Lukas 11
11
I Yesus parajari lo’da’ soal bado’aan
Mat. 6:9-15; 7:7-11
1Jaji barik andian asona i Yesus bado’a di kosanna. Mamin akaus bado’ana, mondok bea palola’a seraan manjarum lo’a, “O Paraampuane, suba parajariko lo’am mainto’ itamuna ikam bado’a, awan bua i Yohanes parajarina lo’a palola’a,” ingka kenang lo’a i Yesus.
2Jaji manjarum i Yesus lo’da’ mameang sonto, “Jaji do’aka’ kenang maamen,
“O Amanam, arung ipaduli asannu, arung ianggap barese.
“Daiko kangkamannu dinen arung ipadari di dunia di’en.
3“Meangkam mairaso jalu kaanen.
4“Kenang bea daikam di’en maminta amponkam lo’a dosanam. Kole’a daikampi di’en mamponikam bea lo’a tau arasala’en lo’am.
“Ada’kam iawa lo’a jalu mangilalaien,”
ingka kenang parajarina lo’da’.
5Jaji dajarumang bapi lo’da’ parumpama’an lo’a soal do’a, “Umpamana andian kawanka’. Jaji lamba’ki’ tanga’ malamen manjarum lo’a, O kawane, suba painjamang lo’ku’ roti talu sakalana. 6Kole’a andian bapi kawanku’ mondok lo’ku’ dari banua bajao’en. Kosan jalu kusorongang lo’a, iki’ kenang lo’a kawanka’.
7“Jaji manyauti bapi dinen kawanka’, O ambakinto’ mangaruun lo’ku’. Mambangan mamin ipalang. Mamin tindo’ anakku’ indi’angen nanku’. Na’an kukule’ aduduk mameang jalu lo’u, ingka kenang bua lo’ka’. 8Na, manjarumak tapat-tapat lo’in, na’anpi to’ mangamase’i lo’ka’ kole’a daaku’ kawan, tentu mameang bua barik roti dinen kapanjanganna mamitaka’ lo’a. Ai poang paruluka’ tentu dameang bua lo’ka’,” ingka kenang i Yesus lo’da’.
9“Jaji manjarumak lo’in. Se’ mamitaki’ lo’a Alatala, ka’ bea dameangka’. Se’ manyariki’ lo’a, ka’ bea idua’anga. Se’ manodokki’ di mambanganna, ka’ bea dabae’angka’. 10Kole’a intain yang mamitaan tentu to’ dameang bua. Intain dinen yang manyariin, to’ mandua’ang bua. Intain yang manodoken to’ dabae’ang bua,” ingka kenang.
11“Umpamana yang daiki’ babakaan, ti’ andian anakka’ mamita lauken itiang patamaan, na’an patut imeang urar yang balasan. 12Ti’ mamita intaror, na’an patut imeang supit bawi suar. 13Na, ti’ daiki’ tau ajau’en, itamu iki’ mameang jalu maamen lo’a anakka’, ai lagi’ maama Ama’ka’ di Surga. Ti’enki’ mamita Sumangat Bareseen lo’a, tentula dameangki’ bua,” ingka kenang i Yesus lo’a palola’a.
I Yesus daasan dasarung kole’a i Pangabo
Mat. 12:22-30; Mk. 3:22-27
14Jaji i Yesus dinen maruru jalu ajau’en yang manyuro’ abisuun. Jaji mamin barik daruru, manjarum tau dinen yang abisuun de’i. Jaji tatakau tauen. 15Poangsi andian sapa dua yang manjarum, “Daia dinen kuasana i Beelsebul yang dapakaien, kuasana panguluan jalu ajau’en. Ialalo dapadulina, ialalo dapata daruru gulungan jalu ajau’en,” ingka kenang ira. Mat. 9:34; 10:25. 16Andian bea sapa dua mangilalaien lo’a i Yesus mamita tanda dari Surga. Mat. 12:38; 16:1; Mk. 8:11.
