Markus 12
12
Tau manyewa kobon angguren dala sama’ jarum
Mat. 21:33-46; Lk. 20:9-17
1Jaji barik i Yesus manjarum lo’da’ nanna sama’ jarumen, “Andian tau mananam kobon angguren. Jaji kobon angguren dinen dapakar. Dapolaang bak datiang palatan bua’ angguren pala danuma, dapola tampara’en itiang paruangi kobon,” ingka kenang i Yesus lo’da’ nanna sama’ jaruma. “Jaji barik kobon anggur dinen dasewaang lo’a tauen. Mamin dinen tarangkat daia tau ampuna kobonen dinen lamba’. 2Ada’a barik asona, dasuro’ suro’anna lo’a dinen managi pambagian dari mole’a kobon anggur dinen. 3Jaji barik mondok lo’a dinen, lo’a tau manyewaan dinen kobon angguren, datiang, dasuro’ lamba’ kosan jalu daawa mole’ tau dasuro’en dinen. 4Andian bapi sera, dasuro’ bapi lo’a dinen. Daia dinen aluka di uluna, dapawa’-awa’ani. 5Mamin dinen dasuro’ bapi tau to’ managi lo’da’. Jaji rabarik dinen dauno’ kole’da’ tau manyewaan dinen. Bayu’ bea bokanen dasuro’en lo’a dinen. Sapa dua datiang, sapa dua dauno’.
6“Kapanjanganna rabarik, andianpi sera, anaka yang dakasaang. Jaji dasuro’ bapi lo’a dinen. Pasti dapaduli anakku’ ingka kenang nyawana.
7“Poangsi mondok rabarik lo’a dinen anaka dinen dakita kole’da’, sijaruman tau manyewaan dinen, Na, di’ anaka daarapen lalo di’i, yang dasuro’en. Barik ona’ dinen iana lalo ampunaan. Se’ iduno’ iki’, mainto’ kobonna di’en idua’ang barik iki’, ingka kenang sijarumanna sera lo’a seraan. 8Rabarik anaka dinen laloang dauno’. Datampeang bangkayoanna dinen insaluanna kobonen dinen,” ingka kenang i Yesus manutula lo’da’.
9“Jaji ai lo’a barik tau ampunaan kobon dinen?” ingka kenang i Yesus lo’da’. “Tentu dalamba’i kobon dinen, dauno’ tau manyewaan dinen. Tentu dasuro’ang bapi kobon dinen lo’a tau bokanen rabarik,” ingka kenang i Yesus lo’da’.#12:9 Ilalam sama’ jarum di’en Tau ampuna kobon angguren dinen – Alatala. Kobon angguren – dunia di’en nanna ambata mantuarina. Tau yang dasuro’ manuntuanina kobon dinen – Urang Israel, kanturunanna baki’ Abraham. Suro’anna yang dasuro’ mala bagianna paraampuanna dinen – ambata panjaruma Alatalajo. Anaka yang daarapen – Yesus Kristus. Maminna Alatala maukum tau Israelen dasurangi barik nanna tau bokanen – ialalo iki’, yang mainya’en parasaya’ lo’a i Yesus Kristus (kapi kanturunanna baki’ Abraham kapi okan kanturunanna Abraham). 10“Na, kenang lalo ti’en jalu dakamainya’iin kole’a Alatala ikalibakang iki’. Asi dinen jalu datulisangen di’en ilalam Jaruma Alatala manyama’angen lo’a tau dabayaangen, na’an kala’ ibasa ikin? Jaji kenang jalu datulisangen dinen,
“Andian batu yang na’anen dapaguna kole’a tau pamola sao, daunjang. Batu dinenpi barik yang padari batu palin pentingen di pambangunanen. 11Dinen lalo karajana Alatala yang maamen jaji kalo’ka’,
ingka kenangjo ilalam Jaruma Alatala,” ingka kenang i Yesus lo’da’. Msm. 118:22-23.
12Jaji barik, sama’ jarum dinen datamu kole’a ira toa adaten, kole’da’ imam baraa’en dinen manyama’ang lo’da’ awan tau mangalibakangen lo’a pasuro’a tau ampuna kobonen dinen. Jaji to’ maningkam barik lo’a i Yesus, poangsi na’an adari kole’a atakut ira daanu kole’a tau bayu’en. Jaji irapi dinen marantang unjang lo’a i Yesus, inyap.
Tauen mangatoanang lo’a bayaran sukaien
Mat. 22:15-22; Lk. 20:20-26
13Maminna dinen, dasuro’ tauen lo’a i Yesus. Andian tau golongan Parisiin, andian golongan Raja Herodes maimpa’ to’ manyuro’ sala’ lo’a i Yesus ilalam jaruma. 14Jaji manjarum ira majo’-ajo’ lo’a i Yesus, “Pa’ Guru,” ingka, “daiko di’en tau tapatko. Na’anko atakut lo’a tauen, mamin itamu ikam. Na’anko manampi’ lo’a tau sera labi lo’a seraan. Sama ratako manjarumang dalanna Alatala yang jalu tapaten lo’a tauen. Jaji ai lo’a di adatka’? Daikam di mamayar sukainam, 15pande te’ lo’a Raja Kaisar, na’an te’?” ingka kenang matoanina lo’a i Yesus to’ manyari sala’a.
