Yohanes 7
7
Ambata arina i Yesus na’an bea parasaya’ lo’a
1Jaji barik i Yesus lamba’ kuliling di propinsi Galilea. Alibak lamba’ lo’a propinsi Yudea kole’a ambata toa Yahudiin to’ mauno’ lo’a. Mamin manikom. 2Jaji tauen mainso’ to’ maramiang Rami Mamola Nyonyoon, rami yang tuju asoon launna dinen. Im. 23:34; Ul. 16:13. 3Jaji barik manjarum ambata arina lo’a, “Se’ lamba’ko, tarangkatko lo’a propinsi Yudea,” ingka kenang. “Mainto’ dakitana panyunyuanu kole’a gulungan palola’u,” ingka. 4“Ati’enko to’ mamola panyunyuanu, arungko payoang kalenu lo’a tauen. Kole’a tau to’ manyari asan baraa’en, kosan malamunna basa maama,” ingka kenang jarumda’ lo’a i Yesus. 5Kole’a gulungan arinapi dinen, na’an bea parasaya’ lo’a.
6Jaji barik i Yesus manjarum lo’da’ manyauti bapi, “Nampiak to’ lamba’ kole’a nampi mondok lo’a bayaku’,” ingka kenang. “Daikin dinen, nanga inde poang pandekin tarangkat 7kole’a kosan tau duniaan mangalibakangen lo’in. Lo’ku’ alibak, kole’a kujarumi lapoanga kole’a basada’ yang ajau’en,” ingka kenang lo’da’. 8“Ijolokin. Nampiak to’ tamba lo’a dinen kole’a nampi mondok lo’a bayaku’,” ingka kenang. 9Jaji arantangpi di Galilea.
I Yesus di Rami Mamola Nyonyoon
10Jaji barik maminna dinen de’i, mamin talalo arasairunna, i Yesuspi dinen tarangkat bea lo’a dinen. Poangsi tarangkata dinen na’an datamu tau. Malamun poang dinen tarangkata. 11Inang di rami-ramiinpi gulungan toa Yahudiin dinen manyari lo’a i Yesus. “Disasi daia?” ingka ira sikatoananna sera lo’a seraan. 12Gulungan tau babangkulungenpi dinen bayu’ bea jarum sisiniken sera lo’a seraan. “I Yesus dinen tau maamen,” ingka kenang sapa dua. Jaji barik sapa dua dinen, “Na’an! Dinen tau makal,” ingka kenang. 13Poangsi jarumda’ dinen jarum sisinik sera lo’a seraan. Alibak unyi baraa, atakut lo’a toa Yahudiin.
14Jaji barik satanga’ dinen rami-ramiin, baru’ i Yesus lamba’ lo’a saona Alatala. Mondok inang di saona Alatala, daia barik talakat majar. 15Jaji barik toa Yahudiin dinen tatakau mandalingana lo’a, “Dari sa panamuna? Daia dinen tau na’anen sakola,” ingka kenang.
16Jaji barik dasauti kole’a i Yesus, “Jalu kuajaraangen, okan panamu diri’ku’, dinen panamuna Alatala yang tau manyuro’en lo’ku’,” ingka kenang. 17“Yang tau mainya’en malola’ani panamuna Alatala, daia lalo yang datamuun pasitimbangang lo’a pangajaranku’ ti’ panamuna Alatala atau panamu diri’ku’. 18Jaji kenang tandana. Yang tau paraa-raa’en kalena, dinen lalo tau mamakai panamu diri’aan. Yang na’anen paraa kalena poangsi paraa-raa’en lo’a tau yang manyuro’en lo’a, ia lalo tau tapaten. Okan tau makal,” ingka kenang i Yesus lo’da’. 19“Itamu ikin Ukuma Alatala yang dapamondokangen malaloi baki’ Musa. Kapisi poang itamu, kosankin sera yang malola’aniin. Mai poang to’ mauno’in lo’ku’!” ingka kenang i Yesus lo’da’ manjaruma.
20Jaji barik mamuko tauen, “Intain tau to’ mauno’en lo’u? Iko lalo yang dasarung jalu ajau’en. Dinen lalo jarumu balu’a dinen, masanen andian tau to’ mauno’ lo’u, kakaru’,” ingka kenang manjaruma ira di babangkulunga tau bayu’en.
