Palamba’anna Pasuro’a I Yesus 7
7
Jaruma i Stepanus
1Maminna dinen mangatoani imam baraa’en dinen lo’a i Stepanus, “Ai lo’a jaruma ira dinen, tapat te’ na’an te’?”
2Jaji barik dasauti kole’a i Stepanus, “Taantalinganinjo lo’ku’ arasairunku’kin, araama’ku’kin,” ingka kenang. “Nanga nampina arabaki’ka’ baki’ Abraham mamalin lo’a Haran, lagi’pi lalako’ di Mesopotamia, andian Alatala paitang kalena lo’a. Mondok Alatala yang palin patut ipudiin laloang manjarum lo’a, 3Rantang poang banuanu di’en nanna ambata gulungan arasairunnu, ingka kenang. Mamalinko lo’a banua yang to’ kutunjukangen lo’u ona’, ingka kenang manjaruma Alatala lo’a. 4Jaji darantang banua Kasdim, mamalin lo’a banua Haran. Lalako’ di Haran barik, maminna mate barik amana, manjarum bapi Alatala lo’a baki’ Abraham manyuro’ mamalin lo’a tana’ di’en, yang ilalako’iin iki’ di’en. 5Waktu nanga dinen kosanpi mandua’ang bagi di tana’ di’en kole’a Alatala. Kakapitpi kosan waktu nanga dinen. Poangsi andian bayana Alatala lo’a, tana’ di’en to’ daunjukang lo’a baki’ Abraham padari ia ampunaan sampai mondok lo’a anak kanturunanna. Mul. 12:7; 13:15; 15:18; 17:8.
“Na, nanga dinen kosanpi anaka baki’ Abraham. 6Poangsi Alatala manjarum kenang,
Anak kanturunannu ona’ to’ lalako’ di banua tau, yang okanen banua diri’da’. Inang bea dinen kanturunannu to’ dala pangkama kole’a tau negeri dinen. To’ daparinsa’i ampat ratus taun launna. 7Poangsi yang tau mala pangkamen dinen ona’ to’ kudukum,
ingka kenang manjaruma Alatala.
Maminna barik kudukum, ona’ dinen to’ minsaluan bapi anak kanturunannu, to’ manyemba lo’ku’ indi’angen di kosan di’en,
ingka kenang manjaruma Alatala lo’a baki’ Abraham. Mul. 15:13-14.
8“Maminna akaus jaruma awan dinen, dameang adat sunaten lo’a baki’ Abraham itiang tanda bayana Alatala lo’a baki’ Abraham nanna ambata anak kanturunanna. Jaji baki’ Abraham mandua’ang anaka babakaan, baki’ Isak dinen, laloang dasunat barik dalam lapan asoon umura. Baki’ Isakpi barik maminna mandua’ang anaka, dasunat bea daia anaka dinen, baki’ Yakub. Jaji kenang turun-manurun dari baki’ Abraham sampai mondok lo’a kanturunanna baki’ Yakub yang dua belasen, ialalo arabaki’ka’. Dasunat samuana,” ingka kenang manjaruma i Stepanus. Mul. 11:27—17:14; 21:2-4; 25:26; 29:31—30:24; 35:16-18.
9“Jaji kapiayo arabaki’ka’ lo’a arina, lo’a baki’ Yusup dinen. Dapet barik padari pangkam di negeri Mesir. Poangsi mondok inang, baki’ Yusupen dinen datuntuani kole’a Alatala. 10Dapalapas dari nanna ambata gulungan susana. Dameang lo’a panamu datiang pasitimbangan jalu ajau’en nanna maamen, manyuro’ maam dabelena barik kole’a Raja Mesir. Jaji dameang tugas rabarik kole’a Raja Mesir, dasuro’ mamarinta ibona samuana negeri Mesir. Dasuro’ manguasai ibona samuana ambata gulungan kamusanna.
11“Maminna dinen dadua’ karaparan barik dinen negeri Mesir nanna negeri Kana’an. Marinsa’ tapat. Na’an dapat mandua’ang jalu kaan arabaki’ka’ dinen. 12Jaji datamu dongoon kole’a baki’ Yakub, andian jalu kaanen di negeri Mesir, dasuro’ lamba’ araanaka, arabaki’ka’ dinen. Dinen mulakata lamba’a lo’a Mesir. 13Di lamba’a yang kaduang kaliin, baru’ baki’ Yusup dinen jarumang kalena lo’a arasairunna mainto’ datamuna iana arida’. Baru’ waktu nanga dinen barik dakilalana arasairuna baki’ Yusup kole’a Raja Mesir. 14Maminna dinen, baki’ Yusup daia paba’ang lo’a amana, lo’a baki’ Yakuben. Dasuro’ mamalin kausa lo’a negeri Mesir. Jaji yang mamalinen lo’a Mesir samuana, andian tuju pulo’ lima mantuari bayu’a,” ingka kenang i Stepanus.
