Yohanes 4
4
I Yesus sijaruman nanna babainye, tau banua Samaria
1Jaji barik dadalinga dongoon kole’a tau golongan Parisiin. Ingka jaruma tauen, “I Yesus daia mawa lo’a tauen padari palola’a sarata mambaptis lo’da’, labi bayu’ lagi’ lo’a i Yohanes,” ingka kenang manjaruma. 2Jaji okan bea ia yang mambaptisen, palola’a yang mambaptisen. 3Jaji datamu barik jarum tauen awan dinen kole’a i Yesus, daia tarangkat dari propinsi Yudea to’ mole’ balik lo’a propinsi Galilea.
4Jaji dalam palamba’anna dinen arung daia marat di propinsi Samaria. 5Jaji dalam palamba’anna dinen rabarik, mondok daia lo’a banua Sikar yang mainso’en lo’a tana’a baki’ Yakubjo yang dameangen lo’a anaka, lo’a baki’ Yusup dinen. Mul. 48:22; Yos. 24:32. 6Inang andian loang kali palanan danumen, yang baki’ Yakubenjo ampunaan. Jaji mondok inang i Yesus aduduk sangarian kole’a alolo’ tolanga lamba’. Kira-kira tanga’ aso mondoka lo’a dinen.
7Jaji barik i Yesus aduduk inang, mondok babainyeen, babainye urang Samariaan to’ malapang danum. Jaji manjarum barik i Yesus lo’a babainye urang Samariaan dinen, “Meangak danum,” ingka kenang. 8Jaji palola’a i Yesus dinen mamin inyap intama lo’a banuaan, to’ mala jalu kaan.
9Jaji barik dasauti kole’a babainye urang Samariaan, “Ai lo’a mamitanu danum lo’ku’? Daiak tau Samariaak, daiko tau Yahudiko,” ingka kenang. Ratina jaruma awan dinen kole’a tau Yahudiin na’an mainya’ sarilao’ mainyum angkaanna nanda’ tau Samariaan. Es. 4:1-5; Neh. 4:1-2.
10Jaji dasauti barik kole’a i Yesus, “Ti’ itamu iko pameanga Alatala lo’ka’, ti’ko mangilala lo’ku’ yang mamitaan lo’u, tentu iko barik yang mamitaan lo’ku’. Tentu kumeang barik lo’u danum pangatio’en,” ingka kenang i Yesus lo’a babainye urang Samariaan.
11Jaji manjarum babainye urang Samariaan lo’a i Yesus, “Ai lo’a malanu danum pangatio’en, Ama’e, dari isa malanu? Loang kali di’en bajao’ ilalam, kenang daiko kosan palapang danumu,” ingka kenang. 12“Ai daiko, to’ paraa kalenu lo’a arabaki’ka’ yang ijoloon, pandenu mandua’ang danum labi maamen? Daia sarata nanna anaka, sarata nanna gulungan inatanga samuana mainyum dari loang kali di’en,” ingka kenang babainye urang Samariaan lo’a i Yesus.
13Jaji barik dasauti kole’a i Yesus lo’a babainye dinen, “Yang tau mainyumen danum loang kaliin di’en pasti tabalik akaring nyawana,” ingka kenang. JD. 21:6; 22:17. 14“Intain yang mainyumen danum yang dari nanku’ dinen, na’an lagi’ akaring nyawana barik. Awan lalo danum batu yang mangae’ lapoangen di atena barik manyuro’ tio’ salaun-launna,” ingka kenang manjaruma i Yesus lo’a babainye dinen.
15Jaji barik manjarum babainye dinen lo’a i Yesus, “Ama’e, meangak danum dinen,” ingka kenang yang babainye dinen, “mainto’ na’anna akaring nyawaku’, mainto’ na’anku’ mala danum balik-balik lo’a di’en,” ingka kenang lo’a i Yesus. Daasanang to’ danum tapat.
16Jaji barik manyauti i Yesus lo’a babainye urang Samariaan dinen, “Se’ ala lakinu,” ingka kenang.
17Manyauti barik babainye Samariaan, “Daiak kosan lakiku’,” ingka kenang.
“Tapat lalo jarumu dinen. 18Lima maminjo lakinu. Awandi’enpi yang malola’en lo’u, okan bea lakinu, tau malola’en poang lo’u,” ingka kenang i Yesus barik manyautina lo’a babainye dinen.
