Palamba’anna Pasuro’a I Yesus 10
10
I Petrus mawa Dongo Maamen lo’a i Kornelius
1Jaji di banua Kaisarea andian babaka seraan, asanna i Kornelius. I Kornelius dinen kapala’ tentara Roma. Asan rombongan tentaraan yang dakapala’iin, rombongan Italia. 2Daia dinen manyemba lo’a Alatala. Ia nanna samuana sama lalako’en di saona paduli tapat lo’a Alatala. Na’an sangari bado’ana. Kenang bea arapat bua manggulungina lo’a tau Yahudiin nanna pameanga.
3Jaji kira-kira jam talu asoon, andian jalu paitangen kalena dinen lo’a. Saja maam paitana. Dakita andian malaikata Alatala mondok intama laloang mangalong lo’a i Kornelius, “O Kornelius!” ingka kenang.
4Mamele unding-unding barik i Kornelius lo’a malaikaten. Atakut. Jaji barik manjarum, “Andian ai, Paraampuane?”
Jaji dasauti, “Dabeleko barik kole’a Alatala, kole’a ambata do’anu, kole’a ambata gulungan basa maamu. To’ dabalas barik,” ingka kenang. Yes. 56:6-8. 5“Se’, manyuro’ tau lamba’ko lo’a banua Yope. Suro’ mala lo’a i Simon. Asan yang tapata, i Simon Petrus. 6Daia lalako’ di saona i Simon, tau yang mangaraja kulit inatangen, yang lalako’en di biring kabang jawaan,” ingka kenang manjaruma malaikaten lo’a i Kornelius. 7Mamin dinen inyap malaikat dinen, marantang lo’a.
Maminna barik inyap dinen malaikaten, dakalong anak buana duaan. Dakalong bea tentara seraan, palola’ adonga yang manyembaan bea lo’a Alatala. 8Jaji datutul kausa lo’da’. Maminna akaus datutul, dasuro’ lamba’ lo’a banua Yope. Jaji tarangkat barik.
9Di aso mina’ barik, lamba’pi ira. To’ mondok bea lo’a banua Yope. I Petruspi daia inait ibona saoen di tudung salalasen, to’ bado’a tanga’ asoon. 10Mase’ tapat batanga i Petrus nanga dinen, baingin to’ angkaan. Jaji marungi daparoanga jalu kaanen dinen, andian jalu paitangen kalena lo’a. 11Jaji dabeleang matana, tabae’ suanen. Laloang dakita andian barik jalu daurar indor balu’ palas tilam dagantung di susu’ ampata. 12Ilalama dinen andian gulungan inatangen, ambata inatang pande lamba’, ambata inatang pande melet, ambata inatang pande mainsap. 13Jaji barik andian unyi manjarumen, “O Petrus, akadengko. Se’ sambeli inatang dinen, kaan,” ingka kenang manjaruma lo’a.
14Jaji barik dasauti, “Na’anak, Paraampuane! Nampiak kala’ angkaan jalu na’anen maam, yang jalu ipase’angen di Ukumu,” ingka kenang. Im. 11:1-47.
15Poangsi tabalik bapi unyi dinen, “Jalu yang maminen daasan maam kole’a Alatala ada’ iasanen iko ajau’,” ingka kenang manjaruma. 16Jaji jalu paitaangen kalena dinen, talung kali mondoka. Maminna akaus talung kaliin, datarik barik inait jalu dagantungen dinen lo’a suanen.
17Jaji akaru nyawana i Petrus mamikirang ratina jalu paitangen kalena dinen. Patanga’an dasarinapi ratina, mondok bea tau dasuro’en kole’a i Kornelius. Dakatoanang de’i lo’a tauen saona i Simon laloang mondok jaji lo’a mambangan pakar saona. 18Jaji mangalong, “Ai lo’a, andianaka tau manumpang indi’angen asanna i Simon Petrus?” ingka kenang matoanda’ lo’a tauen di sao dinen.
