Lukas 8
8
Ambata babainyeen manggulungi lo’a i Yesus
1Jaji barik i Yesus dinen lamba’ kulilingen. Lo’a banua dinen lo’a banua dinen lamba’a manjarumang dongo maamen kole’a to’ adarina lalo baya Alatala to’ mangkama lo’ka’ awan rajaan. Tamba bea dinen palola’a yang dua belasen dinen. 2Jaji waktu nanga dinen andian bea ira babainyeen yang tambaan nanna, tau yang maminen dapamaam padisa. Andian yang dasarung jaluun, nanna ambata pamadis bokanen yang dapamaamen. Jaji yang tambaan dinen ialalo i Maria Magdalena. I Mariajo dinen andian tuju jalu ajau’en yang daruruun. 3Andian bea i Yohana bainyena i Kusa. I Kusa dinen tau yang maurusi saona Raja Herodes. Mamin dinen i Susana, nanna bayu’ bokanen bea. Jaji ambata babainyeen dinen manggulungi lo’a gulunganna i Yesus, daongkosi palamba’anda’ dinen nanna duit diri’a. Mat. 27:55-56; Mk. 15:40-41; Lk. 23:49.
Tau mamborang banyia’en dala sama’ jarum
Mat. 13:1-9; Mk. 4:1-9
4Jaji nyangka’ tauen yang babangkulungen lo’a i Yesus, dari banua dinen, dari banua dinen. Jaji i Yesus manjarum lo’da’ mawa sama’ jarum di’en. 5“Andian,” ingka, “tau mamborang banyia’en. Nanga daamboranga, sapa dua dinen alao’ bea di biring dalanen, laloang dalat-lat kole’a tauen. Jaji mondok burungen, akaus dakaan,” ingka kenang. 6“Andian bapi banyia’ yang alao’en di tana’ batuanen. Poangsi manaram barik tio’, na’an balaun, akalas bua kole’a ator tana’en dinen,” ingka kenang manjaruma. 7“Andian bapi banyia’ dinen alao’ di gulungan akat jalu arapati’en. Jaji tio’ rimputen dinen, jalu arapati’en, tarapit dinen banyia’en, kareketan barik,” ingka kenang. 8“Poangsi andian bapi banyia’ dinen yang alao’en lo’a tana’ maamen, lo’a tana’ bainyaken. Dinen lalo yang ambua’ atambor bayu’ yang sampai saratus kali lipat yang jalu datanamen dinen,” ingka kenang i Yesus manjaruma lo’da’.
Jaji mamin akaus sama’ jaruma i Yesus dinen, manjarum bapi, “Intain yang andianen loang talingana arung mananami nyawaan jalu idalingaan,” ingka kenang lo’da’.
Tujuanna ambata sama’ jarumen
Mat. 13:10-17; Mk. 4:10-12
9Jaji barik gulungan palola’a dinen matoanang lo’a i Yesus ratina sama’ jaruma dinen. 10“Jaji barik kenang,” ingka i Yesus manyautina, “Yang ikin panduduk kangkamanna Alatala iparuarangkin manamu ratina yang jalu ilamunen dinen, yang tau bokanen nampi. Ialalo ipolana barik sama’ jarum bayu’ balu’a dinen, kole’a tau okanen kangkamanna Alatala, mainto’ adarina baya datulisangen ilalam Jaruma Alatala di’en,
Maita matada’, poangsi na’an bea dakilala jalu dakitaan. Mandalinga talingada’ poangsi na’anpi datamu ratina jalu dadalingaan,
ingka kenangjo ilalam Jaruma Alatala,” ingka kenang i Yesus lo’da’. Yes. 6:9-10.