19Jaji manjarum barik babainye dinen lo’a i Yesus, “Kutamuko barik Ama’e. Daiko lalo panjaruma Alatala,” ingka kenang. 20“Na, mangatoaniakpi lo’u Ama’e. Daikam arabakinam ijoloon manyemba lo’a Alatala di ukit di’en,” ingka kenang. “Poangsi daikin Yahudiin, iasan ikin inang poang di banua Yerusalem pandeka’ manyemba lo’a Alatala. Ai lo’a?” ingka kenang babainye urang Samariaan lo’a i Yesus.
21Jaji manjarum i Yesus lo’a babainye urang Samariaan, “Manjarumak tapat-tapat lo’u. To’ mondok ona’ asona, kosan tau manyemba di ukit di’en lagi’. Kosan bea tau manyemba di Yerusalem. Disa-isa poang pandeki’ manyemba,” ingka kenang. 22“Jaji daikin tau Samariaan na’an ikilala ikin yang to’ isembaan ikin. Daikam tau Yahudiin mangilalakam, kole’a dari nanna tau Yahudiin lalo andianna dalan pangatio’en,” ingka kenang i Yesus. 23“Poangsi mondok ona’ asona, sabenara mamin lalo mondok, pandena tauen manyemba lo’a Alatala nanna jalu tapaten. Kole’a tauen dapat barik mangilala lo’a Alatala nanna panamu tapaten malaloi Sumangata Alatala. Dinen lalo yang dasariin kole’a Alatala mainto’ awan dinen manyembaka’ lo’a. 24Kole’a Alatala, dinen lalo Sumangat. Jaji tau to’ mangilala tapat lo’a, to’ manyemba lo’a, arung malaloi Sumangata,” ingka kenang i Yesus lo’a babainye urang Samariaan.
25Jaji barik manjarum babainye dinen, “Kutamu iak. Tau dabayaangen dinen, Kristus din to’ mondok. Jaji ati’en mondok ona’, daia to’ manjarumang lo’ka’ kausa jaluun,” ingka kenang.
26“Iak lalo tau dabayaangen dinen. Yang sijarumanen nannu, iak lalo iaan,” ingka kenang i Yesus lo’a babainye urang Samariaan.
27Jaji barik patanga’an manjaruma i Yesus dinen, mondok bea palola’a yang inyapen de’i. Jaji tatakau dinen ira mamelena lo’a i Yesus kole’a sijarumanna nanna babainyeen. “Jalu ai dakainginiin,” ingka, na’an bea matoani. “Jalu ai dapasijarumangen nannu,” na’an bea ingka kenang. Dabele poang kole’da’ dinen i Yesus kole’a palola’a dinen.
28Jaji barik babainye dinen laloang lamba’ marantang jawina mole’ lo’a banuaan. Jaji barik dajarumang di banuaan, 29“Se’ lola’ak ikin. Andian tau sidua’en nanku’ yang datamuun manjarumang kausa basaku’. Okan te’ dinen Kristus,” ingka kenang. 30Jaji barik tau di banuaan dinen malola’ lo’a loang kali palanan danum dinen, lo’a i Yesus.
31Imundina babainye dinen barik palola’a dinen manjarum lo’a i Yesus, “O Pa’ Guru, angkaanko,” ingka kenang manjaruma palola’a lo’a i Yesus.
32Jaji dasauti kole’a i Yesus, “Andian jalu kaanku’ yang na’anen itamu ikin,” ingka kenang i Yesus lo’da’.
33Jaji barik palola’a dinen mamele sera lo’a sera sijarumanen, “Andian te’ tau mawa jalu kaan lo’a?” ingka kenang sijarumanda’.
34Jaji barik dasauti kole’a i Yesus, “Okan kenang. Yang kuasanen jalu kaanku’ di’en, to’ kulola’ani panamuna tau manyuro’en lo’ku’, to’ kukausang gulungan karajana yang dasuro’angen lo’ku’. Dinen lalo paruluku’,” ingka kenang jaruma i Yesus. 35“Andian sama’ jarumka’, ampat bulanpi baru’ki’ matam, ingka kenang tauen. Poangsi manjarumak lo’in, belejo aseen, mamin sasak. Pande mamin ikatam,” ingka kenang. 36“Tau matamen daopa’i, kenang bea aseen dakumpulangen dinen okan itiang tio’ka’ yang sikadangen di’en, itiang tio’ka’ yang salaun-launnaan. Jaji tau masaken nanna tau matamen sama sasauna nyawana. 37Kole’a tapat bua sama’ jarum di’en, laan tau masaken, laan tau matamen. 38Daiak kusuro’ lo’in matam mangapulungang tau itiang lo’ku’. Matamin dinen di umaan yang na’anen kala’ ikaraja ikin. Andianjo tau bokanen mangaraja Dongo Maamen inang. Barik daikin yang bauntungen kole’a karajada’,” ingka kenang i Yesus lo’da’ sama’ jaruma.
