Yohanes 6
6
I Yesus pangkaani lo’a tau, lima ribuun bayu’a
Mat. 14:13-21; Mk. 6:32-44; Lk. 9:10-17
1Maminna dinen, i Yesus manarear dano Galilea, dano yang iasanen bea dano Tiberias dinen. 2Bayu’ tau malola’en lo’a kole’a mamin dakita ambata panyunyuana pamaamiin lo’a tau apadisen. 3Jaji barik mondok di ukiten, aduduk inang nanna palola’a. 4Dinen mamin mainso’ tau to’ maramiang aso Palaloien.
5Jaji barik mamele i Yesus, bayu’ tauen babangkulung ibiringa. Jaji manjarum daia matoani lo’a i Pilipus, “Isa mandua’angka’ jalu kaanka’ to’ pangkaanka’ lo’a tau bayu’en di’en?” ingka kenang i Yesus lo’a i Pilipus. 6Okan kole’a de’i ai-aina. Daiasi, datiang pangilalai lo’a i Pilipus. Mamin lalo datamu jalu to’ daanu indinang.
7Jaji manyauti barik i Pilipus lo’a i Yesus, “Kapisi andian, ti’ kurang dua ratus dinar duit pirak, na’an sumaka’ tau bayu’en balu’a di’en,” ingka kenang. “Dinenpi sakakapit poang kira mantuariin,” ingka kenang i Pilipus lo’a i Yesus.
8Jaji manjarum barik palola’ seraan, i Andreas asanna, sairunna i Simon Petrus. 9“Andian indi’ang nangkanak babaka yang mawaan roti jelai lima sakalana. Lauken dua-dua bua,” ingka. “Poangsi kapisi andian, na’an sumaka’ tau bayu’en balu’a di’en,” ingka kenang manjaruma.
10Jaji barik manjarum i Yesus lo’da’, “Na, di’en suro’ lo’a tauen aduduk kausada’,” ingka kenang. Jaji indinang bayu’ rimputen. Jaji aduduk tauen kausa, kira-kira lima ribu bayu’a tauen yang babakaan. 11Mamin dinen dala rotiin dinen laloang dado’aang dakasuang nyawaan. Jaji barik dasuro’ tawa’ lo’a tau aduduken dinen. Nanna lauken kenang bapi. Tauenpi dinen bosor kausana angkaanen.
12Mamin angkaan dinen ira, bosor kausa angkaanna, dasuro’ kumpul tunana, “Ada’ iparugina,” ingka kenang i Yesus lo’a palola’a. 13Dakapulungang kole’a tauen dinen ambata tunanna, di maminna bosor dinen, dua belas bapi babakula tunanna.
14Jaji maminna barik dakita panyunyuana i Yesus dinen, manjarum tauen, “Tentu di’en lalo yang dabayaangenjo ijolo ilalam Jaruma Alatala yang datulisangen, tau yang to’ mondok lo’a duniaan,” ingka kenang tauen. 15Jaji datamu kole’a i Yesus tujuanda’ to’ maningkama, to’ mamaksana dinen lo’a i Yesus padari rajada’. Jaji kapi’ang barik kalena i Yesus lo’a ukiten.
I Yesus malete ibona kulit danumen
Mat. 14:22-33; Mk. 6:45-52
16Jaji pamamalamen barik, ambata palola’a i Yesus dinen tador lo’a danoon, 17mauwat di parauen barik laloang manarear to’ mole’ balik lo’a banua Kapernaum. Malamen barik, nampi bua mondok i Yesus lo’da’. 18Jaji mondok barik sariuten, mondok galombangen. 19Patanga’an ira dinen manareara di danoon, kira-kira lima atau anam kilometer mainseda’, i Yesuspi dinen dakita mondok to’ mainso’i parauda’. Mondoka dinen lo’da’ malete ibona kulit danumen. Jaji barik tatakau ira dinen mamelena lo’a i Yesus malete ibona kulit danumen. Nyap-nyap sumangatda’ mamelena. 20Jaji mondok barik i Yesus manjarum lo’da’, “Ada’kin atakuten. Iak lalo di’en,” ingka kenang i Yesus lo’da’. 21Baru’ mainya’ ira mauwatang lo’a parauda’. Laloang dinen barik parauda’pi dinen tatunduk lo’a biring kabangen sabala’, lo’a kosan tujuanda’.
