मती 24
24
ईसु सेंड़ा बिनती ओड़ाः नास तआ आगमजानी लअय
(मरकुस 13:1–31; लुका 21:5–33)
1ईसु जब होना सेंड़ा बिनती ओड़ाः एतेन उडुङ कनते सेनो गोन दोहोनय चि हुँनि रेनकु चेलाकु हुँनि बिनती ओड़ाः रआ सेंड़ा-सेंड़ा बंगला एरञेले तआ वेज्लेनाकु। 2तब ईसु हुँकूइ कथावा लआ, “आपे नोआँ गोटा ञेल यतेअपे! इञः आपे सनारी कथावा यतपेअइञ, नोंडे मियड् दीरी तेङ रे एटाः दीरी एरो टिकाव लेना; गोटा तहास नहास एंडायोओ।”
3जब ईसु जयतुन पहार ठँवरे सोदोर कनते दुड़ूः दोहोलेनय, दो हुँनि एसकार ते दोहोलेनय घनी चेलाकु ठँवरे सेन कनते हुँनि सोधव लिदियाकु, “आले बतलाव वालेमी नोआँ ओका बेरा होयावओ,” जब अमः रुवाड़ोओम जोटोः नोआँ दुनियाँ रआ अखरी होयावओ दो चितान चिन होयावओ?
4ईसु हुँकू कथा रुवाड़वा लअय, “चँड़चित दोहोनपे! आपे ओके हों अलोकु भरमाव केपे। 5चितानतआचि अगम होड़ इञः रआ ञुमुन ते वेज् कोते अगम कथायकु ‘इञः मसी हके’ मेनकेते अगम होड़कु भरमाव कुआकु। 6आपे जब लड़ाइ रआ घोल जोटोः लड़ाइ रआ खभार पे अयुमेंए, अलोपे बोरोकोः, नोंका दो होयावओ ही बकिन नहाः अखरी का वेज्तना। 7जोटोः गोटे जाइत एटाः जाइत रआ बिरोद रे जोटोः मियड् राइज एटाः राइज रआ बिरोद होयावओ कथायकु। जोटोः ठाँव-ठाँव अकाल होयावोः जोटोः ओत हिलहोयोओ। 8बकिन नोआदर गोटा दुखमा दो सिरीप दुख रआ बुहड़ी होयावओ।”
9 #
मती 10:22
“होना बेरा होड़कु आपे एर सब् पेआकु जोटोः सताव पेआकु, जोटोः हुँकू आपे गोज् पेआकु। इञः ञुमुन चलते गोटे जाइत आपे सुधाकु बयरेआ। 10होना बेरा अगम होड़कु ठोकोर जोमेअकु; हुँकू एटाःकु एर सब् कुआकू जोटोः एक दुसरे रे घीनाव ओपड़ेञ ञोआकु। 11अगम परमेसर पड़ा एतेन दुखमाय अवला कथा केते ठ-ठकु पड़ीयोओकु, जोटोः अगम ठक कथाकेते अगम होड़कु बहकाव कुआकू। 12अधरम बढावओ चलते अगम होड़कु रआ दुलार घटावओ। 13#मती 10:22बकिन जे अखरी हमाः टिकाव ओय हिनी ही पाप एतेन बंचावओ। 14सिरमा राइज रआ बढ़ियाँ दुखमा गोटा दुनियाँ रे जोटोः गोटे जाइत रे तआ गोवाही रआ रुप ते परचारेए, तब ही अखरी होयावओ।”
महा संकट
(मरकुस 13:14–23; लुका 21:20–24)
15 #
दानि 9:27; 11:31; 12:11 “हिना तआ आपे ‘भय-भयान नास करावे अवला घीन चीज’ जे परमेसर पड़ा एतेन दुखमाय अवला होड़ दानिएल पड़ा एतेन कथा लआ, सेंड़ा बिनती ओड़ाः रआ पबितर ठँव रे तींगुनपे ञेले।” (पढ़ाव अवला नोआँ रआ माने खुद समझाव ओपे!) 16“तब जे होड़ जहुदिया रेकुआ हुँकू पहार पड़ाते ञीरे चही। 17#लुका 17:31जे अपन ओड़ाः रआ सड़िम रिया, हुँनि ओड़ाः भीतरी एतेन चितानहों इदी तआ ओतेत अलोय अड़गुकोः। 