मती 21
21
जेरुसलेम रे ईसु वेजो रआ खुसी
(मरकुस 11:1–11; लुका 19:28–38; जोहन 12:12–19)
1ईसु जोटोः हुँनि रेनकु चेला जब जेरुसलेम ठँव रआ जयतुन पहार रआ सटले बयतफगे सोदोर लेनाकु दो, बरिया चेलाकिन नोंका हुकुमवा केते बिदा लिड्किनय 2चि, “ठँव रआ डीही रे सेनबन जोटोः होंडे सेन तोरान मियड् गधा तोल लेनी ञमोअय। हुँनि तुली छउवाते हों ञमोअय। हुँनि रड़ा केते इञः ठँवरे अगुइबन। 3अगर ओकेकुन चितानकुन कथावाबन दो हुँनि कथा वायबन, ‘परभु तआ नुई रआ दरकार इदानआँ।’ तब हुँनि झटहेले रड़ा गोदेयय।”
4नोंका हिना तआ होयावलेना चि परमेसर पड़ा एतेन दुखमाय अवलाकु रआ नोआँ बचन पुरायोः
5 #
जख 9:9
“सियोन नगर रेनि मइयाँ कथावाइपे,
ञेलेमी अमः रेनि राजा अमः ठँवरे वेजो गोनय!
हुँनि सोझा इदानियाँ, हुँनि दो गधा छउवा तेङ रे दुड़ूः कोते वेजोगोनय,
आँ गधा छउवा तेङरे दुड़ूः तनय जे काम करेक अवला जनावर रेनि छउवा हके।”
6तब हुकिन चेला सेनोः यनाकिन जोटोः जे लेका ईसु कथा दोहोलअय हेंका लआकिन; 7हुकिन गधा जोटोः छउवाते अगुकेते हुँनि तेङ रे अपन गेंदराः डबना लआकु जोटोः ईसु हुँनि तेङ रे दुड़ूः लेनय। 8भीड़ रेनकु अगम होड़ अपन गेंदराः होरा रे बिल लआकु जोटोः थोड़ेः एकेन होड़ काट रआ डाँड़ माः अगुकेते परिघावी तआ होरा रे बिल लआकु। 9#सिरिञ 118:25,26ईसु रआ मड़ाङ रे से-सेनकु जोटोः तयोम एतेन वेजोःकु गोटे होड़ नोंका नारा लगाव यते दोहोनाकु,
दाऊद होपोन रआ “होसाना!
परभु रआ ञुमुन ते जे वेजोअय बढ़ियाँ इदानियाँ।
जे परभु सिरमा रिया हुँनि रआ होसाना!”
10जब ईसु जेरुसलेम रे सेनलेनय दो गोटा सहार रे हलचल यना। होड़कु सोधव ओपड़ेञोन दोहोलेनाकु, “नुई ओके हके?”
11होड़कु ही उतारा एम यते दोहोलेना, “नुई गलील परदेस रआ नासरत सहार रेनि परमेसर पड़ा एतेन दुखमाय अवला ईसु हके।”
सेंड़ा बिनती ओड़ाः एतेन के-केजाकु उडुङ
(मरकुस 11:15–19; लुका 19:45–48; जोहन 2:13–22)
12ईसु सेंड़ा बिनती ओड़ाः रआ राच रे बोलो लेनय जोटोः जे होंडे किरिञ केजा यते दोहोलेनकु, हुँकू बहराते उडुङ लिड्कुअय। ढिबवा बदलाकु रआ टीबुल जोटोः पेरवाँ केजाकु रआ मचिया उलटाव लअय। 13#जसा 56:7; जिर 7:11जोटोः हुँकू कथावा लिड्कुअय, “जे लेका परमेसर रआ बचन रे ओल लआ इदानआँ, ‘इञः रआ ओड़ाः बिनती ओड़ाः कहालवओ। बकिन आपे दो नोआँ रे-रेज्कु रआ लोपाः पे बनाव केदा।’”
14सेंड़ा बिनती ओड़ाः रे अन्धरा, जोटोः लंगड़ाकु ईसु ठँवरे वेज्लेनाकु। जोटोः हुँकू ईसु नपाय लिड्कुअय। 15जब मुध पुरोहित जोटोः परमेसर रआ बचन सि-सिखावकु हुँनि एतेन चिन-चमतकर ञेल लआकु जोटोः कोड़ा सेंगोज्कु सेंड़ा बिनती ओड़ाः रे “दाऊद होपोन रआ होसाना!” धन्य रआ नारा लगावे अयुम लिड्कुअकु दो कयरव कनते। 16#सिरिञ 8:2ईसु कथावा लआकु, “तना अमः अयुम यतेअम नुकु चितानकु मेन यतेआ?”
ईसु हुँकू कथा रुवाड़वा लिड्कुअय, “आँ, अयुम यतेअइञ। चिताना आपे नोंका कपे पढ़ावतना, ‘आपे सेंगोज्कु जोटोः दुद ञुकू रआ अहा ते महिमा ठहराव तड्कुअय?’”
