Palamba’anna Pasuro’a I Yesus 9
9
I Saulus padari palola’a i Yesus
1Jaji waktu nanga dinen i Saulus daia mansangpi manikoma to’ mauno’ lo’a tau malola’en lo’a Paraampuanen. Jaji lamba’ lo’a imam baraa’en barik 2mamita surat kuasaan. To’ daawa lo’a paurus sao sambayanga tau Yahudiin di banua Damsik. Maksuta surat dinen, ti’ andian inang babaka babainyeen yang malola’aniin Dalanna Paraampuanen, to’ datingkam. Laloang to’ daawa mole’ lo’a Yerusalem.
3Jaji di lamba’a i Saulus lo’a Damsik, mainso’ to’ mondok lo’a banuaan, sadinga poang andian jalu dari Surga manyalangen, dakita kole’a i Saulus mangulilingi lo’a. 4Laloang araba’ barik dinen i Saulus lo’a tana’en. Laloang andian unyi dadalingaan, “Saulus, O Saulus. Mai daiko kenang maam-maam parinsa’inu lo’ku’?” ingka kenang unyi dinen lo’a i Saulus.
5“Intainkosi Paraampuane?” ingka kenang dinen manyautina i Saulus.
“Iak lalo i Yesus,” ingka kenang, “yang iparinsa’iin iko. 6Se’ lamba’ko poang intama lo’a banuaan. Ka’ bea andian tau manjarum lo’u mainto’ itamuna iko malamba’ang tugasu,” ingka kenang manjaruma lo’a i Saulus. 7Arakawanna i Saulus dinen de’i mamin sengka’. Na’an lagi’ kakaji’. Andian unyi dadalingaan kole’da’ poangsi kosan tau dakitaan. 8Jaji akadeng barik i Saulus, dabeleang matana, araun. Kosan jalu dakitaan. Dabibit poang kole’a arakawanna lamba’a dinen intama lo’a banua Damsik. Plp. 3:4-9. 9Mondok di Damsik inang, talung aso talung malam daia na’an maita jaluun. Launna dinen daia na’an angkaan, na’an mainyum.
10Jaji andian tau dinen asanna i Ananias di banua Damsik dinen, palola’a i Yesus. Jaji barik andian jalu paitangen kalena lo’a, Paraampuanen manjarum lo’a, “O Ananias!”
“Indi’angak Paraampuane,” ingka kenang.
11Jaji manjarum, “Se’, tangkatko, lamba’ko lo’a dalan asan yang Baloloken. Mondok inang ona’ lo’a saona i Yudas, katoanang tau manamoeen inang, asanna i Saulus tau banua Tarsus. I Saulus daia dinen bado’a awandi’en. 12Ilalam bado’anna, andian jalu kusuro’ paitang kalena lo’a. Dakita balu’ andian tau asanna i Ananias yang mondok lo’a. Dajalaang tanganna lo’a manyuro’ pande mamele jalu arawangen barik. Jaji malamba’iko lo’a dinen,” ingka kenang manjaruma Paraampuanen lo’a i Ananias.
13Jaji manyauti barik i Ananias, “Ado Paraampuane, bayu’ mamin jarum tau kudalingaan manu lo’a i Saulus dinen. Dakajari jaji ambata anak katio’annu di banua Yerusalem. 14Awandi’enpi daia mondoka lo’a banua di’en, dameang kuasa kole’a ambata imam baraa’en pande maningkam lo’a tauen intain poang mangalongen lo’a asannu,” ingka kenang manjaruma i Ananias lo’a Paraampuanen.
15Jaji barik dasauti kole’a Paraampuanen, “Maam. Lamba’i poang. Kole’a tau din mamin kudile’i padari anak suro’anku’. Kusuro’ itiang manjarumang asanku’ lo’a tau bokanen yang tau na’anen mangilala lo’ku’, lo’a ambata gulungan rajaan, lo’a ambata anak kanturunanna baki’ Israel. 16Iak ona’ panamuangen lo’a mainto’ datamuna ambata gulungan parinsa’a yang arung darasaan kole’a jarum yang daawaan atas asanku’,” ingka kenang dinen manjaruma Paraampuanen lo’a i Ananias.
