Yohanes 13
13
I Yesus pakeke’ kalena malola’ani karaja pangkam
1Jaji barik to’ mainso’ jaji aso Palaloien, i Yesus dinen datamu to’ mole’a lo’a Amana, to’ marantang dunia di’en. Mamin lalo dakasaang ambata anak mantuariin yang ia ampunaan, rabarik dinen dapamatang laloang kasaanga dinen sampai mondok lo’a katuntunganna.
2Jaji barik dinen i Yesus angkaan nanna ambata gulungan palola’a. Nanga dinen andianna memen i Pangabo mangaru atena i Yudas Iskariot manyuro’ to’ maduang lo’a i Yesus lo’a musuna mainto’ dakule’a datingkam. 3I Yesuspi dinen datamu ratina andian kuasana ibona gulungan ambata jaluun, dasuro’angen lo’a kole’a Amana. Datamu diri’a mondoka dari nanna Amana kenang bea to’ mole’ balik lo’a Amana. 4Jaji patanga’an angkaanda’ dinen, i Yesus akadeng. Daleka’ dinen sapena, anduken barik dalilitang di awaka. 5Jaji barik dinen daolongang danumen di basikomen daputi’ kakina ambata gulungan palola’a, laloang dasonoti nanna anduk dalilitangen di awaka dinen, polaang kalena suro’anen. 6Jaji mondok lo’a i Petrus, “Adi, to’ iputi’ iko kakiku’. Na’an patut iko mangarajaan, Paraampuane!” ingka kenang.
7Jaji i Yesus barik manyauti lo’a, “Di’en nampi itamu iko ratina awandi’en. Poangsi itamu bua iko ona’,” ingka kenang i Yesus lo’a i Petrus.
8Jaji barik, “Na’an. Na’anko patut mangusuk kakiku’ sampai awandi’en mondok lo’a salaun-launnaan,” ingka kenang i Petrus lo’a.
Jaji manjarum i Yesus, “Na’an, ti’ na’annak mangusuk kakinu, okanko barik palola’ku’, anake,” ingka kenang i Yesus.
9Mamin dinen manjarum barik i Petrus, “Ati’ kenang, kusuk kakiku’. Okan kakiku’ poang ikusuken. Tanganku’ kusuk, uluku’ kusuk, Paraampuane,” ingka kenang i Simon Petrus lo’a i Yesus.
10Jaji barik i Yesus manjarum lo’da’, “Na, di’en maminkin mandi’. Itamuna iki’ tau maminen mandi’, tau dinen mamin barese kausa. Suma kakina poangpi yang na’anen barese,” ingka kenang i Yesus lo’da’. “Daikinpi maminkin barese. Suma sera poang di’en yang na’anen barese,” ingka kenang i Yesus lo’da’. 11Kenanga manjaruma i Yesus, samuana daasan barese, suma sera poang na’anen, kole’a datamu memen tau yang to’ maduangen lo’a lo’a musuna mainto’ dakule’a datingkam.
12Mamin akaus dakusuk kakida’ kole’a i Yesus, barik dapakai sapena. Baru’ mole’ dinen lo’a kosanna di mejaan. Jaji barik i Yesus manjarum lo’da’, “Itamu ikinaka ratina yang jalu kuanuun dinen?” ingka kenang. 13“Daikin mangalong gurukin lo’ku’, mangalong Paraampuan. Ya, patutak bua iasan ikin Paraampuan. Tapat bua iasanak ikin guru,” ingka kenang. 14“Jaji iak di’en Paraampuannin, Gurunin, baru’ak mangusuk kakinin. Daikin rabarik arung mainya’ sigulungan mangusuk kakinin sera lo’a seraan,” ingka kenang. 15“Daiak maminak mameang sonto lo’in mainto’ ilola’ani ikin. Awan lalo basaku’ lo’in, arung awan dinen bea daikin basanin sera lo’a seraan,” ingka kenang. Lk. 22:27.
16Jaji manjarum bapi, “Manjarumak lo’in tapat-tapat. Yang paraampuanen, ia jaji iboen. Na’an patut ulunna baraa’en lo’a paraampuanna. Kenang bapi tau manyuro’en, tentu ia yang baraa’en lo’a tau yang dasuro’en. Na’an patut suro’an baraa’en lo’a tau manyuro’en. Na’an patut alibak malola’ani sontona,” ingka kenang. Mat. 10:24; Lk. 6:40; Yoh. 15:20. 17“Na, itamu barik ikin sontoku’. Bauntungkin ati’en ilola’ani ikin,” ingka kenang i Yesus lo’da’.
18Jaji manjarum i Yesus, “Yang jalu kujarumangen dinen, okan samuanin. Yang maminen kudile’i, kukilala kausana. Poangsi arung adari bua jalu yang datulisangen ilalam Jaruma Alatala,
Yang sarilao’ angkaanen dinen nanku’, dinen bua yang malawanen lo’ku’,
ingka kenangjo ilalam Jaruma Alatala. Msm. 41:10.
19“Jaji kujarumang memen mainto’ itamuna ikin di aso adarina, mainto’ iparasaya’ina ikin kole’a Iak Lalo di’ Iak,” ingka kenang. 20“Manjarumak lo’in tapat-tapat. Intain manyialoon lo’ku’, okan iak poang dasialoon, manyialo bua lo’a tau yang manyuro’en lo’ku’,” ingka kenang i Yesus lo’da’. Mat. 10:40; Mk. 9:37; Lk. 9:48; 10:16.
