Yohanes 5
5
I Yesus pamaami tau apadisen di kolam Betesda
1Jaji barik i Yesus lamba’ lo’a Yerusalem kole’a andian rami-rami agama Yahudiin. 2Mondok inang, andian kolam mandi’en mainso’ lo’a mambangan yang iasanen Mambangan Dombaan. Jaji asanna kolam dinen ilalam jarum Ibrani, Betesda. Jaji di biringa kolam dinen andian tanga’ sao lima bayu’a. 3Di tanga’ saoen dinen andian tauen alenga’ indinang, ambata tau apadisen. Andian tau bauta, andian tau atimpang, andian tau tamate mantuariina. [Jaji alenga’ tauen inang, marungi pakaji’a danumen. 4Kole’a mondok lola’ malaikata Paraampuan lo’a dinen mangaji’ang danumen. Jaji ati’en pakaji’ danumen, intain tajoloon dinen lo’a kolamen, dinen maamen padisa.] 5Jaji inang dinen andian bea babaka yang tiga pulo’ lapan taun mamin apadisa. 6Jaji barik dakita kole’a i Yesus, datamu awan dinen launna padisa. Jaji barik manjarum i Yesus, “Ai daiko, mainya’ko maam?” ingka kenang i Yesus lo’a tau dinen de’i.
7Jaji barik manyauti babaka dinen de’i lo’a i Yesus, “Mainya’ Ama’e. Poangsi daiak na’an kukule’ lamba’ lo’a kolamen. Kosan tau manggulungi lo’ku’. To’ lamba’ak, andian lapoang tau ijoloku’,” ingka kenang manyautina lo’a i Yesus.
8Jaji barik manyauti i Yesus lo’a, “Se’ angkat lenga’annu, lamba’ko,” ingka kenang barik i Yesus lo’a. 9Jaji sikadang kayana rabarik dakule’a tau dinen. Dalola’ani barik jaruma i Yesus dinen. Daangkatang lenga’anna laloang lamba’.
Jaji asona adarina awan dinen de’i, di aso Sabaten, aso sangarianna tau Yahudiin. 10Jaji bakaya barik gulungan toa Yahudiin manjaruma lo’a tau apadisen dinen de’i, “Daiko dinen na’anko pande mangkat lenga’annu di aso Sabaten,” ingka kenang. Neh. 13:19; Yer. 17:21.
11Jaji barik dasauti kole’a tau apadisen dinen, “Tau pamaamiin lo’ku’ de’i manyuro’ mangkat lenga’anku’, manyuro’ lamba’en,” ingka kenang manyautina lo’a toa Yahudiin.
12Jaji dasauti bapi kole’a toa Yahudiin, “Intain tau dinen yang manyuro’en kenang lo’u,” ingka kenang.
13Jaji barik daia na’an mangilala lo’a tau yang pamaamiin lo’a, kole’a bayu’ tau babangkulungen inang. Kenang bea i Yesus mamin inyap di babangkulunga tau bayu’en.
14Maminna dinen barik i Yesus sidua’ bapi nanna tau dinen di saona Alatala. Jaji barik manjarum i Yesus lo’a, “Na, daiko maminko maam. Na’anko pande lagi’ badosa,” ingka kenang manjaruma i Yesus lo’a. “Ati’enko badosa, jalu yang adariin lo’u ungka’en labi lagi’ ajau’a,” ingka kenang i Yesus lo’a tau dinen.
15Mamin dinen laloang lamba’ tau dinen lo’a toa Yahudiin manjarumang kole’a i Yesusa lalo dinen de’i yang pamaamiin lo’a. 16Dinen lalo gulungan toa Yahudiin dinen apadisa atena lo’a i Yesus to’ parinsa’i lo’a, kole’a dapamaamina tauen di aso Sabaten. 17Jaji dabalas kole’a i Yesus, “Ati’en ama’ku’, daia bakaraja lapoang. Jaji daiakpi arungak bakaraja bea,” ingka kenang lo’a toa Yahudiin. 18Dinen lalo insang kayana apadisa atena to’ mauno’ lo’a. Okan poang kole’a dalanggara adat Sabaten, kole’a de’i pasisamaangen kalena paama’a lo’a Alatala.
Anaka Alatala andian kuasana
19Jaji barik i Yesus manyauti lo’a gulungan toa-toaan, “Manjarumak lo’in tapat-tapat. Daiak di’en Anaka Alatala kosan jalu kukule’en manu yang panamuku’en. Yang kukitaan inang nanna Ama’ku’ karajana, jangka’a dinen poang kulola’aniin. Basa yang kukitaan nanna Ama’ku’, kulola’ani bua iak. 20Dapayoang lo’ku’ ambata karajana Ama’ku’ kole’a daia mangasaanga lo’ku’ Anaka. Kenang bea ona’ labi maam lagi’ karajana yang to’ dapayoangen lo’ku’. Tatakaukin ona’ mamelenin,” ingka kenang.
21“Na, Ama’ku’ daia datamu matio’ lo’a tau mateen. Daiakpi kutamu bea matio’ lo’a tau mateen, intain poang kukamainya’iin. 22Kenang bapi soal mamutusiin, okan Ama’ku’ diri’a mamutusiin lo’a tauen. Tugas mamutusiin dinen dasuro’ang lo’ku’ Anaka. 23Ratina dasuro’anga lo’ku’ mainto’ samuana mantuariin paduli lo’ku’ sama awan lo’a Ama’ku’. Intain na’anen paduli lo’ku’ Anaka Alatala, daiapi na’an bea paduli lo’a Ama’ku’ yang manyuro’en lo’ku’.
