Lukas 10
10
Tuju pulo’ mantuariin datugas kole’a i Yesus
1Jaji barik maminna dinen, i Yesus manugas lo’a tauen tuju pulo’ ambata. Dasuro’ lamba’ tajolo tata dua lo’a ambata banua yang to’ dalamba’iin kole’a i Yesus. 2Jaji manjarum lo’da’ mamakai sama’ jaruma, “Jalu to’ ikatam di’en tapat bayu’, bayu’ bua’a. Poangsi daiki’ di’en na’an tuli tenagaka’. Arungki’ bado’a lo’a tau ampuna umaan manyuro’ mawa tau,” ingka kenang i Yesus lo’da’. Mat. 9:37-38. 3“Na, lamba’kin barik,” ingka. “Daikin di’en kusuro’kin lamba’ di jalu bahayaan, awan lalo dombaan lamba’en antarana ambata asu toanen,” ingka kenang. Mat. 10:16. 4“Jaji di lamba’in di’en, ada’kin mawa ongkosen, mawa gulungan tasen, gulungan sandalen. Ada’kin manaat di dalanen itiang pamase’ lo’a tauen,” ingka kenang i Yesus. Mat. 10:7-14; Mk. 6:8-11; Lk. 9:3-5.
5“Jaji to’ intamakin ona’ lo’a sao tauen, bado’akin mawa salam lo’da’. 6Ti’en de’i maam tau di sao dinen, salamin dinen lalako’ bua nanda’, jaji pole’. Ti’ de’i ajau’ tau di sao dinen, salamin dinen mole’ bua lo’in, na’an jaji pole’ lo’da’. 7Laloang inang poangkin, di sao dinen. Na’ankin pande mamalin-malin lo’a sao dinen, lo’a sao dinen. Lalako’in inang, ai poang yang dakaanen kole’da’, ai dainyumen kole’da’, dinen idinyumen ikin, dinen ikaanen ikin. Ada’ bawa’en. Kole’a yang tau mangarajaan, dinen patut bea daongkosi,” ingka kenang lo’da’. 1Kor. 9:14; 1Tim. 5:18.
8“Jaji ti’enkin intama lo’a banuaan, ti’en mainya’ ira manarima’ lo’in, ai poang dasorongiin lo’in, ikaan ikin. 9Ambata tau apadisen dinen, pamaam. Laloang manjarumang lo’da’ dongoon, Mamin mainso’ adarina baya Alatala to’ mangkama lo’ka’, ikin kenang lo’da’. 10Ti’enkin sidua’ nanna banuaan yang alibaken manyialo lo’in, lamba’kin lo’a dalanna banuaan, laloang manjarumkin inang, 11Na, bele! Mamalinkam barik dari banuanin. Gulungan kutu tana’en dampe ipipirikang ikam irantang nannin, tanda tanggung jawapin lo’a kajau’annin, ikin kenang ona’. Poangsi arung itamu ikin, mamin mainso’ to’ adarina bayana Alatala to’ mangkama lo’ka’, ikin lo’da’,” ingka kenang i Yesus paba’ina lo’da’. PalPa. 13:51. 12“Jaji manjarumak lo’in,” ingka kenang i Yesus lo’a tau datugasen dinen, “mondok ona’ idurusina kajau’an tauen, tau mangalibakangen lo’in aborat ukuma. Labi aborat lo’a ukuma tau banua Sodom,” ingka kenang i Yesus lo’da’. Mul. 19:24-28; Mat. 10:15; 11:24.
Banua mangalibakangen lo’a i Yesus daasan labi ajau’ lagi lo’a banua palin ajau’en
Mat. 11:20-24
13Jaji manjarum i Yesus, “Mase’ poang nyawanin, ikin ambata tau banua Korasim! Mase’ poang nyawanin ambata tau banua Betsaida! Asi dinen ambata gulungan panyunyuaan kupolaan di matanin? Banua Tirus nanna banua Sidon, banua palin ajau’en dinen, na’an kala’ maita panyunyuaku’. Ti’ jalu dinen kupolajo di banua Tirus, di banua Sidon, ira dinen tentu mamin jolo memen maunjang pikiranda’ yang sala’en. Tentu dapakai kain kasaren, tentu koangi kalena nanna kutu daren lasana ajau’a nyawana mamikirang dosana. Poangsi daikin di’en na’ankin mainya’ maunjang pikirannin dinen,” ingka kenang. Yes. 23:1-18; Yeh. 26:1—28:26; Yl. 3:4-8; Am. 1:9-10; Sak. 9:2-4. 14“Ira dinen banua Tirus nanna banua Sidon kapisi ajau’, tentu labi arengan ukumda’ di asona to’ dalao’ina nanna ukumanen. Ikin ona’ aborat ukumannin, kole’a jalu ikitaan ikin na’an bua iparasaya’i ikin,” ingka kenang i Yesus.
