Yohanes 14
14
I Yesus lalo dalan lo’aan Amana
1Jaji barik i Yesus manjarum lo’da’, “Ada’kin susaan. Ada’ ajau’a nyawanin,” ingka kenang lo’da’. “Parasaya’ poangkin lo’a Alatala. Parasaya’kin lo’a Alatala, parasaya’kin bea lo’ku’,” ingka kenang i Yesus. 2Jaji barik, “Tajoloak lo’a saona Ama’ku’. Saona Ama’ku’ dinen bayu’ sapat-sapata. Jaji mangamasangak lo’in tajolo kosannin inang. Jarumku’ di’en lo’in saja tapat. Na’annak manjarum kenang ti’ na’an tapat,” ingka kenang lo’da’. 3“Jaji mamin ona’ kukamasang kosannin, tabalikak bua mala lo’in. Mainto’ disa kosanku’, inang bua kosannin,” ingka kenang i Yesus lo’da’.
4“Yang dalan lo’aan, dinen mamin lalo itamu ikin,” ingka kenang i Yesus lo’da’. Yoh. 10:1,7,9; 11:25.
5Jaji barik i Tomas manjarum bapi lo’a i Yesus, “Na’an itamu ikam, Paraampuane. To’ disako inyapen? Asi lo’a itamuna ikam dalanen?” ingka kenang.
6“Iak lalo di’en yang dalanen. Iak lalo katapatanen nanna katio’anen,” ingka kenang. “Kosan tau mondok lo’a Ama’ku’ ti’ na’an malaloi lo’ku’,” ingka kenang i Yesus lo’a i Tomas. 7“Na, daikin ti’ saja mangilala lo’ku’, mangilala beakin lo’a Ama’ku’. Yang tapaten, tarangkat awandi’en mangilalakin lo’a. Mamin lalo ikita ikin,” ingka kenang lo’da’.
8Jaji barik manjarum i Pilipus lo’a i Yesus, “Paraampuanku’, Amanu dinen payoang lo’am. Dinen poang parulunam,” ingka kenang jaruma i Pilipus.
9Jaji barik manyauti i Yesus, “Asi lo’a na’anna itamu iko, Pilipuse? Maminak balaun lalako’en nannin, na’anpiko mangilala lo’ku’?” ingka kenang manjaruma i Yesus lo’a i Pilipus. “Yang tau maitaan lo’ku’ maita bua lo’a Ama’ku’. Asi lo’a jarumu suro’ payoanga Ama’ku’ lo’in kakaru’? Yoh. 8:19,54; 10:30,38; 12:45. 10Ai na’anko parasaya’, Pilipuse, na’an itamu iko? Daiak sarilao’ak nanna Ama’ku’. Ama’ku’pi daia sarilao’ bua nanku’,” ingka kenang lo’da’. “Yang jalu kujarumangen dinen okan jarumku’, jaruma Ama’ku’. Ama’ku’ yang sarilao’en nanku’, ia yang mawa adariin panamu diri’a,” ingka kenang lo’da’.
11“Arungkin parasaya’ lo’a jarumku’ dinen de’i, daiak sarilao’ak nanna Ama’ku’, Ama’ku’pi sarilao’ bua nanku’. Ti’ na’ankin parasaya’ lo’a jarumku’ dinen, sana’an-na’anna arungkin parasaya’ kole’a basa panyunyuaku’,” ingka kenang i Yesus lo’da’. 12“Manjarumak lo’in tapat-tapat. Yang tau parasaya’en lo’ku’ dapat malola’ani panyunyuaku’. Sabenara, labi maam lagi’ panyunyuana ona’, kole’a daiak di’en to’ mole’ak lo’a Ama’ku’,” ingka kenang. 13“Jaji ai poang yang ipitaan ikin ona’ atas asanku’, ona’ kumeang. Ratina kumeanga, mainto’ dapayoanga kamaamanna Ama’ku’ malaloi lo’ku’ Anaka. 14Jaji ti’ ipita ikin lo’ku’ jaluun atas asanku’, dinen kunoang lo’in,” ingka kenang i Yesus lo’a palola’a.
I Yesus mameang bayana kole’a to’ dasuro’ tador Sumangat Bareseen lo’da’
15Jaji barik manjarum i Yesus lo’da, “Ti’kin mangasaang lo’ku’, tentukin malola’ani panamuku’, malola’ parintaku’,” ingka kenang. 16“Daiakpi to’ mamita lo’a Ama’ku’ isuro’ manoang lo’in bapi seraan yang itiang panggulunginin, yang to’ sarilao’en nannin sampai salaun-launna,” ingka kenang lo’da’. 17“Jaji yang to’ sarilao’ nannin, ialalo dinen Sumangat Bareseen yang manyuro’ paitaan lo’in jalu yang tapaten, manyuro’ manamu lo’in,” ingka kenang i Yesus lo’da’. “Ti’ tau duniaan,” ingka kenang, “na’an dapat manarima’ lo’a, kole’a ira dinen na’an maita lo’a, na’an mangilala lo’a. Ti’ daikin, mangilalakin lo’a kole’a andian mamin sarilao’ nannin. Ona’pi dinen to’ malalako’i barik lo’in,” ingka kenang i Yesus lo’da’.
