Yohanes 10
10
I Yesus mamola sama’ jarum, diri’a dasama’ang nanna panuntuani dombaan
1Jaji barik manjarum bapi i Yesus lo’da’, “Jaji manjarumak lo’in tapat-tapat. Andian tau yang to’ intama di pakar dombaan, ati’en na’an intama di mambanganna, tentu okan dinen panuntuani dombaan. Intain intamaan di bokanen, intain mambiten, dinen tau to’ mangalit, tau to’ marampas,” ingka kenang. 2“Yang tau tapat panuntuani dombaan, dari mambangan pakaren intamana. Yeh. 34; PalPa. 20:17-38; 2Tim. 4:1-5; Ibr. 13:20; 1Ptr. 5:1-4. 3Yang tau maruangi mambanganen ti’ mamin mangita lo’a panuntuaniin, terus dabae’ang,” ingka kenang i Yesus lo’da’. “Mondok barik ilalam yang panuntuaniin, dakalong barik dombana dinen sera-serana, daasan asanna, daawa minsaluan,” ingka kenang. 4“Mondok barik insaluan dinen, dauluang kole’a panuntuaniin dinen. Dalola’ kole’a gulungan dombaan kole’a dakilala dinen unyina. 5Yang okanen panuntuaniin dinen, yang na’anen dakilala unyina, alibak dinen dombaan malola’. Bajao’ alit dinen, arari. Kole’a na’anna dakilala unyina kole’a dombaan,” 6ingka kenang i Yesus lo’da’ manyama’angen. Poangsi na’an ira manamu ratina.
I Yesus asan kalena awan mambangan pakar dombaan
7Jaji barik i Yesus manjarum bapi lo’da’, “Manjarumak lo’in tapat-tapat. Iak lalo di’en mambangan pakar dombaan,” ingka kenang. 8“Ambata ira bokanen yang maminen mondok ijoloku’, samuana dinen tau mangalit, tau marampas. Poangsi gulungan ambata dombaan dinen na’an paduli lo’da’,” ingka kenang. 9“Iak lalo di’en mambanganna pakar dombaan. Intain dinen yang malaloien lo’ku’, dinen yang ikatio’en, yang pandeen mansang mole’ mandua’ang jalu kaanna. 10Yang tau pangaliten dinen to’ mangalit poang, to’ mauno’, to’ marampas,” ingka kenang i Yesus lo’da’. “Daiak di’en to’ pamaamak, to’ manyuro’ tio’, mainto’ tio’api dinen insang maam,” ingka kenang i Yesus lo’da’.
I Yesus asan kalena panuntuani domba yang palin maamen
11Jaji i Yesus manjarum bapi lo’da’, “Iak lalo di’en yang manuntuaniin dombaan nanna yang maamen, yang barani mateen maruangiku’ lo’a,” ingka kenang lo’da’. 12-13“Yang tau daopa’iin maruangiin, ati’en mondok asu toanen, arari atakut poang daia, marantang unjang lo’a gulungan dombaan. Datingkam barik gulungan dombaan, atambor kole’a asu toanen. Ararina dinen tau daopa’iin, kole’a na’an dakasaang dinen dombaan, okan ia ampunaan, tau to’ mala opa’a poang,” ingka kenang i Yesus lo’da’.
14-15“Iak lalo di’en panuntuani dombaan yang maamen. Iak nanna Ama’ku’ sikilalakam. Gulungan dombaan nanku’ ka’ kenanga, sikilalakam. Basadiaak di’en to’ mate maruangiku’ lo’a,” ingka kenang i Yesus lo’da’. Mat. 11:27; Lk. 10:22. 16“Andian daiak dombaku’ di bokanen, yang okanen dari pakar di’en. Dinenpi arung kuawa. To’ dakilala unyiku’, to’ malola’ bea lo’ku’. Kupasilao’ang barik, sera kawan dombaan nanna sera poang panuntuanina,” ingka kenang i Yesus lo’da’.
17Jaji barik i Yesus manjarum lo’da’, “Ama’ku’ daia mangasaang lo’ku’,” ingka kenang. “Dakasaangku’ kole’a Ama’ku’ kole’a mainya’ku’ mate mainto’ tio’ balikku’,” ingka kenang manjaruma i Yesus lo’da’. 18“Kosan tau pande mauno’ lo’ku’. Mateku’ dinen dari kamainya’an diri’ku’. Andian kuasaku’ pande palaloang kaleku’ iduno’. Andian bea kuasaku’ pande tio’ balik. Kenang lalo jaruma Ama’ku’ manyuro’a lo’ku’,” ingka kenang i Yesus lo’da’.
19Jaji na’an bapi ira Yahudiin sikule’ kole’a jaruma dinen. 20“Asi lo’a mainya’in manaantalinga lo’a tau dinen? Tau dinen dasarung jalu ajau’en! Baunding daia!” ingka kenang.
