bhuo ji-a 'mö 'kpö, wa nɛ: “'Sibha Balabasɩ yɛ! 'Lɩbha nɩkpɛ -mɔ -la ɔ 'yɛ tlɩ!” 19'Mɔ Balabasɩ, 'ma 'ylʋba la'a 'mö, nɩkpa -mʋmʋa -wa nʋ-a wa 'yɛ -gwlɩnyiningwa ghayɩ 'pa, wa gla'a ɔ -wʋ la -bha 'bhë, 'n ɔ ji 'yɛ-a 'kuë 'lɩbhaa yɛ wa 'pɔ la-a -die 'mö. 20Pilatɩ 'jɩbha ɔ 'yɛ Zezwi 'ji 'tatie yɛ, 'n ɔ ji-a wa de gba 'sɔ. 21'Mɩɛ 'bhë wa nyla-a tenyi. Wa nɛ: “Wa kʋnʋɔ su 'klʋ!” 22'N Pilatɩ ji-a ta do'o wa de gba, ɔ nɛ naa: “'Jinyloli -mɩɛ 'bhë ɔ nʋ bhe 'nɩ? N nɛ wɛlɩ -mɩɛ 'bhëë yɛ ɔ 'yɛ tlɩ n 'nɩɩ-ɩ na-a yɩlɩ. Wʋ yɛ n gba-a naa, n 'yɛ 'slʋja 'dɩ 'nyɛ wa 'kɔ 'sɛlɩ 'bhë, n 'kɔ 'ji 'tati.” 23Pilatɩ gba-a sa'a, 'mɩɛ 'bhë wa nylanylɩɛ 'tamanɩ-a 'mö tenyi, wa nɛ wa kʋnʋ Zezwi su 'klʋ ɔ 'yɛ tlɩ. Wa nyla-a -sɩbha kplokplo, 'n wa -li ji-a 'wlu tʋnʋ. 24'N Pilatɩ ji-a wa -li 'wʋ nglu. 25Balabasɩ wa 'pa la-a -gwlɩnyiningwaa ghayɩpa yɛ -yɛ 'kulɩbha yɛ 'sɔɔ -die 'mö, 'mɔ wa 'jɩbha-aa yɛ, 'n Pilatɩ jio-a sɛ 'sibha. 'N ɔ ji-a Zezwi 'slʋja 'ye 'nyɛ, -ɩ 'zwiföa nʋ la-a wa nʋɔ 'ji, wa 'kɔ 'ji nʋɔ yɛ.
Wa yɛ Zezwi su 'klʋ kʋnʋ
26Wa -yɛ Zezwi-e mö 'le, 'n wa -yɛ nɩkpɛ -bhlʋ 'sɔ ji-e -bha 'yuogblʋ'ʋ gbënɩ, ɔ 'bhö-ö 'kwla 'mö. Ɔ nglɩ-ɩ -yɛ-a Simo, -glɔ wa la-a Silɛnɩ, ʋ 'möö nɩkpɛ la -bha. 'N wa jio-a Zezwie 'klʋkʋnʋsu -sulua, ɔ 'kʋ -ma ɔ nimï -su ɔ 'kɔ -ganɩ. 27Wa -wʋ-a 'mö 'le, -ma Zelwizalɛmöö nɩkpaa -bebe -ganʋa, -ma wa gla'aa 'ngwlɩ-ɛ Zezwie yɛ 'köklɩa cɛ 'pa 'le, wa-a ngazɩli nʋ 'le. 28Zezwi 'bhɩlɔ-a 'mö-ö, ɔ nɛ -bha wa de naa: “Zelwizalɛmöö 'ylugwieyi, a 'na-a wi na yɛ -nɩ, a wi a 'bhï -yɛ a 'gwie 'sɔɔ yɛ. 29-Wʋʋ yɛ-a, ylɩa -mɩmɩ ji-a jie, sa'a wa ji-a gbaa naa: 'Mʋna 'lɩbha 'kukungwlɩ, -wa 'nɩ-a 'ylɩ -bhlʋ gwalɩ -yɛ -wa 'nɩ-ɛ -bhla takaswɩ'ɩ 'gu nyɩtɩ 'nyɛ 'sɔ 'mʋna 'lɩbhʋa. 30-Bhaa do'o sa'a nɩkpa ji-a -gɔgɔgbɩ 'kadɩɛ de gbaa naa: A -bhlinɩya -gömö! Wa 'yɛ-ɛ -bha -gɔgɔgbɩ 'kikiee de gbaa naa: A -suya 'wʋ! 31-Wʋʋ yɛ-a, wa -wʋ la'a sa'a sujɩjalʋ zɛ 'le, sa gɔgɔsuo gbʋ ji-e 'mö-a -nɩ 'mö -wʋnʋɔ 'nɩ?”