15“Jaji mamalin barik baki’ Yakub lo’a Mesir. Laloang mate inang barik baki’ Yakub nanna arabaki’ka’ ambata araanaka dinen. 16Bangkayoanda’ daawa mole’ balik lo’a Sikem. Dakubur di loang batuun di tana’ yang dabaliin kole’a baki’ Abrahamen nanna duit pirak. Dabali lo’a tau Hemor di banua Sikem. Mul. 37:1—50:14.
17“Jaji di maminna mainso’ rabarik to’ adarina bayana Alatala lo’a baki’ Abraham, banuaka’ di Mesir mamin bayu’ jaji kanturunanna. 18Rabarik andian raja baru daangkatangen yang tau na’anen mangilala lo’a baki’ Yusup. 19Jaji daakal barik banuaka’ kole’a raja dinen, daparinsa’i. Dapaksa barik ira, arung daunjang ambata gulungan nangkanak baru daparanakangen. Arung dapainsaluan dari saoen mainto’ matena.
20“Jaji nanga dinen bua daparanakanga baki’ Musa, nangkanak yang maamen tapat batora. Talung bulan bua umura launna dakatio’a di saona amana. 21Maminna dapainsaluan rabarik, dadua’ang barik kole’a anaka Raja Mesir yang babainyeen. Laloang daangkat anak rabarik. 22Baki’ Musapi barik daparajari lo’a samuana panamu di negeri Mesiren dinen. Jaji maam barik asanna inang kole’a jaruma nanna basa maama,” ingka kenang tutulanna i Stepanus.
23“Jaji mondok ampat pulo’ taun umura baki’ Musa dinen, andian nyawana barik to’ malamba’i uranga, tau Israelen dinen. 24Jaji di lamba’a inang dakita uranga seraan daparinsa’iin kole’a tau Mesiren seraan. Jaji dakamuroang uranga dinen, dauno’ tau Mesiren. 25Daasanang diri’a mamin datamu kole’a banuana kole’a ia yang to’ dapakaien kole’a Alatala datiang malapasang lo’da’. Poangsi na’an pan datamu.
26“Jaji imbara aso seraan, dalamba’i bapi kole’a baki’ Musa. Jaji di lamba’a dinen sidua’ bapi nanna tau sijaien. Urang Israelen duana. Laloang to’ dapasikule’ang. Darada’i, Ai daikin sipapadisinin? Sama urangka’ bua, ingka kenang baki’ Musa lo’da’. 27Poangsi tau arasala’en lo’a kawanna dinen alibak. Dajuluang baki’ Musa lo’a biringa laloang manjarum, Intain padariin lo’u panguluanen, padari paurus lo’am? ingka. 28Ai daiko di’en to’ mauno’ko lo’ku’ awan tau Mesiren iduno’en iko imalam? ingka kenang manyautina tau sala’en dinen lo’a baki’ Musa. 29Jaji maminna barik dadalinga jarum dinen, baki’ Musa daia rariang kalena lo’a banua Midian. Jaji launna lalako’a inang di banua tauen, daia mandua’ang anaka duaan, babakaan,” ingka kenang i Stepanus. Pal. 18:3-4.
30“Jaji ampat pulo’ taun maminna ararina dinen launna, andian Malaikat paitangen kalena lo’a baki’ Musa di kasik baraa’en inang mainso’ lo’a ukit Sinai. Paita balu’ api adale’en di akat jalu arapati’en. 31Jaji heran nyawana baki’ Musa mameleen. Laloang dainso’i, to’ dabele malola’ani batak nyawana. Poangsi to’ dainso’i, dadalinga barik unyina Paraampuanen manjarum, 32Iak lalo di’en Alatalana arabaki’. Lo’ku’ manyembana baki’ Abraham, baki’ Isak, nanna baki’ Yakub, ingka kenang manjaruma Paraampuanen. Jaji baki’ Musapi barik kikirik tolanga. Na’an barani barik mamele.
