Yohanes 11
11
I Lasarus mate
1Andian tau babakaan apadis, asanna i Lasarus di banua Betania. Jaji barik Betania dinen banuana ari Maria nanna Marta yang sairunnaan nanna i Lasarus dinen. Lk. 10:38-39. 2I Maria lalo dinen yang maolongang inyaken di kakina i Yesus sarata manyonoti dinen nanna buka. Yoh. 12:3. 3Jaji dapaba’ang lo’a i Yesus, kole’da’ dua pariin, “Paraampuane, kawannu yang ikasaangen iko, balasa apadisa,” ingka kenang jarumda’ dapaba’angen lo’a i Yesus.
4Jaji paba’ang jaruma lo’a i Yesus, dasauti kole’a i Yesus jarum dinen de’i, “Daia padisa dinen, okan mainto’ matena. Daia dinen mainto’ paitana kamaamanna Alatala lo’a tauen. Daiakpi Anaka Alatala to’ paita bua kamaamanku’ lo’a tauen kole’a padisa i Lasarus dinen,” ingka kenang i Yesus lo’da’. 5Jaji i Yesus dinen mangasaang lo’da’ dinen talu pariin, ari Marta, i Maria nanna i Lasarus. 6Kapi poang kenang, i Yesus lalako’pi inang di banua dinen duang aso launna.
7Mamin duang asoon dinen rabarik, i Yesus manjarum lo’a palola’a, “Se’ mole’ balikki’ lo’a propinsi Yudea,” ingka kenang.
8Jaji manjarum palola’a, “O Pa’ Guru, asi lo’a mole’ka’ bapi lo’a dinen? Inang lalojo dinen tauen to’ mauno’en lo’u, to’ mamaratiin nanna batuun,” ingka kenang dinen palola’a manjaruma lo’a i Yesus.
9Dasauti kole’a i Yesus, “Insa’ jama te’ dalam saso? Na’an te’ dua belas jam? Jaji intain yang lamba’en di arawanga matasoon, na’an tatoro. Andian yang jalu parawangiin,” ingka kenang. 10“Intain yang lamba’en di malamen tatoro,” ingka kenang i Yesus. “Kole’a dinen jalu araunen,” ingka kenang.
11Jaji barik, “Daiki’ dinen kawanka’, i Lasarus dinen mamin tindo’. To’ kulamba’i iak itiang manyading lo’a,” ingka kenang manjaruma i Yesus lo’da’.
12Jaji barik manjarum palola’a, “Ti’en tau tindo’, ratina to’ maam padisa,” ingka kenang palola’a lo’a. 13Jaji jaruma i Yesus dinen de’i masan tindo’en lo’a i Lasarus mamakai sama’ jaruma kole’a lalo matena. Poangsi palola’a dinen na’an datamu. Daasanang tindo’ tapat.
14Jaji barik manjarum terus terang, “I Lasarus dinen mamin talalo mate,” ingka kenang manjaruma i Yesus lo’a palola’a. 15“Mandua’ lalo na’anku’ indinang di matena. Maam nyawaku’. Kole’a kutiang pamayoang lo’in, mainto’ parasaya’in,” ingka kenang lo’da’. “Se’ tarangkatki’ barik. Ilamba’iki’,” ingka kenang manjaruma i Yesus lo’a palola’a.
16Jaji barik manjarum sera, i Tomas asanna. Ia lalo yang daasanen anak kampit. Jaji barik, “Se’ tambaki’ nanna Pa’ Guruka’ mainto’ sarataka’ mateen,” ingka kenang jaruma lo’a ira palola’a i Yesus yang bokanen, ambata arakawanna.
I Yesus lalo yang manyuro’en lo’a tauen tio’ balik
17Jaji mondok lo’a dinen, datamu kubura dinen i Lasarus ampat aso maminna ikubur. 18Ti’en Betania dinen de’i, na’an bajao’ lo’a banua Yerusalem, tiga kilometer bua. 19Jaji bayu’ tauen mondok di propinsi Yudea, to’ manjangoki itiang pamaam atena ari Marta, ari Maria kole’a matena sairunna. 20Jaji datamu barik dongona i Yesus di dalanen, ari Martapi lamba’ pasidua’ang kalena nanna i Yesus. I Maria dinen na’an tamba. Arantangpi di saoen.