21Jaji barik andian bea sapa dua yang manjarumen, “Asi lo’a dasarung jalu ajau’a. Okan balu’a dinen jarum tau dasarungen. Ti’ tau dasarung jalu ajau’en, dinen na’an dakule’ pamaam tau bautaan,” ingka kenang sapa dua sijarumanna.
I Yesus barik dakalibakang
22-23Musim dinginen barik, di tau to’ maramiang resmina saona Alatalajo, i Yesuspi lamba’ di saona Alatala. Inang di tanga’ saona Alatala asan yang tanga’ saona baki’ Salomo, 24tauen babangkulung ibiringa. Jaji manjarum ira, “Daiko launnusi na’an manjarum lo’am. Suba terus terang jarumanga kalenu lo’am ti’ko tapat Kristus yang tau dabayaangen dinen, mainto’ itamuna ikam,” ingka kenang ira manjaruma lo’a i Yesus.
25Jaji barik manjarum dinen i Yesus, “Mamin bea kujarumang lo’in poangsi alibakkin parasaya’ lo’ku’,” ingka kenang lo’da’. “Ambata basaku’ yang kuanuun atas asanna Ama’ku’ samuana dinen kutiang manjarumang kaleku’ lo’in. 26Poangsi alibakkin dinen parasaya’ lo’ku’ kole’a okan beakin dombaku’. 27Yang dombaku’en mainya’ manaantalinga unyiku’. Mangilalaak lo’da’, dairapi mainya’ bea malola’ lo’ku’. 28Jaji daira dinen na’an ona’ mate. Andian pameangku’ lo’da’, kusuro’ tio’ salaun-launna,” ingka kenang lo’da’. “Kosan tau dakule’en marampas lo’da’ mala dari nanku’. 29Ama’ku’ yang mameang dombaan lo’ku’, daia baraa kuasana ibona samuana. Kosan tau pande marampas lo’a gulungan dombaan mala dari tanganna Ama’ku’,” ingka kenang. 30“Jaji iak nanna Ama’ku’, serakam bua.”
31Jaji manu bapi ira pakokoloan manjaput batu to’ mamarati dinen lo’a i Yesus. 32Jaji barik dinen i Yesus manjarum lo’da’, “Ai daikin to’ mamaratinin lo’ku’? Bayu’ daiak basaku’ yang maamen kupayoangen di matanin. Anu inde manyuro’ to’ mamaratinin lo’ku’?” ingka kenang manjaruma i Yesus dinen lo’da’.
33Jaji barik dasauti kole’da’, “To’ iparati nanna batuun okan kole’a basa maamu. Kole’a dinen jarumu yang pajau’en lo’a Alatala, kole’a asanna kalenu Alatala padahal mantuariin!” ingka kenang ira dinen lo’a i Yesus. Im. 24:16.
34Jaji barik manjarum i Yesus lo’da’, “Andianjo datulisangen di Ukuma Alatala, adatin bua,
Daikin patutkin ianggap awan Alatala, uka’,
ingka kenang Alatala lo’da’ arabaki’ka’jo inang. Msm. 82:6. 35Na, mamin itamu iki’ mandua’ kausa jalu datulisangen ilalam Jaruma Alatala sampai salaun-launna. Jaji Alatala daia masan lo’da’ dinen yang darantangang jarumen dinen, daasan patut ianggap awan Alatala. 36Daiakpi di’en dameangak tugas dasuro’ mondok lo’a duniaan. Asi lo’a na’anku’ pande asan kaleku’ anaka Alatala? Asi lo’a iasan ikin pajau’ku’ lo’a Alatala?” ingka kenang lo’da’. 37“Bele poang basaku’. Ati’en basaku’ okan dari panamuna Ama’ku’, ada’ak iparasaya’iin ikin. 38Poangsi ati’en basaku’ dinen malola’ani panamuna Ama’ku’, arungkin parasaya’. Kapisi na’ankin parasaya’ lo’a diri’ku’, sana’an-na’anna arungkin parasaya’ kole’a basa panyunyuaku’. Dinen kuala bukti mainto’ itamuna jaji ikin kole’a Ama’ku’ andian nanku’, kenang bapi andianku’ sarata nanna Ama’ku’,” ingka kenang i Yesus lo’da’.
39Jaji barik maminna dinen, bayu’ bapi tauen to’ maningkam lo’a. Poangsi i Yesus inyap barik.
40Jaji barik i Yesus dinen lamba’ bapi manarear sunge Yordan, lalako’ inang di kosanna i Yohanes mambaptisa lo’a tauen. Yoh. 1:28. 41Bayu’ bua tau mondoken lo’a dinen. Jaji barik manjarum dinen tauen, “I Yohanes dinen kosan panyunyuana. Poangsi tapat bua jaruma i Yohanes. Gulungan jaruma manyaksiin lo’a tau di’en, mandua’ kausana,” ingka kenang tauen. 42Jaji bayu’ barik tau inangen parasaya’ lo’a i Yesus.
നിലവിൽ തിരഞ്ഞെടുത്തിരിക്കുന്നു:
Yohanes 10: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