33“Jaji manjarum bapi Paraampuanen, Leka’jo sapatunu. Na’an pande ilat iko nanna sapatuun tana’ di’en. Kole’a tana’ di’en yang ikadengiin iko di’en tana’a Alatala, tana’ yang bareseen, ingka kenang. 34Okan na’an kubele daparinsa’i tauna ambata anak katio’anku’ di negeri Mesir inang. Kudalinga iak pasiaka. Ialalo tadorku’ di’en to’ malapasang lo’da’. Se’ tangkatko. Daiko kusuro’ mole’ balik lo’a negeri Mesir, ingka kenang manjaruma dinen Alatala lo’a baki’ Musa. Pal. 1:7—3:10.
35“Na baki’ Musa lalo dinen yang tau dakalibakangen kole’a uranga, ia yang dasuro’en. Intain padariin lo’u panguluannam, padari paurus lo’am? ingka kenangjo kajau’an nyawada’. Yang tau dakalibakangen, ia bua dinen yang datugasen kole’a Alatala padari panguluanen, padari malapasangen lo’da’. Datugas malaloi jaruma malaikat paitangen kalena lo’a di akat jalu arapati’en. 36Baki’ Musa bua dinen yang painsaluanen lo’da’ dari negeri Mesir. Baki’ Musa bua dinen yang bayu’en jalu dapolaan, ambata gulungan jalu laan-laanen, ambata panyunyuaan. Dapola inang di Mesiren, di Jawa Dadara’en, di kasik baraa’en launna ampat pulo’ taunen dinen. Pal. 7:3; 14:27-31. 37Baki’ Musa bua dinen manjarumangen lo’a arabaki’ka’ tau Israelen, Andian bapi ona’, ingka, panjaruma dasuro’ mondok lo’in, awan bua iak. Urangin bua, ingka kenang manjaruma baki’ Musa. Ul. 18:15,18. 38Baki’ Musa bua dinen sarilao’en nanna arabaki’ka’ yang akombongen inang di kasik baraa’en. Lo’a manjaruma Malaikaten di ukit Sinai marantang jarum yang ipakaien salaun-launaan, dasuro’ jarumang lo’ka’. Pal. 20:18-21.
39“Poangsi arabaki’ka’ dinen alibak malola’ani panamuna baki’ Musa. Dakalibakang. Batak nyawada’ dinen, to’ mole’ lo’a negeri Mesir. 40Jaji nanga inaita baki’ Musa lo’a ukiten itiang manarima’ ukum sapulo’en, manjarum tauen lo’a baki’ Harun, i Musa dinen yang mauluangen lo’am minsaluan lo’a negeri Mesir, na’ankam manamu, ti’ isa kosanna. Polaangkam barik jalu isembaan yang pandeen padari panguluan lamba’am, ingka kenang jaruma tauen lo’a baki’ Harun. 41Jaji waktu dinen dapolaang jalu isembaan balu’ anak sapi, laloang dapamindara’i. Darami-ramiang kakaru’ jalu dapolaan nanna tangan diri’a. Kenang ateda’ arabaki’ka’. Pal. 32:1-6. 42Jaji Alatalapi barik marantang lo’da’. Dabele poang karajada’ manyembaan balu’a dinen. Dapalaloang ira marap lo’a ambata alat suanen. Awan yang maminen datulisang ilalam buku’a ambata panjaruma Alatala,
Na, ikin tau Israelen. Ai daikin launna lalako’in di kasik baraa’enjo dinen, yang isembaan ikin ai? Iakaka yang ipamindaraangen ikin? Okan. 43Yang iambenen ikin inang, kakalang palamba’ panyemba jaluun, dinen yang iambenen ikin. Iala manyemba lo’a Molok, lo’a Repan, lo’a ambata gulungan jalu ipolaan ikin to’ isembaan. Na, ialalo barik kudunjangin babajao’ isuali lo’a banua Babel,
ingka kenangjo jaruma Alatala yang datulisangen. Am. 5:25-27.
44“Jaji Kakalang Palamba’ dinen yang padariin tanda bukti Alatala andianna nanda’, andian bua nanna arabaki’ka’ di kasik baraa’en. Alatala yang manjarum lo’a baki’ Musa manyuro’ mamola Kakalang Palamba’a dinen malola’ani sonto yang dapayoangen lo’a. Pal. 25:40. 45Laloang darantang Kakalang Palamba’ dinen nanna arabaki’ka’, anaka tau mamolaan kakalang dinen. Waktu nanga daawana barik arabaki’ka’ kole’a baki’ Yosua lo’a tana’ negerika’ di’en, daawa manuduki banuana ambata suku yang daburoon kole’a Alatala, daawa bea Kakalang Palamba’ dinen nanda’. Jaji sampai mondok waktu tio’a baki’ Raja Daud andianpi Kakalang Palamba’ dinen.