15“Daikin bapi tau banua Kapernaum, ai ratina to’ suro’ kalenin iparaa sampai mondok lo’a suanen? Na’ankin to’ iparaa. Daikin ona’ to’ ipakeke’kin, ipaindor lo’a kosanna tau mateen,” ingka kenang lo’a ambata banua tau mangalibakangen lo’a. Yes. 14:13-15.
16Jaji manjarum bapi lo’a palola’a, “Intain manaantalingaan lo’in,” ingka, “daia dinen manaantalinga lo’ku’. Sabalika intain mangalibakangen lo’in, mangalibakang bea lo’ku’, mangalibakang bapi lo’a tau manyuro’en lo’ku’,” ingka kenang i Yesus lo’a palola’a. Mat. 10:40; Mk. 9:37; Lk. 9:48; Yoh. 13:20.
Yang tau datugasen mole’ balik malapor lo’a i Yesus
17Jaji barik tau datugasen dinen, ira tuju pulo’en dinen mole’ lo’a i Yesus. Saja sasau nyawada’, “O Paraampuane,” ingka, “ambata gulungan jalu ajau’en dinen malola’ani bua lo’a panamunam. Iburo ikam atas asannu, mainya’ bua ararina!” ingka kenang ira lo’a i Yesus.
18Jaji dasauti kole’a i Yesus, “Kenang lalo. Kukita iak i Pangabo alao’a dari suanen balu’ kilat dinen mamancara,” ingka kenang i Yesus. 19“Jaji andian lalo kuasanin kumeangen lo’in, uraren pande ilat ikin, na’ankin bahaya. Supit bawi suar pande ilat ikin, na’ankin bahaya. Pandekin manalo lo’a kuasana i Pangabo, kosan jalu manyuro’ bahaya lo’in,” ingka kenang. Msm. 91:13. 20“Dalam dinenpi, ambakinto’ sasau nyawanin kole’a dalola’anina panamunin kole’a gulungan jalu ajau’en. Yang labi maam pasasauiin nyawanin, kole’a andianna asannin dasuratang inang di Surga. Dinen yang patut manyuro’ sasau nyawanin,” ingka kenang i Yesus manjaruma lo’a tau yang datugasen dinen.
Alatala mamayoang jalu maamen lo’a tau pakeke’en kalena
Mat. 11:25-27; 13:16-17
21Jaji barik waktu nanga dinen sasau jaji nyawana i Yesus kole’a Sumangat Bareseen. Jaji manjarum, “Mamudiak lo’u Ama’e,” ingka kenang do’ana. “Iko lalo Paraampuanen ibona suanen nanna tana’en. Mamudiak lo’u kole’a samuana yang jalu ijarumangen iko, na’an ijarumang, na’an ipayoang lo’a tau pandeen, yang tau manamu sakolaan. Ipayoang iko lo’a nangkanaken lo’a ambata tau na’anen manamu. Mandua’ lalo. Kenang lalo kamainya’annu Ama’e,” ingka kenang manjaruma i Yesus ilalam do’ana.
22Jaji manjarum bapi i Yesus, “Gulungan ambata jaluun, dasera kausa lo’ku’ kole’a Ama’ku’,” ingka kenang. “Kosan tau mangilalaan lo’ku’ Anaka, suma Ama’ku’ poang mangilalaan. Kenang bapi, kosan tau mangilalaan lo’a Ama’, suma iak Anaka poang mangilalaan. Intain poang kudile’iin iak, kujarumang Ama’ku’ lo’a. Dinen poang barik mangilalaan lo’a Ama’ku’,” ingka kenang manjaruma i Yesus lo’a tauen. Yoh. 3:35; 10:15.
23Jaji dakoengang kalena manjarum poang lo’a palola’a, “Bauntungkin kole’a jalu ikitaan ikin. 24Kole’a manjarumak lo’in, arabaki’ka’jo dinen bayu’jo panjaruma Alatala, bayu’jo ambata rajaan bainginen to’ mamele panyunyuaku’ yang ibeleen ikin di’en. Baingin to’ mandalinga jarumku’ yang idalingaan ikin di’en. Poangsi ira dinen na’an dapat mamele kole’a nampi mondok bayana. Ikin bauntungen,” ingka kenang i Yesus lo’da’.
Tau Samariaan dala sama’ jarum
25Jaji barik andian dinen toa adaten yang mondok to’ maimpa’ lo’a i Yesus. Jaji barik sidua’, “O Pa’ Guru,” ingka kenang, “jalu ai kupolaan mainto’ kukule’a tio’ salaun-launna?” ingka kenang manjaruma lo’a i Yesus.
26Jaji dasauti barik kole’a i Yesus, “Ai lo’a jalu datulisangen di Ukuma Alatala?” ingka. “Ai lo’a kalo’u?”
27Jaji manyauti toa adaten dinen lo’a i Yesus, “Yang datulis inangen,
Arung sajangka’-jangka’a ateka’ mangasaangen lo’a Paraampuan Alatalaka’.