Gulungan tau bayu’en manyari lo’a i Yesus
22Di aso mina’a barik dabele kole’da’ bokanen, tau babangkulungen dinen, kosan i Yesus dabelena. Inang lalo akaruna batak nyawana. Kole’a mamin dakita imalam kosan bayu’ parauen, sera poang. Kenang bapi parau dinen mamin daawa imalam kole’a palola’a, i Yesus diri’a arantang. Jaji sijaruman ira, “Inyap malola’, iki’, parau dinen daawa imalam,” ingka kenang. “Disasi daia,” ingka kenang tauen sikatoananen. 23Jaji mondok barik gulungan parauen dari Tiberias tatunduk lo’a dinen, lo’a kosanda’ angkaanen roti yang dado’aangen dinen imalam. 24Jaji datamu barik i Yesus kosan indinang, kosan bea palola’a, tarangkat bea ira mauwat di gulungan parau dinen lo’a Kapernaum, manyari lo’a i Yesus.
I Yesus asan kalena rotiin yang manyuro’ tio’
25Jaji sidua’ barik ira nanna i Yesus isualina danoon, manjarum ira lo’a i Yesus, “Nanga inde mondoku lo’a di’en, Pa’ Guru?” ingka kenang ira dinen lo’a i Yesus.
26Jaji barik manjarum i Yesus lo’da’, “Manjarumak lo’in tapat-tapat. Daikin mondokin lo’a di’en, manyarinin lo’ku’, okan kole’a itamuna ikin ratina panyunyuaku’. Na’an itamu ikin ratina. To’ manyari jalu kaan poangkin. Mondokin daikin kole’a maminkinjo bosor angkaan rotiin dinen. 27Ada’kin panyunyung manyari jalu kaan biasaan, yang na’anen bataan, yang maundaan buarina. Yang arung isariin ikin, jalu kaan dinen yang pandeen manyuro’ tio’ salaun-launna. Dinen yang to’ kutawa’iin lo’in,” ingka kenang i Yesus lo’da’. “Iak lalo di’en Anak Mantuariin yang dakamainya’iin kole’a Ama’ku’. Jalu kaan dinen yang pandeen manyuro’ tio’ salaun-launna, iak yang to’ manawa’iin lo’in,” ingka kenang lo’da’.
28Jaji barik ira mangatoanang lo’a i Yesus bapi, “Ai ianuun ikam mainto’ ilola’anina panamuna Alatala?” ingka kenang ira dinen lo’a i Yesus.
29“Na, ti’kin to’ malola’ani panamuna Alatala, arungkin parasaya’ lo’ku’ tau dasuro’en lo’in,” ingka kenang i Yesus lo’da’.
30Jaji manjarum bapi ira lo’a i Yesus, “Ai daiko panyunyuanu tanda kuasanu mainto’ iparasaya’inu ikam? Jalu ai to’ ianuun iko?” ingka. Ungka’enko to’ malola’ani awan arabaki’ka’jo baki’ Musa dinen.
31“Ati’en arabaki’ka’ yang ijoloon, angkaan roti mana ira inang di kosan ateengen. Awan jalu yang datulisangen ilalam Jaruma Alatala,
Dameang lo’da’ rotiin dari Surga datiang jalu kaanda’,”
ingka kenang ira dinen lo’a i Yesus. Pal. 16:4,15; Msm. 78:24.
32Jaji barik manyauti i Yesus lo’da’, “Manjarumak tapat-tapat lo’in. Roti mondoken di Surgaanjo dinen, dinen okan baki’ Musa yang mameangen. Ama’ku’ yang mameangen. Daia yang mameang roti yang tapaten,” ingka kenang i Yesus lo’da’. 33“Ratina roti yang dameangen kole’a Alatala, dinen lalo tau yang tadoren dari Surga yang patio’en lo’a tau duniaan,” ingka kenang i Yesus lo’da’.
34“O Pa’ Guru,” ingka barik ira. “Meangkam lapoang roti dinen,” ingka kenang ira lo’a i Yesus.
35Jaji barik, “Iak lalo di’en roti yang pangatio’en. Intain yang malola’en lo’ku’ na’an barik mase’ batanga. Intain parasaya’en lo’ku’ na’an barik akaring nyawana,” ingka kenang i Yesus lo’da’.