17नुमेन कथाकेते हुँकू बायअटु लिड्कुअय जोटोः सहार एतेन उडुङ कनते हुँनि बयतनियाह रे सेनलेनय। जोटोः होंडे रात बिताव लअय।
ईसु अंजीर काट सरपाव लअय
(मरकुस 11:12–14,20–24)
18ञीन्दवात रे ईसु सहार रुवाड़ोन दोहोनय बेरा हुँनि रंगिज् लिदिया। 19होरा बट रे हुँनि अंजीर रआ काट ञेल केते होना ठँवरे सेनलेनय, होना काट रे हुँनि सेकम रआ अलावा चितानहों काय ञमलआ। जोटोः होना काट कथावा लअय, “अमः एडे कहियो एरो जो लेना!” जोटोः होना अंजीर काट हेनेन बेरा रोहोड़यना।
20चेलाकु होना ञेल केते तजूक लेनाकु जोटोः कथा लआकु, “नोआँ अंजीर काट झटहेले चिलका ते रोहोड़यना?”
21 #
मती 17:20; 1 कोरि 13:2 ईसु हुँकू कथावा लअय, “इञः सनारी आपेञ कथावा यना। अगर आपे सारीयोनापे जोटोः कपे संका यते दो। जे इञः अंजीर काट सुधा कराव लआञ सिरीप होंका ही कोवन बकिन आपे नोआँ पहार पे कथावा, ‘रचागोमी जोटोः समुदार रे सेन डुबाः गोमी’ दो होना हेंका होयावओ। 22जोटोः जे चिताना आपे सारी कोते बिनती रे कोयेअपे, होना आपे तआ ञमोआँ।”
ईसु रआ अधिकार रआ सवाल
(मरकुस 11:27–33; लुका 20:1–8)
23ईसु सेंड़ा बिनती ओड़ाः रे सेन कनते सिछा एम यते दोहोलेनय, दो मुध पुरोहितकु जोटोः जहुदी होड़कु रेनकु नेताकु हुँनि ठँवरे वेज् कनते कथा लआकु, “नोआदर ओकेरआ हाक ते अमः कराव यातेअम? अमः ओके नोआँ हाक ओवा तड्मिआँ?”
24ईसु हुँकू उतारावा लअय, “इञः हों आपे मियड् सवाल सोधव यातपे अइञ, अगर आपे नोआँ रआ जबाब ओवाञपे, दो इञः हों बतलाव वेएञ चि इञः ओका हाक ते नोआदार कराव यतेअइञ। 25जोहन रआ बतिसमा ओका रआ दोहोलेना? सिरमा रआ चि होड़कु रआ?”
हुँकू अकु-अकु कथा ओपड़ेञ केते कथायते दोहोलेनाकु, “अगर अबुन कथायबुन, ‘सिरमा पड़ा एतेन,’ दो नुई अबुन सोधव बुनय, ‘फिन हुँनि तेङ रे चितान तआ कपे सारी लेना?’ 26बकिन अगर अबुन कथायबुन ‘होड़ पड़ा एतेन,’ दो अबुन तआ होड़कु रआ बोर इदानआँ चितानतआचि हुँकू जोहन परमेसर पड़ा एतेन दुखमाय अवला होड़ मनावियाकु।” 27हिनाते हुँकू ईसु उतारावा लआकु, “आले कले ठुवावना।”
हेंका ईसु हों हुँकू कथावा लअय, “तब इञः हों एरोइञ बतलाव लेए इञः ओका हाक ते नोआदार कराव यतेअइञ!”
बरिया कोड़ा होपोनकिन रआ कथनी
28“अछा बतलावेपे आपे रआ चितान बिचार इदानआँ? मियड् होड़ रेनकिन बरिया कोड़ा होपोन दोहोलेना। हुँनि सेंड़ाई एडे सेन कनते कथालअय, ‘बाबु तीहिञ इञः रआ अँगुर बिठा रे जू सेन कोते कामेमी।’ 29बकिन कोड़ा होपोन ते कथा लआ, ‘इञः रआ हिछा कोनाआँ’ बकिन हुँनि रआ मन तयोम ते रुवाड़ लअय जोटोः सेनोः लेनय। 30फिन हुँनि मंझिला होपोन ते एडे सेनलेनय, जोटोः हेंका कथालअय, होपोन ते कथा लआ ‘आँ,’ हाजुर सेनाइञ, बकिन हुँनि काय सेनलेना। 31अब बतलावेपे जे अपाते कथा लआ होना, ओके अयुमवा लअय?”