17Jaji dalamba’i barik kole’a i Ananias. Mamin dalamba’i, intama lo’a saona dinen, dajalaang tanganna lo’a i Saulus. “Sairun Saulus,” ingka kenang, “dasuro’ak lamba’ lo’u kole’a Paraampuanka’ Yesus. Ia bea dinen tau ikitaan iko di tanga’ dalanen lo’a di’en. Dasuro’ang lo’ku’, mainto’ daiko dapat mamele jalu arawangen, mainto’ dakuasainu barik kole’a Sumangat Bareseen,” ingka kenang manjaruma lo’a i Saulus. 18Akaus poang jaruma dinen, sadinga poang andian jalu balu’ sisik lauken talapas lo’a matana i Saulus laloang dapat daia mamele jaluun. Laloang akadeng barik I Saulus laloang dabaptis. 19Laloang angkaan barik dinen yang i Saulusen. Maminna barik angkaan, mole’ bakajung rabarik. PalPa. 22:3-16; 26:9-18.
I Saulus manjarumang Dongo Maamen di Damsik
Jaji insa’-insa’ aso launna barik i Saulus lalako’a di banua Damsik nanna ambata palola’a i Yesus. 20Laloang dalamba’i ambata sao sambayangen inang laloang manjarum lo’da’, “I Yesus lalo dinen Anaka Alatala,” ingka kenang.
21Tauenpi barik tatakau mandalingana lo’a i Saulus, “Ai tau dinen, okan ia mauno’en tau di Yerusalem, yang tau mangalongen lo’a asanna i Yesus dinen? Pamondoka di’en okanaka tujuan to’ maningkam tau, to’ mawa mole’ lo’a ambata imam baraa’en?” ingka kenang jarumda’ sikatoananen.
22Poangsi i Saulus daia insang maam pangajaranna. Insang maam buktina yang daawaan mamayoang kole’a i Yesus tapat-tapat dinen Kristus yang tau dabayaangen. Mondok dinen tau Yahudiin yang lalako’en di banua Damsik, sampai na’an dampe kakaji’ kole’a dinen i Saulus.
23Jaji insa’-insa’ aso maminna dinen, bakumpul barik dinen tau Yahudiin pasipakatang to’ mauno’ lo’a i Saulus. 24Poangsi andian bua tau mawa jarum dinen lo’a i Saulus. Asoon malamen dajagaina ambata mambangan pakar tagap banuaan dinen kole’a tau Yahudiin, to’ mauno’ lo’a i Saulus. 25Maama poang andian ira ambata palola’a i Saulus manggulungiin lo’a. Daapis i Saulus di baka’ baraa’en laloang daurarang indor nanna taliin dari palawaken yang di pakar tagap banuaan. 2Kor. 11:32-33; Gal. 1:15-20.
I Saulus aramen lo’a tau Kristen di Yerusalem
26Jaji lamba’ i Saulus dinen lo’a banua Yerusalem. Mondok inang, manyari dinen to’ pasilao’ang kalena nanna palola’a i Yesus inang. Poangsi ira dinen atakut. Na’an daasanang tapat-tapat daia mamin padari anak palola’a i Yesus. 27Poangsi andian dinen i Barnabas manggulungiin. Daawa dinen i Saulus, dapasidua’ang nanna pasuro’a i Yesus. Datutul barik lo’da’ kole’a i Barnabas, maminna i Saulus sidua’ nanna i Yesus di tanga’ dalanen. Datutul dinen unyina Paraampuanen manjaruma lo’a. Datutul baranina i Saulus majaren lo’a tau banua Damsik atas asanna i Yesus. 28Baru’ barik dapat dinen i Saulus sarilao’ nanda’ inang di Yerusalem. Okan gampang baranina i Saulus dinen. Saruran lamba’ barik daia majar lo’a tauen atas asanna Paraampuanen. 29Biasa bea sisarian jarum mengena’i i Yesus nanna ambata tau Yahudiin yang tapawanen lo’a jarum Yunaniin. Poangsi ira dinen ajau’ nyawana lo’a, manyari akal to’ mauno’ lo’a i Saulus. 30Jaji datamu panikomanda’ dinen kole’a ambata arasairunna ilalam i Yesus Kristus, daantat i Saulus lo’a banua Kaisarea. Dasuro’ mole’ lo’a banuana, lo’a banua Tarsus.
