Lukas 12
12
Ada’ki’ malola’ani basana tau mamis baba’ masam atena
Mat. 10:26-27
1Jaji insang bayu’ tau babangkulungen ibiringa i Yesus sampai marapit malat-lata sera lo’a seraan. Jaji i Yesus tajolo manjaruma lo’a palola’a, “Maam-maamkin, babajao’kin lo’a ragina tau Parisiin. Ragina ialalo baba’a mamis, ate masam,” ingka kenang lo’da’. Mat. 16:6; Mk. 8:15. 2“Ti’ jalu kalindungan, pasti to’ dapayoang bua ona’ samuana. Ti’ jalu ilamunen, pasti to’ datamu tau,” ingka kenang. Mk. 4:22; Lk. 8:17. 3“Yang jalu ijarumangen di araunen, to’ dajarumang barik di jalu arawangen. Mambanganpi dakunsi, jarum sisiniken ijarumang di talingana tauen, dinenpi ona’ to’ dapukoang manjarumanga lo’a tauen,” ingka kenang lo’da’.
Alatala poang yang patut ikatakutangen
Mat. 10:19-20,28-33
4“Jaji manjarumak lo’in arakawanku’, ada’kin atakuten lo’a tau yang mauno’en lo’a mantuarika’. Kapisi daia dinen pande mauno’, akaus inang panamuna. Jangka’a. Kosan bapi jalu pande manu lo’ka’ maminna dinen. 5Intain ikatakutangen dinen? Kujarumang iak lo’in, yang arung ikatakutangen dinen, andian tau pauno’en, yang maminna mauno’ lo’ka’ datamu bea manampeang lo’ka’ lo’a Nerakaan, lo’a Banua Apiin. Kujarumang lo’in, ia lalo yang arung ikatakutangen,” ingka kenang lo’da’.
6“Ada’ki’ bea kalangganganen. Andian ragaka’ di arona Alatala. Awan burung dungusen, ti’en ipet iki’, lima burung kule’ poang duit dua papaka. Poangsi dinen kapisi na’an baraga, daparandam lapoang sera-serana kole’a Alatala. 7Buk di uluka’ dampe, mamin dakira bayu’a. Mamin datamu kole’a Alatala. Dinen lalo na’anka’ pande kalangganganen. Kole’a kapisi burung dungusen ikapulungang bayu’, tentu iki’ labi baraga lo’a burung dinen di arona Alatala. Ati’en burung dapaduli, ai lagi’ daiki’ dapaduliin,” ingka kenang i Yesus lo’da’.
8“Manjarumak lo’in,” ingka, “intain mangaku’en lo’ku’ di arona tauen, daiakpi Anak Mantuariin mangaku’ak bua lo’a di arona malaikata Alatala. 9Intain panasalangen kalena, na’an mangaku’ lo’ku’ di arona tauen, daiakpi panasalang kaleku’ bea di arona malaikata Alatala, na’anak mangaku’ lo’a,” ingka kenang. 10“Intain mantuariin manjarum to’ malawan lo’ku’ Anak Mantuariin pande daia daamponi. Sabalika tau manjarum pajau’-jau’en lo’a Sumangat Bareseen, dinen na’an ikule’ iamponi,” ingka kenang lo’da’. Mat. 12:32; Mk. 3:29.
11“Jaji ona’ dinen andian tau maduangen lo’in kole’a iawana asanku’, ada’kin kalangganganen. Ti’ daawakin madap di arona paurusen di sao sambayangen, daawakin di arona gubernur, di arona rajaan, ada’kin kalangganen yang jalu to’ ijarumangen ikin. 12Kole’a pas waktu madapin dinen to’ dameang bua lo’in kole’a Sumangat Bareseen. Ia yang parajariin lo’in lo’a jalu yang arung ijarumangen ikin dinen,” ingka kenang i Yesus lo’da’. Mat. 10:19-20; Mk. 13:11; Lk. 21:14-15.
Tau maamen tio’a yang rabor-raboren dala sama’ jarum
13Jaji barik andian tau seraan dinen, tau babangkulung, babakaan. Jaji barik manjarum lo’a i Yesus, “O Pa’ Guru, suba manjarumiko lo’a sairunku’ babakaan suro’ manawa’i lo’ku’ sapa dua hartana tumate ama’ka’ dinen,” ingka kenang lo’a i Yesus.
