Lukas 4
4
I Yesus dakilalai
Mat. 4:1-11; Mk. 1:12-13
1Jaji i Yesus di mole’a dabaptis di sunge Yordan dinen, dauluang jaji kole’a Sumangat Bareseen. Jaji daawa barik kole’a Sumangat Bareseen lo’a kosan ateengen. 2Jaji mondok inang rabarik, ampat pulo’ aso launna dakilalaina kole’a i Pangabo. Launna dinen saja na’an angkaan. Jaji akaus ampat pulo’ asoon ampat pulo’ malam, mase’ batanga.
3Jaji barik manjarum i Pangabo lo’a i Yesus, “Ti’ko tapat-tapat Anaka Alatala,” ingka kenang, “suba gulungan batu di’en ipanyunyuangjo ipola rotiin,” ingka kenang manjaruma i Pangabo lo’a i Yesus.
4Jaji barik dasauti kole’a i Yesus, “Na’an pande. Kole’a andian mamin ilalam Jaruma Alatala yang datulisangen,
Okan roti poang yang pandeen mangatio’ lo’ka’,
ingka kenangjo di jaruma Alatala,” ingka kenang manjaruma i Yesus lo’a i Pangabo. Ul. 8:3.
5Jaji barik i Yesus daawa lo’a kosan yang balangkeen ibo. Dapayoang lo’a ambata kangkaman duniaan. Sikadang poang, mamin dapayoang samuana. 6Jaji manjarum i Pangabo lo’a, “Na di’en,” ingka, “samuana di’en daiak ampunaan, mamin dasera lo’ku’. Intain poang kukamainya’iin pande kudunjukang lo’a. 7Jaji samuana kuasa dinen, samuana kamaamanna, kudunjukang lo’u asal malingkututko dinen ijoloku’, manyembako lo’ku’,” ingka kenang manjaruma i Pangabo lo’a i Yesus.
8Jaji dabalas barik kole’a i Yesus, dasauti, “Andian ilalam Jaruma Alatala yang datulisangen,
Arungki’ manyemba lo’a Paraampuanka’ Alatala. Kosan jalu pande isemba bokan. Ia poang yang pandeen ipaduli iki’,
ingka kenangjo di Jaruma Alatala,” ingka kenang i Yesus lo’a i Pangabo. Ul. 6:13.
9Maminna dinen barik i Yesus daawa kole’a i Pangabo lo’a Yerusalem. Jaji dasuro’ akadeng di Saona Alatala, inang di tompok yang palin balangkeen ibo. Jaji barik manjarum i Pangabo mangilalaien lo’a, “Na, ti’enko tapat-tapat Anaka Alatala, suba maningkado’ko dari indi’angen lo’a tana’en. 10Kole’a andian bayana ilalam Jaruma Alatala yang datulisangen,
Daia to’ manyuro’ lo’a malaikata maruangi lo’u. 11To’ dasialoiko nanna tanganna mainto’ na’anna dampe tadua’ kakinu lo’a batuun,
Na, kenang jaruma Alatala,” ingka kenang i Pangabo lo’a i Yesus. Msm. 91:11-12.
12Jaji barik i Yesus manyauti lo’a i Pangabo, “Na’anak pande kenang. Kole’a andian bea ilalam buku’ Jaruma Alatala yang datulisangen,
Ada’ mangilalaien lo’a Paraampuanka’ Alatala,
ingka kenangjo jaruma Alatala,” ingka kenang i Yesus lo’a i Pangabo. Ul. 6:16.
I Yesus dakalibakang di banua Nasaret
Mat. 4:12-17; 13:53-58; Mk. 1:14-15; 6:1-6
13Mamin akaus dinen mangilalaina i Pangabo lo’a i Yesus, darantang unjang barik i Yesus kole’a i Pangabo, darungi bapi lele’anen itiang mangaru lo’a.
14Jaji barik i Yesus mole’ lo’a Galilea, daawa kole’a Sumangat Bareseen. Mondok lo’a dinen tadongo lo’din, tadongo lo’din asanna i Yesus kulilinga daerah dinen. 15Inang dinen daia majara lo’a tauen maira sao sambayangen. Tauenpi samuana mamudi lo’a.
