Lukas 3
3
I Yohanes Pambaptis manjarum di kosan ateengen
Mat. 3:1-12; Mk. 1:1-8; Yoh. 1:19-28
1Jaji nanga dinen mamin lima belas taun Raja Tibereas mangkama di Roma. I Pontius Pilatus lalo gubernur di Yudea. Di Galilea Raja Herodes mangkamen. Di Iturea nanna Trakonitis Raja Pilipus sairunna Raja Herodes yang mangkamen. Raja Lisanias yang mangkamen di Abilene. 2Ti’en di Yerusalem, inang i Annas nanna i Kayapas yang mawa tugas imam baraa’en. Jaji nanga taun dinen lalo andian paba’ina Alatala lo’a i Yohanes anaka i Sakaria yang lalako’en di kosan ateengen. 3Jaji i Yohanes barik lamba’ kausana kuliling di daerah Yordan manjarum. Jaji yang dajarumangen lo’a tauen, dasuro’ arung dabaptis itiang manjarumang kalena mamin maunjang pikiranna yang sala’en mainto’ dosana daamponi. 4Jaji tugasa i Yohanes dinen sikule’ bua nanna baya yang datulisangen memen kole’a panjaruma Alatalajo yang asanna baki’ Yesaya,
Andian ona’ tau nanna unyi baraana manjarum di kosan ateengen, Kamas-kamaskin pamaami dalan to’ mondoka Paraampuanka’ mainto’ salalasa. 5Di jalu aloangen arung dinen idisi’i. Ambata ukit, ambata munggu’en arung irata. Ambata dalan na’anen balolok arung ipalolok. Ambata dalan ajau’en arung irata. 6To’ maita kausa barik ambata gulungan anak mantuariin lo’a karajana Alatala yang itiang mangatio’ lo’da’,
ingka kenangjo bayana baki’ Yesaya. Yes. 40:3-5.
7Jaji bayu’ tau mondoken lo’a i Yohanes to’ dabaptis. Jaji manjarum i Yohanes lo’da’, “Daikin lalo di’en yang sarang jalu ajau’en. Tungan urarkin. Mai daikin mondokin lo’a di’en? Ai daikin, to’ suro’ baptis kalenin itiang pasutang kalenin lo’a arasina Alatala yang to’ dalao’en lo’in? Intain poang manjarumiin lo’in manyuro’ kenang?” ingka kenang i Yohanes lo’da’. Mat. 12:34; 23:33.
8“Daikin dinen, na’ankin mainya’ to’ maunjang pikirannin yang sala’en. Ti’enkin tapat-tapat to’ marantang kasala’annin, to’ mamakai panamuna Alatala, arung andian bua’ asela itiang buktina. Arung tapalin basanin,” ingka kenang. “Ada’ jarumina kalenin ikin ilalam atenin, Maam. Daikam lalo di’en kanturunanna baki’ Abraham. Kosan mai, ikin kenang, kakaru’. Kapisi kanturunan baki’ Abraham ti’kin alibak maunjang pikirannin yang sala’en. Manjarumak tapat-tapat lo’in, ti’ kapentingan kanturunanna baki’ Abraham, dari batuunpi di’en pande dari purina kole’a Alatala,” ingka kenang i Yohanes manjaruma lo’da’ dinen. Yoh. 8:33.
9“Jaji mamakai sama’ jarumak. Kapaken mamin dakamasang to’ manabang akat kayuun. Gulungan kayu yang ajau’en bua’a to’ databang, to’ datampeang di apiin,” ingka kenang lo’da’. Mat. 7:19; 19:30; 21:31-32.
10“Ti’ kenang, ai yang arung ikarajaan ikam,” ingka kenang ira tau bayu’en.
11Jaji dasauti kole’a i Yohanes, “Ti’enkin dua sapenin, sera arung indunjukang lo’a tau angkosanen,” ingka kenang. “Ti’en andian jalu ikaan ikin, arung itawa’ang sapa dua lo’a tauen,” ingka kenang manjaruma i Yohanes lo’da’.
12Tau panarima’ sukaienpi dinen andian yang mondok lo’a i Yohanes suro’ baptis kalena. Jaji matoani dinen ira lo’a, “Ai yang arung ikarajaan ikam, Pa’ Guru?” ingka kenang. Lk. 7:29.
