मती 23
23
परमेसर रआ बचन सि-सिखावकु जोटोः फरीसीकु एतेन चँड़चित
(मरकुस 12:38–40; लुका 11:37–52; 20:45–47)
1तब ईसु अनेज् चेलाकु जोटोः भीड़ कथावा लअय। 2“जहुदी परमेसर रआ बचन सि-सिखावकु जोटोः फरीसीकु मुसा रआ गदी रे दुड़ूः तनाकु। 3हिना चलते जे आपेकु कथावा हिना करावे जोटोः पलानेपे; बकिन जे हुँकू काम करावेआकु हिना अलोपे करावके। चितानतआचि हुँकू नोंका कथायकु अकु खुद ककु करावेआ। 4हुँकू अगम भारी बोझा तोल केते होड़कु रआ खंद रे तेंगड़ा वाकु अकु होना अलगावे तआ मसकिला, बकिन खुद अपन अती अँगरी तेहों मदाइते तआ ककु चहावओ। 5#मती 6:1; नियम 6:8; लेखा 15:38हुँकू जे कामेअकु होड़कु एरञेल तआ कामेअकु, जोटोः हुँकू अकु गेन्दराः रआ अँचड़ा रे बचन ओल केते समाङ रे जोटोः सुपु रे तोलोगोन दोहोनाकु जोटोः पोसक रे झबु जिलिङ यते दोहोलेनाकु! 6जोटोः हुँकू समाजोः घनी हों मुख-मुख ठाँव चहावओकु, जोटोः बिनती ओड़ाः रे मुख-मुख ठँव रे दुड़ूः पसींदेएकु, 7जोटोः बाजार ते जोहार-जोहार अ-अयुमकु पसिंदेःए, जोटोः होड़कु एतेन ‘गुरु,’ एर कथायोः हुँकू तआ बढ़ियाँ सचायोःओ। 8बकिन होड़कु एतेन आपे अपन अप ‘गुरु,’ अलोपे एर कथा-कोः। चितानतआचि आपे रेनि गुरु दो सिरीप मियड् इदानियाँ। आपे गोटे कोड़ा बोयहा कुड़ी बोकोञ मियड् इदानपेआ। 9धरती रे ओके हों अलोम ‘बबावा’ किकु, चितानतआचि अमः रेनि मियड् ठउका बबा इदानियाँ जे सिरमा रे इदानियाँ। 10जोटोः न होड़कु अमः ‘अगुवाकु,’ कथावम चितानतआचि अमः रेनि मियड् ठउका अगुवा इदानियाँ हुँनि मसी हके। 11#मती 20:26,27; मर 9:35; 10:43,44; लुका 22:26आपे मे से सेंड़ाअँय हुँनि आपे रेनि धँगड़ पड़ीयोः। 12#लुका 14:11; 18:14चितानतआचि जे अपन अप सेंड़ा कथायोओय, हुँनि हुडिञ बनाविया जोटोः जे अपन अप हुडिञ कथायोओय, हुँनि गोटे एतेन सेंड़ा बनाविया।”
सात चेतावन
(मरकुस 12:40; लुका 11:39–42,44,52; 20:47)
13“ओय कपटी धरम पोथी सि-सिखावकु! जोटोः फरीसीकु! आपे तआ ओह! आपे सिरमा राइज रआ दुवार होड़कु तआ सींग यतेअपे, जे सिरमा सेन तआ कोसिस यतेअकु हुँकू मना यतकु आपे जोटोः न खुद आपे सेन तआ पे कोसिस यतेआ!” 14#23:14 नोआँ 14 पद गोटा एतेन बढ़ियाँ बाही रे नोआँ कोनाआँ।(“ओय ढोंगी जोटोः कपटी परमेसर रआ बचन सि-सिखावकु! आपे तआ ओह! आपे रंडियाहीकु रआ ओड़ाः कबजा एंडायाकु, जोटोः एरञेञेल तआ जिलिङ-जिलिङ बिनती इञोअपे हिना तआ आपे तआ अगम डन्ड ञमेअकु।”)
15“ओय ढोंगी जोटोः कपटी परमेसर रआ बचन सि-सिखावकु जोटोः फरीसीकु! आपे तआ ओह! मियड् जहुदी धरम मनव अवला होड़ अपन बनावी तआ धरती जोटोः समुदार परोमेआपे। जोटोः जब हुँनि चेला पड़ीयोओय दो हुँनि आपे एतेन हों बगरा नरक रेनि बनाविया पे!”