Poangsi datamu ateda’ kole’a i Yesus, mamis baba’da’ poangsi ateda’ ajau’. Jaji manjarum lo’da’, “Maisi daikin mangilalainin lo’ku’? Subakin mawa lo’ku’ sapapak duiten, to’ kubele,” ingka kenang i Yesus lo’da’. 16Jaji daawa barik lo’a Yesus. “Na, gambara intain di’? Capa intain di’en,” ingka kenang i Yesus lo’da’.
“Capa Kaisar Raja Roma,” ingka kenang ira lo’a.
17“Jaji kenang kausa jaluun. Jalu maminen itamu Kaisar ampunaan, lo’a Kaisar bea mameangin. Jalu maminen itamu Alatala ampunaan, lo’a Alatala bea mameangin,” ingka kenang i Yesus lo’da’. Ira dinenpi barik tatakau mamikira lo’a jaruma i Yesus.
Tauen mangatoanang lo’a tio’ balika tauen
Mat. 22:23-33; Lk. 20:27-40
18Maminna dinen andian tau mondok lo’a i Yesus, dari golongan tau Sadukiin. Jaji kaparasaya’anda’ tau Sadukiin, kosan kalo’a tau tio’ baliken yang maminen mate. Ti’ mamin mate, mamin akaus poang inang kalo’a. Jaji andian jalu to’ dakatoanang lo’a i Yesus, PalPa. 23:8. 19“Pa’ Guru,” ingka, “andian datulisangen kole’a baki’ Musajo ijoloon, dasuro’ lo’ka’ ti’ tau babakaan mate, darantang bainyena poangsi kosan anaka, arung sairunna dinen sialaan barik nanna bainyena dinen itiang patio’ puri itiang lo’a sairunna,” ingka kenang ira lo’a i Yesus. Ul. 25:5-6. 20“Jaji manutulkam lo’u. Andian tau tuju pariin. Yang atoaan dinen arainye. Maminna barik arainye, mate barik babaka dinen angkosan anaka. 21Yang kaduaan dinen, arina dinen barik arainye lo’a babainye dinen, kosan bapi anaka. Jaji mate bapi. Yang kataluun ka’ kenanga. 22Jaji kenang kausana, arainye kausa lo’a dinen laloang mate. Angkosan anaka kausana. Imundina rabarik, mate bea babainye dinen. 23Jaji ati’en kenang, ai lo’a di asona tauen tio’ balika, intain ampuna babainye dinen, yang ampuna tapaten? Kole’a samuana tuju pariin di’en arainye kausa lo’a babainye dinen,” ingka kenang mangilalaina lo’a i Yesus dala panaloan kole’a kosan tau tio’ baliken kalo’aan. “Na, asi lo’a adarina?” ingka kenang.
24Jaji barik dasauti kole’a i Yesus, “Daikin sala’ tapat. Tentu kole’a na’an itamu ikin jalu datulisangen ilalam Jaruma Alatala, na’an bea itamu ikin kuasana Alatala,” ingka kenang. 25“Kole’a tauen maminna tio’ balik na’an lagi’ siala arainye. Tio’a barik awan lalo gulungan malaikaten di Surga,” ingka kenang lo’da’. 26“Poangsi lo’a soal tio’ balika tauen, ai daikin, na’ankin kala’ mambasa jalu datulisangen kole’a baki’ Musa inang di tutulan akat jalu arapati’en yang atutungen? Kole’a andian inang jaruma Alatala lo’a baki’ Musa,
Iak lalo di’en Alatalana arabaki’. Lo’ku’ manyembana baki’ Abraham, baki’ Isak, nanna baki’ Yakub,
ingka kenang. Pal. 3:6. 27Na, arabaki’ka’ daasan inang manyemba lo’a Alatala. Ratina tio’pi bua, kapisi daia mamin talalo. Kole’a okan dinen tau mateen yang dapaten manyemba lo’a Alatala. Tau tio’en lalo yang manyembaan lo’a Alatala. Daikin di’en sala’ tapat,” ingka kenang i Yesus manyautina lo’da’.
Inde Ukuma Alatala yang baraa’en gunana?
Mat. 22:34-40; Lk. 10:25-28
28Jaji andian bea mondok sera toa adaten yang mandalingaan lo’da’ sipaduun. Jaji datamuna sautina i Yesus dinen maam manyautina lo’da’ tau Sadukiin, daiapi malao’i inang mangatoani lo’a, “Jaji di antarana ambata Ukuma Alatala yang dapamondokang malaloi baki’ Musa, ukum inde yang labi penting?” ingka kenang lo’a i Yesus.