16Jaji barik waktu nanga dinen i Yesus lamba’ lo’a Nasaret, kosan dakatio’a di akeke’a. Jaji awan atoranna kiraso di aso Sabaten, daia laloang intama di sao sambayangen. Jaji akadeng daia inang to’ mambasa di Jaruma Alatala yang datulisangen. 17Jaji daawa lo’a dinen buku’ panjaruma Alatala asanna baki’ Yesaya. Jaji barik dabae’ inang dasari jarum di’en,
18 Sumangata Paraampuanen andian nanku’, dinen lalo datugasku’ itiang manjarumang dongo yang maamen lo’a tau masikinen. Dasuro’ lo’ku’ lo’a tau tagurungen itiang manjarumang kalapasanen. Dasuro’ lo’ku’ lo’a tau bautaan mainto’ maitana. Dasuro’ malapasang lo’a tau daparinsa’iin. 19Dasuro’ manjarumang lo’a tauen kole’a taun di’en lalo Paraampuanen to’ mamayoang kamaamanna lo’a tauen,
ingka kenang jarum yang dabasaan dinen. Yes. 61:1-2.
20Jaji barik i Yesus dinen dakaput buku’ dinen, dapole’ lo’a suro’anen laloang aduduk bapi daia. Jaji barik samuana tauen di sao sambayangen dinen lo’a i Yesus mamelena, marung majara dari jarum dabasaan de’i. 21Jaji barik manjarum i Yesus lo’da’, “Na, jalu datulisangen ilalam Jaruma Alatala yang kubasaan de’i di talinganin, di’ bua darina,” ingka kenang lo’da’.
22Jaji samuana jarum dajarumangen dinen maam tapat dadalinga tauna. Saja tatakau mandalingana lo’a jaruma, kole’a alus jaji, mamis, maam. Jaji sijaruman tauen, “Ai dinen, okan anaka i Yusup dinen?” ingka kenang manjaruma tauen.
23Jaji manjarum barik i Yesus lo’da’, “Tentu sama’ jarum di’en to’ ijarumang ikin lo’ku’, iasanak dokter, isuro’ pamaami padisen yang sama diri’ku’en. Samuana dinen jalu laan-laanen, karajaku’ di banua Kapernaum yang tadongoon lo’a di’en, isuro’ lo’ku’ mangaraja bapi indi’angen di banuaku’, tentu kenang jarumin,” ingka kenang i Yesus lo’da’.
24“Manjarumak lo’in tapat-tapat,” ingka, “ti’en panjaruma Alatala, tapat balu’a dinen. Dakamainya’i kole’a tauen di banua bokanen. Di banua diri’a na’an dakamainya’i. Na’an kala’,” ingka kenang i Yesus lo’da’. Yoh. 4:44. 25“Manjarumak lo’in,” ingka, “di nanga tio’a panjaruma Alatala yang baki’ Eliaanjo dinen, nanga kosan sauranen talung taun satanga’ launna, nanga karaparan kausa banuaan, bayu’ bua babainye jandaan di banua Israelen. 26Na, kole’ai Alatala na’an manyuro’ lo’a baki’ Elia lamba’ lo’a urangka’? Kole’ai daia dinen dasuro’ lamba’ lo’a babainye jandaan di banua Sarpat di daerah Sidon, lo’a tau bokan?” ingka kenang. 1Raj. 17:1,8-16. 27“Kenang bea waktu nanga panjaruma Alatala yang baki’ Elisaanjo dinen, bayu’ bua tau akudungen di banua Israelen. Na, kole’ai daia na’an pamaam lo’a tau Israelen? I Namaan poang dinen urang Siria yang dapamaamen?” ingka kenang i Yesus lo’da’. “Suba pikir,” ingka kenang. 2Raj. 5:1-14.
28Jaji barik nanga dadalingana de’i kole’a tau bayu’en inang di sao sambayangen, arasi tapat ira. Alibak manaantalinga lo’a jaruma i Yesus dinen. 29Laloang akadeng ira maruru, mamuro lo’a i Yesus. Dajaput barik dinen i Yesus daawa lo’a kabang ukit yang balangkeen, kosanna banuada’ dinen. Jaji barik i Yesus dinen to’ dagoleng lo’a kabang ukiten. 30Poangsi i Yesus dinen sulupang kalena poang lo’a tau yang bayu’en dinen, laloang lamba’ dinen i Yesus, inyap.
