Palamba’anna Pasuro’a I Yesus 8
8
1Jaji i Sauluspi dinen satuju bua nanna kaputusan dauno’a dinen i Stepanus.
Anak ulun maamen daparinsa’i
Jaji inang lalo akata balasa daparinsa’ina kumpulan anak ulun maama i Yesus di Yerusalem. Atambor barik samuana ambata tau parasaya’en sasara banuaan di Yudea nanna Samaria. Suma poang yang na’anen atambor, ira ambata pasuro’a i Yesus. 2Jaji andian ambata babakaan yang paduliin tapat lo’a Alatala yang mangaliangen lo’a i Stepanus. Baraa bea maule’a lo’a i Stepanus.
3Poangsi i Saulus daia mangajari lo’a kumpulan anak ulun maama i Yesus. Dalamba’i tauen maira sao. Ti’ dadua’ang tau parasaya’en babaka babainyeen, dabibit barik lo’a sao ukumanen, daapis inang. PalPa. 22:4-5; 26:9-11.
4Jaji ambata tau parasaya’en dinen barik atambor. Yang atamboren barik lamba’ lo’din, lamba’ lo’din mawa Dongo Maamen. 5Jaji i Pilipuspi daia lamba’ lo’a banuaan di daerah Samaria laloang manjarumang i Yesus lo’a tau inangen, manjarumang kole’a ialalo Kristus, tau yang dabayaangen dinen. 6Jaji dabele bayu’a panunyuana dinen i Pilipus kole’a tau babangkulungen dinen, manaantalinga kausa barik lo’a jalu dajarumangen. 7Bayu’ ambata jalu manyarungen yang daruruun. Nanna mamuko-mukona barik minsaluanna lo’a tau dasarungen. Bayu’ bea ambata tau tamateen mantuarina, tau alato’, tau atimpang yang pandeen maam barik. 8Jaji sasau tapat nyawada’ tau banua Samariaan dinen.
9Jaji di Samaria indinang andian babaka seraan, i Simon asanna. Balaun mamin karaja ilmu patakut-takuti tauna di banua dinen manyuro’ tatakau lo’a tauen. Bagap daia asan-asanen kalena tau yang patuten ipaduli. 10Jaji samuana ambata tau di daerah dinen yang baraa’en pakaina, yang tau akeke’enpi pangkata, paduli kausa lo’a tau dinen. “I Simon ialalo kuasana Alatala yang daasanen dinen Kuasa yang Baraa’en,” ingka kenang jarumda’ mamudiin lo’a. 11Atakut tapat tauen lo’a kole’a mamin balaun daawa manuntuta yang luar biasa kalo’aan. 12Poangsi dajarumang barik Dongo Maamen kole’a i Pilipus, dongo kole’a Alatala to’ mangkam rabarik lo’ka’ padari Rajaka’, dongo mawaan parasaya’ lo’a asanna Kristus. Jaji maminna barik dadalinga kole’a tauen dongo yang daawaan kole’a i Pilipus dinen, parasaya’ barik ira. Laloang dinen dabaptis, maam babakaan, babainyeenpi ka’ kenanga. 13Jaji i Simonpi dinen parasaya’ bea lo’a dongo dinen, laloang dabaptis. Maminna dabaptis, dong-dong poang malola’a lo’a i Pilipus. Saja heran nyawana i Simon mameleen ambata gulungan panyunyuana nanna tanda kuasaan yang dapolaan kole’a i Pilipus.
14Jaji maminna dinen mondok dongoon barik lo’a ambata pasuro’a i Yesus di Yerusalem, kole’a tau di Samaria, ingka, bayu’ mamin parasaya’en lo’a Jaruma Alatala. Jaji dasuro’ lamba’i kole’a i Petrus nanna i Yohanes. 15Lamba’ ira duaan, mondok lo’a dinen laloang dado’aang ira inangen mamita tador dinen Sumangat Bareseen malalako’i lo’da’. 16Kole’a nampi tador dinen Sumangat Bareseen lo’da’ inangen. Kole’a waktu nanga dabaptisda’ dinen, dabaptis poang atas asanna Paraampuanka’ Yesus. 17Jaji ari Petrus nanna i Yohanes dajalaang tanganna lo’da’, baru’ barik ira dinen manarima’ Sumangat Bareseen.
18Na, maminna dinen dakita kole’a i Simon dajalaanga tanganda’ lo’a tauen manyuro’ dalalako’i kole’a Sumangat Bareseen, daiapi mondok mawa duit, to’ daunjukang lo’da’. 19Jaji manjarum, “Tawa’iak bea panamu balu’aan dinen mainto’ pandeku’ manjalaang tanganku’ lo’a tauen manyuro’ dalalako’i kole’a Sumangat Bareseen,” ingka kenang manjaruma.
20Poangsi dasauti barik kole’a i Petrus, “Maam alit duitu iawa masok neraka. Kole’a irasa iko pameanga Alatala pande ibali. 21Kosan bagiannu di urusannam di’en, kosan karajanu nannam. Kole’a na’an tapat atenu di arona Alatala. 22Arung idunjang pikirannu yang sala’en dinen. Bado’ako poang lo’a Paraampuanen. Ungka’en dapatpi daamponi maksut atenu yang ajau’en dinen. 23Kole’a kubele di’en atenu mamin datio’i nanna urat jalu apaiten. Dala pangkamko mamin kole’a basa ajau’en,” ingka kenang manjaruma i Petrus lo’a. Ul. 29:18.
