Yohanes 12
12
I Yesus dainyaki
Mat. 26:6-13; Mk. 14:3-9
1Jaji anam aso poangpi tau to’ maramiang aso Palaloien, i Yesus dinen lamba’ lo’a banua Betania lo’a saona i Lasarus. I Lasarus lalo dinen yang dakatio’ baliken kole’a i Yesus. 2Jaji ira dinen mangamasang jalu kaan, ari Marta dinen yang manyorongiin. I Lasarus daia dinen angkaan bea di mejaan nanna i Yesus. 3Jaji barik yang i Mariaan dinen mondok mawa inyak narwastu, inyak yang palin baaragaan satanga’ kilo bayu’a. Jaji inyak dinen daolongi di kakina i Yesus laloang dasonoti barik nanna buka. Barik dinen dabau kole’da’ kausa yang ilalam saoen. Lk. 7:37-38.
4Rabarik andian tau seraan, asanna dinen lalo i Yudas Iskariot. Dinen ona’ yang maduangen lo’a i Yesus lo’a musuna mainto’ dakule’a datingkam. Jaji barik andian jaruma dinen i Yudas, 5“Ai ratina iruaranga kenang? Inyak dinen pande ipet baraga. Ragana dinen pande tiga ratus papaka duit pirak, itiang pameangka’ lo’a tau masikinen,” ingka kenang i Yudas pasala’a lo’a i Maria dinen. 6Jaruma dinen okan bea mangasaanga lo’a tau masikinen. I Yudas dinen tau pangalit. Ia yang tugas manuntuani duitda’ dua belasen, yang biasa bea angkaan duitda’ dinen.
7Jaji barik dasauti jarum dinen de’i, “Koronga,” ingka i Yesus. “Dinen lalo ratina itaro’a inyak dinen launna di’en, mainto’ dainyakina mantuariku’, itiang mangamasang ikuburku’ ona’ di mateku’,” ingka kenang lo’da’. 8“Ti’ tau masikin andian lapoang nannin, poangsi daiak diri’ku’ okanak salaun-launna lalako’ku’ nannin,” ingka kenang manyautina i Yesus lo’a jaruma i Yudas. Ul. 15:11.
Gulungan imam baraa’en manikom to’ mauno’ lo’a i Lasarus
9Jaji barik bayu’ tau Yudea mandalinga dongona i Yesus di banua Betania. Jaji lamba’ tauen lo’a dinen. Okan poang kole’a i Yesus tauen lamba’a, tauen to’ mamele lo’a i Lasarus yang dakatio’ baliken kole’a i Yesus. 10Jaji barik dinen gulungan imam baraa’en manikom to’ mauno’ bea lo’a i Lasarus. 11Kole’a bayu’ tau Yudea dinen yang to’ alibaken barik malola’ lo’a imam baraa’en, to’ malola’ lo’a i Yesus kole’a maminna dakita i Lasarus yang dakatio’ baliken.
I Yesus mondok lo’a Yerusalem awan Rajaan
Mat. 21:1-11; Mk. 11:1-10; Lk. 19:28-38
12Di aso mina’a barik, dadalinga dongo kole’a tau babangkulungen yang to’ maramiang Palaloien, dongona i Yesus to’ mondok lo’a Yerusalem. 13Jaji barik tauen dinen mawa daun kayu, dayo’-ayo’ang itiang panyialo lo’a i Yesus, laloang lamba’ pasidua’ang kalena nanna i Yesus di dalanen. Jaji mamuko tauen sasarata pamaama lo’a i Yesus, “Dapamaamko rajanam tau Israelen yang mondoken atas asanna Alatala!” ingka kenang tau mamukoon. Msm. 118:26.
14Jaji i Yesus daia mandua’ang keledaien laloang mauwat barik ibona keledaien. Sabangon bua awan jalu yang datulisangen dinen,
15 Ada’kin atakuten, tau banua Sion! Belejo rajanin mondoka lo’in, mauwat di anak keledaien,
ingka kenangjo ilalam Jaruma Alatala. Sak. 9:9.
16Jaji palola’a dinen nampi datamu ratina mondoka i Yesus balu’a dinen. Di ona’a barik nanga iangkatanga i Yesus lo’a kamaamanna, inang barik datamuna. Daparandam barik andianna memen dinen jarum datulisangen ilalam Jaruma Alatala lo’a pamondoka i Yesus. Daparandam kole’a balu’a dinen lalo ira mawada’ lo’a.