17Jaji datamu barik pikiranda’ kole’a i Yesus, laloang manjarum daia, “Na’an patut panguluanna mainya’ maruru sama diri’a. Umpamana kangkaman rajaan, ati’en sijai ambata gulunganna, tentu na’an kuat kangkamanna dinen, tentu na’an bataan. Kapanjanganna na’anna sikule’, tentu sarak barik, tambor-ambor. Atau saloang kayan, ati’en sijai suang gulunganna, tentu na’an bataan,” ingka kenang. 18“Kenang bapi nanna i Pangabo. Ati’en daia silawan sama diri’a pasisarakang, asi lo’a bataanna kangkamanna dinen? Tentu na’an bataan, tentu to’ atalo, manyuro’ atampus kuasana,” ingka kenang. “Daiakpi di’en iasanku’ ikin mamakai kuasana i Beelsebul itiang maruru jalu ajau’en. Ti’ tapat awan dinen, ratina jalu ajau’en dinen mamin sikaru sama diri’a. Na’an masok akal. Na’an mainya’ kuasana panguluan jalu ajau’en ipakai itiang maruru jalu ajau’en,” ingka kenang.
19“Na, daiak di’en iasanku’ ikin mamakai kuasana i Beelsebul itiang maruru jalu ajau’en. Ai daikin dinen, andian bea sama ikin yang tau maruru jalu ajau’en. Kuasa aien ipakaien dinen? Suba tanya’ sama ikin suro’ mamutusiin ti’ kuasa aien yang mustiin itiang maruru jalu ajau’en. Ai te’ daikin, kuasana i Pangabo bua? Tentula na’an,” ingka kenang i Yesus lo’da’. 20“Poangsi ti’en de’i kuasana Alatala kuawanna paruru jalu ajau’en, ratina di’en mondok mamin baya Alatala to’ mangkama lo’in awan rajaan,” ingka kenang manjaruma i Yesus lo’da’.
21“Umpamana tau bakajungen manyagai saona, sukup nanna ambata gulungan alat sikayoon. Maam. Na’an dakule’ darampas jaluna. 22Poangsi mondok ona’ tau bakajung bapi lo’a, malawan lo’a, manalo. Dala dinen alat sikayona yang daarapen dinen, datawa’-tawa’ dinen jalu darampasen,” ingka kenang. “Arung tau labi bakajung lagi’, baru’ dapat manalo lo’a,” ingka kenang i Yesus lo’da’.
23“Jaji kenang. Intain tau yang na’anen mangamuroang lo’ku’, dinen lalo yang tau malawanen lo’ku’. Intain tau yang na’anen tamba mangapulungang, dinen lalo tau yang pasisarakangen,” ingka kenang. Mk. 9:40.
Jalu ajau’en ti’en iruru, arung isurangi nanna jalu maamen
Mat. 12:43-45
24Jaji manjarum bapi lo’da’ manjarumang sama’ jarum lo’a tau tio’en di tataka dinen, “Umpamana tau dasarung jaluun, minsaluan barik dinen jalu ajau’en. Jaji lamba’ barik jalu ajau’en dinen manyari kosanna to’ sangarian di ambata kosan na’anen dadua’ sauranen. Jaji lamba’ dinen, na’an mandua’ang kosanna. Jaji balaun barik, To’ mole’ak lalo lo’a saoku’ yang kurantangen dinen, ingka kenang. 25Jaji mole’ balik lo’a saona, saona dinen mamin barese, mamin dapamaam. 26Jaji barik lamba’ bapi manyari kawanna. Daawa bapi kawanna tuju jalu ajau’en yang labi ajau’en lagi’ lo’a, lalako’ kausa barik di saona. Jaji katuntunganna rabarik tau dasarungen dinen insang kaya susana,” ingka kenang lo’da’.
Tau bauntungen
27Jaji nanga manjaruma i Yesus dinen, andian dinen babainye dari tau babangkulungen manjarum, “Bauntung tapat babainye yang paranakangen lo’u, yang panusu’en lo’u,” ingka kenang.
28Jaji barik dasauti bapi kole’a i Yesus, “Jaji kenang, na’an awan dinen. Labi bauntung lagi’ dari pada dinen yang tau manaantalingaan jaruma Alatala, yang tau malola’aniin jaruma Alatala,” ingka kenang manjaruma i Yesus lo’a babainye dinen.
Tauen mamita tanda dari nanna i Yesus
Mat. 12:38-42; Mk. 8:11-12
29Jaji insang kaya tau babangkulunga ibiringa i Yesus, i Yesuspi manjarum, “Asi lo’a tau tio’en di tatakka’ di’en. Na’an sera ate mainya’in lo’a Alatala. Tau kakanjianen lalo yang mamita tanda panyunyuaan,” ingka kenang. “Daiak kosan tanda panyunyuaku’ kupayoangen lo’in. Suma poang tandana lo’in, tandana baki’ Yunus. Msm. 95:7-9; Mat. 16:4; Mk. 8:12. 30Kole’a baki’ Yunusjo dinen, tandana lalo lo’a tau Niniwe. Daiakpi di’en Anak Mantuariin padari tanda lalo bea daiak lo’a tatakku’ di’en,” ingka kenang. Yun. 3:4.