21Jaji dasauti kole’a i Yesus, “Sera poang panyunyuaku’ yang manyuro’ tatakauen lo’in, yang kupolaan di aso Sabaten dinen. 22Ai arasinin na’anku’ pande pamaami mantuarina tauen di aso Sabaten kalo’in? Asi lo’a pangajaranna baki’ Musa yang ilola’aniin ikin? Anakin yang isunaten yang umur lapan asoon pandeen isunat kapisi alao’ di aso Sabaten,” ingka kenang. “Daikin dinen malola’ani parintana baki’ Musa. Poangsi sabenara okan parintana baki’ Musa poang, parintana arabakinin ijolonaan baki’ Musa,” ingka. Mul. 17:10; Im. 12:3. 23“Na, asi na’anku’ pande pamaami mantuarina tauen di aso Sabaten? Padahal anakin pande isunat di aso Sabaten, pande ipapadisi itiang malola’ani Ukuma baki’ Musa,” ingka kenang i Yesus lo’da’. Yoh. 5:9. 24“Na’an itamu ikin pasitimbangang jalu ajau’en nanna jalu maamen. Mamele lindo’ poangkin, mamele jalu yang ikitaan ikin. Mala poangkin to’ mainya’ pasala’. Ada’ barik awan dinen. Arungki’ pasitimbangang mamakai pikiran yang tapaten,” ingka kenang manjaruma i Yesus lo’da’.
Aiaka dinen tau dabayaangen?
25Jaji barik tauen di Yerusalem sapa dua manjarum, “Intainsi dinen? Okan te’ dinen yang to’ dauno’enjo kole’a gulungan toa-toaan?” ingka kenang. 26“Belejo dinen daia baranina manjarum di bangkulunganna tauen. Asi lo’a toa-toaan di’en na’anna kakaji’?” Jaji barik manjarum ira, “Ungka’en datamu barik kole’a toa-toaan, darasa i Yesus di’en lalo Kristus dinen yang dabayaangenjo kole’a Alatala!” ingka kenang. 27“Poangsi na’an patut ia tau dabayaangen dinen. I Yesus di’en mamin itamu iki’ ratina, itamu iki’ asala, itamu banuana,” ingka kenang. “Poangsi malola’ani bayana panjaruma Alatalajo, ati’en mondok Kristusen yang tau dabayaangen dinen, kosan tau to’ manamu asala daia,” ingka kenang jarumda’ sijarumanen.
28Jaji barik i Yesus majar inang di saona Alatala nanna unyi baraana, “Ai daikin, tapat-tapat mangilala lo’ku’? Itamu ikin asalku’?” ingka kenang. “Saja na’an itamu ikin. Daiak di’en, na’anak mondok sabarang, na’anak mondok nanna panamu diri’ku’. Andian tau manyuro’en lo’ku’. Jaji tau manyuro’en lo’ku’, dinen lalo tau tapaten. Na’an ikilala ikin tau dinen. 29Poangsi daiak mangilalaak lo’a, kole’a dari nanna tau dinen lalo pamondokku’ dinen, daia lalo yang manyuro’en lo’ku’,” ingka kenang majara i Yesus lo’da’.
30Jaji barik dinen ira bagado to’ maningkam lo’a i Yesus. Poangsi to’ maningkam lo’a, samuana ira dinen kosan mangule’en manu lo’a kole’a nampi mondok lo’a bayana. 31Poangsi andian bayu’ dinen ira yang di bangkulunganna dinen yang parasaya’en lo’a i Yesus. “Di mondoka tau dabayaangen dinen datamu te’ ti’ dasuro’ mamola panyunyuana labi lo’a i Yesus dinen? Tentu ialalo tau dabayaangen, bayu’en mamin tanda panyunyuana,” ingka kenang manjaruma.
Gulungan panyagaien dasuro’ maningkam lo’a i Yesus
32Jaji barik dadalinga kole’a ambata tau Parisiin dinen ambata jarum tau dinen de’i, to’ maningkam lo’a i Yesus. Jaji barik bagado ira dinen nanna gulungan imam baraa’en manyuro’ lo’a tau panyagai saona Alatala, dasuro’ tingkam dinen i Yesus. 33Jaji barik datamu kole’a i Yesus dinen, manjarum barik i Yesus, “Daiak di’en na’anakpi to’ balaun nannin,” ingka kenang. “Ona’ to’ inyapak mole’ lo’a tau manyuro’en lo’ku’,” ingka kenang manjaruma. 34“Jaji daikin ona’ to’ manyarikin lo’ku’ poangsi na’anak ona’ idua’ang ikin. Kole’a na’an pandekin malola’ lo’a kosanku’ dinen,” ingka kenang i Yesus lo’da’.