17-18Jaji ratina tauen manyialoon lo’a i Yesus, kole’a dongona panyunyuana yang dajarumangen kole’a tauen. Kole’a de’i tau Yudea yang tambaan inang mamele nanga i Lasarus dakalonga, dasuro’ minsaluan lo’a kubura, ira dinen barik yang manjarumangen lo’a tauen dongona dinen. 19Jaji barik sijaruman dinen gulungan tau Parisiin, “Na, belejo! Ataloki’ barik kole’a. Tauen malola’ kausa lo’a,” ingka kenang ira.
Tau okanen Yahudiin manyari lo’a i Yesus
20Jaji barik di gulungan tau mondoken to’ manyemba di ramiin, andian tau yang okanen urang Yahudiin. 21Jaji barik mondok lo’a i Pilipus. I Pilipus dinen tau banua Betsaida di propinsi Galilea. Jaji manjarum dinen tauen lo’a i Pilipus, “Ama’, daikam di’en bainginkam to’ sidua’ nanna i Yesus,” ingka kenang. 22Jaji barik i Pilipus dinen manjarum bapi lo’a i Andreas, lamba’ ira duaan. “O Yesus, andian tau to’ manyari lo’u,” ingka kenang ira.
23Jaji barik dinen manjarum i Yesus lo’da’, “Di’en mondok mamin bayana kamaamanku’ Anak Mantuariin to’ dapayoang lo’a tauen,” ingka kenang. 24“Manjarumak lo’in tapat-tapat. Tolang banyia’en kuala sama’ jarum awan tau mainya’en mate. Satolang banyia’en, ti’ na’an itanam, kosan ratina. Tetap sera bua tolanga,” ingka kenang. “Ti’ itanam, ti’ dadua’ sauranen, dadua’ sisiaken baru’ dinen ambua’ bayu’,” ingka kenang. 25“Jaji kenang bapi nanna mantuariin. Intain yang mainya’en marinsa’ malola’anina lo’ku’, yang barani sampai mate, dinen ona’ bauntung to’ tio’ salaun-launna. Intain mainya’en to’ katio’ poang kalena, yang alibaken marinsa’, dinen ona’ yang arugiin salaun-launna, na’an tio’,” ingka kenang. Mat. 10:39; 16:25; Mk. 8:35; Lk. 9:24; 17:33. 26“Jaji intain barik to’ padari anak ulun maamku’, arung malola’ lo’ku’, mainto’ disa barik kosanku’, inang bea ulun maamku’. Intain barik ulunku’, dinen yang dapaduliin kole’a Ama’ku’,” ingka kenang i Yesus lo’da’.
I Yesus manjarumang matena
27Jaji barik manjarum i Yesus, “Awandi’en barik susa ateku’. Asi lo’a maamen jarumku’? To’ mamita lo’a Ama’ku’ manyuro’ mangapi’ang jalu marinsa’en mainto’ na’anna adari lo’ku’, na’an patut. Kole’a dinen lalo ratina pamondokku’, mainto’ dadua’ku’ nanna parinsa’en dinen,” ingka kenang lo’da’. 28“Labi maam kenang,” ingka, “Mawako poang panamunu mainto’ ipudinu,” ingka kenang barik i Yesus do’ana lo’a Amana.
Jaji barik mondok unyi baraa’en dinen dari Surga, “Ijolona di’en maminak lalo mawa pudi lo’a diri’ku’. Awandi’enpi laloang kuawa pudi lo’a diri’ku’,” ingka kenang dinen.
29Jaji barik unyi dinen, bayu’ tauen mandalingana. Sapa dua tauen masan dinen unyi dalak. Sapa dua dinen masan unyi malaikat. 30Poangsi manjarum i Yesus, “Unyi dinen, okan itiang lo’ku’ manjaruma. Dinen itiang lo’in, mainto’ itamuna ikin,” ingka kenang. 31“Awandi’en lalo mondoka bayana, tau duniaan di’en to’ daawa mamutusi kajau’anna. Awandi’en lalo i Pangabo dinen yang tau mamarintaan di duniaan to’ daburo,” ingka kenang. 32“Ti’ak ona’ mamin iangkatang inait, baru’ inang ona’ datamuna kole’a tauen, datarikang atena lo’ku’,” ingka kenang lo’da’. 33Jaji jaruma dinen dajarumang memen sara matena di kayu salipen.
34Jaji manjarum dinen tau babangkulungen lo’a i Yesus, “Dalam baya datulisangen di Ukuma Alatala, daasan Kristus tau dabayaangen dinen to’ tio’ salaun-launna. Asi lo’a jarumu dinen, Anak Mantuariin to’ iangkatang mate ikona? Ai ratina kalo’u yang iasanen dinen Anak Mantuariin ilalam baya datulisangenjo dinen?” ingka kenang ira lo’a. Msm. 110:4; Yes. 9:6; Yeh. 37:25; Dan. 7:14.