36“Awan lalo jarumku’ memen lo’in, maminak ikita ikin. Poangsi kapiak mamin ikita, na’ankin mainya’ parasaya’ lo’ku’. 37Poangsi andian to’ mondok lo’ku’. Intain poang dasuro’en kole’a Ama’ku’, dinen pasti mondok lo’ku’. Jaji intain poang mondoken, dinen kutarima’. 38Kole’a pamondokku’ di Surga di’en, okan itiang malola’ani panamu diri’ku’. Pamondokku’ di’en to’ kulola’ani panamuna tau yang manyuro’en lo’ku’,” ingka kenang i Yesus lo’da’. 39“Jaji panamuna daia yang manyuro’en lo’ku’, gulungan tau yang mondoken lo’ku’ mainto’ kosan yang tapasuten di tanganku’. Panamuna daia mainto’ samuana ira dinen kukatio’ balik di aso katuntunganna,” ingka kenang i Yesus lo’da’. 40“Kole’a panamuna daia mainto’ samuana yang mameleen lo’a Anaka, yang parasaya’en lo’a, mainto’ tio’a salaun-launna. Jaji ira dinen to’ kukatio’ balik di aso katuntunganna,” ingka kenang i Yesus lo’da’.
41Jaji barik dadalinga jaruma i Yesus dinen kole’da’ tau Yahudiin, amumut barik ira dinen lo’a i Yesus. Apadis atena kole’a jaruma de’i, “Iak lalo roti tadoren dari Surga.” 42Jaji barik, “Ai lo’a jaruma dinen? Amana ikilala iki’. Induna ikilala iki’. Okanaka dinen anaka i Yusup? Asi lo’a asanna kalena tau mondoken dari Surga kakaru’?” ingka kenang jaruma tauen lo’a i Yesus.
43Jaji barik i Yesus manjarum lo’da’, “Tadangkin amumuten,” ingka kenang i Yesus lo’da’. 44“Ati’en okan Ama’ku’ manarikangen lo’a ate tauen, kosan tau pandeen mondok lo’ku’. Poangsi tau yang datariken kole’a Ama’ku’ yang manyuro’en lo’ku’, tau dinen yang kukatio’en di aso katuntunganna,” ingka kenang manjaruma i Yesus lo’da’. 45“Awan jalu datulisangen kole’a panjaruma Alatala,
Samuana tauen to’ daajar kole’a Alatala,
ingka kenangjo ilalam Jaruma Alatala. Yes. 54:13. Jaji intain poang manaantalingaan lo’a Ama’ku’, yang mananami nyawaan jalu dadalingaan, dinen lalo yang malola’en lo’ku’,” ingka kenang lo’da’.
46“Okan kuasan andian tau kala’en mangita lo’a Amaku’. Daiak di’en yang mondoken dari nanna Alatala, iak poang kakaleku’ yang kala’en mangita lo’a,” ingka kenang lo’da’. 47“Manjarumak tapat-tapat lo’in. Intain parasaya’en lo’ku’, dinen yang pandeen tio’ salaun-launna. 48Iak lalo di’en yang roti pangatio’en,” ingka kenang. Pal. 3:14; Yoh. 8:12; 10:9,11; 11:25; 15:1. 49“Daikin arabakininpi dinen yang angkaanen roti mana di kosan ateengen, pande bua mate,” ingka kenang. 50“Sabalika, roti yang dari Surga dinen pande manyuro’ lo’a tau angkaanen mainto’ na’anna lagi’ mate. 51Iak lalo roti pangatio’en, yang tadoren dari Surga. Intain angkaanen lo’ku’, to’ tio’ salaun-launna. Roti yang kutawa’iin, dinen lalo mantuariku’ yang kuseraan lo’a tau duniaan mainto’ tio’a,” ingka kenang manjaruma i Yesus lo’da’.
52Jaji barik jaruma i Yesus dinen de’i manyuro’ lo’da’ poang sipadu. Jaji manjarum ira sera lo’a seraan, “Ai lo’a bisana mantuarina dasuro’ kaan lo’ka’?” ingka kenang ira sikatoanana.