14Jaji manjarum i Yesus, “Asi lo’a dinen? Intain manugasen lo’ku’ itiang mamutusi lo’in manyuro’ manawa’ jalunin? 15Maam-maamkin. Jagai kalenin dinen. Ada’kin dinen tama’ lolo to lo’a jaluun. Ada’kin dinen mangaingini jalu tau. Kole’a tio’ka’ di’en na’an kapentingan jalu bayu’,” ingka kenang.
16Jaji manjarum bapi i Yesus lo’da’ mamakai sama’ jarum, “Andian dinen tau maamen tio’a yang palin bayu’en asela umana. 17Jaji manjarum barik tau dinen di batak nyawana, Asi lo’a barik di’en? Na’an sumana pamoranku’ itiang panaro’an mole’a bayu’a di’en, ingka kenang tau dinen.
18“Jaji dasauti kalena, Kutamu barik. Ambata pamoranku’ di’en kurarak. Kupola baru yang baraa’en. Inang barik taro’a kole’ku’ ambata mole’a tanamanen, ambata kamaamanku’. 19Jaji inang ona’ barik manjarumku’ di batak nyawaku’, Maam! Bayu’ mamin jaluun, sukup insa’ taun, yang mole’a jalu kutaro’en dinen. Tadangak barik aparuken. To’ sangarian, to’ rami-rami. Angkaan mainyum poangak, ingka kenang tau dinen ilalam batak nyawana.
20“Poangsi Alatala barik manjarum lo’a tau maamen tio’a dinen, Rabor-raborko! Na, daiko di’en kualako. Mateko barik malam di’en. Intain barik ampunaan? Lo’a intain barik mole’a yang itaro’en iko? Tau bokanla’ mamakaien! ingka kenang Alatala lo’a tau dinen.”
21Jaji manjarum bapi i Yesus, “Jaji kenang lalo tauen yang manaro’ jaluun balu’a dinen, yang mamikirang poang itiang kakalena, yang angkosanen kamaamanna di arona Alatala,” ingka kenang i Yesus lo’da’. Yak. 4:13-15.
Ada’ki’ kalangganganen lo’a katio’anka’
Mat. 6:25-34; 19—21
22Jaji barik i Yesus manjarum lo’a palola’a, “Jaji kenang lalo jarumku’ lo’in, ada’ki’ kalangganganen mamikirang soal katio’anka’, soal angkaan mainyum, soal parakainiin lo’a mantuarika’. 23Asi lo’a? Tio’ka’ di’en, okan soal jalu kaan poang yang pentingen. Mantuarika’ di’en, okan kainen poang yang pentingen. 24Belejo gulungan burung kakao’en, okan daia masak, okan daia matam mangapulungang ase di pamoranen. Angkaanna bua, dapangkaanna bua kole’a Alatala. Labina lagi’ daiki’, tentuki’ baraga lo’a gulungan burungen. 25Ai gunana kalangganganen? Kalangganganen dinen okan jalu manyuro’ balangke tio’ka’,” ingka kenang. 26“Na, ti’ kosan dampe asela kalangganganen, na’an manyuro’ balangke tio’ka’, ratina samuana soal bokanen yang ipikirangen kosan kausa guna kalangganganen. Kenang ratina,” ingka kenang i Yesus lo’da’.
27“Kenang bapi soal kainen. Belejo gulungan timbukas rimputen dabaranga. Okan dinen bakaraja, okan bea manam kainen. Poangsi maam jaji ayu’a. Manjarumak lo’in, Raja Salomopi dinen di kamaamannajo dinen, kosan labi lo’a rimputen ayu’a. Kainna dinen na’an sabalu’ nanna timbukas rimputen dinen maama. 1Raj. 10:4-7; 2Taw. 9:3-6. 28Padahal rimputen dinen jalu sikadang poang, aso di’en tio’a, mina’ itampeang lo’a apiin. Jaji ati’en awan dinen maama parakainina lo’a gulungan rimputen kole’a Alatala, tentu labi lagi’ mainya’a parakaini lo’ka’. Daikin saja kurang jaji kaparasaya’annin,” ingka kenang.