35Jaji barik i Yesus manyauti lo’da’, “Sikadang poangpi jalu arawangen andianna nannin. Jaji lamba’kin terus launna andiannapi nannin, mainto’ na’annin darambit jalu araunen,” ingka kenang. “Ti’kin lamba’ di jalu araunen, ti’ inyap jalu arawangen, manasarkin ona’ lamba’en,” ingka kenang lo’da’. 36“Launna andianna jalu arawangen di’en, di lamba’in, parasaya’kin poang lo’a jalu arawangen, mainto’ daikin rabarik padari tau basa arawangen,” ingka kenang i Yesus lo’da’.
Bayu’ ira tau Yahudiin na’an parasaya’ lo’a i Yesus
Yes. 53:1; Dan. 6:10
Maminna dinen i Yesus kapi’ang kalena barik lo’a tau bayu’en. 37Kapisi bayu’a panyunyuana yang dapolaan kole’a i Yesus di matada’ nampi bua ira parasaya’. 38Mainto’ adarina bua sabalu’ nanna jalu datulisangen memen ilalam Jaruma Alatala. Kole’a andiannajo bayana baki’ Yesaya panjaruma Alatala,
O Paraampuanku’, andian te’ tau yang parasaya’en lo’a jalu yang ijarumangen iki’? Intain manamuun ratina panyunyuanu?
ingka kenangjo ilalam Jaruma Alatala. Yes. 53:1.
39Jaji ira dinen na’an pande parasaya’ kole’a andian bapi bayana baki’ Yesaya awan di’en,
40 Matada’ kusuro’ bauta mainto’ na’anna mamele. Ateda’ kusuro’ bakaras mainto’ na’anna datamu ratina. Na’an kenang ungka’en ira dinen mole’ lo’ku’ laloang kupamaam lo’da’,
ingka kenang Alatala ilalam jalu datulisangen kole’a baki’ Yesaya. Yes. 6:10. 41Jaji baki’ Yesaya manulis dinen kole’a datamuna memen kamaamanna i Yesus yang maminen ia ampunaan inang di Surga. Jaji dajarumang barik lo’ka’.
42Jaji waktu nanga dinen andian mamin bayu’ toa Yahudiin yang parasaya’en lo’a i Yesus. Poangsi alibakpi ira jarumang kalena kole’a atakuta lo’a gulungan tau Parisiin, atakut dauser dari sao sambayangen. 43Ira dinen labi penting dapudi tau daripada dapudi kole’a Alatala.
Jaruma i Yesus ona’ dala mamutusi lo’a tauen
44Jaji barik manjarum i Yesus nanna unyi baraana lo’da’, “Intain yang parasaya’en lo’ku’, okan lo’ku’ poang parasaya’a. Parasaya’ bea lo’a tau manyuro’en lo’ku’,” ingka kenang. 45“Intain maitaan lo’ku’, maita bua lo’a tau manyuro’en lo’ku’,” ingka kenang manjaruma i Yesus. 46“Daiak mondokku’ lo’a duniaan awan jalu arawangen, mainto’ tau parasaya’en lo’ku’ na’an lagi’ lalako’ di jalu araunen,” ingka kenang manjaruma i Yesus lo’da’.
47Jaji manjarum i Yesus, “Ti’ tau mandalingaan dongoku’ poangsi na’an malola’ani, okan iak yang mamutusiin. Okan mondokku’ di’en itiang mamutusi lo’a anak mantuariin. Mondokku’ di’en itiang matio’ lo’a anak mantuariin,” ingka kenang. 48“Poangsi andian bua pamutusiin. Intain yang mangalibakangen lo’ku’, alibak lo’a jalu kujarumangen dinen, andian ona’ yang mamutusiin lo’a,” ingka kenang. “Samuana jalu maminen kujarumang, dinen ona’ yang itiang mamutusi lo’a tau mangalibakangen lo’ku’ mondok ona’ di aso katuntunganna,” ingka kenang i Yesus. 49“Kole’a samuana dinen yang kujarumangen okan kuasa diri’ku’, kuasana Ama’ku’. Samuana dinen dongoku’ yang kujarumangen, dinen jalu dasuro’angen lo’ku’ kole’a Ama’ku’, parintana Ama’ku’. 50Jaji ambata parintana dinen kutamuna, ratina mainya’ku’ manjarumang, kole’a jarum dinen lalo manyuro’ tio’en,” ingka kenang. “Jaji jarumku’ kujarumangen dinen, dinen lalo jaruma Ama’ku’ yang dasuro’angen lo’ku’,” ingka kenang i Yesus lo’da’.
നിലവിൽ തിരഞ്ഞെടുത്തിരിക്കുന്നു:
Yohanes 12: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997