16“ओय अन्धरा नेताकु! आपे तआ ओह, आपे कथायपे चि, ‘अगर ओकेकुन सेंड़ा बिनती ओड़ाः रआ किरया जोम यतेअपे दो चितानहों कोवन, बकिन जे सेंड़ा बिनती ओड़ाः रआ सोना रआ किरया जोमेअय दो होना रे तोल एंडायोओय।’ 17अरे अन्धरा मुरखकु! सेंड़ा चिताना हके? सोना चि होना सेंड़ा बिनती ओड़ाः, जेकर से सोना पबितर बनाव लआ इदानआँ? 18आपे नोंका हों कथायपे ‘अगर ओकेकुन बेदी रआ किरया जोम यते दो नोआँ रआ चितान मतलोब हों कोनाआँ; बकिन जे वेदी रे राकब् लआ दान रे किरया जोम यते, दो हुँनि अनेज् रआ किरया ते तोल एंडायोओय।’ 19अरे अन्धराकु! चिताना सेंड़ाआँ, राकब् लआ दान चि वेदी जेकर से होना राकब् लआ दान पबितर पड़ी योना? 20हिना तआ जे वेदी रआ किरया जोमेअय हुँनि वेदी रआ जोटोः वेदी रे राकब् लआ रे हों किरया जोमेअय; 21जे होड़ सेंड़ा बिनती ओड़ाः रआ किरया जोम यतेअय, हुँनि सिरीप सेंड़ा बिनती ओड़ाः रआ ही कोवन बकिन संघे संघे होना भीतारे दोहोन अवला परमेसर सुधा हों किरया जोमेअय; 22#जसा 66:1; मती 5:34जोटोः जे सिरमा रआ किरया जोमेअय, हुँनि परमेसर रआ राजगदी रआ जोटोः होंडे दुड़ूः लेनि रआ हों किरया जोमेअय।”
23 #
लेबी 27:30
“ओय ढोंगी जोटोः कपटी धरम पोथी सि-सिखावकु जोटोः फरीसीकु! आपे रआ जे चितानहों इदानआँ, होना रआ दसवाँ हिसा, जे एडे रे चि आपे फुदेना, सोंफ जोटोः जीरा हमाः रआ दसवाँ हिसा परमेसर तआ एमेअपे हिना रे हों आपे मुसा रआ नियम रआ दरकार दुखमा नेयय, माया जोटोः सारी बय एंडायपे, आपे नोआदार हों करावेते जोटोः होना हों करावे चही दोहोलेना। 24ओय अन्धरा नेताकु! आपे दाअ् ते सिंकड़ी दो छना यापे बकिन ऊँट उड् गोदेयापे!”