18जोटोः जे टइन्ड रीया हुँनि अनेज् गेंदराः इदी हों अलोय रुवाड़कोः। 19जे लंञी भारी गतार रिया चहे जेकर सेंगोज्कु दुद ञू यातेअकु, हुँकू लंञी तआ होना बेरा अगम कसाट होयावओ! 20बिनतीपे चि रेवेड़ बेरा रे चहे रुड़ुयोः हिला ञी-ञीर अलो होयावकोः! 21#दानि 12:1; दि.बचन 7:14चितानतआचि होना जुवार इसन बिपाइत होयावओ, जे हिला परमेसर दुनियाँ सिरजाव तड्अय होनाघनी एतेन तीहिञ हमाः का होयावतना, जोटोः न कहियो होयाव कोओ। 22अगर परभु होना दिन अलोय घटाव दोहोलेड् दो ओके होड़ हों एरोकु बंचावनाअने बकिन रींबड़ लिड्कु रआ चलते होना दिन घटाव तदय।”
23“अगर, होना बेरा ओकेकुन आपेकु कथावा, ञेलेपे, ‘मसी नोंडेया!’ चहे ‘होंडेया!’ दो अलोपे सारीकोः। 24चितानतआचि ठक मसी जोटोः परमेसर पड़ा एतेन दुखमाय अवला कथा केते ठ-ठकु अवला दिसतार रोओकु, जोटोः नोंकन-नोंकन चिन एरञेलेअकु जोटोः अचराज काम करावेआकु चि होयव सकावोओ रींबड़ लिड्कु हों बहकाव कुआकु। 25ञेलेपे इञः आपे पहिल एतेन ही चँड़चित दोहोन तआ बतलाववा केड् पेअइञ।”
26 #
लुका 17:23,24 “अगर ओकेकुन आपेकु कथावा, ‘ञेलेपे पहार रिया’ दो होंडे आपे अलोपे सेनकोः, ‘ञेलेपे हुँनि होना कोठली रे उकु तनय’ दो हुँकू रआ अलोपे सारीकोः। 27चितानतआचि जे लेका बिजली पुरुब एतेन पछिम रआ अगास हमाः लवकावओ, हेनका मनवाँ होपोन रआ वेजो हों होयावओ।”
28 #
लुका 17:37
“जे एडे मुरदा दोहोना, होंडे गिद जवारोआकु।”
29 #
जसा 13:10; जोवे 2:10,31; 3:15; दि.बचन 6:12;
जसा 13:10; हेज 32:7; जोवे 2:10; 3:15;
जसा 34:4; दि.बचन 6:13 “होना बेरा रआ बिपाइत रआ तुरात तयोम सीञ बोंगा ञोता एंडायोओय, ञीन्द बोंगा एरोय मरसाल लेना, जोटोः इपीलकु आकास एतेन ञुरो अकु जोटोः आकास रआ सकती काम हिलहोयोओ। 30#दानि 7:13; जख 12:10–14; दि.बचन 1:7होना बेरा मनवाँ होपोन वेजो रआ चिन आकास रे होयावओ; तब ओत रेनकु गोटे जाइत खोभराव-खोभराव ते इयामेआकु, जोटोः हुँकू मनवाँ होपोन अपन सकती रआ काम जोटोः बड़ाइ रे रिमिल एतेन वेजोः ञेलेयाकु। 31हुँनि अनेज् सिरमा दुतकु तुरही रआ अगम साडी तुली बिदाकुअय। फिन हुँकू चावगिरदा एतेन अगास रआ कोना-कोना एतेन, गोटा पड़ा एतेन अनेज् रींबड़ लिड्कु होड़ जवार कुआकू।”
नोआँ ओका हिला होयावओ
(मरकुस 13:28–31; लुका 21:29–33)
32“अंजीर काट एतेन हुडिञ गाम सिखावओपे। जब डाँड़ ते नरामोओ जोटोः पहुला योओ दो आपे ठुवायापे चि जेठ सोदोरयना। 33हेंका ही जब नोआँ घटनायोः ञेलेअपे दो समझाव ओपे चि होना बेरा सोदोरयना, दुवार ठँवरेआ। 34इञः आपे सुधा सनारी कथा यतेअइञ चि नोआँ जुग रेनकु होड़ रआ जिवेदोः घनी ही नोआँ गोटा दुखमा होयावओ। 35चहे आकास जोटोः धरती टलाव एंडायोओ, बकिन इञः रआ बचन उकेड् हों एरो टलावना।”