29“Jaji ada’ki’ kalangganganen kapentingan jalu kaanka’ nanna jalu idinyumen. 30Awan dinen lalo tau na’anen paduli lo’a Alatala. Poangsi daiki’ Ama’ka’ di Surga datamu kausa mamin kaparuluanka’. 31Daiki’ manyariki’ tajolo jalu manyuro’ adariin lo’a bayana Alatala to’ mangkama lo’ka’ awan rajaan. Ka’ bea idua’anga iki’ gulungan kaparuluanka’. Kenang ratina,” ingka kenang i Yesus lo’da’.
32“O daikin anak kawanan dombaan, ada’kin atakuten. Kole’a Ama’ka’ di’en kamainya’anna to’ mawa lo’in tamba marasa samuana ambata gulungan jalu maamen ilalam kangkamanna. 33Jaji daikin, pet poang ambata jalunin. Tawa’ang poang lo’a ambata tau masikinen. Isari poang kamaamanen yang na’anen mainya’ arusak. Isari iki’ kamaaman di Surga kole’a inang na’an mainya’ akaus, na’an mainya’ darampas tauna, na’an mainya’ damansangi pangaliten,” ingka kenang. 34“Ada’ mangapulungang jalu di duniaan, mangapulungang poang di Surga. Kole’a disa poang ikumpulanga iki’ jaluun, tentu talola’ bea ateka’ lo’a dinen. Ti’ indi’ang di duniaan ikumpulanga, indi’ang lapoang di arta duniaan ateka’. Ti’ inang di Surga ikumpulanga, inang bea di Surgaan ateka’,” ingka kenang i Yesus lo’da’.
Dasuro’ lo’ka’ bakamas
Mat. 24:42-44
35“Jaji arungki’ arasape, arung ikatio’ palitaan, arung bakamas lapoang itiang mangarajaang panamuna Paraampuanka’,” ingka kenang. Mat. 25:1-13. 36“Awan lalo tau suro’anen dinen lamba’ samagata lo’a rami-rami tau sialaan. Jaji ambata suro’anna yang arantang di saona dinen, bakamas dinen marungina. Ti’ mole’ paraampuanna dinen manodok, terus poang dabae’ang mambanganen kole’a ambata suro’anen. Mk. 13:34-36. 37Jaji bauntung lalo suro’anna dinen ti’ tapat manyagai di nanga mole’a paraampuanna. Manjarumak lo’in tapat-tapat, di mole’a dinen ti’ dabele suro’anna manyagai tapat-tapat, tentu paraampuanna diri’a barik mangamasangen kalena to’ manyorongi lo’a suro’anna dinen. Tentu ia barik yang manyorongiin lo’da’. 38Bauntung lalo dinen suro’anna ti’ bakamas di mole’a, kapisi tanga’ malam, kapisi damiari mole’a,” ingka kenang manjaruma.
39“Na, awan toa sao dinen, to’ dakaliti kole’a tauen, ti’ datamu jama, tentu dajagai. Tentu dapase’ang daintamai saona. Mamin terang lo’ka’,” ingka kenang. 40“Jaji daikinpi bua arung bakamas, kole’a na’an itamu mondoka. Itamu na’an itamu, maminak mondok Anak Mantuariin, di waktu na’anen isangka ikin,” ingka kenang i Yesus lo’da’. Mat. 24:43-44.
Balu’ ai basana suro’an yang maamen?
Mat. 24:45-51
41Jaji barik i Petrus di’en mangatoani lo’a i Yesus, “Ai sama’ jarumu dinen lo’a suro’an yang dapaten iarap dinen, lo’am poangaka atau lo’ka’ samuaka’?” ingka kenang.
42Jaji i Yesus barik manyauti, “Jaji balu’ ai basana ti’ suro’an yang datamu pasitimbangan jalu maamen nanna jalu ajau’en, tau yang dapaten iparasaya’iin? Umpamana suro’annen datugas kole’a samagata dasuro’ mangapala’iin lo’a suro’an bokanen. Dasuro’ maurusi tawa’an jalu kaanda’. 43Ti’ de’i mole’ paraampuanna, sidua’ nanna waktu maurusina nanna maamen, maam lalo. Bauntung daia. 44Manjarumak tapat-tapat lo’in, daia dinen pasti datugas bapi dasuro’ maurus kausa ambata jaluna,” ingka kenang. 45“Ti’ dinen ajau’ suro’an de’i, manjarum di nyawana, Ha, to’ laiaka bea to’ mate-mateak bakaraja’a. Mamalang launna paraampuanku’, ingka kenang. Mulai dinen maniang barik lo’a ambata suro’an bokanen babaka babainyeen, mulai dinen angkaan mainyum sampai mangalo uluna, 46sadinga poang to’ mole’ dinen paraampuanna. Itamu na’an itamu mamin mondok di asona, di jama na’anen sangka’. Laloang dinen paraampuanna to’ manyuro’ idukum satanga’ mate. To’ dameang barik kosanna sarilao’ nanna ambata tau na’anen dapat iparasaya’i dinen,” ingka kenang i Yesus manyautina.