21Jaji sidua’ barik nanna i Yesus, manjarum i Marta, “O Paraampuane,” ingka, “ti’ko andian indi’ang, tentu na’an mate sairunku’!” ingka kenang. 22“Poangsi kapisi mamin mate, tentuko dameang bua kole’a Alatala panamu, ai poang yang ipitaan iko. Mamin kutamu,” ingka kenang manjaruma i Marta lo’a i Yesus.
23Jaji barik manyauti i Yesus lo’a, “Daiko sairunnu dinen to’ tio’ balik bua,” ingka kenang manjaruma i Yesus lo’a.
24Jaji barik, “Kenang lalo Paraampuane, to’ sarataki’ tio’ baliken ona’ di aso katuntunganna,” ingka kenang.
25Jaji barik manjarum dinen i Yesus lo’a i Marta, “Iak lalo di’en yang matio’en,” ingka kenang. “Jaji intain parasaya’en lo’ku’, daia ona’ to’ tio’ bua kapisi mamin talalo mate,” ingka. 26“Intain poang yang tio’ parasaya’en lo’ku’, daia dinen na’an to’ mate sampai salaun-launna,” ingka kenang i Yesus. Jaji barik, “Ai lo’a Marta’e, parasaya’ko daiko balu’a dinen?” ingka kenang i Yesus lo’a i Marta.
27“O’ lalo Paraampuane, parasaya’ak lo’u,” ingka kenang. “Iko lalo Kristus. Iko lalo Anaka Alatala yang dabayaangen to’ mondok lo’a duniaan,” ingka kenang i Marta manyautina lo’a i Yesus.
I Yesus anangis
28Jaji akaus jaruma dinen, i Marta dinen mole’ balik lo’a saoen. Mondok lo’a saoen, i Marta dinen manyari lo’a i Maria. Dakapi’ang barik dinen i Maria di biringa tau bayu’en dinen. Jaji manjarum, “Mondok mamin Pa’ Guruka’, manyari lo’u,” ingka kenang i Marta lo’a i Maria.
29Jaji datamu barik awan dinen, i Maria dinen lamba’ nanna karuruna, to’ pasidua’ang kalena nanna i Yesus. 30I Yesuspi dinen nampi mondok lo’a banuaan, na’an bea lamba’. Marung bua inang di kosan sidua’a nanna i Marta de’i. 31Tau inangenpi dinen, tau di saoen yang pamaam atena i Maria, tarangkat bea ira kole’a dakitana i Maria dinen lamba’ karuru. Daasanang to’ anangis lo’a kuburen.
32Jaji barik mondok i Maria lo’a i Yesus. Maminna barik sikita nanna, laloang arari lo’a dinen paraba’ kalena di arona i Yesus. “Paraampuanku’, na’an mate sairunku’ ti’ko andian,” ingka kenang. Laloang anangis dinen i Maria.
33Jaji barik susa atena i Yesus mamelena dinen lo’a i Maria anangisa. Ajau’ bea daia nyawana kole’a anangisa gulungan tau malola’en dinen. 34Jaji barik manjarum lo’da’, “Disasi kubura kole’in?” ingka kenang i Yesus lo’da’.
“Se’ lamba’ki’, Paraampuane. Lola’kam ti’ko to’ mamele,” ingka kenang ira lo’a i Yesus.
35Jaji barik i Yesus dinen anangis. 36Tauen barik mamele anangisa dinen manjarum, “Belejo dinen anangisa lasana mangasaanga lo’a i Lasarus dinen.”
37Poangsi manjarum barik sapa dua, “Na’an patut i Lasarus dinen mate ti’ dasuro’ tio’ kole’a i Yesus di’en. Sedangkan tau bauta pande mamele barik kole’a,” ingka kenang gulungan tauen sijarumanna.
I Lasarus dakatio’ balik
38Jaji barik i Yesus lamba’ lo’a kuburen, tabalik susa nyawana. Jaji mondok lo’a kuburen inang, kubur dinen loang batu yang dakaputiin nanna batuun. 39Jaji barik manjarum dinen i Yesus, “Batu dinen kapi’ang ikin,” ingka kenang i Yesus lo’da’.
Jaji barik manjarum i Marta, sairunna i Lasarus dinen, “Na’an te’ mamin bau bauruk yang maminen ampat aso kubura,” ingka kenang i Marta.
40Jaji barik manjarum i Yesus, “Asi lo’a jarumku’ lo’u de’i? Ti’ko parasaya’ uka’, ka’ bea ikitana iko kamaamanna Alatala,” ingka kenang i Yesus manjaruma lo’a i Marta.