हुँकू कथा लआकु, “पहिल रेनि।”
ईसु हुँकू कथावा लअय, “इञः आपे एडे सनारी कथायतेअइञ मलगुजारी अँगावकु जोटोः बे-लाज काम करावकु परमेसर रआ राइज रे आपे एतेन पहिल रे सेनाकु। 32#लुका 3:12; 7:29,30नोंका इञः हिना तआ कथा यतेअइञ, चितानतआचि बतिसमा एमी जोहन आपे तआ धरम रआ सही होरा बतलाव तआ वेज् दोहोलेनय, जोटोः आपे हुँनि तेङ रे कपे सरीलेना बकिन मलगुजारी अँगावकु जोटोः बे-लाज काम करावकु सारी लेनाकु। आपे हुँनि ञेल लिदियापे सेकरो रे मन कपे रुवाड़ लआ जोटोः न ही हुँनि तेङ रे सारी लेनापे।”
सझेदारी गिरहातकु रआ हुडिञ गाम
(मरकुस 12:1–12; लुका 20:9–19)
33 #
जसा 5:1,2 “मियड् जोटोः हुडिञ गाम अयुमेपे, मियड् गिरहात दोहोलेना। हुँनि अँगुर रआ मियड् बिठा एर बनाव लअय। जोटोः होना रआ चावगिरदा एर घोरान लअय, जोटोः रास उडुङ तआ हाउदा एर बनाव लअय, जोटोः ओगरायोः तआ मचा हों एर बनाव लअय, तब हुँनि सझेदारी रे हटिञ कोते एटाः देस ते सोनोः यानय। 34जोओ गोड् बेरा वेज्लेनय, तब बगान मलीक गिरहात एडे अपन बन्धुवाकु बिदायय ताकि हुँनि अपन हिसा अँगुर अगुयाय। 35बकिन गिरहातकु हुँनि रेनकु बन्धुवा सब् लिड्कुआकु। ओके दो हुमाः लिड्कुअकु, ओके दो दीरी ते ढेचोम लिड्कुअकु, जोटोः थोड़ेः एकेन दो गोज् लिड्कुआकु। 36जोटोः मिसा हुँनि पहिल एतेन अगम बन्धुवा बिदा लिड्कुअय। गिरहातकु हुँकू सुधा हों हेंका बेवहार लआकु। 37अखरी रे हुँनि नोंका सोचाव केते अपन कोड़ा होपोन बिदालअय चि, ‘हुँकू इञः रेनि होपोन रआकु इजाते।’ 38बकिन हुँकू गिरहातकु अकु-अकु दुखमा लेनाकु, ‘नुई दो मलीक रेनि हकदार हके, एला नुई गोजेयाबुन जोटोः हुँनि रआ हाक हथियावेअबुन!’ 39तब हुँकू हुँनि अँगुर बिठा एतेन बहरा उडुङ केते गोज् लिदियाकु।”
40“आपे चिलकापे सोचावेआ जब हुँनि अँगुर बिठा रेनि मुवार वेजोअय दो हुँकू गिरहातकु तुली चितानय चिलकाआ?” 41हुँकू ईसु कथावा लिदियाकु, “हुँनि हुँकू गिरहातकु एर गोज् कुअय जोटोः अपन अँगुर बिठा रआ हिसा एटाः गिरहातकु ओवा कुअय। जे ठीक बेरा रे खेती रआ हिसा हटीञेआकु हीकु तआ ओवा कुअय।”
42 #
सिरिञ 118:22,23 ईसु हुँकू कथावा लअय, “चिताना आपे धरम पोथी रे कपे पढ़ावतना?
“‘जे दीरी ओड़ाः बनाव अवला राज मिस्त्रीकु बेकमा समझाव लेनाकु,
हेनेना दीरी कोना रआ कोर पड़ीलेना।
नोआँ परभु रआ काम हके,
जोटोः अबुन रआ नजाइर रे अचराज इदानआँ!’”
43“हिना तआ इञः आपेइञ कथावा यना, परमेसर रआ राइज आपे एतेन रेज् एंडाया, जोटोः जे जाइत हुँनि रआ राइज मोताबिक सेनेअकु हुँकू होड़ तआ ओवा कुअय 44जे नोआँ चटाइन रे ञुरो अकु, हुँकू टुकरा-टुकरा योओकु जोटोः अगर नोआँ चटाइन ओके तेङ रे ञुरोआ दो हुँकू गेजेरोओकु।”
45जब मुध पुरोहित जोटोः फरीसीकु ईसु रआ गोटा हुडिञ गाम अयुम केते समझाव यनाकु चि हुँनि अबुन रआ बिसय रे कथा यतेअय। 46तब हुँकू हुँनि सब् तआ अराव लेनाकु बकिन होड़कु बोरोवा लआकु, चितानतआचि ईसु परमेसर पड़ा एतेन दुखमाय अवला होड़ हके मेनकेते हुँकू समझावओन दोहोनाकु।
നിലവിൽ തിരഞ്ഞെടുത്തിരിക്കുന്നു:
मती 21: BIX
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 NLCI CC BY-NC-ND 4.0