I Yesus manjarumang memen tau yang to’ maduang lo’a lo’a musuna mainto’ dakule’a datingkam
Mat. 26:21-25; Mk. 14:18-21; Lk. 22:21-23
21Maminna i Yesus manjarum awan dinen, susa tapat atena. Jaji manjarum lo’da’ terus terang, “Di’en manjarumak lo’in tapat-tapat. Di antaraka’ pakawanen di’en andiankin sera yang to’ maduangen lo’ku’ mainto’ dakule’ku’ datingkam kole’a musuku’,” ingka kenang manjaruma i Yesus lo’da’.
22Jaji gulungan palola’a dinen sibele. Na’an datamu intain-intain. 23Jaji barik andian di antarada’ dinen kawan yang palin dakasaangen. Daia kosanna di mejaan dinen, inang ibiringa i Yesus. 24Jaji i Simon Petrus dinen mameang tanda jarum sisinik lo’a palola’ dinen de’i dasuro’ matoani lo’a i Yesus, “Mangatoaniko lo’a, intain yang dakenangiin,” ingka.
25Jaji barik palola’a dinen de’i mainso’i bapi lo’a, “Intain dinen Paraampuane?” ingka kenang.
26Jaji barik dinen i Yesus manyauti, “Ona’, roti kusalapang. Intain manyialoon roti yang kusalapangen dinen, dinen lalo iaan,” ingka kenang. Jaji barik roti dinen daawa, dasalapang dinen laloang daunjukang lo’a i Yudas anaka i Simon Iskariot itiang tanda. 27Maminna barik dasialoi roti dinen, mondok bea i Pangabo manyarungen lo’a.
Jaji barik manjarum i Yesus, “Se’ jalu to’ ianuun iko dinen, manuko babariar,” ingka kenang i Yesus lo’a. 28Jaji ira bokanen yang angkaanen di mejaan, kosan manamuun ratina jaruma i Yesus dinen. 29Sapa dua dinen daasanang dasuro’ babalanja mala ambata jalu kaanen itiang lo’a rami-ramiin, atau dasuro’ mameang jalu lo’a tau masikinen. Kole’a i Yudas dinen yang manuntuaniin duitda’. 30Jaji maminna i Yudas dinen manyialo roti dinen daiapi inyap. Jaji dinen mamin malam asoon.
Parinta baruun darantangen lo’da’ kole’a i Yesus
31Jaji maminna talalo barik i Yudas, manjarum barik i Yesus lo’da’, “Na di’en, mondoka lalo bayana to’ dapayoanga kamaamanku’ Anak Mantuariin. Dapayoang bea dinen kamaamanna Alatala malaloi lo’ku’,” ingka kenang manjaruma i Yesus lo’da’. 32“Jaji ti’ mamin kamaamanna Alatala dapayoang malaloi lo’ku’, inang bua dapayoanga kamaamanku’ Anak Mantuariin, Alatala diri’a yang mamayoangen. Bariar bua to’ adarina,” ingka kenang manjaruma i Yesus lo’da’.
33“Araanakku’kin, na’an lagi’ balaun daiak lalako’ku’ nannin. Daikin ona’ to’ manyarikin lo’ku’ poangsi daikin na’ankin dapat malola’ lo’ku’, awan lalo jarumku’ memen lo’da’ toa Yahudiin,” ingka kenang lo’da’. Yoh. 7:34.
34“Di’en pesanku’ baruun lo’in, arungkin tio’ sikasaang. Awan iak mangasaangku’ lo’in, awan dinen bea daikin sikasaangin sera lo’a seraan,” ingka kenang. Yoh. 15:12,17; 1Yoh. 3:23; 2Yoh. 5. 35“Jaji ati’kin tio’ sikasaang baru’kin dakilala tau, baru’ datamu kole’a tauen ikinna palola’ku’,” ingka kenang manjaruma i Yesus lo’da’.
I Yesus manjarumang memen kole’a i Petrus to’ manasal
Mat. 26:31-35; Mk. 14:27-31; Lk. 22:31-34
36Jaji barik i Simon Petrus matoani lo’a i Yesus, “Paraampuanku’, to’ disako inyapen?”
“O na’an dapatko malola’ lo’ku’. Ona’ko, imundiko,” ingka kenang i Yesus lo’a i Simon Petrus.
37Jaji dasauti bapi kole’a i Petrus, “Asi lo’a imundiku’? Maminak basadia, ti’ko mate, mateak bea daiak mangamuroangku’ lo’u,” ingka kenang i Petrus lo’a i Yesus.
38Jaji manjarum i Yesus lo’a i Simon Petrus, “Ai daiko dinen, tapat-tapatko basadia to’ mate mangamuroangu lo’ku’? Manjarumak lo’u tapat-tapat. Nampina manuken manunturunguk, daikopi to’ mamin talung kali asasalu lo’ku’,” ingka kenang i Yesus lo’a i Simon Petrus.
നിലവിൽ തിരഞ്ഞെടുത്തിരിക്കുന്നു:
Yohanes 13: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997