32Wa -wʋ-ɔ -sɩbha Zezwi su 'klʋ kʋnʋ kwla'a mö 'le-e, wa -su 'kulɩbhangwa 'sɔ wa 'kʋa 'yɛ -nɩ swi 'klʋ kʋnʋɔ yɛ.
33De -bhlʋ la wa la-a 'wlukɔfʋ, 'n wa ji-e -bha nyini. Wa 'libhï-a Zezwi 'wʋ, 'n wa jio-a su 'klʋ kʋnʋ. 'Kulɩbhangwa la'a 'sɔ -kpɔ, 'n wa jua 'yɛ-a -nɩ swi 'klʋ kʋnʋ 'gamö. -Bhlʋ tʋnʋ -ma ɔ kɔpɛsɔ pɩa 'mö, -mɔbha tʋnʋ -ma ɔ linɩkpɛsɔ pɩa 'mö. 34'N Zezwi ji-a nɩkpa -wa -wʋɔ la-a su 'klʋ kʋnʋ 'lee 'wlumö -Lagɔ -bɛlɩ 'pa, ɔ nɛ: “-Atʋ -Lagɔ, 'jinyloli nɩkpa la'a -wʋ-ɔ la'a nʋ 'le, 'tatinɩ ɩ gbʋ 'ji. -Wʋʋ yɛ-a, -ɩ wa -wʋ-a nʋ 'le wa 'nɩɩ -ji.” 'N wa ji-a ɔ -banɩ -nɩgbɩ 'wʋ 'pa, 'n wa jiɩ-a dlinɩ. 35-Glɔngwa 'bhuo su -bha, wa-a jɩla 'le. 'N 'zwiföaa -zijlitungwa 'kadɩ -wʋ-a Zezwi gla palɩ 'le. Wa nɛ naa: “Ɔ yɛ kabönɩkpa pua 'bhë, ɔ pua-a 'mö ɔjɩ, ɔ -yɛ 'dɛdɛ'ɛ Puanyɔ -ɔ -Lagɔ -sa-a -bha glɩnɩ -a 'kɩ yɩlɩ.” 36'N 'slʋja -wʋɔ 'yɛ-a -nɩ gla palɩ 'le 'gamö, 'n wa -yɛ zɛzɛnʋ ji-a ji, wa 'kɔ ngli palɩɛ yɛ. 37Wa nɛ naa: “-N -yɛ 'dɛdɛ'ɛ 'zwiföaa dʋdʋnyininyɔ glɩnɩ -sa -bha -najɩ.” 38Su wa kunʋ-a Zezwi 'klʋ, -bha ʋ ghayɩde, -bha wa 'cɛlɩ-a wɛlɩköbhë -bhlʋ naa: “Nɩkpɛ la'a, 'zwiföaa dʋdʋnyininyɔ -bha.”
39'Kulɩbhangwa 'sɔ wa kʋnʋ la-a -bha Zezwi yawʋ swi 'klʋ, wa gla'aa -bhlʋ-ɔ 'yɛ -nɩ Zezwi sa 'le, ɔ nɛ naa: “-Nmö 'nɩ-ɛ bhe Puanyɔ -ɔ -Lagɔ -sa-a -bha? -Sa yɩ -bha -najɩ 'bhë -n -kaya -nɩ -bha -sa.” 40Ɔ gba-a sa'a, 'n 'sɔ -lɔ jio-a gbʋ 'wʋ -dɩ, ɔ nɛ naa: “-Nn -gu -Lagɔ 'nɩ-ɩ? N -tɔnʋ -na -nɩ 'bhë la'a -n ji 'yɛ-ɛ -na tlɩnɩɛ? 41N -nyɛmö na-a 'sɔ, sa wa -kaya la-a köbha -sɩbha wa -köbhaya-a la'a. -Aa 'jinyloli a nʋ la-a, ɩ wlumö -a -wʋ-ɔ la'a plʋnʋ 'le. -Mɔ -laa -nɩ-ɛ, ɔ'ɔ -lɛ -nɩ 'jinyloli -bhlʋɔ 'bhë nʋ.” 42'N ɔ ji-a Zezwi 'ji gö ɔ nɛ naa: “Nyininyɔ, -zlɩ -n ji-e -na nyininyinie 'kadɛɛ yɛ nimï ji-e, n -bhiamö yawʋ, -na dlɩ bhlɩnɩ -bha na de.” 43Zezwi nɛ -bha ɔ de naa: “'Dɩɛ -dɩ n -nyɛmö-a naa, -zɩkazɩnɩ'ɩɛ 'bhë n -nyɛmö 'sɔ -ma -Lagɔ wʋ a ji-a möö.”