13Jaji dasauti kole’a i Yohanes, “Jaji kenang, managi sukaien dinen, ada’ malabiang bayu’a sukaien yang maminen dajarumang lo’a tauen,” ingka kenang manjaruma i Yohanes lo’da’.
14Jaji andian bea dinen tentaraan matoani lo’a i Yohanes, “Ai yang arung ikarajaan ikam,” ingka kenang manjaruma.
Jaji dasauti kole’a i Yohanes, “Ada’kin marampasen lo’a tauen mala duita. Ada’ sampai maukum lo’a tauen nanna ukuman yang na’anen tapat. Arungkin marasa sukup nanna gajinin dinen. Ada’kin manyari yang kalabianna,” ingka kenang manjaruma i Yohanes lo’da’.
15Jaji tau bayu’enpi dinen samuana marungi. “Aiaka i Yohanes di’en lalo Kristusen yang tau dabayaangen dinen atau okan?” ingka kenang nyawana tauen. 16Jaji dasauti barik kole’a i Yohanes, “Okanak Kristus. Daiak di’en kubaptis lo’in nanna danumen. Poangsi andian ona’ tau mondoken lo’in imundiku’ di’en. Daia dinen baraa pakaina, baraa pangkata, baraa lagi’ lo’ku’. Daiakpi di’en na’anak patut mainso’i lo’a kole’a baraana dinen. Kapisi karaja pangkat yang palin akeke’en, kapisi itiang malaka’ sandala, na’anak patut mangarajaang,” ingka kenang. “Daia dinen to’ mambaptis lo’in nanna Sumangat Bareseen. To’ mambaptis lo’in sapa dua nanna apiin. 17Isama’ang lo’a musim matamen. Di tanganna dinen daawa tapanen, datapi ase kombongen. Awanga dinen datutung di apiin yang na’anen mainya’ imasami. Yang isina dinen lalo yang dakapulungangen, daapis di pamoranen,” ingka kenang i Yohanes lo’da’.
18Jaji bayu’ bea bokanen jaruma i Yohanes lo’a tau bayu’en. Dajarumi kole’a i Yohanes, dajarumang dongo maamen. 19Kenang tugasa i Yohanes dinen. Poangsi barik i Yohanes dinen dadua’ tingkam katagal marada’ina lo’a Raja Herodes. Kole’a Raja Herodes, bainyena sairun sata dinen dapo. Dala itiang bainyena. Kenang bapi bayu’ bokanen basa kajau’anna yang darada’iin kole’a i Yohanes. 20Jaji barik Raja Herodes dinen dakadani bapi kajau’anna, i Yohanes dinen daapis barik di sao ukumanen. Mat. 14:3-4; Mk. 6:17-18.
I Yesus dabaptis
Mat. 3:13-17; Mk. 1:9-11; Yoh. 1:32-34
21Jaji barik tau bokanen dabaptis, i Yesuspi dinen dabaptis. Jaji maminna barik dabaptis, bado’a i Yesus inang, tabae’ barik suanen. 22Laloang tador barik Sumangat Bareseen balu’ burung merpatiin yang manando’en lo’a. Laloang dadalinga andian unyi baraa’en yang mondok dari suanen, “Iko lalo Anak kukasaangen,” ingka kenang. “Sasau tapat nyawaku’ lo’u,” ingka kenang unyi baraa’en dinen manjaruma. Mul. 22:2; Msm. 2:7; Yes. 42:1; Mat. 3:17; Mk. 1:11; Lk. 9:35.
Tutulanna i Yesus
Mat. 1:1-17
23Jaji i Yesus mulaina tugasa, umura dinen kira-kira tiga pulo’ taun mamin. Jaji kalo’a tauen dinen, pamele tau inangen, anaka i Yusup. Tutulanna i Yusup sampai mondok lo’a arabakina kenang,
I Yusup dinen anaka baki’ Eli.
24Baki’ Eli dinen anaka baki’ Matat.
Baki’ Matat dinen anaka baki’ Lewi.
Baki’ Lewi dinen anaka baki’ Malki.
Baki’ Malki dinen anaka baki’ Yanai.
Baki’ Yanai dinen anaka baki’ Yusup.
25Baki’ Yusup dinen anaka baki’ Matica.
Baki’ Matica dinen anaka baki’ Amos.