25“ओय ढोंगी जहुदी कपटी परमेसर रआ बचन सि-सिखावकु! जोटोः फरीसीकु! आपे तआ ओह। आपे कटोरा जोटोः थाड़ी तेङ-तेङ एतेन दो मंजावेआपे बकिन भीतरी दो रे-रेज् जोटोः मौजमस्ती ते पेरेज् तनापे। 26ओय अन्धरा फरीसीकु! आपे अपन रआ थाड़ी जोटोः कटोरा भीतरी एतेन मंजावेआपे तब बहरा रे हों सुध योओ! 27#बि.काम 23:3ओय ढोंगी जोटोः कपटी परमेसर रआ बचन सि-सिखावकु जोटोः फरीसीकु! हाय आपे एडे। आपे लेवार लआ मरघाट लेका सुभरित ञेलोअपे, बकिन भीतरी रे गोज् होड़कु रआ जङ जोटोः गोटा लेकन रआ छुत ते पेरेज् तनापे। 28हेनेन लेका आपे हों बहरा एतेन दो धरमी ञेलोअपे बकिन भीतरी कपट जोटोः अधरम ते पेरेज् तनापे।”
29“ओय कपटी परमेसर रआ बचन सि-सिखावकु जोटोः फरीसीकु! आपे एडे हाय! आपे परमेसर पड़ा एतेन दुखमाय अवला होड़कु रआ मरघाट बनावेएपे जोटोः धरमीकु रआ मरघाट बनाव केते सिंगरावेएपे; 30जोटोः कथायपे, अगर आले अपन बबा-ताताकु रआ बेरा रे जीवेड् दोहोलेन, दो आले परमेसर पड़ा एतेन दुखमाय अवला होड़कु हुमाः गो-गोज् रे हुँकू तुली अलोपे हिसेदार लेन। 31नोंका आपे अपन अप गोवाही एम यतेअपे चि आपे हुँकू रेनकु जयपुइ हके, जे परमेसर पड़ा एतेन दुखमाय अवला होड़कु गो-गोज्कु हके! 32अब जे आपे रेनकु बबा-ताताकु बुहड़ी दोहोलआकु, होना पुरायपे!”
फरीसीकु जोटोः परमेसर रआ बचन सि-सिखावकु तआ डन्ड
33 #
मती 3:7; 12:34; लुका 3:7 “ओय कराइट जोटोः बिञ रेनकु होपोन! आपे नरक रआ डन्ड एतेन चिलका बंचाव सकावओपे? 34हिना तआ आपे बतलाववा यापेअइञ चि इञः आपे ठाँवरे परमेसर पड़ा एतेन दुखमाय अवला होड़कु, बुधिमानकु जोटोः परमेसर रआ बचन सि-सिखावकु बिदा यतकुअइञ, आपे हुँकू मे से अगम हुमाः गोज् कुआपे, जोटोः अगम कुरुस रे राकब् कुआपे। थोड़ेः एकेन आपे अपन रआ धरम सभा रे कोड़रा ते हुमाः कुआपे जोटोः मियड् सहार एतेन एटाः सहार हुँनि रआ पीछा यापे। 35#अँगन 4:8; 2 इति 24:20,21बेगुनाह हबिल एतेन बिरकियाह रेनि होपोन जकरयाह हमाः जेकर-जेकर रआ मयाम नोआँ धरती रे तू लआ हुँकू गोटे धरमीकु रआ मयाम रआ डन्ड आपे तेङ रे होयावओ। बिरकियाह रेनि होपोन जकरयाह सेंड़ा बिनती ओड़ाः जोटोः वेदी रआ तला रे गोज् लिदियाकु। 36इञः आपे सनारी कथावा यतपेअइञ चि नोआँ गोटा दुखमा रआ डन्ड नोआँ जुग रेनकु होड़ भोगावेआकु!”
जेरुसलेम रेनकु होड़कु तआ ईसु दुखित लेनय
(लुका 13:34–35)
37“ओय जेरुसलेम! ओय जेरुसलेम! आपे जे परमेसर पड़ा एतेन दुखमाय अवला होड़कुपे गोज्आ, जोटोः आपे एडे बिदा लिदी, हुँनि एडे टुकु गिडीयाम। इञः कइक धँव चहाव नइञ चि जे लेका सीम अनेज् सेंगोज् ते अनेज् डेना रे उकु कुआ, हेंका इञः हों आपे रीनकु होड़कु समटावञ चहावना, बकिन आपे नोंका कपे चहावना। 38#जिर 22:5ञेलेपे आपे रआ ओड़ाः पुरा उतुड़ केते बय एंडाया। 39#सिरिञ 118:26चितानतआचि इञः आपे कथावा यतपेअइञ चि नहाः एतेन जबरे आपे कपे कथाय, ‘बढ़ियाँ इदानिञा हुँनि जे परभु रआ ञुमुन ते वेजोअय,’ तब रे आपे इञः फिन ओका हिला हों एरोपे ञेल लिञा।”
നിലവിൽ തിരഞ്ഞെടുത്തിരിക്കുന്നു:
मती 23: BIX
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 NLCI CC BY-NC-ND 4.0