Tau dasarung jalu ajau’en mondok di sao sambayangen
Mk. 1:21-28
31Maminna dinen i Yesus dinen lamba’ lo’a banua Kapernaum di daerah Galilea. Jaji di aso Sabaten, aso sangarianna tau Yahudiin, i Yesus majar lo’a tauen. 32Jaji ambata tau manaantalingaan tatakau lo’a pangajaranna. Maam tapat pangajaranna awan tau manjarumen atas kuasa tugasa. Mat. 7:28-29.
33Jaji andian bea inang tau dasarungen kole’a jalu ajau’en. Jaji barik manjarum tau dinen mamuko-muko, 34“Ado! Ai poang urusannu nannam, Yesus tau Nasaret? Maiko poang pamondoku, to’ manampusiko lo’am?” ingka kenang manjaruma. “Kukilalako Tau Bareseen yang mondoken dari nanna Alatala,” ingka kenang.
35Jaji darada’i barik kole’a i Yesus, “Jajiko manjarumen. Minsaluanko jalu ajau’en lo’a tau dinen!” ingka kenang. Jaji daparaba’ barik tau dinen di arona tauen kole’a jalu ajau’en dinen, minsaluan bea. Na’an barik apadis tau dinen kole’a.
36Maminna minsaluan dinen jalu ajau’en, jalu yang mangaruun, tabulanga’ tauen mamelena. “Ai poang ajaran dinen?” ingka kenang. “Balasa kuasana daia, dapata daparinta jalu ajau’en, daruru. Dalola’ani bua kole’a jalu ajau’en. Maruar bua!” ingka kenang manjaruma tauen sera lo’a seraan. 37Jaji tadongo barik asanna i Yesus kira tatak banuaan.
I Yesus pamaami bayu’ tau apadisen
Mat. 8:14-17; Mk. 1:29-34
38Jaji i Yesus marantang sao sambayangen. Mamin marantang dinen, lamba’ lo’a saona i Simon. Jaji mondok di saona i Simon, matoanna i Simonpi dinen babainyeen akangkar. Balasa jaji aduruka mantuarina. Jaji i Yesus dinen dasuro’ manggulungi lo’a. 39Jaji barik i Yesus akadeng bua inang ibiringa tau apadisen. Daunjang dinen kangkara dasuro’ anyap. Jaji anyap bua akangkara, maam. Laloang aduduk dinen matoana i Simon dinen manyorongi jalu kaan lo’da’.
40Jaji barik malam asoon, maminna masam matasoon, tauen dinen samuana ambata baranana padisa daawa kausa lo’a i Yesus. Jaji dajalaang tanganna lo’da’ sera-serana, dapamaam. 41Ambata jalu ajau’en daburoon dinen, minsaluan barik sarata mamuko-muko, “Iko lalo Anaka Alatala,” ingka kenang jalu ajau’en. Poangsi darada’i barik jalu ajau’en dinen dapase’ang manjarum. I Yesus dinen mamin dakilala kole’a jalu ajau’en dinen, datamu iana Kristus yang tau dabayaangen dinen. Ialalo dapase’anga manjarum dinen jalu ajau’en kole’a i Yesus.
I Yesus tangkat lamba’ manjarumang Kangkamanna Amana
Mk. 1:35-39
42Jaji imbara asoon barik i Yesus lamba’ lo’a kosan yang ateeng. Tauenpi dinen bagado manyariin lo’a. Rabarik dinen dadua’ang, to’ dapase’ang marantang lo’da’. 43Poangsi manjarum i Yesus lo’da’, “Okan to’ indi’ang poang angga’ku’. Ambata banua bokanen dinen arung kulamba’i bea itiang manjarumang dongo maamen kole’a to’ adarina lalo baya Alatala to’ mangkama lo’ka’ awan rajaan. Kole’a dinen lalo ratina dasuro’ku’,” ingka kenang lo’da’. 44Jaji lamba’ barik daia. Kira tatak banuaan daerah Yudea dalamba’i kausa manjarumang jaruma Alatala di sao sambayangen.
നിലവിൽ തിരഞ്ഞെടുത്തിരിക്കുന്നു:
Lukas 4: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