53Jaji manjarum bapi i Yesus, “Manjarumak lo’in tapat-tapat. Ati’ na’ankin angkaan mantuariku’ Anak Mantuariin di’en, ati’en na’ankin mainyum dara’ku’, na’ankin pande tio’,” ingka kenang. 54“Intain parasaya’en lo’ku’, yang mainyumen dara’ku’, dinen pande tio’ salaun-launna. Tau dinen laloang kukatio’ balik di aso katuntunganna. 55Kole’a mantuariku’ di’en, dinen lalo jalu kaan yang tapaten, dara’ku’ di’en, dinen lalo inyumaan yang tapaten,” ingka kenang lo’da’. 56“Jaji tau angkaanen lo’a mantuariku’, tau mainyumen lo’a dara’ku’, dinen yang tio’ sisiau’en nanku’. Daiakpi tio’ sisiau’ nanna tau dinen. 57Tulak dari nanna Amaku’ lalo andianna jalu tio’. Daia yang manyuro’en lo’ku’, daiapi mangatio’ lo’ku’. Jaji awan dinen bapi tau angkaanen lo’ku’. Intain angkaanen lo’ku’, to’ tio’ kole’ku’.
58“Jaji kenang ratina roti yang tadoren dari Surga. Na’an balu’ roti mana yang dakaanen kole’a arabakinin. Arabakininpi dinen angkaanna roti dinen, pande bua mate,” ingka kenang. “Sabalika intain angkaanen rotiku’ di’en to’ tio’ salaun-launna,” 59ingka kenang i Yesus lo’da’ majara inang di sao sambayangen di banua Kapernaum.
Jaruma i Yesus poang yang pandeen manyuro’ tio’ salaun-launna
60Jaji dadalinga dinen jaruma i Yesus kole’a palola’a, amumut palola’a. “Intain yang pandeen manaantalinga jaruma awan dinen, pangajaranna dinen? Badidit jaji,” ingka kenang palola’a amumuten.
61Jaji i Yesus manamu lo’a jarumda’ amumuten. Kapisi kosan tau manjarumangen, mamin datamu. Jaji barik dinen i Yesus manjarum lo’da’, “Ai jarum dinen, manyuro’ apagu lo’in, manyuro’ putus asa? 62Ai lo’a ona’ ati’enkin maita lo’ku’ Anak Mantuariin mole’ inait lo’a kosanku’, mainya’kin parasaya’ barik?” ingka kenang. 63“Okan kuasana mantuariin yang pandeen manyuro’ tio’. Yang pandeen manyuro’ tio’, dinen lalo Sumangata Alatala. Gulungan jarumku’ yang kujarumangen dinen lalo dapakaien kole’a Sumangata Alatala itiang matio’ lo’in. 64Kapisi kenang, andiankin sapa dua yang na’anen parasaya’,” ingka kenang lo’da’. Ratina jarum dinen kole’a datamu memen dari mulakata, dakilala tau yang to’ alibaken parasaya’ lo’a. Dakilala bea dinen seraan yang to’ maduangen ona’ lo’a lo’a musuna mainto’ dakule’a datingkam. 65Jaji manjarum bapi, “Dinen lalo ratina jarumku’, kosan tau pande mondok lo’ku’ ti’ na’an dasuro’ kole’a Ama’ku’,” ingka kenang i Yesus lo’da’.
66Jaji barik dinen, bayu’ palola’a dinen yang manaantalingaan angga’a dinen laloang marantang lo’a. Alibak malola’ lo’a kole’a jaruma dinen de’i. 67Jaji barik, “Ai daikin, to’ ararikin bea daikin?” ingka kenang lo’da’ dua belasen.
68Jaji manjarum i Simon Petrus lo’a, “O Paraampuanku’, intainpi lagi’ ilola’en ikam. Jarumu lalo yang manyuro’ tio’en salaun-launnaan. 69Parasaya’kam lo’u, itamu ikam tau bareseen yang mondoken dari nanna Alatala,” ingka kenang. Mat. 16:16; Mk. 8:29; Lk. 9:20.
70Jaji manjarum bapi i Yesus lo’da’, “Ikin lalo yang kudile’iin, yang dua belasen. Poangsi andian di antaranin sera, pasuro’a i Pangabo,” ingka kenang i Yesus. 71Yang dakenangiin tau to’ maduangen lo’a lo’a musuna mainto’ dakule’a datingkam, ialalo i Yudas Iskariot dinen.
നിലവിൽ തിരഞ്ഞെടുത്തിരിക്കുന്നു:
Yohanes 6: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