31“Di asona ona’ to’ idukuma duniaan di’en, raja babainyeen yang dari Selatanen to’ manuntut lo’in. Kole’a babainye dinenjo mondok dari bajao’en to’ datiang manaantalinga lo’a panamuna Raja Salomo. Poangsi daikin na’an awan dinen. Yang andianen nannin di’en, baraa lagi’ lo’a i Salomo. Na’an bua itaantalinga ikin. Patutkin datuntut,” ingka kenang lo’da’. 1Raj. 10:1-10; 2Taw. 9:1-12.
32“Kenang bapi tau banua Niniwe. Di asona ona’ to’ idukuma duniaan di’en, tau banua Niniwepi dinen to’ manuntut lo’in. Kole’a daira dinenjo, manjarum baki’ Yunus lo’da’, daunjang barik pikiranda’ yang sala’en. Dalola’ani panamuna Alatala. Poangsi daikin laan. Yang andianen nannin di’en baraa lagi’ lo’a baki’ Yunus dinen. Na’an bua ipaduli ikin,” ingka kenang. “Ialalo patutin datuntut kole’da’,” ingka kenang i Yesus manjaruma lo’da’. Yun. 3:5.
Pangajaran yang tapaten dasama’ang awan palita yang marawangiin lo’ka’
Mat. 5:14,16; 6:22-23
33“Awan lalo palita yang ikatio’en dinen, tentu na’an ilamun. Tentu na’an itongopi nanna basikomen. Palita yang ikatio’ tentu ipaduduk ibona dudukanna. Tentu itiang parawangi tau mondoken ilalam saoen,” ingka kenang. Mat. 5:15; Mk. 4:21; Lk. 8:16. 34“Jaji mataka’ di’en kusama’ang awan lalo palitana mantuarika’. Ti’ maam mataka’, maam bea pameleka’. Arawang kausa mantuarika’. Ati’en ajau’ mataka’, ajau’ pameleka’. Araun bea mantuarika’ kausana,” ingka kenang sama’ jaruma i Yesus. 35“Jaji daiki’ arung sasari kaleka’, ungka’en jalu iasanen arawang ilalam ateka’, okan lagi’ arawang. Ungka’en araun yang jalu lalako’en di ateka’. Mat. 6:22-23. 36Jaji ti’ saja arawang kausana ilalam mantuarika’, ti’ kosan jalu araunen nanka’, baru’ki’ arawang kausana. Awan bua arawanga lampuun yang marawangiin lo’ka’,” ingka kenang i Yesus lo’da’.
I Yesus manjarumi lo’a gulungan toa adaten nanna tau Parisiin
Mat. 23:1-36; Mk. 12:38-40; Lk. 20:45-47
37Maminna akaus barik ambata jaruma i Yesus dinen, andian tau Parisiin mawa angkaan lo’a i Yesus. Jaji barik i Yesus dinen lamba’ bea lo’a saona dinen angkaan inang. 38Jaji dabele kole’a tau Parisiin, i Yesus dinen na’an dapakai atoran pamareseen tanganna nampina angkaan awan di adat Yahudiin, jaji tatakau barik tau dinen.
39Jaji manjarum Paraampuanen lo’a tau Parisiin dinen, “Na daikin tau Parisiin, ambata sawannin, ambata pinggannin ikusuk. Bayokkin mamareseen. Poangsi daikin katio’annin dinen na’ankin bayok mamareseen. Awan lalo pingganenkin. Balu’ jalu balakanga poang ibareseen. Arona na’an ikusuk. Daikinpi insaluannin poang yang ipikirangen. Dinen poang yang ibareseen. Ilalamen, di atenin, na’ankin barese. Tumbas mamikir lapoang to’ marampas jalu tau, to’ mamola ambata kajau’anen. 40Rabor-raborkin! Tau yang mamolaan lo’a mantuarinin, tentu mamola bea atenin,” ingka kenang. “Insaluannin ia yang mamolaan, ilalamin ia mamolaan. 41Dari pada mamikirang poang insaluanen, jalu yang dakitaan, suba dari ate maamin mobosa ambata pameangin lo’a tau masikinen, ambata sadekaan. Baru’ barese kausa katio’annin. Ilalamen bareseen, insaluanenpi barese,” ingka kenang jarumina lo’da’ tau Parisiin.
