Lukas 5
5
I Yesus mangalong lo’a palola’a
Mat. 4:18-22; Mk. 1:16-20
1Jaji barik andian asona i Yesus akadeng di biringa dano Genesaret. Tauenpi dinen marapit-rapit ibiringa to’ manaantalinga lo’a jaruma Alatala. 2Jaji barik dabele kole’a i Yesus, andian inang parau duaan, darantang inang kole’a tau manjalaan. Tau dinen de’i mangusuk jalana, yang sera dinen asanna i Simon. 3Jaji i Yesus mauwat di parau seraan dinen, parauna i Simon. Dasuro’ tulak babajao’ kakapit lo’a biring kabangen. Jaji inang barik dinen aduduka i Yesus majara lo’a tauen. Mat. 13:1-2; Mk. 3:9-10; 4:1.
4Maminna dinen barik, akaus pangajaranna, manjarum i Yesus lo’a i Simon, “Awajo parau di’en lo’a jalu bajalamen. Amborang inang dinen jalanu,” ingka kenang i Yesus lo’a i Simon. 5Jaji manjarum i Simon lo’a, “Pa’ Guru,” ingka, “samalam-malam mamin karajanam manyari lauken. Na’ankam mandua’ang lauk, na’ankam kule’,” ingka kenang manjaruma i Simon. “Poangsi asi poang lo’a. Pa’ Guru manyuro’ mamborang jalako,” ingka kenang manjaruma i Simon dinen. Yoh. 21:3.
6Jaji daamborang barik di jalu bajalamen malola’ani jaruma i Yesus, bayu’ tapat kule’a, tabakak. Mulai to’ atatas jalada’ dinen. Yoh. 21:6. 7Jaji dakalong barik kole’a i Simon parau yang seraan, parauna arakawanna, suro’ gulungi kalena. Sama maisi’i ilalam parauna. Manyat tapat, to’ akaram parauda’ lasana bayu’a lauken.
8Dakita awan dinen kole’a i Simon, daiapi malingkutut ungge’-ungge’ dinen ijolona i Yesus. “Babajao’ko lo’ku’ Paraampuane,” ingka, “kole’a iak di’en tau yang badosaanak,” ingka kenang. 9Kole’a i Simon dinen nanna ambata arakawanna saja tabulanga’ mamelena kole’a bayu’a kule’a lauken balu’a dinen. 10Kenang samuana ira ari Yakobus, nanna i Yohanes anaka Sebedeus dinen yang arakawanna i Simon dinen, tatakau kausana.
Jaji barik manjarum i Yesus lo’a i Simon, “Ada’ko atakuten,” ingka. “Tarangkat awandi’en daiko to’ manjala anak mantuariin rabarik,” ingka kenang i Yesus lo’a. 11Laloang barik datarik parauna kole’da’ tatunduk lo’a tana’en. Darantang unjang kausana laloang malola’ lo’a i Yesus.
I Yesus pamaam tau akudungen
Mat. 8:1-4; Mk. 1:40-45
12Jaji barik waktu nanga andianna i Yesus di banua seraan, mondok bea babakaan yang tau dadua’ kudungen. Akudung kausa mantuarina tau dinen. Jaji dakita barik i Yesus kole’a tau dinen, saja ungge’-ungge’ ijolona. Jaji barik manjarum, “O Paraampuane, kamase’i iak. Kutamuko, ikule’ iko bua mamarese lo’ku’ ati’enko mainya’ to’ mangamase’i lo’ku’,” ingka kenang tau dinen lo’a i Yesus.
13Jaji datanggeang barik tanganna i Yesus, dajalaang lo’a tau dinen de’i. “Mainya’ak,” ingka kenang. “Maamko barik, bareseko,” ingka kenang manjaruma i Yesus. Sikadang kayana rabarik anyapa kudunga tau dinen.