I Yesus manjarumang ratina sama’ jarum lo’a tau mamborang banyia’en
Mat. 13:18-23; Mk. 4:13-20
11“Jaji kenang ratina,” ingka kenang i Yesus. “Banyia’en dinen ialalo jaruma Alatala. 12Yang di biring dalanen, dinen lalo yang tau mandalingaan lo’a jaruma Alatala. Laloang banyia’ Jaruma Alatala yang daamborangen lo’a atena dinen terus dala kole’a i Pangabo, mainto’ na’anna parasaya’, mainto’ na’anna dakatio’. 13Yang di tana’ batuanen, dinen lalo tau yang mandalingaan yang laloang manarima’ jaruma Alatala nanna sasauna nyawana. Daia dinen bataan sikadang poang kole’a kosan urata maam-maam. Mondok barik jalu mangilalaien lo’a, maunda sorota. 14Jaji banyia’ yang alao’en di gulungan akat jalu arapati’en, dinen lalo tau yang mandalingaan. Poangsi rabarik bayu’ kalangganganen di atena kole’a katio’anna di duniaan. Bayu’ bua kainginanna lo’a kakaya’an duniaan nanna ambata jalu bokanen. Jaji tarapit dinen jaruma Alatala di atena. Ialalo kosanna mole’a. 15Poangsi yang daamborangen di tana’ maamen, dinen lalo tau manaantalingaan yang tau maamen atena. Atena dinen mainya’ malola’ani. Datamu bea panat jalu susaan. Laloang barasel jalu daamborangen di atena, ambua’ nanna yang maamen,” ingka kenang i Yesus lo’da’.
Palita na’an patut itongopi nanna basikomen
Mk. 4:21-25
16Jaji i Yesus manjarum bapi lo’da’, “Palita yang ikatio’en dinen, tentu na’an itongopi nanna basikomen. Tentu na’an itaro’ inyaunga ranjangen. Palita yang ikatio’en tentu ipaduduk di dudukanna. Tentu itiang parawangi tau mondoken ilalam saoen. Mat. 5:15; Lk. 11:33. 17Jalu kujarumangen, samuana arung datamu tau ona’. Kole’a ati’en andian jalu kalindunganen, pasti to’ dapayoang bua ona’. Ati’en jalu ilamunen, pasti dinen to’ datamu tau. Mat. 10:26; Lk. 12:2. 18Jaji maam-maam taanna talingannin. Kole’a lo’ka’ yang andianen panamu mamin, ti’ ipaguna, to’ datambai bapi. Poangsi lo’a tau angkosanen panamuna, panamu yang andianen kalo’a, dinenpi dala di ateda’, anyap, ona’,” ingka kenang manjaruma i Yesus lo’da’. Mat. 25:29; Lk. 19:26.
Intain induna nanna arina i Yesus?
Mat. 12:46-50; Mk. 3:31-35
19Jaji barik mondok induna, mondok arina lo’a i Yesus. Poangsi na’an dakule’ mainso’i lo’a kole’a bayu’a tauen. 20Jaji andian tau manjarumang lo’a, “O Pa’ Guru, mondok arinu, mondok indunu akadeng insaluanna saoen, manyari lo’u,” ingka kenang.
21Jaji barik manyauti i Yesus lo’da’ dinen, “Yang tau manaantalingaan lo’a jaruma Alatala, yang malola’aniin, dinen lalo ariku’, dinen lalo indu’ku’,” ingka kenang.
Sariuten dasuro’ tadang kole’a i Yesus
Mat. 8:23-27; Mk. 4:35-41
22Jaji barik andian aso bokanen, i Yesus mauwat di parauen nanna palola’a. Jaji manjarum lo’a palola’a, “Se’, tarangkatki’. Tarearki’ lo’a danoon,” ingka kenang manjaruma lo’a palola’a. Jaji barik ira dinen mauwat di parauen tarangkat. 23Jaji mamarau ira inang, i Yesuspi dinen tindo’. Jaji mondok bea sariuten, mondok bea galombangen manyeoki parauda’ sampai to’ apano’, to’ akaram. Jaji ilalam bahayaan ira dinen.
24Jaji mondok ira palola’a lo’a i Yesus manjarum, “Guru! O Pa’ Guru! Asadingko! Mateki’ di’i!” ingka kenang lo’a i Yesus manyadinga.
Jaji barik i Yesus asading laloang manjarum marada’i lo’a sariuten, marada’i lo’a galombangen. Rabarik dinen sariutenpi tadang. Danumenpi bauling barik. 25Jaji barik manjarum lo’a palola’a, “Ai, na’an jajikin parasaya’?” ingka kenang i Yesus.
Gulungan palola’api dinen tatakau, atakut. Jaji sikatoanan, “Intainsi lalo tau dinen kenang maam-maama dapadulina kole’a sariuten? Dapadulina kole’a danumen?” ingka kenang sera lo’a seraan.