सिरीप परमेसर ठुवा वानय चि होना बेरा ओका हिला वेजोआ
(मरकुस 13:32–37; लुका 17:26–30,34–36)
36“होना दिन चहे होना जुवार रआ बारे ओके हों ककु ठुवावना; न सिरमा दुत जोटोः न होपोन। सिरीप परम बबा परमेसर ठुवावना। 37#अँगन 6:5–8जे लेका नूह रआ बेरा रे होयाव दोहोलेना, हेनेन लेका मनवाँ होपोन रआ वेजोः बेरा रे हों होयावओ। 38जे बेरा हमिज् नूह जहाज रे काय देज्ना, होना दिन हमीज् होड़कु जोमोः ञुयोः नाकु जोटोः हुँकू रे बियाह होयाव इञोःना, 39#अँगन 7:6–24जबरे दअ-प्रलय का वेज्लेना, जोटोः हुँकू जबरे गोटे काय तू इदी लीड्कु तब रे ओके तआ हों पता का चलाव लेना। मनवाँ होपोन रआ वेजो घनी हों हेनेन लेका होयावओ। 40होनाघनी खेत रे बारहोड़ का-कामकिन मे से मिहोंड़ अलगाविया जोटोः मिहोंड़ हेनेन रे बयेया। 41बरिया लंञीकिन जनता रिड्कीन मे से मिहोंड़ अलगाविया जोटोः मिहोंड़ हेनेन रे बय अटुया।”
42“हिना तआ जगल दोहोनपे चितानतआचि आपे कपे ठुवावना चि आपे रेनि परभु ओका हिला वेजोअय। 43#लुका 12:39,40बकिन नोआँ ठुवायापे चि अगर ओड़ाः रेनि मालिक ठुवा लेड् चि चोर ओका बेरा वेजोअय दो हुँनि जगल दोहोकनयअने जोटोः चोरकु अनेज् रआ ओड़ाः एरोय एर फोंगाःवा लिड्कुआने। 44हिना तआ आपे तेयार दोहोनपे, चितानतआचि जे बेरा आपे कपे सोचावेए हिना बेरा मनवाँ होपोन वेज् एंडायोओय।”
बढ़ियाँ धँगड़ जोटोः बाइमन धँगड़
(लुका 12:41–48)
45“दो सोचावेपे सारीयोः लेकानी जोटोः बुधिमान बन्धुवा ओके हके, जेके मुवार अनेज् ओड़ाः रेनकु बन्धुवाकु तेङ रे नेता ठहराव तदियय, ताकि सही बेरा रे मंडी ओवाकु। 46बढ़ियाँ इदानियाँ हुँनि बन्धुवा जब हुँनि रेनि मुवार वेज् कोते हेनेन लेकाय ञमें! 47इञः सनारी कथा यतेअइञ चि मालिक हुँनि अनेज् रआ गोटा धनखुरजी रआ जिमेदारी बनावियय। 48बकिन हुँनि बाइमन बन्धुवा अपन मन रे सोचावे चि इञः रेनि मुवार अगम दिन एतेन काय रुवाड़ोना, 49तब हुँनि अनेज् बन्धुवा गतिकु सुधा ठे-ठेंगा जोटोः मतवाड़कु सुधा जोमोः-ञूयोः बुहड़ी केदय। 50दो हुँनि बन्धुवा रेनि मुवार इसन दिन रे वेजोअय, जे हुँनि सोचाव हों काय सोचाव दोहोलआ जोटोः जे घनी पता हों का दोहोलेना। 51जोटोः हुँनि रेनि मुवार हुँनि अगम भारी दुख ओवायय जोटोः कपटीकु तुली हुँनि जोड़ावियय, जे ठँवरे होड़कु इयामेआकु जोटोः डटा रेडेजेआकु।”
നിലവിൽ തിരഞ്ഞെടുത്തിരിക്കുന്നു:
मती 24: BIX
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 NLCI CC BY-NC-ND 4.0