Zezwi yɛ ngɔmʋ sɛ zʋ
44'Ylʋ glɩ jije 'wʋ, 'n 'misikpoko ji-a dʋdʋkpata 'bhuoo -gömö köbha. A 'köbhɔ-ɔ -sɩbha, 'n -dudoglie ta ji-a nyini. 45-Ma -Lagɔbudu 'kadʋ 'mlɩɛ köbhë -aa 'mö -Lagɔbʋbɔngwa 'kadɩɛ 'nyize pla-a, a ngo'oo lokwi 'kadɛ wa -gbanɩ-ɛ -bha, 'n ɛ ji-a 'mö wʋlɔ. 46'N Zezwi ji-a 'mö 'kpö, ɔ nɛ: “-Atʋ -Lagɔ, 'libhï na zuzu 'wʋ!” Ɔ gba-a -sɩbha, 'n ɔ ji-a nyɔmʋ sɛ zʋ. 47'Slʋja -wa 'lɩbha la-a Zezwi wa 'bhitɩbha yɩlɩ-a -ɩ la'a, 'n ɔ ji-a -Lagɔɔ 'nglɩ 'ghlimanɩ, ɔ nɛ: “'Wuë! Nɩkpɛ -la 'mö ɔ slɛnɩ la-a 'dɛdɛ'ɛ.”
48Nɩkpa la'a bhuo -wa mö-a jɩla kwla'a, 'mɩ -ɩ 'plɩ-ɛ la'a wa yɩlɩɩ-a, wa-a ngazɩswɩ'ɩ 'köklɩa cɛ 'pa 'le, 'n wa ji-a mö. 49Zezwie 'tʋalɩbhangwa 'bhuo -yɛ ngwlɩ la'a -wa -ganɩɔ la-a -wa ɔ -nyʋa 'bhö-ö -ma Galilee dʋdʋ -gömö 'sɔ, wa 'nɩgbö -ma 'yu, -ɩ la'a -ɩ -wʋ-a 'plɩ 'le 'n wa -wʋɩ-a jɩla 'le.
Wa yɛ Zezwie -gazɛ zʋ
50'Zwiföaa -zijlitungwa 'kadɩɛ gla'aa nɩkpɛ -bhlʋ -wʋ la-a -bha, ɔ nglɩ-ɩ -yɛ-a Zozɛfö, 'n ɔ nʋnʋli slɛnɩ-a 'mö. 51'Zwiföaa -glɔ -bhlʋ wa la-a Alimate, -maa nɩkpɛ -bha, 'n ɔ -wʋ la-a -Lagɔɔ nyininyinipɩɛ jijie -kʋ 'le. Kïbhï la'a 'bhuo ɔ lizijlitungwa nʋ-a Zezwi 'ji ɔ 'nɩɩ-ɩ la -nɩ nglunʋ. 52Ɔ ghlɩ-ɛ -ma Pilatɩ 'n ɔ jio-a Zezwie -gazɛ 'jɩbhanɩ. 'N Pilatɩ ji-a nglu. 53Zozɛfö mö-a, 'n ɔ ji-a Zezwie -gazɛ -bha su 'klʋ -sa. Ɔ 'pɛ-a lokwi 'pʋpʋɛ yawʋ, lesikpa la'a -a 'wluo-o -ma 'kpɩɛ -dʋ 'mö, -aa 'mö wa'a -lɛ -bhla takaswɩ'ɩ nɩkpɛ zʋ, 'n ɔ jie-e -ma zʋ. 54'Mɛ zlɩ la'aa -dudo'o, -bha nɩkpa 'bhuo göganɩ-a wa -li. -Wʋʋ yɛ-a, zlɩ -yɛ zɩ -gwlɛnɩzlɩ -bhaa yɛ -bha.
55Zozɛfö -wʋ-a Zezwie -gazɛ zʋ kwla'a mö 'le, ngwlɩ -wa -yɛ Zezwi 'sɔ 'bhönɩ la-a -ma Galilee dʋdʋ -gömö, wa -ganɩɔ 'n wa ji-e -ma lesikpa yawʋ mö. Sa wa zʋzʋnʋ-a ɔ -gazɛ 'mö, 'n wa jiɩ-a yɩlɩ. 56Wa mö-ö -ma 'ligbï'ï nimï-ë, kpö la'a -ɩ pa-a nglɛɛ nglɛ, wa -yɛ-a Zezwie -gazɛ yawʋ 'pa ɛ 'na-a zɛ bhleemö, 'n wa jiɩ-a pi. Zlɩ zɩ-a, -gwlɛnɩzlɩɛ gböö do'o mɛ zlɩ la'aa 'mö -bɛ 'nɩ 'bhö-ö -gbawʋɔ yɛ, wa'a -lɛ de mö.
നിലവിൽ തിരഞ്ഞെടുത്തിരിക്കുന്നു:
LWIKÖÖ 'BƆGƲ 23: BNT96
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Bete New Testament © Bible Society of Côte d'Ivoire 1996