42“Mase’ poang nyawanin ona’ ikin tau Parisiin! Bayo’kin tapat mamayar paresenen. Gulungan asel bumbu, jalu itanamen ikin, imeang kausa ikin sadeka sapulo’ paresen lo’a Alatala. Maam selasih, maam inggu, ibayar kausa ikin paresena. Poangsi ilaloi barik ikin jalu pentingen. Na’an ianu basa tapaten lo’a tauen. Na’ankin mangasaang lo’a Alatala,” ingka kenang. “Yang mandua’en, arung dinen ilola’aniin, sarata nanna yang bokanen dinen de’i, arung ilola’ani bea,” ingka kenang lo’da’. Im. 27:30.
43“Mase’ poang nyawanin ona’ ikin tau Parisiin! Tumbas paraa kalenin lapoang. Di gulungan sao sambayangen pakokoloankin to’ aduduk di kosan tau baraa’en pakaina. Di pasaren mainya’ jajikin dapaduli kole’a tauen,” ingka kenang.
44“Mase’ poang nyawanin ona’. Jalu kotorenkin. Ikin lalo kusama’ang awan kubur tau yang na’anen datandai. Kuburen ti’en na’an datandai, dalengka’i, dalat poang, na’an dampe datamu tau. Na’an datamu andian jalu kotor indinangen,” ingka kenang.
45Jaji barik manjarum tau toa adaten lo’a i Yesus, “O Pa’ Guru, daiko jarumu dinen tadua’ bea lo’am, pajau’ lo’am,” ingka kenang lo’a i Yesus.
46Jaji manyauti bea i Yesus, “Daikinpi toa adaten yang tau parajariin Ukuma Alatala, mase’ bea daikin nyawanin ona’. Bagadokin mangamasangen jalu aboraten sama’a. Pangajaran dari Ukuma Alatala iakadani nanna atoran pamola kadiri’. Ijaratang, isuro’ san lo’a tauen. Poangsi diri’in dinen na’ankin mainya’ manggulungi. Na’an dampe pakaji’ anak tunjukin itiang manju’ lo’a ambenanda’ yang aboraten,” ingka kenang i Yesus manyautina lo’da’.
47“Mase’ poang nyawanin bea ona’, kole’a daikin dinen balu’-balu’ padulikin lo’a panjaruma Alatala. Mangulambuangkin lo’a ambata panjaruma Alatala yang ijoloon, yang dauno’enjo kole’a arabakinin. 48Na, inang lalokin mangaku’ lo’a basa mauno’a arabakinin dinen. Diri’inpi dinen balu’ tamba satuju nanna basada’ dinen. Arabakinin yang mauno’en, ikin barik manguburangen. 49Na, dinen lalo panamuna Alatala yang datulisangen dinen,
To’ kusuro’ tau mondok lo’in, ambata tau panjarumen, ambata tau pasuro’en. Sapa dua ona’ to’ iduno’. Sapa dua to’ iparinsa’i,
ingka kenang bayana. 50Dinen lalo ratina to’ lo’in alao’a ukuma samuana basa ajau’in nanna arabakinin. 51Tarangkat nanna baki’ Habel, mondok lo’a baki’ Sakaria anaka baki’ Berekia yang iduno’en ikinjo inang antarana kosan bareseen nanna kas pamindaraan, samuana dinen to’ isuro’ tanggung lo’in. Samuana arabasanin nanna arabakinin dinen tulak ijoloon mondok awandi’en, mondok di ona’en to’ isuro’ tanggung kausa lo’in di tatakka’ di’en,” ingka kenang i Yesus lo’da’. Mul. 4:8; 2Taw. 24:20-21.
52“Mase’ poang nyawanin ona’ ikin toa adaten. Iala ikin kuncina mambangan yang manyuro’ dapat itamu jaji ratina jalu tapaten. Ipase’ang ikin lo’a tauen. Daikin diri’in na’ankin intama. Tau bokanenpi yang to’ intamaan lo’a dinen ipase’ang bapi ikin,” ingka kenang i Yesus lo’da’.
53Jaji barik i Yesus marantang kosan dinen, lamba’. Imundina rabarik, ambata tau Parisiin nanna toa adaten mulai malawan jaji lo’a. Jaji mulai barik mangatoani lapoang lo’a i Yesus, bayu’ lapoang baranana jalu dakatoanangen. 54Maimpa’ ira to’ mamele kasala’anna ilalam jaruma.
നിലവിൽ തിരഞ്ഞെടുത്തിരിക്കുന്നു:
Lukas 11: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