24Maminna dinen barik manjarum i Simon lo’a i Petrus nanna i Yohanes, “Adu, mase’ak! Do’aangak ikin lo’a Paraampuanen mainto’ kosanna adari balu’ jalu ijarumangen iko dinen lo’ku’,” ingka kenang lo’a i Petrus.
25Maminna dinen ari Petrus nanna i Yohanes dinen mawa saksina lo’da’ sarata daawa Jaruma Paraampuanen. Maminna akaus manjaruma laloang mole’ balik ira lo’a Yerusalem. Di lamba’a mole’ dinen dasengka’i ambata gulungan banua Samariaan mawa Dongo Maamen lo’da’.
I Pilipus nanna tau Etiopia
26Jaji waktu nanga dinen barik andian malaikata Paraampuan seraan manjarum lo’a i Pilipus, ingka, “Se’ tangkatko maro selatanen. Lamba’ lo’a dalan antarana banua Yerusalem nanna banua Gasa,” ingka kenang. Dalan dinen dalan yang ateengen. 27Jaji i Pilipuspi barik tangkat lamba’.
Jaji andian babaka seraan, tau baraa’en pakaina di banua Etiopia, yang manyembaan lo’a Alatala di Yerusalem. Pangkata dinen panuntuani duita raja babainyeen, rajana Etiopia. Di Etiopia, pangkat raja babainyeen daasan Kandake. 28Jaji mole’ manyembana babaka dinen, lamba’ nanna karetana. Di aduduka ilalam karetana dinen, daia mambasa buku’ panjaruma Alatala, baki’ Yesaya asanna. 29Jaji manjarum Sumangat Bareseen barik lo’a i Pilipus, “Se’ lo’ako. Mainso’i kareta dinen,” ingka kenang manjaruma Sumangat Bareseen. 30Jaji dalola’ bua awan jaruma, arari. Dainso’i kareta dinen.
Mondok lo’a dinen, dadalinga tau dinen, mambasa buku’a baki’ Yesaya. Jaji barik dakatoani kole’a i Pilipus, “Ai, jalu ibasaan iko din, itamu ratina?” ingka kenang manjaruma i Pilipus.
31“Ai lo’a kutamuna ratina ti’ kosan tau maratiin lo’ku’?” ingka kenang. Laloang daawa i Pilipus mauwat di karetaan aduduk di biringa. 32Jaji jarum yang dabasaan dari buku’a baki’ Yesaya de’i ialalo di’en,
Daia dinen balu’ dombaan yang datingkam laloang to’ dasembeli. Balu’ anak dombaan dinen waktu nanga iguntinga buluna, na’an lagi’ araunyi. 33Daia dinen dapawa’-awa’ani. Na’an balolok tauen maurusina lo’a. Na’an dapat barik itutul kanturunanna, kole’a apolo tio’a. Kosan lagi’ di duniaan,
ingka kenang jarum yang dabasaan dinen. Yes. 53:7-8.
34Maminna dabasa jarum dinen, manjarum tau baraa’en pakaina dinen lo’a i Pilipus, “Suba jarumang lo’ku ratina jarum dinen. Intain dakenangiin ilalam jarum inangen dinen? Aiaka mangenangi diri’a baki’ Yesaya, atau mangenangi tau?” ingka kenang mangatoanina.
35Jaji datutul kausa kole’a i Pilipus tangkat di jarum inangen dinen, dala manjarumang Dongo Maama i Yesus. 36Jaji patanga’an lamba’da’ dinen andian anak danum. Jaji manjarum tau Etiopia dinen, “Na, andian danum. Ai sala’a ti’enak ibaptis?” ingka kenang lo’a i Pilipus.
37[Jaji barik manyauti i Pilipus lo’a, “Kosan sala’a asal tapatko parasaya’ lo’a i Yesus nanna ate gugulungen,” ingka kenang.
Jaji dasauti bapi, “Daiak parasaya’ kole’a i Yesus Kristus lalo Anaka Alatala,” ingka kenang manyautina lo’a i Pilipus.] .
38Jaji dapanyengka’ karetana dinen laloang tador ira duaan lo’a danumen. I Pilipuspi daia laloang mambaptis lo’a tau bapangkaten dinen. 39Maminna inait ira duaan dari danumen, sadinga poang barik kosan lagi’ dakita dinen i Pilipus. Mamin daawa kole’a Sumangata Paraampuanen. Tau baraa’en pakaina daia lamba’ poang nanna sasauna nyawana. 40Awan i Pilipuspi dinen dabele diri’a mamin mondok di banua Asdod. Jaji lamba’pi daia mawa Dongo Maamen sasara banua inangen sampai mondok lo’a banua Kaisarea.
നിലവിൽ തിരഞ്ഞെടുത്തിരിക്കുന്നു:
Palamba’anna Pasuro’a I Yesus 8: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