29“Jaji kenang,” ingka i Yesus. “Ukuma yang palin penting ia di’en,
Daikin tau Israelen, taantalinganin. Paraampuan Alatalaka’ dinen kosan bayu’. Jangka’a sera Alatalaka’. 30Arung sajangka’-jangka’a ateka’ mangasaangen lo’a Paraampuan Alatalaka’. Arung sajangka’-jangka’a nyawaka’, sajangka’-jangka’a pikiranka’, sajangka’-jangka’a kajungka’ mangasaangen. Ul. 6:4-5.
31Jaji andian bapi Ukuma seraan yang baraa’en, ialalo,
Balu’ai mangasaangka’ lo’a diri’ka’, arung awan dinen bea mangasaangka’ lo’a tauen,
ingka kenang. Im. 19:17-18. Kosan labina lo’a din duaan antarana Ukuma Alatala,” ingka kenang i Yesus dinen manyautina lo’a toa adaten dinen.
32Jaji barik, “Tapat bua Pa’ Guru. Saja mandua’ jarumu dinen. Kole’a Alatalaka’ dinen sera, kosan labi lo’a. Ul. 4:35. 33Kenang bapi ati’en sajangka’-jangka’ ateka’ mangasaangen lo’a, ati’en sajangka’-jangka’ pikiranka’, sajangka’-jangka’ kajungka’, sarata ati’enki’ mangasaang lo’a tauen saimbang nanna diri’ka’ bua, dinen labi lo’a ambata gulungan pamindaraan, lo’a pamindara itutungen,” ingka kenang jaruma toa adaten dinen lo’a i Yesus. Hos. 6:6.
34Jaji datamu barik i Yesus maama manyautina dinen toa adaten, manjarum barik daia lo’a toa adaten dinen, “Daiko dinen, na’anko bajao’ lo’a kangkamanna Alatala,” ingka kenang. Jaji maminna dinen rabarik, kosan tau barani barik mangatoanang jalu lo’a i Yesus.
I Yesus mangatoanang kanturunanna baki’ Daud
Mat. 22:41-46; Lk. 20:41-44
35Jaji barik i Yesus majar di saona Alatala, manjarum lo’da’, “Ai lo’a pangajaranna gulungan toa adaten dinen, yang daasanen lo’a Kristus yang tau dabayaangen dinen ona’ anak kanturunanna Raja Daud? 36Kole’a baki’ Daud nanga dalalako’inajo, dauluang kole’a Sumangat Bareseen daia manjarumang tau dabayaangen dinen. Nanga dinen, daia diri’a masan,
Paraampuanen manjarum lo’a Paraampuanku’, Adudukko indi’angen di biring katoku’ sampai akaus atalona gulungan lawannu kole’ku’,
ingka bua jaruma baki’ Daud ilalam Jaruma Alatala yang datulisangen. Msm. 110:1. 37Na, pande te’ iasan anak kanturunanna ti’ mamin diri’a mangaku’ Paraampuan lo’a? Poangsi daia pangkata dinen, labi baraa pan dari pada kanturunan awan biasaan,” ingka kenang i Yesus lo’da’.
Jaji gulungan tau bayu’en kakadaka tapat mandalinga lo’a pangajaranna i Yesus.
Dapase’angki’ malola’ani sontona toa adaten
Mat. 23:1-36; Lk. 11:37-54; 20:45-47
38Jaji ilalam majara i Yesus inang, daia manjarum lo’da’, “Maam-maamkin. Ada’ ilola’anina basana gulungan toa adaten yang paraa-raa’en kalena, yang mainya’en to’ arayu’ nanna kain langkeen, mainya’ dapaduli kole’a tauen di pasaren. 39Ada’ ilola’anina basada’ yang pakokoloanen to’ aduduk di kosan tau baraa’en pakaina di gulungan sao sambayangen, di gulungan rami-rami tauen. Lk. 11:43. 40Ibalakang daira dinen makal-akal itiang mala saona gulungan bainye baluun. Rabarik di arona tauen balangke-langke bado’ana mainto’ kalo’a dalamunna kajau’anna. Daira dinen labi baraa ona’ ukumda’,” ingka kenang i Yesus lo’da’.
Duit sembaan dameang kole’a bainye baluun
Lk. 21:1-4
41Jaji barik i Yesus aduduk tumbalian nanna kosan panaro’en duiten di saona Alatala, mamele lo’a tau bayu’en manaro’ duiten inang. Jaji barik bayu’ dinen tau manaro’ duiten yang tau maamen, yang tau bayu’en jaluna. Bayu’ duita dataro’ inang. 42Jaji barik mondok bainye baluun, tau masikinen yang manaro’ duit inang dua papaka yang palin akeke’en.
43Jaji barik i Yesus dinen manyuro’ kombong lo’a palola’a. “Manjarumak tapat-tapat lo’in. Tau bainye baluun dinen, ia yang palin bayu’en dataro’en. Daia pameanga dinen labi lo’da’ bokanen yang manaro’ duiten inang. 44Kole’a yang bokanen dinen manaro’ duit kole’a bayu’a. Poangsi dinen bainye baluun saja jangka’a katio’anna,” ingka kenang i Yesus manjaruma lo’a palola’a.
നിലവിൽ തിരഞ്ഞെടുത്തിരിക്കുന്നു:
Markus 12: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997