35Jaji barik manjarum ira mamele sera lo’a seraan. “Disa ona’ to’ inyapa? Disa kosanna dinen manyuro’ na’an pande idua’ang iki’? Ungka’en to’ malamba’i gulungan banua urang Yunani inang, majar lo’a banuaka’ yang lalako’en indinang,” ingka ira sijarumanna. 36“Ti’ isari iki’, ingka, na’an to’ idua’ang iki’. Na’an pandeki’ malola’ lo’a kosanna, ingka. Ai te’ ratina jaruma awan dinen?” ingka kenang ira.
I Yesus asan kalena danum yang manyuro’ tio’en
37Jaji barik mondok asona to’ akausa rami-ramiin, aso yang palin pentingen. Jaji i Yesus akadeng di arona tau bayu’en majar nanna unyi baraana, “Intain tau yang akaringen nyawana, daia arung mondok mainyum lo’ku’,” ingka kenang. Im. 23:36. 38“Tau parasaya’en lo’ku’ dinen ona’ sama awan yang datulisangen ilalam Jaruma Alatala,
Dari atena dinen andian awan lalo danum sunge yang areangen, yang mangae’en lapoang ilalam batak nyawana manyuro’ tio’,”
ingka kenang manjaruma i Yesus lo’da’. Yeh. 47:1; Sak. 14:8.
39Yang dasama’angen dinen kole’a i Yesus awan danum mangae’en, ialalo dinen Sumangat Bareseen yang to’ datarima’ kole’a gulungan tau yang parasaya’en lo’a. Poangsi waktu nanga dinen nampi mondok Sumangat Bareseen, kole’a i Yesus dinen nampi daangkatang inait lo’a kamaamanna.
Na’an sikule’ pikiranna tauen lo’a i Yesus
40Jaji barik dadalingana jaruma i Yesus dinen kole’a tau bayu’en, sapa dua manjarum, “Tau dinen tentu Panjaruma Alatala dinen yang dajarumangen to’ mondok lo’ka’!” ingka kenang.
41Sapa dua masan dinen, “Dinen lalo Kristus, tau yang dabayaangen dinen!” ingka kenang.
Sapa dua masan lo’a, “Na’an patut Kristus, kole’a i Yesus di’en urang Galilea. Ti’en Kristus, na’an pande barasal dari Galilea. 42Kole’a yang maminen datulisangen ilalam Jaruma Alatala, Kristus dinen lalo kanturunanna baki’ka’ Raja Daud. Kenang bea paranakanga arung di Betlehem di banuana baki’ Daud dinen,” ingka kenang sijarumanda’. Mik. 5:1.
43Jaji barik tauen na’an sikule’ kole’a i Yesus, akabo. 44Tauen sapa dua to’ maningkam lo’a, poangsi kosan tau mangule’ lo’a.
Gulungan toa-toa Yahudiin alibak parasaya’ lo’a i Yesus
45Jaji barik maminna mole’ gulungan panyagaien dinen, manjarum barik ambata imamen nanna tau Parisiin lo’da’, “Ai na’anna iawa ikin?” ingka kenang.
46Jaji barik dasauti kole’a gulungan panyagaien, “Kosan tau pande manjarum awan tau dinen yang kala’ idalingaan!” ingka kenang jarumda’ manyautiin.
47Jaji manjarum bapi tau Parisiin, “Ai daikin dinen, daakalkin bea?” ingka. 48“Suba di antaraka’ panguluanen, kosan to’ sera parasaya’en lo’a tau dinen,” ingka kenang ira. 49“Ati’en gulungan tau babangkulungen dinen, gulungan tau bayu’en, kosan jaji panamuda’ lo’a Ukuma baki’ Musa. Samuana mamin dadua’ kutuk kole’a Alatala,” ingka kenang.
50Jaji barik andian di antarana dinen tau Parisiin, i Nikodemus asanna. Ia lalo yang lamba’en lo’a i Yesus dinen. Jaji barik manjarum lo’da’ bokanen mangamuroangen lo’a i Yesus, Yoh. 3:1-2. 51“Di adatka’ na’an pandeki’ malao’ ukum memen ati’en nampi idalinga iki’ jarum diri’a, ati’en nampi itamu iki’ ratina jalu iaduangen dinen,” ingka kenang.
52Jaji dasauti kole’da’ pajau’ lo’a, “Na daiko, ai te’ tau Galileako bea daiko, sama nanna i Yesus dinen? Subako balajar jalu datulisangen ilalam Jaruma Alatala, mainto’ itamuna iko. Kosan panjaruma Alatala barasalen dari Galilea,” ingka kenang jarumda’ lo’a i Nikodemus.
53Mamin dinen mole’ kausa tauen.
നിലവിൽ തിരഞ്ഞെടുത്തിരിക്കുന്നു:
Yohanes 7: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