46“Jaji baki’ Daud daia dakamainya’i kole’a Alatala. Jaji dapita lo’a Alatala mainto’ daparuarang kalena mamola Sao itiang lo’a Alatala yang dasembaan kole’a arabakina dinen yang baki’ Yakuben. 2Sam. 7:2. 47Poangsi okan ia barik mamolaan, baki’ Raja Salomo yang mamolaan Saona Alatala, anaka baki’ Raja Daud. 1Raj. 6:1-38.
48“Poangsi sabenara Alatala yang Palin Baraa’en na’an lalako’ ilalam sao yang dapolaan kole’a mantuariin. Awan bua jaruma panjaruma Alatala dinen,
49 Sao balu’ ai to’ ipolaangku’ ikin? Isa lagi’ kosanku’ to’ sangarianen? Suanen lalo dinen yang datiang kadudukanku’ itiang mangkam. Tana’ duniaan dinen datiang latan kakiku’. 50Samuana ambata jalu ikitaan, iak kausana mamolaan,
ingka kenang jaruma Paraampuanen.” 2Taw. 6:18; Yes. 66:1-2.
51Maminna dinen manjarum bapi i Stepanus lo’a paurusen, “Sampai karasa atenin! Sampai pebelin! Sabangonkin nanna tau na’anen paduli lo’a Alatala! Ilawan lapoang ikin panamuna Sumangat Bareseen. Manyuli jajikin lo’a arabaki’ka’. Yes. 63:10. 52Yang joloon, samuana ambata panjaruma Alatala kosan yang na’anen daparinsa’iin. Ambata panjaruma Alatala yang manjarumangen memen pamondoka suro’anna seraan yang Tau Tapaten dinen, dauno’jo kole’a arabaki’ka’. Rabarik maminna mondok suro’anna Alatala yang dabayaangen dinen, iaduang barik ikin lo’a pamarintaan, isuro’ uno’. 53Lo’in darantanganga Ukuma Alatala yang dapamondokangen malaloi Malaikaten, poangsi na’an ipaduli ikin,” ingka kenang manjaruma i Stepanus lo’a ambata paurusen dinen.
54Maminna akaus dadalinga tutulanna i Stepanus dinen, arabulu kausa ateda’. Ajau’ kausa nyawana sampai karet-karet isina dinen dapasimama’anga mamelena lo’a i Stepanus. 55Poangsi i Stepanus, dakuasai tapat kole’a Sumangata Alatala. Jaji dabeleang matana inait lo’a Surga, dakita kamaamanna Alatala yang palin arawangen. Sarata dakita bea i Yesus akadengen inang di ibiring katona Alatala. 56Jaji manjarum, “Na, belejo!” ingka kenang. “Kubele iak tabae’ mambangan suanen. Kukita iak Anak Mantuariin akadengen ibiring katona Alatala,” ingka kenang manjaruma i Stepanus lo’da’.
57Maminna dadalinga jaruma i Stepanus dinen laloang mamuko ira sasarata. Dakaputi talingada’ dinen nanna tanganna laloang mamansangi dinen lo’a i Stepanus. 58Dasorong barik insaluanna banuaan laloang daparati nanna batuun dinen i Stepanus, to’ dauno’. Ambata tau yang dala saksi de’i waktu idurusina, to’ mamarati, daleka’ jolo sapena. Dasuro’ jagai sape dinen lo’a anak bakas seraan, i Saulus asanna.#7:58 Malola’ani adata tau Yahudiin, tau barani manyaksi arung barani tajolo mamarati tau idukumen nanna batuun.
59Jaji patanga’anna mamaratida’ lo’a i Stepanus, i Stepanuspi barik bado’a, “Paraampuanku’ Yesus, sialoi barik sumangatku’!” ingka kenang. 60Laloang malingkutut daia sarata manjarum nanna unyi baraana, “Paraampuane, ada’ itanggunganga dosa di’en lo’da’,” ingka kenang. Mamin manjarum awan dinen i Stepanuspi mate.
നിലവിൽ തിരഞ്ഞെടുത്തിരിക്കുന്നു:
Palamba’anna Pasuro’a I Yesus 7: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