Baki’ Amos dinen anaka baki’ Nahum.
Baki’ Nahum dinen anaka baki’ Hesli.
Baki’ Hesli dinen anaka baki’ Nagai.
26Baki’ Nagai dinen anaka baki’ Maat.
Baki’ Maat dinen anaka baki’ Matica.
Baki’ Matica dinen anaka baki’ Simei.
Baki’ Simei dinen anaka baki’ Yosek.
Baki’ Yosek dinen anaka baki’ Yoda.
27Baki’ Yoda dinen anaka baki’ Yohanan.
Baki’ Yohanan dinen anaka baki’ Resa.
Baki’ Resa dinen anaka baki’ Serubabel.
Baki’ Serubabel dinen anaka baki’ Sealtiel.
Baki’ Sealtiel dinen anaka baki’ Neri.
28Baki’ Neri dinen anaka baki’ Malki.
Baki’ Malki dinen anaka baki’ Adi.
Baki’ Adi dinen anaka baki’ Kosam.
Baki’ Kosam dinen anaka baki’ Elmadam.
Baki’ Elmadam dinen anaka baki’ Er.
29Baki’ Er dinen anaka baki’ Yesua.
Baki’ Yesua dinen anaka baki’ Eliesor.
Baki’ Eliesor dinen anaka baki’ Yorim.
Baki’ Yorim dinen anaka baki’ Matat.
Baki’ Matat dinen anaka baki’ Lewi.
30Baki’ Lewi dinen anaka baki’ Simeon.
Baki’ Simeon dinen anaka baki’ Yehuda.
Baki’ Yehuda dinen anaka baki’ Yusup.
Baki’ Yusup dinen anaka baki’ Yonam.
Baki’ Yonam dinen anaka baki’ Elyakim.
31Baki’ Elyakim dinen anaka baki’ Melea.
Baki’ Melea dinen anaka baki’ Mina.
Baki’ Mina dinen anaka baki’ Matata.
Baki’ Matata dinen anaka baki’ Natan.
Baki’ Natan dinen anaka baki’ Daud.
32Baki’ Daud dinen anaka baki’ Isai.
Baki’ Isai dinen anaka baki’ Obed.
Baki’ Obed dinen anaka baki’ Boas.
Baki’ Boas dinen anaka baki’ Salmon.
Baki’ Salmon dinen anaka baki’ Nahason.
33Baki’ Nahason dinen anaka baki’ Aminadab.
Baki’ Aminadab dinen anaka baki’ Admin.
Baki’ Admin dinen anaka baki’ Arni.
Baki’ Arni dinen anaka baki’ Hesron.
Baki’ Hesron dinen anaka baki’ Peres.
Baki’ Peres dinen anaka baki’ Yehuda.
34Baki’ Yehuda dinen anaka baki’ Yakub.
Baki’ Yakub dinen anaka baki’ Isak.
Baki’ Isak dinen anaka baki’ Abraham.
Baki’ Abraham dinen anaka baki’ Terah.
Baki’ Terah dinen anaka baki’ Nahor.
35Baki’ Nahor dinen anaka baki’ Serug.
Baki’ Serug dinen anaka baki’ Rehu.
Baki’ Rehu dinen anaka baki’ Peleg.
Baki’ Peleg dinen anaka baki’ Eber.
Baki’ Eber dinen anaka baki’ Salmon.
36Baki’ Salmon dinen anaka baki’ Kenan.
Baki’ Kenan dinen anaka baki’ Arpaksad.
Baki’ Arpaksad dinen anaka baki’ Sem.
Baki’ Sem dinen anaka baki’ Nuh.
Baki’ Nuh dinen anaka baki’ Lamek.
37Baki’ Lamek dinen anaka baki’ Metusalah.
Baki’ Metusalah dinen anaka baki’ Henok.
Baki’ Henok dinen anaka baki’ Yared.
Baki’ Yared dinen anaka baki’ Mahalaleel.
Baki’ Mahalaleel dinen anaka baki’ Kenan.
38Baki’ Kenan dinen anaka baki’ Enos.
Baki’ Enos dinen anaka baki’ Set.
Baki’ Set dinen anaka baki’ Adam.
Baki’ Adam dinen anaka Alatala.
നിലവിൽ തിരഞ്ഞെടുത്തിരിക്കുന്നു:
Lukas 3: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