31Maminna dinen sikamaaman barik ambata kumpulan anak ulun maama i Yesus nanna tauen. Di propinsi Yudea, di propinsi Galilea, di propinsi Samaria kosan barik jalu mangaru. Insang maam kaparasaya’anda’ insang sikadanan bayu’ tau parasaya’en. Kole’a ira dinen tio’ paduli lo’a Paraampuanen, tio’ dauluang kole’a Sumangat Bareseen yang pamaamen bua lo’a nyawada’.
I Petrus malamba’i banua Lida nanna banua Yope
32Jaji i Petrus daia lamba’ kuliling. Ilalam palamba’anna dalamba’i bea gulungan anak katio’anna Alatala di banua Lida. 33Jaji mondok inang di Lida, sidua’ barik nanna babaka seraan, i Eneas asanna. I Eneas dinen tamate mantuarina. Lapan taun mamin alenga’a, na’an jaji dakule’. 34Jaji barik i Petrus manjarum lo’a i Eneas, “Dapamaamko barik di’en kole’a i Yesus Kristus, Enease,” ingka kenang. “Se’ akadengko, kamusi bebe’u,” ingka kenang manjaruma i Petrus lo’a. Laloang akadeng dinen i Eneas malola’ani jaruma i Petrus. 35Maita kausa dinen ambata tau banua Lida nanna banua Saron. Parasaya’ kausa barik lo’a Paraampuanen.
36Jaji di banua Yope andian babainye seraan, tau malola’en lo’a i Yesus, i Tabita asanna. Ilalam jarum Yunani, i Dorkas asanna, asan inatang piang. Jaji i Dorkas dinen maam lapoang basana lo’a tauen. Mainya’ jaji manggulungi lo’a tau masikinen. 37Jaji waktu nanga dinen dadua’ padis daia, laloang mate. Maminna barik dakusuk bangkayoanna, dataro’ barik di tingkat iboen.
38Jaji andian dongona i Petrus di banua Lida. Jaji maminna datamu dongona dinen kole’a ambata palola’ i Yesus di Yope, dasuro’ lamba’i kole’a arakawanda’ duaan. Kole’a banua Lida nanna banua Yope sikainso’an. Mondok rabarik ira dasuro’en lo’a banua Lida, “Lamba’ijo kawanka’, babariar!” ingka kenang jarumda’ yang daawaan lo’a i Petrus. 39Jaji i Petruspi dakamas bebe’a laloang tamba nanda’ dinen.
Mondok lo’a Yope rabarik, laloang daawa i Petrus inait lo’a tingkat yang iboen. Samuana ambata gulungan babainye baluun babangkulung kausa inang ibiringa i Petrus anangis sarata mamayoang ambata tiangan buata dinen i Dorkas, ambata baju kotang, ambata gulungan sape yang dapolaan kole’a i Dorkas di tio’a. 40Poangsi dapainsaluan ira kole’a i Petrus laloang malingkutut bado’a. Maminna dinen kisikang kalena lo’a bangkayoanna i Dorkas, sarata manjarum, “Akadengko Tabitae!” Laloang tabae’ matana dinen i Tabita. Dabele dinen i Petrus laloang aduduk daia. 41I Petruspi daia manangko’ tanganna i Tabita barik, daawa akadeng. Maminna dinen, dasuro’ mondok ira ambata babainye baluun dinen nanna ambata anak katio’anna Alatala bokanen, laloang dapayoang lo’da’ i Dorkas yang maminen dinen tio’. 42Jaji tadongo barik jalu dinen sasara banua Yope. Bayu’ bea tau parasaya’en barik lo’a Paraampuanen.
43Maminna dinen i Petrus daia lalako’ barik inang di banua Yope insa’-insa’ poang aso launna, lalako’ di saona i Simon asanna, tau mangaraja kulit inatangen.
നിലവിൽ തിരഞ്ഞെടുത്തിരിക്കുന്നു:
Palamba’anna Pasuro’a I Yesus 9: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