19Jaji dasasaripi nyawana dinen i Petrus ti’ ai ratina jalu yang dakitaan dinen, manjarum Sumangat Bareseen lo’a, “O Petrus, andian mantuari taluun manyariin lo’u. 20Se’ bakamas, tadorko. Ada’ kalangganganen malola’en lo’da’, kapi okan kanturunan Yahudiin, kole’a iak manyuro’en lo’da’,” ingka kenang.
21Jaji tador barik i Petrus laloang manjarum lo’da’, “Iak lalo yang isariin ikin. Mai mondokin lo’a di’en?” ingka kenang.
22Jaji dasauti, “Dasuro’kam kole’a i Kornelius kapala’am. Daia dinen tau yang maamen, yang paduliin lo’a Alatala. Dakamainya’i bua kole’a ambata gulungan tau Yahudiin. Jaji andian jaruma malaikata Alatala manyuro’ mala lo’u. To’ mandalinga lo’u jalu to’ ijarumangen iko,” ingka kenang jarumda’. 23Jaji barik i Petrus daia mawa samalampi inang.
Makapen barik tangkat i Petrus tamba nanda’. Tamba bea ira ambata arasairunen ilalam i Yesus dari banua Yope. 24Jaji di aso mina’a bapi, mondok barik ira lo’a banua Kaisarea. Mamin darung-arung kole’a i Kornelius nanna tau dakampitangen, ambata arasairunna nanna kawan tapata. 25Nanga i Petrus to’ intama lo’a saoen, dasialoi kole’a i Kornelius. Paraba’ kalena tunduka di kakina i Petrus. 26Poangsi daawa akadeng kole’a Petrus, “Akadengko. Daiakpi mantuariak bea,” ingka kenang. 27Mansangapi manjaruma i Petrus lo’a Kornelius daiapi intama ilalam saoen. Mondok ilalam, dakita bayu’ tau maminen bakumpul. 28Jaji manjarum lo’da’, “Itamu bua ikin kole’a malola’ani adatam, dapase’angkam tau Yahudiin sarilao’ nanna tau okanen Yahudiin. Na’ankam pande intama lo’a tau bokanen. Poangsi mamin dapanamuang lo’ku’ kole’a Alatala ilalam jalu dapaitangen lo’ku’, daiak na’anak pande masan ajau’ lo’a tauen kapi intain-intain. Ti’ mamin daasan maam kole’a Alatala na’an pande ikalibakang. 29Ialalo na’anku’ alibak iawa lo’a di’en. Jaji bainginak to’ manamu, mai malanin lo’ku’?” ingka kenang manjaruma i Petrus lo’da’.
30Jaji barik dasauti kole’a i Kornelius, “Talung aso yang laloon kira-kira jam di’en, bado’aak di saoku’, malola’ani kabiasa’anka’ bado’aan jam tiga pamamalamen. Patanga’an bado’aku’, sadinga poang barik andian babaka seraan akadengen ijoloku’. Kainna dinen arawang jaji, parakilat-kilat. 31Jaji daia manjarum, O Kornelius, dabeleko barik kole’a Alatala kole’a ambata do’anu, kole’a ambata pameangu lo’a tauen. 32Se, manyuro’ tau lamba’ lo’a banua Yope. Suro’ mala lo’a i Simon. Asan tapata i Simon Petrus. Daia lalako’ di saona i Simon, tau yang mangaraja kulit inatangen, lalako’ di biring kabang jawaan, ingka kenang manjaruma malaikaten lo’ku’. 33Jaji babariar manyuro’ku’ lo’a tauen itiang mala lo’u. Daikopi maam tapat atenu mainya’u mondok lo’ku’. Jaji daikam bakumpul kausanam indi’angen di arona Alatala, to’ mandalinga samuana ambata jarum yang dasuro’angen lo’u kole’a Paraampuanen,” ingka kenang manjaruma i Kornelius lo’a i Petrus.