41Jaji barik batu dinen dagoleng kole’da’. Maminna dagoleng batu dinen de’i, i Yesuspi dinen maningara’ bado’a barik, “Ama’e, kukasuang nyawa lo’u kole’a mainya’u manaantalinga do’aku’,” ingka. 42“Poangsi kenangku’ kutamu, manaantalingako lapoang lo’ku’. Manjarumku’ poang dinen mainto’ ira di’en parasaya’a lo’ku’, mainto’ parasaya’a barik ira dinen kole’a iko lalo yang manyuro’en lo’ku’,” ingka kenang i Yesus do’ana.
43Jaji barik maminna bado’ana dinen, manjarum bapi i Yesus nanna unyi baraana mangalong lo’a i Lasarus, “O Lasarus, minsaluanko,” ingka kenang. 44I Lasaruspi minsaluan, kakina nanna tanganna dinen takambut kole’a kainen. Lindo’a dinen dabalut nanna kainen.
Jaji barik manjarum i Yesus lo’da’, “Leka’i ikin dinen mantuarina, lapasang ikin,” ingka kenang i Yesus lo’da’.
Tauen pasipakatang to’ mauno’ lo’a i Yesus
Mat. 26:1-5; Mk. 14:1-2; Lk. 22:1-2
45Jaji antarana tau mameleen dinen, tau aramenen lo’a i Maria dinen, bayu’ yang parasaya’en barik lo’a i Yesus. 46Poangsi andian bea dinen yang tau maduangen lo’a tau Parisiin manjarumang dongona dinen jalu dakarajaan kole’a i Yesus. 47Jaji maminna dadalinga pangaduan dinen sipakat barik gulungan tau Parisiin nanna gulungan imam baraa’en sarata dinen Paurusen. Jaji manjarum, “Ai lo’ka’ barik di’en? Na, belejo bayu’a panyunyuana, bayu’a jalu dakarajaan,” ingka kenang. 48“Ona’ dinen insang bayu’ tauen parasaya’a, to’ akaus tauen parasaya’en lo’a,” ingka kenang. “Ipalaloang poang iki’, dakita ona’ kole’a ambata pamarinta Roma yang manjajaan lo’ka’. Datamu ona’ tau bayu’en malola’en lo’a i Yesus, tentu daasanki’ sarantak malawan. Tentu marampas lo’a banuaka’ nanna saona Alatalaka’ di’en,” ingka kenang ira sijarumanna.
49Jaji di antarada’ dinen andian tau sera asanna i Kayapas. I Kayapas dinen yang mala tugas imam baraa’en taun dinen. Jaji barik dinen manjarum lo’da’, “Kosan jaji panamunin!” ingka kenang. 50“Ai na’an ipikirang ikin, dari pada mate tau bayu’en idukum, labi maam mantuari sera mateen itiang lo’ka’,” ingka kenang.
51Jaji jaruma dinen okan bea jarum diri’a. Daia dinen dapakai kole’a Alatala itiang manjarumang memen kole’a i Yesus dinen arung mate manyurang lo’a banuada’. Kole’a i Kayapas dinen mawa tugasa imam baraa’en taun dinen. 52Jaji matena i Yesus dinen okan dinen to’ manyurang lo’a banuada’ poang, na’an. Lo’a banua tau bokanenpi ka’ kenanga, to’ dapasera barik ambata anaka Alatala kira tatak banuaan. 53Jaji dari aso dinen lalo ambata toa Yahudiin manikoma to’ mauno’ lo’a i Yesus.
54Jaji barik i Yesus dinen na’an lagi’ payoang kalena di Yudea. Daia dinen kapi’ang kalena barik lo’a banua Epraim. Di biringa kosan ateengen lalako’a nanna palola’a.
55Jaji aso dinen mainso’ rami Palaloien. Jaji barik dinen bayu’ lamba’en dari kuliling lo’a Yerusalem to’ manu pamareseda’ malola’ani sara agamada’ pangamasanga lo’a rami Palaloien. 56Jaji barik ira dinen yang babangkulungen di saona Alatala, manyari lo’a i Yesus. Jaji manjarum, “Ai lo’a i Yesus dinen, mondok te’ na’an te’?” ingka kenang ira sijarumanen. 57Jaji ira imaam baraa’en nanna gulungan tau Parisiin dinen mamin mamarinta, “Intain,” ingka, “manamuun kosanna i Yesus arung maduang lo’am mainto’ itamuna ikam maningkam lo’a,” ingka kenang parintada’.
നിലവിൽ തിരഞ്ഞെടുത്തിരിക്കുന്നു:
Yohanes 11: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
