Lukas 7
7
Tatakau i Yesus lo’a uluan tentaraan kole’a kuat kaparasaya’anna
Mat. 8:5-13
1Jaji maminna akaus ambata jaruma i Yesus dinen lo’a tauen, daiapi malamba’i banua Kapernaum. 2Jaji barik dinen andian tau uluan tentara Roma, yang tau mangapala’iin lo’a tentaraan saratus. Daia suro’anna dinen apadis sampai to’ mate. Dakasaang jaji dinen suro’anna. 3Jaji dadalinga barik dongona i Yesus kole’a uluan tentaraan, dasuro’ ambata toa-toa Yahudiin barik, suro’ mala lo’a itiang pamaami padisa suro’anna dinen. 4Jaji mondok barik gulungan toa-toa Yahudiin lo’a i Yesus mamita tapat ira. “Patut bea daia dinen igulungi ikamase’i. 5Kole’a daia dinen maam lo’a urangka’. Sampai dapolaang sao sambayangen untukka’ inangen,” ingka kenang ira pamiya’a lo’a i Yesus. 6Jaji barik i Yesus malola’ lo’da’ tau yang dasuro’en dinen.
Jaji barik na’an bajao’ lo’a saoen, mondok bapi kawanna tau uluan tentaraan dinen, dasuro’ manjarum lo’a, “O Paraampuane, ambakinto’ susa-susa mondoken lo’a saoku’. Na’an patut iko kusuro’ lamba’en intama lo’a saoku’,” ingka kenang. 7“Dinen lalo na’anku’ barani mondok mala lo’u. Indi’ang poangko mamarintanu pamaamen lo’a. Tentu dapat iparinta iko manyuro’ maam. 8Kole’a soal mamarintaangen mamin kutamu. Kole’a daiakpi di’en andian bea tau bakuasaan iboku’, andian bea kuasaku’ ibona gulungan tentaraku’. Ti’enak mamarinta lo’a seraan kusuro’ lo’a dinen, lo’a dinen daia. Ti’enak mamarinta bapi lo’a seraan kusuro’ lo’di’, lo’di’ bapi daia. Kenang bea lo’a gulungan suro’anku’. Ti’ kusuro’ bakaraja, bakaraja daia. Na, daikopi dinen baraa pangkatu. Tentu dapat iparinta iko manyuro’ maama padisa suro’anku’,” ingka kenang manjaruma uluan tentaraan yang dapaba’angen lo’a i Yesus.
9Jaji barik dadalinga gulungan jarum dinen kole’a i Yesus, tatakau daia. Jaji manjarum lo’a tau malola’en lo’a, “Sampai maama parasaya’a tau dinen! Manjarumak tapat-tapat lo’in, kapisi sama iki’ tau Israelen na’anak kala’ sidua’ nanna tau yang sabangonen parasaya’a,” ingka kenang manjaruma i Yesus lo’da’. 10Jaji barik yang tau dasuro’en dinen, kawanna uluan tentaraan dinen mole’ lo’a saoen. Tau yang apadisenpi dinen dakita barik, mamin maam padisa.
I Yesus matio’ tau mateen, anaka babainye jandaan
11Jaji barik na’an balaun maminna dinen lamba’ barik dinen i Yesus nanna palola’a lo’a banua Nain. Bayu’ bea bokanen tau yang malola’en lo’a. 12Jaji rabarik mainso’ lo’a mambangan pakar tagapa banuaan dinen, dabele andian tau mateen, anaka tau babainye baluun, to’ daantat lo’a kuburen. Anaka dinen babaka, jangka’a dinen anaka seraan. Bayu’ bea tau yang tambaan dinen to’ mantat lo’a kuburen. 13Jaji dabele awan dinen kole’a Paraampuanen, talola’ bea atena. Jaji manjarum barik lo’a babainye baluun dinen, “Ada’ anangisen,” ingka kenang manjaruma i Yesus lo’a babainye baluun.