14I Yesuspi barik bakaras manjaruma lo’a tau dinen, “Ada’ jarumanga lo’a tauen. Lamba’ko laloang lo’a imamen. Suro’ pariksa kalenu lo’da’ mainto’ datamunu maminna maam padisu. Laloang mawako pamindara pamareseen awan yang daparintangenjo kole’a baki’ Musa, mainto’ daparasaya’inu barik kole’a tauen maminna maam padisu,” ingka kenang i Yesus lo’a tau dapamaamen kudunga. Im. 14:1-32.
15Poangsi insang kaya rabarik tadongona asanna i Yesus. Tauenpi bayu’ yang babangkulungen to’ mandalinga lo’a, to’ suro’ pamaam padisa. 16Poangsi daia dinen biasa bea kapi’ang kalena lo’a kosan ateengen laloang bado’a inang.
I Yesus barik pamaam tau tamateen mantuarina
Mat. 9:1-8; Mk. 2:1-12
17Jaji barik andian asona i Yesus patanga’an aduduka majar tauna dinen. Andian bea dinen ambata tau Parisiin, nanna toa adaten yang guru agama Yahudiin tamba lo’a dinen, yang tau dari ambata banua Galilea. Andian dari Yudea, andian dari Yerusalem yang aduduk bea indinangen. Jaji andian bea inang kuasana Paraampuanen mainto’ dapamaama padisa tauen kole’a i Yesus. 18Jaji barik andian tau mondok, mawa tau tamate mantuarina di lenga’anna. Tujuanda’ dinen to’ daawa intama lo’a saoen, to’ ipalenga’ di arona i Yesus. 19Jaji na’an dapat dainso’ang lo’a dinen kole’a bayu’a tauen, inait barik di tudung rataan dinen. Dabubusang di tudungen, daurarang di aset tau apadisen dinen di bibila’a. Jaji mondok di aset dinen di tanga-tanga’ tau bayu’en lo’a arona i Yesus.
20Mamele barik i Yesus lo’a tau dinen, datamu barik kaparasaya’anda’, jaji manjarum i Yesus lo’a tau dinen, “Dosanu mamin iamponi, anake,” ingka kenang.
21Jaji barik ambata tau Parisiin nanna toa adaten manjarum di batak nyawaan, “Intainsi lalo tau dinen pajau’-jau’en lo’a Alatala, yang pandeen kalo’a mamponi dosaan? Kosanki’ mantuariin pande mamponi lo’a dosa tauen, suma Alatala poang,” ingka kenang pikiranna nyawana.
22Jaji barik i Yesus manjarum lo’da’ kole’a datamu mamin nyawana pikiranda’ dinen, “Asi kenang maam-maama pikiranin dinen mangatoaniin ilalam atenin? Na’ankin parasaya’ lo’a kuasaku’ pande mamponi dosaan? 23-24Daiak Anak Mantuariin, andian lalo kuasaku’ indi’ang di duniaan itiang mamponi dosa tauen. Lo’ku’ kosan jalu badidit. Mamponi dosana pande, manyuro’ akadeng, manyuro’ lamba’pi pande. Na, kumeangkin tanda bukti mainto’ itamuna ikin kuasaku’ itiang mamponi dosaan,” ingka kenang. Jaji barik mamalin bapi jaruma lo’a tau tamateen mantuarina dinen, “Manjarumak lo’u. Daiko, akadengko barik. Angkat bibila’u laloang lamba’ko mole’,” ingka kenang. 25Laloang barik yang tau tamateen mantuarina dinen akadeng di bangkulungan tau bayu’en. Daangkat barik kosan lenga’a de’i, laloang lamba’ mole’. Lamba’a dinen de’i, daia mamudi-mudi lo’a Alatala. 26Gulungan tau babangkulungen yang mameleen de’i, samuana tabulanga’ mamelena. Samuana mamudi lo’a Alatala. “Saja laan-laan jalu ikitaan de’i!” ingka kenang jaruma tauen.
