मती 22
22
बियाह भोज रआ हुडिञ गाम
(लुका 14:15–24)
1ईसु मिसा जोटोः मियड् हुडिञ गाम हुँकूइ कथावा लआ, हुँनि कथालअय अयुमेपे। 2“सिरमा रआ राइज हुँनि राजा लेकाआ जे अपन कोड़ा होपोन रआ बियाह रे भोज खियाव लिड्कुअय। 3हुँनि नेवता लिड्कु होड़कु राअ् तआ अपन बन्धुवाकु बिदालअय, बकिन हुँकू वेजोः तआ ककु अराव लेना। 4राजा जोटोः एटा बन्धुवा बिदालअय, जोटोः हुँनि कथावा लिदियय, ‘गोतियाकु कथावाकुमी, अयुमेपे इञः आपे तआ भोज तेयार केदाइञ। इञः रेनि हडा जोटोः असुल लिड्कु जनावर गेड् किड्कुआ। जोटोः गोटा तेयार यना। बियाह रआ भोज रे वेजोःपे!’ 5गोतियाकु हुँनि तेङ रे ककु धेयान लआ दो हुँकू अपन ओत रे काम तआ सेनोः यनाकु; ओके दो अपन-अपन काम धंधा रे सेनोः यनाकु, 6जोटोः थोड़ेः एकेन होड़ दो राजा रेनकु बन्धुवा सब् केते थपड़ाव-थपड़ावते हुमाः गोज् किड्कुअकु। 7राजा मुरुक कयराव यनय, जोटोः हुँनि अनेज् रेनकु पलटनकु बिदा केते हुँकू गो-गोज्कु गोज् किड्कुअकु, जोटोः हुँकू रआ सहार रे सेंगेल लगाव केदाकु। 8तब राजा अनेज् बन्धुवाकु कथावा लअय, ‘बियाह रआ भोज दो तेयारा बकिन जे गोतियाकु राअ् दोहोलिड्कुआ, हुँकू लायक कुनीकुआ। 9हिना तआ अब चौराहा रे सेनपे जोटोः जे इमेन ञमोअकु गोटे होड़ बियाह रआ भोज रे राअ् अगुकुपे।’ 10बन्धुवाकु संडक रे सेन लेनाकु जोटोः बढ़ियाँ चहे बुरा होड़ जे ञम लेनाकु गोटे समटाव केते राअ् अगु लिड्कुअकु। जोटोः बियाह रआ मड़वा रे गोतियाकु पेरेज् यनाकु।”
11बकिन जब “राजा गोतियाकु ञे-ञेल वेज्लेनय दो राजा रआ नजाइर मियड् होड़ तेङ रे पड़ाव लेना जे बियाह रआ गेन्दराः काय होड़हड् दोहोलेना। 12राजा हुँनि कथावा लअय, ‘ओय संघाइत, बियाह रआ गेन्दराः बेगर होड़हड् ते चिलका रे नोंडे वेज् तनाम?’ हुँनि होड़ सच मच मटियाव यानय। 13#मती 8:12; 25:30; लुका 13:28तब राजा अनेज् धँगड़कु कथावा लअय, ‘नुई रआ अती-जँगा तोल केते जे एडे होड़कु इयाम यतेअकु जोटोः डटा रेडेज् यतेअकु बहरा ञोता रे गिडीपे।’”
14चितानतआचि राअ् लिड्कु दो “अगम इदानकुआ बकिन रींबड़ लिड्कु थोड़ेः केनाकु।”
मलगुजारी एमे रआ बारे सवाल
(मरकुस 12:13–17; लुका 20:20–26)
15तब फरीसीकु होना बेरा सेन कोते अकु-अकु रे बिचार लआकु, चि अबुन चिलका ईसु अनेज् रआ दुखमा रे ही बझाविया। 16हुँकू ईसु ठँवरे हेरोद राजा देंगा अवला गतिकु, जोटोः अपन चेलाकु नोआँ सवाल सोधव तआ बिदा लिड्कुअय। हुँकू ईसु कथावा लिदियाकु, “ओय गुरु, आले नोआँ ठुवा यतेअले चि अमः सनारीम दुखमाया जोटोः अमः सनारी परमेसर रआ होरा रआ सिछा एमेअम। जोटोः अमः एटाःकु चितानकु सोचावे, होना रआ चितान फिकीर कोनाआँ, चितानतआचि अमः ओकेरआ मेड्-अहा ञेल कोते कम दुखमायोओ। 17हिना तआ अमः रआ बिचार रे चिलकाआ, आले बतलाव वालेमी कयसर तआ मलगुजारी एम उचित इदानआँ चि कोवन?”
18ईसु, हुँकू रआ चलँक ठुवा केदय, दो हुँनि कथालअय, “ओय कपटीकु! आपे इञः चितान तआपे परखावीञ तआ अराव तना? 19मियड् चंदी रआ ठड़रा बतलाव वाइञपे जेकर ते आपे मलगुजारी एमेअपे!”
जब हुँकू मियड् चंदी रआ ठड़रा अगु लआकु, 20तब हुँनि हुँकू कथावा लअय, “नोआँ रे छापा जोटोः ञुमुन ओकेरआ इदानआँ?”