14Jaji maminna dinen, dainso’i bea lungunna. Jaji barik dajalaang tanganna inang di lungunen laloang manaat dinen tau manyanen. Jaji manjarum i Yesus, “Manjarumak lo’u, adudukko, anake,” ingka kenang. 15Jaji barik aduduk tau mateen dinen laloang manjarum. Jaji daunjukang barik lo’a induna kole’a i Yesus.
16Jaji tatakau jaji samuana tauen. Mamudi ira dinen lo’a Alatala, “Andian barik mondok lo’ka’ tau baraa’en, mondok panjaruma Alatala,” ingka kenang. “Mamin mondok Alatala lo’ka’, to’ manggulungi lo’ka’ anak katio’anna,” ingka kenang manjaruma tauen. 17Tababar barik dongona i Yesus lo’a daerah Yudea nanna ambata banuaan sibiring-biringanen nanda’ dinen.
Mondok pasuro’a i Yohanes Pambaptis
Mat. 11:2-19
18Jaji barik andian dinen palola’a i Yohanes Pambaptis mawa jarum, manutul lo’a i Yohanes ambata karajana i Yesus. 19Jaji dasuro’ mondok palola’a duaan kole’a i Yohanes, dasuro’ malamba’i lo’a Paraampuanen itiang mangatoani, “Ai lo’a, iko lalo tau dabayaangen kole’a Alatala? Ataupun andianpiaka tau bokanen iarungiin iki’?” ingka kenang jaruma dasuro’angen lo’a palola’a i Yohanes.
20Jaji suro’anna i Yohanes lamba’ lo’a i Yesus. Jaji mondok lo’a dinen, jaruma i Yohanes dinen dajarumang kole’a palola’ yang dasuro’en dinen, “Daikam di’en pamondokam, dasuro’kam kole’a i Yohanes Pambaptis itiang mangatoani lo’u, Ai lo’a, iko lalo tau dabayaangen kole’a Alatala dinen? Ataupun andianpiaka tau bokanen iarungiin iki’?” ingka kenang jaruma pasuro’a i Yohanes lo’a i Yesus.
21Jaji nanga dinen bua bayu’ tau yang dapamaamiin kole’a i Yesus, ambata tau asakiin, ambata tau apadisen, tau dasarung jalu ajau’en, tau bautaan. 22Jaji barik i Yesus manyauti lo’da’ palola’a i Yohanes dinen, “Mole’ poangkin lo’a i Yohanes, tutulankin lo’a ambata jalu maminen ikita ikin, ambata jalu maminen idalinga ikin. Yang tau bautaan pande mamele. Yang tau araiten pande lamba’. Yang tau akudungen pande barese. Yang tau babongen pande mandalinga. Yang tau mateen pande tio’ balik. Dongo Maamen kujarumang bea lo’a tau masikinen, awan bua bayana baki’ Yesayajo ijoloon manjarumangen tau dabayaangen,” ingka kenang manjaruma i Yesus lo’da’. Yes. 35:5-6; 61:1. 23“Bauntung tau yang na’anen akaru kaparasaya’anna mamikirang lo’ku’,” ingka kenang. “Jarumang poang lo’a i Yohanes di sao ukumanen,” ingka kenang jaruma i Yesus manyautina lo’da’.
24Jaji barik mole’ dinen palola’a i Yohanes, i Yesus barik manjarum lo’a tau bayu’en yang babangkulungen inang de’i, “Ai memen isariin ikin to’ manontonnin lo’a i Yohanes Pambaptis di kosan ateengen? Iasanang tau maunda akaru, balu’ rimputen dapuput anginen lo’din-lo’din? Okan,” ingka kenang. 25“Jalu ai isariin ikin lo’a dinen? Iasanang ikin tau arayu’? Daia okan tau maamen tio’a. Ti’ tau maamen tio’a, tau arayu’en na’an lalako’ di kosan ateengen. Lalako’ di sao rajaan,” ingka kenang. 26“Jalu ai isariin ikin? Panjaruma Alatala? Na, baru’ tapat. Panjaruma Alatala lalo. Sabenara baraa lagi’ lo’a. 27Kole’a i Yohanes, ia lalo suro’an yang dabayaangen di Jaruma Alatala yang datulisangen,
“Belejo di’en suro’anku’,
“ingka kenang Alatala.