I Yesus mala lo’a i Lewi
Mat. 9:9-13; Mk. 2:13-17
27Jaji maminna dinen barik i Yesus lamba’, dakita tau aduduk di kantor sukaien. I Lewi asanna, tau panagi sukaien. Jaji barik, “Se’, malola’ko lo’ku’,” ingka kenang i Yesus. 28Jaji i Lewipi mainya’ bea malola’ lo’a i Yesus, akadengpi daia laloang malola’ lo’a. Darantang unjang poang ambata jaluna dinen.
29Jaji barik i Lewi dinen mamola pesta baraa’en di saona itiang lo’a i Yesus. Jaji angkaanna dinen, andian bea ambata kawanna bokanen yang tau panagi sukaien. Bayu’ ira. Andian bea bayu’ tau bokanen. 30Jaji dakita kole’a ambata tau golongan Parisiin, ambata toa adaten, amumut barik ira lo’a palola’a i Yesus. “Ai lo’in mainya’in sarilao’ angkaan mainyim, aduduk ibiringa tau panagi sukaien nanna tau badosaan?” ingka kenang jarumda’. Lk. 15:1-2.
31Jaji dabalas barik kole’a i Yesus mamakai sama’ jaruma, “Ai lo’a, intain tau yang paruluun lo’a dokteren? Okan tau parulu dokteren, tau babago’en, tau bangasen. Yang parulu lo’a dokter, dinen tau apadisen, tau ajau’en,” ingka kenang. 32“Daiak pamondokku’ di’en okanak mondok mangampitang tau maminen tapat di arona Alatala kalo’aan. Okan bea pamondokku’ lo’a tau maminen manamu ratina. Pamondokku’ di’en lo’a tau yang badosaan, lo’a tau ajau’en. Kenang pamondokku’ di’en,” ingka kenang i Yesus manyautina.
Tauen matoanang soal bapuasaan
Mat. 9:14-17; Mk. 2:18-22
33Jaji barik andian ira manjarumen lo’a i Yesus, “Ti’ palola’a i Yohanes, biasa bapuasa, biasa bado’a. Palola’a tau Parisiinpi ka’ kenanga. Asi lo’a daiko palola’u tumbas angkaan mainyum, na’an lagi’ bapuasa?” ingka kenang ira lo’a i Yesus.
34Jaji barik dasauti kole’a i Yesus, “Asi lo’a bapuasana palola’ku’? Umpamana tau iantat arainyeen, pande te’ isuro’ bapuasa pangabangen ti’ lagi’pi andian babaka dinen nanda’? Tentu na’an. 35Poangsi andian ona’ asona, to’ dala babaka sialaan dinen. Mamin ona’ talalo, mamin dala, baru’ bapuasa arakawanna,” ingka kenang i Yesus. Diria dasama’ang awan tau yang iantat arainyeen.
36Jaji dajarumang bapi lo’da’ sama’ jarum di’en, “Ai lo’a ibarokanga atoran joloon nanna atoran baruun? Umpamana kain maminen bauruk, mainya’ te’ iripakang kain baruun itampangang lo’a kain bauruken? Tentu na’an, kole’a kain babaruun na’an mainya’ sikule’ nanna kain joloon dinen. Kenang bapi arugi dinen kain babaruun,” ingka kenang i Yesus.
37“Awan dinen lalo danum angguren. Ati’en danum anggur baruun, ai lo’a idisi’anga lo’a kambut kulit yang joloon? Tentula atatas kole’a akambanga, atumbang. Arugi barik danum angguren, kenang bea kambuta,” ingka kenang manjaruma i Yesus lo’da’. 38“Yang mandua’en, danum anggur baruun arung idisi’ang lo’a kambut kulit yang babaruun,” ingka kenang. 39“Tauenpi dinen, ti’ mamin manyanyami anggur joloon, alibak barik lo’a danum anggur babaruun. Kole’a labi banyanyam anggur joloon kalo’aan,” ingka kenang sama’ manjaruma i Yesus lo’da’.
നിലവിൽ തിരഞ്ഞെടുത്തിരിക്കുന്നു:
Lukas 5: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