21हुँकू हुँनि उतारावा लिदियाकु, “रोमी राजा कयसर रआ हके।”
ईसु हुँकूइ कथावा लआ, “दो जे रोमी राजा रआ हके होना रोमी राजा ओवायपे, जोटोः जे परमेसर रआ हके, होना परमेसर ओवायपे।”
22नोआँ अयुम केते हुँकू अचराज रे पड़ाव यनाकु जोटोः ईसु बयअटु कोते होंडे एतेन सेनोः यनाकु।
जिवेड्-बिरीदोः रआ बारे सवाल
(मरकुस 12:18–27; लुका 20:27–40)
23 #
बि.काम 23:8
हेनेन हिला थोड़ेः एकेन सदुकीकु जे जिवेड् बिरीदोः ककु सरीयोन दोहोलेना, ईसु ठँवरे वेज्लेनाकु, जोटोः हुँनि सोधव लिदियाकु, 24#नियम 25:5“ओय गुरु, मुसा दो कथा तड्अय अगर ओकेकुन बेगर सेंगोज् जनमाव ते गोज् यानय, दो हुँनि बोकोते रंडियाही तुली बियाह कोते अनेज् बोयहा तआ सेंगोज् जनमाव चही। 25आले रआ तला रे सात बोयहा दोहोलेनाकु, पहिल रेनि सुधा बियाह लेनय तयोम ते बेगर सेंगोज् होयावते गोज् यनाय, जोटोः सेंगोज् ककु होयाव दोहोलेना करने मंझिला बोकोते तआ गोज् बयअटु लिदियय। 26हेंका मंझिला, संझिला जोटोः सातो बोयहा बेगर सेंगोज् होयाव तिकु गोज् यना। 27जोटोः गोटे गोज् कन तयोम हुँनि लंञी हों गोज् यानय। 28अब आले रआ सवाल इदानआँ चि जिवेड् बिरीड् कोते हुँकू सातो मे से हुँनि ओके रेनि लंञी पड़ीयोओय? चितानतआचि हुँनि दो गोटे रेनि लंञी पड़ी दोहोलेनय।”
29ईसु हुँकू कथा रुवाड़वा लअय, “आपे न दो परमेसर रआ बचन पे ठुवावना न दो परमेसर रआ सकती काम, हिना तआ आपे गलती बिचार दोहोलआपे। 30फिन जिवेड् बिरीड् कोते न दो मरदनाकु बियाहकोः जोटोः न लंञीकु बियाहकु तआ एम किकु, बकिन हुँकू सिरमा दुत लेकायोओकु। 31बकिन गोज् कोते जिवेड् बिरीदोः रआ बारे रे आपे तआ जे परमेसर कथा तड्अय, चिताना नोआँ बचन कपे पढ़ावतना? 32#उठलु 3:6‘इञः अबराहम रेनि परमेसर, इसहाक रेनि परमेसर, जोटोः जाकुब रेनि परमेसर हके।’ हुँनि गोज्लेनकु रेनि नालगे बकिन जीवेड् लेनकु रेनि परमेसर हके।”
33जब होड़कु नोआँ अयुम लआकु दो ईसु रआ सिछा ते अगम तजूक यनाकु।
गोटा एतेन सेंड़ा हुकुम
(मरकुस 12:28–34; लुका 10:25–28)
34जब फरीसीकु अयुम लआकु चि ईसु अपन रआ कथायते सदुकीकु रआ अहा हरोब् केदय दो हुँकू मी एडे जवार लेनाकु, 35हुँकू मे से मियड् जहुदी धरम पोथी सि-सिखावकु ईसु परखावी रआ उपाय ते हुँनि सोधव लिदियय। 36“ओय गुरु, मुसा रआ नियम रे गोटा एतेन सेंड़ा हुकुम चिताना हके?”
37 #
नियम 6:5
ईसु हुँनि कथावा लअय, “‘अमः अपन पुरा मन ते, अपन पुरा हिरदाय ते जोटोः अपन पुरा जीवि ते परभु अपन परमेसर सुधा दुलारेमी।’ 38नोआँ गोटा एतेन पहिला जोटोः सेंड़ा हुकुम हके। 39#लेबी 19:18जोटोः ने-नेन लेकाआ दुसरा हुकुम, ‘अपन खुड़ी ठँव तनकु सुधा नोंका दुलार कुमी जे लेका अमः अपन-अप दुलार रेअम।’ 40#लुका 10:25–28मुसा रआ नियम जोटोः परमेसर पड़ा एतेन दुखमाय अवलाकु रआ पोथी रे जे ओल लआ इदानआँ, होना गोटा निआँ बरिया हुकुम ते टिकाव तना।”
मसी ओके रेनि होपोन हके
(मरकुस 12:35–37; लुका 20:41–44)
41ईसु जवार लेनकु फरीसीकु तआ मियड् सवाल सोधव लिड्कुअय, 42“मसी रआ बारे आपे चिलकापे सोचावेए हुँनि ओके रेनि बंसज हके?”
हुँकू हुँनि कथा रुवाड़वा लिदियाकु, “दाऊद रेनि।”
43तब ईसु हुँकू कथा रुवाड़ लअय, “जब दाऊद आतमा रआ अगवाइते, हुँनि चितान तआ दाऊद ‘परभु’ मिनगिअय?,
44 #
सिरिञ 110:1
“‘परभु दो इञः रेनि परभु एडे कथालअय,
जबरे इञः अमः रेनकु बयरी अमः रआ कबजा रे कइञ अगुकु
इञः रआ जोम होरे दुड़ूः गोमी।’”
45“अगर दाऊद हुँनि ‘परभु मेनवाइयाय,’ दो दाऊद रेनि खनदान मसी चिलकय होयव कोओ?”
46हुँनि रआ जबाब ते ओके हों ककु उतारा एम बुजा लआ। जोटोः ना दो हेनेन हिला एतेन ओके हों जोटोः हुँनि सवाल सोधावी तआ ककु डीड लआ।
നിലവിൽ തിരഞ്ഞെടുത്തിരിക്കുന്നു:
मती 22: BIX
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 NLCI CC BY-NC-ND 4.0