I Yesus maruru jalu ajau’en dari tau Gerasa
Mat. 8:28-34; Mk. 5:1-20
26Mondok barik i Yesus nanna palola’a mamarau lo’a banua Gerasa yang isulina dano Galilea dinen. 27Jaji i Yesus dinen to’ mauwat di tana’en, andian tau banua dinen pasidua’ang kalena nanna i Yesus yang tau dasarung jalu ajau’en. Tau dinen balaun mamin na’an arakain, tulendang lapoang. Na’an barik lalako’ di saoen tau dinen, lalako’ inang di gulungan kuburen. 28Jaji tau dinen de’i mangita lo’a i Yesus, laloang malingkutut di arona i Yesus mamuko, “O Yesus, Anaka Alatala yang tau Palin Baraa’en, ai poang urusannu lo’ku’? Kupita jaji lo’u, ada’ parinsa’en lo’ku’!” ingka kenang. 29Ratina kenanga manjaruma, kole’a i Yesus de’i, mamin manyuro’ minsaluan lo’a jalu ajau’en dinen. Kole’a tau dinenjo arapat mamin dasarunga kole’a jalu ajau’en dinen. Kapisi daingkat kakina nanna tanganna nanna rantaien, kapisi dajagai, biasa daantakang akatu poang rantaina dinen. Maminna dakatu rantaina, biasa diri’a daawa kole’a jalu ajau’en dinen lo’a kosan ateengen.
30Jaji mandalinga unyina tau mamukoon dinen de’i mangatoani barik i Yesus lo’a, “Intain asannu?” ingka kenang lo’a.
“I Ribuan asanku’,” ingka kenang manyautina. Kole’a bayu’ jalu ajau’en manyarungen lo’a. 31Jaji mamita balik-balik jalu ajau’en dinen lo’a i Yesus, alibak dasuro’ lo’a loang palin bajalamen dinen, kosanna ambata pasuro’a i Pangabo.
32Jaji andian bea sakawan bawi bayu’ yang manyari kaan inang di sabala’a ukiten, bawi piara. Jaji dapita jaji kole’a jalu ajau’en dinen mainto’ daparuaranga manyarung poang lo’a ambata bawiin dinen. Jaji daparuarang bua kole’a i Yesus. 33Jaji minsaluan barik lo’a tau dinen, lo’a bawiin manyarunga, bawipi dinen tapiar-piar barik rarina lo’a kabangen. Laloang poang tagoleng, akaus mate alamas di danoon.
34Jaji barik tau maruangi bawiin dinen mangita awan dinen laloang arari ira mawa jarum lo’a din, lo’a din di banuaan, kenang bea kulilinga, lo’a jalu yang adariin dinen. 35Tau di banuaan mandalinga jarum dinen, jaji mondok pambar barik lo’a dinen to’ mamele jalu yang adariin dinen. Jaji mondok lo’a i Yesus, dakita barik tau dasarung jaluun de’i aduduk di biringa i Yesus. Mamin maam baundinga, arakain arasape jajalu maam. Jaji atakut tauen mamelena. 36Jaji datutul barik lo’a tau baru mondoken dinen kole’a tau yang maminen maita de’i lo’a tau dasarung jaluun, dapamaamina. 37Maminna barik datutul, ambata tau daerah Gerasa dinen mamita tapat manyuro’ mamalin lo’a i Yesus, manyuro’ marantang daerahda’ dinen. Kole’a samuana saja balasa jaji takuta. Jaji barik i Yesus dinen mauwat di parauen, tarangkat.
38Jaji tau dasarungen yang maminen barik tapasut de’i dari kuasa jalu manyarungen, daia mamita tapat lo’a i Yesus to’ tamba nanna. Poangsi i Yesus dinen manyuro’ lamba’ lo’a, “Na’an. Na’anko pande tamba nanku’. 39Daiko di’en, mole’ko poang mawa jarum lo’a jalu dapolaan kole’a Alatala lo’u,” ingka kenang. Tau dasarungenjo dinen, daia laloang tarangkat lamba’ barik manutul lo’din, manutul lo’din di banuaan lo’a jalu dapolaan kole’a i Yesus lo’a.
Anaka i Yairus nanna babainyeen yang manjaput kainna i Yesus dapamaam
Mat. 9:18-26; Mk. 5:21-43
40Jaji mole’ barik i Yesus tarear, bayu’ tauen babangkulung ibiringa manyialo lo’a, kole’a samuana dinen mamin marung inang lo’a. 41Jaji barik mondok tau panguluan sao sambayang Yahudiin dinen, i Yairus asanna. Jaji malingkutut ijolona i Yesus mamita tapat lo’a, to’ mawa lo’a saona. 42Kole’a andian anaka babainyeen yang to’ mate. Anaka dinen jangka’ dinen seseraan, kira-kira dua belas taun mamin umura.