24“Manjarumak lo’in tapat-tapat. Intain mainya’en parasaya’ lo’a jarumku’, yang parasaya’en bea lo’a tau yang manyuro’en lo’ku’, dinen to’ tio’ salaun-launna. Daia na’an barik to’ daukum, kole’a mamin tapasut lo’a ukum mateen, to’ tio’ salaun-launna. 1Tes. 4:13-18. 25Manjarumak lo’in tapat-tapat. To’ mondok ona’ asona, sabenara mondoka lalo di’en, tau mateen to’ mandalinga unyiku’ Anak Mantuariin. Jaji yang mandalingaan, daia dinen laloang to’ tio’. 26Tulak nanna Ama’ku’ lalo kuasa manyuro’ tio’en. Jaji dasuro’ang bapi kuasa dinen lo’ku’ manyuro’ lo’a tauen tio’. 27Dasuro’ang bua lo’ku’ tugas mamutusiin lo’a tauen, kole’a iak lalo di’en Anak Mantuariin. 28Ada’ tatakauen lo’a jarumku’ di’en. To’ mondok ona’ asona, tau mateen to’ mandalinga unyiku’, laloang to’ minsaluan barik dari kubura. 29Tau yang maamen basana ona’ to’ minsaluan laloang tio’. Yang ajau’en basana to’ minsaluan ona’ laloang dalao’i ukumanen.” Dan. 12:2.
Asala i Yesus dasaksiangen
30“Lo’a soal kuasaku’, daiak di’en kosan panamuku’ kupakaien. Kenang jaruma Alatala, kenang mamutusiku’. Jaji mandua’ kausa kaputusanku’ kole’a na’an kupakai panamu diri’ku’. Panamuna tau manyuro’en lo’ku’, dinen poang kupakaien.
31“Na, daiak di’en, ati’enak diri’ku’ manjarum mawa saksi lo’a diri’ku’, pande bea na’an iparasaya’i jarumku’ dinen. 32Poangsi andian bapi saksiku’. Jaji jaruma dinen, kutamu dinen mandua’ kausana.
33“Jaji lo’a i Yohanespi dinen, isuro’ ikin tauen lo’a, isuro’ matoani. Jaji daia barik dinen manyaksiang bua lo’ku’ nanna jarum yang tapaten. Yoh. 1:19-27; 3:27-30. 34Okan bea kole’a kupentingang saksi nanna mantuariin, okan. Kujarumanga poang mainto’ iparasaya’ina ikin, mainto’ ikatio’a ikin. 35I Yohanes dinen kusama’ang awan lalo palitaan yang ikatio’en, yang marawangiin. Mainya’kin bua sikadang lo’a jaruma dinen yang marawangiin.
36“Poangsi daiak andian bapi saksiku’ yang baraa’en lo’a i Yohanes dinen. Yang kuasanen saksiku’ ialalo karajaku’ yang dasuro’angen kole’a Ama’ku’ lo’ku’. Jaji ambata karajaku’ yang kuanuun dinen, dinen lalo yang mamayoangen lo’a tauen kole’a iak lalo di’en tau yang dasuro’en kole’a Ama’ku’. 37Jaji Ama’ku’pi yang manyuro’en lo’ku’, daia manyaksi bua lo’ku’. Daikin na’ankin kala’ mandalinga unyina, na’ankin kala’ mamele lindo’a. Mat. 3:17; Mk. 1:11; Lk. 3:22. 38Jarumapi dinen na’an bea itanami nyawaan ikin. Manyuro’ kutamuna na’an itanami nyawaan ikin, kole’a na’ankin mainya’ parasaya’ lo’ku’ yang dasuro’en. 39Mainya’kin balajar di jalu datulisangen ilalam Jaruma Alatala yang darantangen nannin, kole’a irasa ikin pandenin mandua’ang inang dalan manyuro’ tio’ salaun-launnaan. Jaji inang lalo di Tulisan dinen pandeen idua’ang ikin saksian lo’ku’, manyuro’ itamu ikin tapatku’. 40Poangsi kapisi poang mandua’angkin Tulisanen, ti’ na’ankin mainya’ mondok lo’ku’ mainto’ pandenin tio’ salaun-launna.
41“Jaji daiak, na’annak manyari pudi dari nanna mantuariin. 42Poangsi daiak, kutamu mamin atenin, kutamu mamin kalakuannin. Angkosan ate mangasaangin lo’a Alatala. 43Daiak di’en mondokku’ lo’in, mondok nanna kuasana Ama’ku’. Poangsi daikin alibakkin manarima’ lo’ku’. Yang mondoken lo’in mamakai kuasa diri’aan, na’an mamakai kuasana Alatala, dinen kakaru’ iparasaya’iin ikin. 44Asi lo’a pandenin parasaya’ lo’ku’. Pantas na’an. Na’ankin mainya’ to’ pasasaui nyawana Alatala. Mantuariin poang yang to’ ipasasauiin. Ialalo na’annin parasaya’ lo’ku’. 45Poangsi ada’ iasana iak yang manuntuten lo’in. Baki’ Musa dinen yang iarapen ikin, ia yang manuntuten lo’in di arona Ama’ku’. 46Kole’a ati’enkin tapat parasaya’ lo’a jalu datulisangen kole’a baki’ Musa, tentukin parasaya’ bua lo’ku’. Kole’a iak lalo yang dajarumangen inang. 47Poangsi na’ankin parasaya’ lo’a jalu datulisangen kole’a baki’ Musa. Jaji ai lo’a pandenin parasaya’ lo’a jarumku’,” ingka kenang manjaruma i Yesus lo’da’ toa Yahudiin.
നിലവിൽ തിരഞ്ഞെടുത്തിരിക്കുന്നു:
Yohanes 5: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