“Kusuro’ lamba’ ijolonu itiang mangamasang dalannu,
“ingka kenangjo ilalam Jaruma Alatala. Mal. 3:1. 28Jaji manjarumak tapat-tapat lo’in. Sampai awandi’en kosan tau iparanakangen yang labi lo’a i Yohanes di’en,” ingka kenang. “Poangsi kapisi baraa i Yohanes, ikin di’en yang padariin panduduk kangkaman Surga, baraa bapikin lo’a i Yohanes. Kapikin yang palin akeke’en ilalam kangkamanna, baraakin lo’a,” ingka kenang manjaruma i Yesus lo’da’.
29Jaji gulungan tau mandalingaan dinen nanna ambata panagi sukaien, maminna dadalinga jaruma i Yesus, samuana mangaku’ barik lo’a dalanna Alatala, daasan tapat kole’da’. Ratina mainya’a manarima’ pangajaranna dinen, kole’a ateda’ dinen mamin bakamas waktu nanga dabaptisda’ kole’a i Yohanes Pambaptis. 30Poangsi ambata tau Parisiin nanna toa adaten mangalibakang lo’a dalan yang jalu datujuangen kole’a Alatala itiang lo’da’. Kole’a ira dinen na’anna memen dabaptis kole’a i Yohanes. Mat. 21:32; Lk. 3:12.
31“Ai lo’a yang maamen itiang sama’ jarum lo’a tau tio’en di tatakka’ di’en?” ingka kenang i Yesus lo’da’. 32“Kapi balu’ ai basanam, tetapkam ikalibakang ikin,” ingka kenang. “Awan lalo basa nangkanaken aduduk di pasaren siawa main,
“Manaba’ sulingkam, ingka, alibakkin tamba mandaria’. Mamata’ang nangiskam, alibakkin bapi tamba anangis,
“ingka kenang nangkanaken sera lo’a seraan.
33“Na, awan dinen bapi daikin karajanin, basa nangkanaken. Kosan jalu ikamainya’iin. Kole’a pamondoka i Yohanes Pambaptis dinen yang na’anen angkaan roti, na’an mainyum anggur, ipasala’ ikin. Iasan ikin tau dasarung jalu ajau’en. 34Daiakpi di’en Anak Mantuariin yang angkaan mainyumen, ipasala’ bapi. Iasanak bapi yang tau kalonganen, tau painyum, tau sikawanen nanna panagi sukaien, nanna ambata tau badosaan,” ingka kenang. 35“Poangsi tau asanen kalena datamu pasitimbangang jalu maamen nanna jalu ajau’en arung andian buktina, arung andian saksina. Ti’ tapat datamu, tentu basana lalo yang padariin buktina. Inang mangilalana,” ingka kenang i Yesus manjaruma lo’da’.
I Yesus angkaan di saona tau Parisiin
36Jaji barik andian dinen tau Parisiin, i Simon asanna, mangalong angkaan lo’a i Yesus. Jaji barik i Yesus dinen lamba’ bea lo’a saona i Simon dinen angkaan inang. 37Jaji barik di banua dinen de’i andian babainye yang tau tio’ badosaan. Jaji datamu barik kole’a babainye dinen andian i Yesus di saona i Simon tau Parisiin dinen, daia laloang mondok lo’a dinen mawa sabotol yang dapolaan dari batu pualam, yang apano’en nanna inyak maamen bauna. 38Jaji barik akadeng ibalakanga i Yesus di kakina anangis. Dabasa’i kakina i Yesus nanna danum matana laloang dasonoti nanna buka, dasum. Laloang daolongang inyak dinen lo’a kakina i Yesus. Mat. 26:7; Mk. 14:3; Yoh. 12:3.