Jaji barik patanga’an lamba’a i Yesus lo’a dinen, bayu’ tapat tau malola’en lo’a, yang marapit-rapiten ibiringa. 43Jaji andian bea babainye yang apadisen. Padisa dinen dua belas taun launna kamamase’a na’an tadang-tadang. Adara’ lapoang. Kosan tau dapaten manggulungi lo’a. 44Jaji mainso’i barik babainye dinen dari balakanga, dajaput rombo kainna. Jaji sikadang kayana rabarik tadanga adara’a.
45Jaji barik i Yesus manjarum, “Intain manjaputen lo’ku’?” ingka kenang.
Jaji samuana manasal, kosan tau mangaku’. Laloang manjarum i Petrus, “Asi lo’a yang bayu’en tau marapit-rapiten mangulilingi lo’u, Guru’e!” ingka kenang i Petrus lo’a i Yesus.
46“Na’an,” ingka kenang i Yesus. “Andian tau manjaputen lo’ku’, kole’a tarasa lo’ku’ andianna kuasa maruaren lo’ku’,” ingka kenang i Yesus manyautiin.
47Jaji babainye dinen, datamu diri’a mamin datamu tau, mondok barik daia paraba’ kalena di kakina i Yesus. Atakut, kikirik tolanga.#8:47 Imamat 15:19-30 Babainye nanna sakina awan dinen daanggap kotor (najis). Na’an pande daia manjaput lo’a tau bokanen kole’a tau bokan ti’ dajaput talola’ kotor. Ati’en na’an daaku’ di arona tau inang, ungka’en badidit tauen manarima’ lo’a barik awan tau maminen maam sakina. Jaji dajarumang. Datutul kausa barik di arona tau bayu’en. Dajarumang ratina dajaputa kainna i Yesus. Datutul kole’a sikadang kayana maama de’i. 48Jaji manjarum i Yesus lo’a, “Maam anake. Maminko maam kole’a kaparasaya’annu,” ingka kenang. “Lamba’ko poang nanna ate maamen nyawanu,” ingka kenang barik i Yesus lo’a.
49Nampi akaus manjaruma i Yesus dinen, mondok tauen dari saona i Yairus tau panguluanen dinen de’i. “Anaku mamin mate. To’ lai lagi’pi mangaruun lo’a Guruka’,” ingka kenang. To’ alibak barik mawa lo’a i Yesus.
50Jaji dadalinga barik jaruma dinen kole’a i Yesus, manjarum barik daia lo’a i Yairus, “Ada’ko kalangganganen. Ada’ko atakuten. Parasaya’ko poang, ka’ bea maama,” ingka kenang i Yesus lo’a i Yairus.
51Jaji mondok lo’a saona i Yairus dinen, na’an daparuarang tauen malola’ lo’a. Ari Petrus, i Yohanes nanna i Yakobus, dinen poang daparuarang intama, nanna indu-amana nangkanak dinen. 52Ambata gulungan tau inangen madan-mau manangisi tau mateen. Marang poang nangisa lo’a nangkanak dinen. Jaji manjarum i Yesus lo’da’, “Ada’kin anangisen. Kosan jalu mate tau dinen, tindo’a poang dini,” ingka kenang lo’da’. 53Jaji ira dinen mananawai poang lo’a, na’an parasaya’. Kole’a datamu lo’a nangkanak dinen mamin mangatu nyawana. 54Poangsi i Yesus daia datangko’ barik tanganna nangkanak dinen sarata manjarum lo’a, “Anake, akadengko,” ingka kenang. 55Jaji mole’ dinen sumangata nangkanak dinen lo’a. Laloang poang akadeng nangkanak dinen. I Yesuspi barik manyuro’ lo’da’ pangkaan lo’a nangkanak dinen. 56Tatakau jaji dinen tamatoana. Poangsi i Yesus daia paba’i lo’da’, dapase’ang manjarumang lo’a tauen jalu adariin dinen.
നിലവിൽ തിരഞ്ഞെടുത്തിരിക്കുന്നു:
Lukas 8: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997