39Jaji bayu’ tau Samaria dinen yang parasaya’en barik lo’a i Yesus kole’a jaruma babainye dinen, “Akaus dajarumang basaku’,” ingka’en de’i. 40Jaji mondok barik gulungan tau Samariaan dinen. Mamita ira lo’a i Yesus dasuro’ lalako’ nanda’. Jaji i Yesus lalako’pi nanda’ duang aso launna. 41Bayu’ bea bokanen yang parasaya’en kole’a jaruma i Yesus. 42Jaji manjarum barik dinen tauen lo’a babainye dinen, “Ialalo. Parasaya’kam. Okan bea kole’a jarumu daikam parasaya’am. Parasaya’kam kole’a mamin idalinga ikam. Ikilala barik ikam Raja Pangatio’en yang mondoken itiang matio’ lo’a tauen kausa duniaan,” ingka kenang tauen lo’a babainye dinen.
I Yesus pamaami padisa anaka tau yang baraa’en pangkata di pamarintaan
Mat. 8:5-13; Lk. 7:1-10
43Jaji barik maminna duang aso i Yesus lalako’a inang, i Yesus tarangkat lo’a propinsi Galilea. 44Jaji andian mamin jaruma i Yesus, “Kiraso ati’en panjaruma Alatala, ti’ majar di banua diri’a na’an dapaduli, na’an dapatiang. Ti’ di banua tau majara, baru’ dapaduli,” ingka kenang manjaruma i Yesus. Mat. 13:57; Mk. 6:4; Lk. 4:24. 45Jaji lamba’ lo’a Galilea, dasialo barik kole’a tauen inang, kole’a maminna datamu. Kole’a dakita mamin basana i Yesus inang di Yerusalem, di aso Palaloien dinen. Yoh. 2:23.
46Jaji barik i Yesus mole’ balik lo’a banua Kana di propinsi Galilea. Inang lalojo dapolana danumen padari anggur. Jaji mondok dinen, andian tau baraa’en pakaina di pamarintaan. Anaka dinen di banua Kapernaum balasa padisa. Yoh. 2:1-11. 47Jaji datamu barik andian i Yesus mondok di Yudea lo’a Galilea, terus lamba’ lo’a. Jaji mamita tapat, “Ama’e, lola’ak. Mala’ak lo’u. Apadis anakku’, to’ mate,” ingka kenang tau baraa’en pakaina lo’a i Yesus.
48Jaji dasauti barik kole’a i Yesus, “Daikin na’ankin mainya’ parasaya’ ati’en na’an ikita tajolo panyunyuaan nanna jalu laan-laanen,” ingka kenang i Yesus lo’da’ indinangen.
49“Ama’e,” ingka tau baraa’en pakaina dinen lo’a i Yesus. “Se’, tarangkatki’. To’ mate anakku’.”
50Jaji manjarum i Yesus, “Maam, mole’ko poang. Tio’ bua anaku,” ingka kenang i Yesus lo’a tau baraa’en pakaina dinen.
Tau baraa’en pakainapi dinen parasaya’ barik lo’a. Lamba’ rabarik. 51Jaji patanga’an lamba’a dinen, di tanga’ dalanen, sidua’ nanna suro’anna. Manjarum suro’anna lo’a tau baraa’en pakaina, “Maam. Tio’ anaku, dakule’,” ingka kenang manjaruma.
52Jaji barik dakatoanang kole’a tau baraa’en pakaina dinen, “Kira-kira jam insa’ maama? Nanga inde itamu tio’a?” ingka kenang.
“Imalam maama kangkara, kira-kira jam satu tanga’ asoon,” ingka kenang manyautina.
53Jaji parasaya’ barik tau dinen nanna samuana yang lalako’en nanna, parasaya’ lo’a i Yesus. Kole’a daparandama kole’a pas jam dinen lalo daasanna tio’a dinen kole’a i Yesus. 54Jaji dinen kaduang kalina i Yesus mamola panyunyuana di lamba’a dari Yudea lo’a Galilea.
നിലവിൽ തിരഞ്ഞെടുത്തിരിക്കുന്നു:
Yohanes 4: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