39Jaji barik dakita kole’a tau Parisiin, manjarum di batak nyawana, “Tau dinen ti’ tapat-tapat panjaruma Alatala, tentu dakilala bua babainye dinen. Tentu datamu balu’ai basana yang tau manjaputen lo’a kakina. Kole’a babainye dinen terang tau badosaan,” ingka kenang nyawana tau Parisiin.
40Jaji manjarum i Yesus lo’a i Simon, “Simon, andian jalu to’ kujarumang lo’u,” ingka kenang.
Jaji barik manjarum dinen i Simon, dasauti, “Jarumang poang Pa’ Guru,” ingka kenang manyautina dinen lo’a i Yesus.
41Jaji barik manjarum i Yesus lo’a, “Jaji manutulak lo’u,” ingka. “Andian mantuari dua yang utanganen lo’a tau karaja painjamang duiten. Yang seraan dinen mainjam duit lima ratus dinar. Yang seraan dinen mainjam lima’ pulo’ dinar. 42Jaji samuana ira duaan kosan pamayara, jaji daapus poang utangda’ dinen kole’a tau pinjamang duit dinen de’i,” ingka kenang i Yesus. “Jaji mangatoaniak lo’u, inde ira duaan yang baraa’en barik mangasaanga lo’a tau pinjamang duit dinen?” ingka kenang i Yesus lo’a i Simon.
43Jaji barik dasauti dinen jaruma i Yesus kole’a i Simon, “Yang palin mangasaangen, tau yang baraa’en utanga, mo’i,” ingka kenang dinen manjaruma i Simon lo’a i Yesus.
Jaji barik dasauti bapi kole’a i Yesus, “Mandua’ manyautinu dinen,” ingka kenang i Yesus.
44Jaji i Yesus dinen koengang kalena mamele lo’a babainye dinen sarata manjarum lo’a i Simon, “Ikita iko babainye di’en?” ingka kenang. “Daiak mondokku’ lo’u, na’anak ikamasang iko pamuti’ kakiku’. Poangsi babainye di’en dakusuk kakiku’ nanna danum matana, dasonot nanna buka. 45Mondokku’ lo’a saonu, na’anak isum manyialoinu lo’ku’. Poangsi daia dinen dari mondokku’ lo’a di’en, na’an sangari manyuma lo’a kakiku’. 46Na’an idinyaki iko uluku’, poangsi daia mainyaki kakiku’,” ingka kenang i Yesus. 47“Jaji manjarumak lo’u, daia dinen dosana yang bayu’en mamin daamponi. Inang itamuna bayu’a, kole’a baraana pangasaanga dinen. Yang tau kakapiten dosana yang daamponiin, kakapit bea balasa nanna pangasaangen,” ingka kenang i Yesus lo’a i Simon.
48Jaji barik manjarum i Yesus lo’a babainye dinen de’i, “Ambata dosanu mamin iamponi,” ingka kenang manjaruma i Yesus lo’a babainye dinen.
49Jaji barik ambata pangabang bokanen dinen sijaruman sera lo’a seraan, “Intainsi lalo dinen sampai mamponi dosa tau,” ingka kenang sijarumanda’.
50Jaji manjarum bapi i Yesus lo’a babainyeen, “Maam. Kaparasaya’annu lalo dinen manyuro’ tio’en lo’u. Mole’ko poang nanna ate maamen nyawanu,” ingka kenang i Yesus lo’a babainye dinen.
നിലവിൽ തിരഞ്ഞെടുത്തിരിക്കുന്നു:
Lukas 7: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