47“Jaji intain suro’anen, mamin datamu panamuna paraampuanna, ti’ na’an bakamas, na’an malola’ani panamuna paraampuanna, daia dinen to’ datiang nanna balasaan. 48Intain dinen na’anen manamu panamuna paraampuanna, ti’ ajau’ basana, daia dinen kakapit poang datianga,” ingka kenang. “Jaji intain dinen yang datawa’i bayu’ jaluun, tau dinen bayu’ datuntuta. Ti’ bayu’ jaluun dasuro’angen lo’a, baraa bea tanggung jawapa,” ingka kenang i Yesus lo’da’.
I Yesus na’an manyuro’ sikamaaman nanna tau duniaan
Mat. 10:34-36
49“Daiak di’en pamondokku’ lo’a duniaan, to’ matio’ apiin. Bainginak jaji. Saja maam nyawaku’ ti’en mamin ikatio’ api dinen. 50Poangsi daiak sama’a arungak ibaptis ijolo, imasokang ilalam ka’ada’an yang palin susaan. Daiakpi launna nampina adari lo’ku’, saja susa ateku’,” ingka kenang manjaruma i Yesus. Mk. 10:38.
51“Asi lo’a, irasa ikin lo’ku’ mondokku’ di’en to’ manyuro’ sikamaamanen lo’a tau duniaan? Saja na’an! Mondokku’ di’en pasilawanang tauak. 52Mulai awandi’en ambata suang kayan tauen to’ silawan sama diri’a. Umpamana sakayan lima mantuariin, yang duaan to’ malawan lo’a yang taluun. Yang taluunpi dinen to’ malawan lo’a yang duaan. 53To’ dapasisarakang barik. Amana silawanen nanna anaka babakaan, anakapi silawanen nanna amana. Yang induna to’ silawan nanna anaka babainyeen. Anaka babainyeenpi to’ silawan nanna induna. Ti’ matoana babainyeen to’ silawan nanna inantuna babainyeen. Inantunapi babainyeen to’ silawan nanna matoana babainyeen,” ingka kenang i Yesus lo’da’. Mik. 7:6.
Tandana jalu to’ adariin
Mat. 16:2-3
54Jaji barik i Yesus manjarum lo’a tau bayu’en, “Jaji daikin ti’ bakaya domen maro lo’a masama matasoon, itamu ikin ratina. To’ sauran dinen, ingka jarumin. Laloang sauranna bua. 55Kenang bapi ti’ sariut dari salatanen, Balasa ona’ di’en sisiaken, ikin bua jarumin. Laloang adari bua. 56Ikin lalo tau mamis baba’en masam atenin. Itamu ikin mamele tanda duniaan, tanda suanen, poangsi na’an itamu ikin mamele ambata gulungan tanda jalu ikitaan di musim di’en kakaru’, tanda to’ adarina ambata gulungan bayana Alatala,” ingka kenang i Yesus lo’da’. Mat. 16:2-3.
57“Suba ikin diri’in mamutusi kalenin, mamele jalu mandua’en nanna jalu sala’en. 58Ti’ umpamana andian tau mawa panakara lo’ka’, nampiki’ to’ daawa lo’a paurusen, arungki’ babariar maurusiin manyari sikamaamanen. Na’an kenang, tentu datingkamki’. Daawaki’ tapat lo’a paurusen. Paurusenpi dinen to’ manyera lo’ka’ lo’a tanganna polisiin, daapiski’ di sao ukumanen dinen. 59Manjarumak tapat-tapat, maminki’ barik daapis di sao ukumanen dinen, ti’ nampi akaus ibayar iki’ gulungan adaten, nampiki’ dapat minsaluan,” ingka kenang i Yesus lo’da’. Mat. 5:25-26.
നിലവിൽ തിരഞ്ഞെടുത്തിരിക്കുന്നു:
Lukas 12: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