18I Yesus manjarum lo’da’, “Di tarangkatku’ ona’, na’ankin to’ kurantang unjang kenang poang kenang, awan lalo anak biuun. To’ tabalikak bua lo’in,” ingka kenang i Yesus lo’da’. 19“Sikadang poangpi tau dunia di’en na’an lagi’ maita lo’ku’. Poangsi daikin maitakin bua lo’ku’,” ingka kenang manjaruma i Yesus lo’da’. “Kole’a daiak tio’, daikinpi tio’,” ingka kenang. 20“Mondok ona’ bayaku’ dinen to’ itamu bua ikin kole’a daiak sarilao’ nanna Ama’ku’. Daikinpi sarilao’ bua nanku’ sarata iak sarilao’ bea nannin,” ingka kenang. 21“Jaji intain manarima’en, yang malola’aniin lo’a parintaku’, dinen yang mangasaangen lo’ku’. Dakasaang bea kole’a Ama’ku’. Yang mangasaangen lo’ku’ kukasaang bea iak, kupaitang kaleku’ lo’a,” ingka kenang i Yesus lo’da’.
22Jaji manjarum barik i Yudas dinen yang okanen i Yudas Iskariot. “Ai daiko paitanga kalenu lo’am, na’annu paitang kalenu lo’a tau duniaan?” ingka kenang manjaruma.
23Jaji barik dasauti kole’a i Yesus. “Ati’en tau mangasaangen lo’ku’ tentu malola’ani pangajaranku’, dakasaang bua barik kole’a Amaku’. Ona’ barik daikam duaan, mondok sarilao’kam nanna,” ingka kenang i Yesus lo’a i Yudas. 24“Intain na’anen mangasaang lo’ku’, dinen lalo tau na’anen malola’ani pangajaranku’. Pangajaranku’ dinen yang idalingaan ikin, okan pangajaranku’. Pangajaranna Ama’ku’ yang manyuro’en lo’ku’.
25“Jalu di’en kujarumang memen lo’in launna andianku’pi nannin. 26Poangsi andian ona’ Sumangat Bareseen yang itiang panggulungi lo’in, yang to’ dasuro’ lo’in kole’a Ama’ku’ atas asanku’. Ti’ mamin andian Sumangat Bareseen, ia dinen yang parandamangen lo’in jalu yang maminen kujarumangjo ijoloon lo’in, mainto’ itamuna ikin ratina,” ingka kenang lo’da’.
27Jaji manjarum i Yesus lo’da’, “Andian jalu kurantangen nannin. Dari maama nyawaku’ daiak kutawa’ lo’in parasa’an mainto’ maama bea daikin nyawanin,” ingka kenang manjaruma i Yesus. “Daiki’ parasa’an maama nyawaka’ di’en yang kutawa’iin lo’in, okan sama nanna yang idua’angen dari nanna tau duniaan,” ingka kenang. “Jaji ada’kin kalangganganen, ada’ susaan, ada’ atakuten. 28Mamin idalinga ikin jarumku’ de’i kole’a to’ inyapak poangsi to’ tabalikak bua lo’in ona’. Ti’enkin mangasaang lo’ku’, tentu sasau nyawanin mandalingaan dongo to’ inyapku’ dinen, to’ mole’ lo’a Ama’ku’. Kole’a Ama’ku’ dinen, daia baraa lo’ku’,” ingka kenang. 29“Jaji dinen kujarumanga memen lo’in nampina adari mainto’ ti’ mamin adari itamu barik ikin, parasaya’kin barik. 30Daiakpi na’anakpi balaun sijarumanen nannin, kole’a to’ mondok i Pangabo dinen yang tau mamarintaan di duniaan di’en,” ingka kenang. “Daia dinen sabenara kosan kuasana lo’ku’. 31Poangsi arung adari. Ambata tau duniaan arung mararati pangasaangku’ lo’a Ama’ku’. Dinen lalo kulola’anina kausa parintana Ama’ku’, mainto’ datamuna kole’a tauen mangasaangku’ lo’a Ama’ku’,” ingka kenang manjaruma lo’da’.
Maminna dinen, “Se’ tarangkatki’ marantang kosan di’en,” ingka kenang manjaruma i Yesus lo’a ambata palola’a.
നിലവിൽ തിരഞ്ഞെടുത്തിരിക്കുന്നു:
Yohanes 14: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