Tutulan langkena i Petrus
34Jaji barik manjarum i Petrus, “Na, awandi’en barik kutamu tapat kole’a Alatala na’an maile’i banua aien. Ul. 10:17. 35Intain atakuten lo’a Alatala, intain mawaan basa tapaten kapi banua aien, dinen yang dakamainya’iin kole’a Alatala,” ingka kenang.
36“Jaji daikin,” ingka, “mamin lalo itamu ikin soala Jaruma Alatala yang darantangen lo’a banua Israel. Dajarumang dongona kole’a anak mantuariin yang na’anen sikule’ nanna Alatala dapasikule’ang barik nanna malaloi i Yesus Kristus. I Yesus lalo Paraampuanen yang mangkamen ibona samuana. 37Na, dongo jalu adariin sasara daerah Yudea mamin itamu ikin. Maminna ajaranna i Yohanes lo’a soal baptisanen, inang di propinsi Galilea i Yesus mulai mawa karajana dinen. 38Itamu inang di Galilea i Yesus tau Nasaret dinen dalao’i nanna Sumangat Bareseen kole’a Alatala datiang manugas lo’a. Dalao’i nanna kuasaan. Laloang daia lamba’ kuliling mawa basa maama lo’a tauen sarata pamaam pamadisa ambata tau dakaruun kole’a i Pangabo, kole’a andian Alatala nanna. Mamin lalo itamu ikin,” ingka kenang.
39“Jaji daikam lalo di’en saksina jalu adariin dinen. Maminkam maita ambata jalu dakarajaan kole’a i Yesus sasara daerah Yudea nanna banua Yerusalem. Daia dauno’ kole’da’, dagantung di kayu pasipalangangen. 40Poangsi yang dauno’ dinen, ia bua dinen yang dakatio’ balik kole’a Alatala di aso yang kataluun laloang dapaitang barik lo’a tauen. 41Okan lo’a tau bokanen paitana, lo’am poang yang maminen daile’i kole’a Alatala datiang padari saksina, yang tambaan barik angkaan mainyum sarata nanna di maminna dakatio’ balik,” ingka kenang.
42“Jaji dasuro’kam mawa Dongo Maamen lo’a tauen samuana. Dasuro’kam manyaksi kole’a i Yesusla yang datugasen kole’a Alatala padari paurus datiang manyelidiki lo’a tauen samuana, maam tau tio’en kenang bea lo’a tau maminen mate. 43Okan ikam poang manjarumangen. Samuana ambata gulungan panjaruma Alatala tarangkat dari jolo manjarumang i Yesus kausana. Dajarumang kole’a samuana yang tau parasaya’en lo’a asanna, to’ daamponi barik dosana,” ingka kenang manjaruma i Petrus lo’da’ babangkulungen di saona i Kornelius.
Tau yang okanen banua Yahudi manarima’ Sumangat Bareseen
44Jaji patanga’an manjaruma i Petrus lo’da’, tador barik Sumangat Bareseen lo’da’ yang mandalingaan Dongo dinen. 45Jaji ambata tau Yahudi yang parasaya’en, yang tambaan de’i dari banua Yope, tatakau samuana mameleen. Heran kole’a dalao’i bea Sumangat Bareseen lo’a tau banua bokanen yang okanen kanturunanna baki’ Israel. 46Manyuro’ datamu maminna dalao’i nanna Sumangat Bareseen, kole’a dataantalingana inang, mamudi-mudi ira lo’a Alatala mamakai jarum na’anen itamu, yang okanen jarum diri’a.
Jaji manjarum barik i Petrus, 47“Na, tau di’en mamin mandua’ang Sumangat Bareseen awan bua iki’. Intain lagi’ pandeen pasala’ ti’en ibaptis nanna danumen?” ingka kenang manjaruma lo’da’. 48Jaji dasuro’ ibaptis atas asanna i Yesus Kristus. Maminna dabaptis barik, manjarum ira lo’a Petrus mawa lalako’ nanda’ insa’-insa’ aso launna.
നിലവിൽ തിരഞ്ഞെടുത്തിരിക്കുന്നു:
Palamba’anna Pasuro’a I Yesus 10: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