Arung sajangka’-jangka’a nyawaka’, sajangka’-jangka’a kajungka’, sajangka’-jangka’a pikiranka’ mangasaangen,
ingka. Kenang bapi,
Balu’ ai mangasaangka’ lo’a diri’ka’, arung awan dinen bea mangasaangka’ lo’a tauen,”
ingka kenang sautina toa adaten lo’a i Yesus. Im. 19:18; Ul. 6:5.
28Jaji dasauti barik kole’a i Yesus, “Mandua’ lalo. Ti’en kenang basanu, pandeko bua tio’,” ingka kenang dinen manjaruma i Yesus lo’a toa adaten dinen. Im. 18:5; Mat. 22:35-40; Mk. 12:28-34.
29Poangsi tau dinen baingin to’ pandua’ kalena. Jaji manjarum bapi, “Jaji intainsi lalo sabenara tauen dinen yang arungen kukasaang?” ingka kenang lo’a i Yesus.
30“Jaji manutulak lo’u,” ingka kenang i Yesus. “Andian tau lamba’ malola’ dalanen dari Yerusalem lo’a banua Yeriko. Jaji di lamba’a sidua’ nanna tau parampoken. Akaus dala gulungan jaluna, kainnapi dalaka’, dala. Daiapi dinen datiang dinen satanga’ mate, na’an lagi’ datamu jaluun. 31Jaji andian bapi tau lamba’ di dalan dinen, tau imamen. Mainso’ barik lo’a tau apadisen dinen, koengang kalena isabala’a dalanen lamba’a. Dalaloi poang,” ingka kenang tutulanna i Yesus. 32“Jaji andian bapi tau Lewi lamba’ malaloi inang. Dakita barik tau dinen, koengang kalena isabala’a dalanen lamba’a. Dalaloi poang. 33Poangsi andian bapi tau imundiin, tau Samariaan, banua yang na’anen sikule’ nanka’ tau Israelen. Jaji lamba’ inang, dabele barik dinen tau yang apadisen, ka’ mase’-mase’a. 34Jaji dasengka’i, dapole’i lukana, daolongi lukana nanna inyaken, nanna angguren, laloang dabalut nanna ambata kainen. Laloang dauwatang di keledaina, daawa lo’a sao tumpanganen dinen, datuntuani. 35Jaji di aso seraan rabarik, dameang duit dinar dua papaka lo’a tau ampuna sao tumpangan dinen. Jaji tau di’en, ingka, manuntuani iko. Ti’en ona’ ongkosa labi lo’a di’en, bele kubayara ona’ ti’enak mole’ lo’a di’en, ingka kenang tau Samariaan dinen,” ingka kenang tutulanna i Yesus.
36Jaji barik manjarum dinen i Yesus lo’a toa adaten dinen, “Inde ira taluun dinen yang mangasaangen lo’a tau daanu parampoken dinen?” ingka kenang.
37“Tentula anu yang imundiin dinen, yang tau mainya’en mangamase’i lo’a,” ingka kenang toa adaten dinen manyautina.
Jaji manjarum i Yesus, “Na dinla. Lola’ani bea daiko basa awan dinen,” ingka kenang i Yesus lo’a toa adaten dinen.
I Yesus aramen di saona i Marta nanna i Maria
38Jaji barik i Yesus dinen mondok lo’a banua seraan. Jaji barik andian inang di banua dinen tau asanna i Marta yang manyialoon lo’a i Yesus dinen manyuro’ sengka’ di saona. 39Andian bea sairunna babainye dinen, asanna i Maria. Babainye dua-duana. Jaji barik i Maria dinen aduduk di biringa Paraampuanen manaantalinga lo’a jaruma. Yoh. 11:1. 40Poangsi i Marta dinen bagado manyorongina lo’a tau mondoken. Jaji kapanjanganna amumuta, dinen i Martaan, lamba’ dinen lo’a i Yesus. “O Paraampuane, ai daiko, na’anko paduli kakaleku’a poang maurusiin ambata gulungan jaluun, na’anak dagulungi kole’a sairunku’? Subako manyuro’ lo’a manggulungi lo’ku’,” ingka kenang manjaruma i Marta lo’a i Yesus.
41Jaji barik dasauti kole’a Paraampuanen, “O Marta, Marta’e, daiko bayu’ tapat kalanggangannu. Bayu’ to jalu ilalam batak nyawanu,” ingka kenang. 42“Sera poang jalu yang pentingen. Yang jalu daile’iin kole’a i Maria dinen, dinen lalo yang mandua’en. Yang jalu maminen daile’iin dinen na’an bea to’ iala mole’,” ingka kenang i Yesus lo’a i Marta dinen.
നിലവിൽ തിരഞ്ഞെടുത്തിരിക്കുന്നു:
Lukas 10: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
