Markus 13
13
I Yesus manjarumang to’ arurunna Saona Alatala
Mat. 24:1-2; Lk. 21:5-6
1Jaji lamba’ barik i Yesus minsaluan lo’a saona Alatala, manjarum palola’a seraan lo’a, “Belejo Pa’ Guru, bangonasi batuun di’en. Bangonasi gulungan sao di’en!” ingka kenang lo’a i Yesus.
2Jaji barik manjarum i Yesus, “O’. Mamelekin. Indi’angen ona’ kosan batu sitataranen ibona seraan. Itampeang kausa ona’ ararak,” ingka kenang i Yesus lo’a palola’a.
I Yesus manjarumang ambata parinsa’en yang mulakataan
Mat. 24:3-14; Lk. 21:7-19
3Jaji i Yesus barik aduduk di ukit Saitun isulina saona Alatala. Jaji di kakaleda’a, ari Petrus, i Yakobus, i Yohanes nanna i Andreas matoani lo’a, 4“Suba jarumang lo’am, nanga inde adarina gulungan jalu yang ijarumangen iko dinen de’i? Ai tandana ona’ ti’ mamin mainso’ to’ adariin?” ingka kenang lo’a i Yesus.
5Jaji manjarum i Yesus, “Jaji kenang. Maam-maamkin mainto’ kosan tau mawa alingoon lo’in. 6Kole’a bayu’ ona’ to’ mondok mala asanku’. Iak lalo tau dabayaangen, ingka bua ona’. Bayu’ ona’ daawa alingoon kole’da’. 7Andian ona’ dongo tau suno’en, sapa dua mainso’, sapa dua bajao’, ada’kin atakuten. Arung adari lalo, poangsi nampi mondok lo’a katuntunganna,” ingka kenang i Yesus lo’da’. 8“Kole’a arung banua siuno’anen nanna banua bokanen. Arung kangkaman siuno’an nanna kangkaman bokanen. To’ tatagar tana’en kole’a gempa bumiin lo’din-lo’din. Kenang bea ona’ karaparanen di duniaan. Poangsi di’en mulakata poang lo’a parinsa’en awan lalo apadisa batanga babainyeen yang to’ aranaken,” ingka kenang i Yesus lo’da’.
9“Poangsi daikin maam-maam kole’a ona’kin datingkam, daawa idurusi di arona ambata paurus Yahudiin. Datiangkin ona’ di ambata sao sambayangen. Daawakin ona’ di arona ambata gubernur, di arona ambata rajaan kole’a jarum iawana ikin atas asanku’. Ratina kenanga, datiang panyaksi dinen lo’ku’. 10Dongo Maamen dinen arung ijarumang ijolo lo’a tauen kira tatak banuaan nampina katuntunganna. 11Jaji daawakin ona’ idurusi, jarumin dinen, ada’kin kalangganganen. Ai poang yang andianen ilalam pikirannin, yang mainso’en di baba’in, din poang ijarumangen. Kole’a okan lagi’ jarumin, jaruma Sumangat Bareseen,” ingka kenang i Yesus lo’da’. Mat. 10:17-20; Lk. 12:11-12.
12“Andian ona’ sairunen to’ maduang lo’a sairunna mainto’ iduno’a. Andian ona’ amana maduang lo’a anaka. Gulungan nangkanakenpi ona’ andian bea dinen to’ malawan lo’a tamatoana, daduang mainto’ iduno’a. 13Daikin to’ dakalibakang taukin kole’a asanku’. Poangsi intainkin ona’ yang ikule’en panaat sampai mondok lo’a katuntunganna, dinen ona’ dakatio’en,” ingka kenang i Yesus lo’da’. Mat. 10:22.
Banua Yerusalem to’ darampas
Mat. 24:15-28; Lk. 21:20-24
14Jaji tau mambasa buku’ di’en arung manamu tapat ratina jaruma i Yesus di’en, kole’a andian jaruma, “Ikita ona’ jalu na’anen patut adariin,” ingka, “ikita ona’ jalu yang ajau’en jaji dapakadeng di kosan yang na’anen patut, arung tau di propinsi Yudea arari babariar lo’a gulungan ukiten mainto’ na’anna darambit kole’a jalu ajau’en. Dan. 9:27; 11:31; 12:11. 15Tau di tingkat ibona saoen ada’ tadora intama lo’a saoen itiang mala jaluna. Arung arari poang. 16Tau di umaan, ada’ mole’ balika lo’a saona itiang mala ampurona. Arari poang. Lk. 17:31. 17Ona’ dinen, mase’ tapat tau yang panusu’en lo’a anaka, tau arauntingen. Lo’a tau biasaan mamin marinsa’, ai lagi’ ona’ tau manuntuani anakaan. 18Bado’akin mainto’ na’ankin dari arari di musim dinginen. 19Kole’a nanga dinen ona’ marinsa’ tapat tauen awan nampiin kala’ adariin di duniaan, tarangkat dari malakata Alatala mamola duniaan, mondok awandi’en, mondok bea ona’. Dan. 12:1; JD. 7:14. 20Samuana dinen jalu ajau’en yang to’ adariin, ati’en na’an mangamase’i Paraampuanen, kosan tau tio’. Ati’en na’an dapopondoki musim dinen kole’a to’ mangamase’ina lo’a tau yang daile’iin, tau dakamainya’iin, kosan lagi’ tau tio’. 21Inang lalo ona’ maam-maamkin yang jalu to’ makalen yang to’ mawa alingo. Belejo, dinen lalo Kristus, ingka ona’ tauen. Ataupun, Belejo dinen lalo Iaan, ingka kenang panganunga, ada’kin parasaya’en. 22Pasti ona’ to’ andian kristusen, andian panjarumen yang okanen tapat. To’ dapayoang ona’ tanda panyunyuana bua to’ datiang mawa alingo lo’a tauen. Kamainya’anda’ dinen, gulungan tau daile’iinpi to’ daawa alingo ati’en dakule’,” ingka kenang i Yesus lo’da’.
23“Poangsi daikin, jagai kalenin, kole’a mamin kujarumang kausana lo’in memen nampina adariin,” ingka kenang i Yesus lo’da’. “Mamin itamu ikin,” ingka kenang.
Balu’ ai ona’ pamondoka Anak Mantuariin?
Mat. 24:29-31; Lk. 21:25-28
24“Maminna dinen, maminna gulungan parinsa’en dinen,
Matasoon to’ araun, bulanenpi na’an to’ manyalang. Yes. 13:10; Yeh. 32:7; Yl. 2:10,31; 3:15; JD. 6:12.
25 Gulungan bintangen, to’ alao’ dari suanen, gulungan kuasa suanen to’ akaru, Yes. 34:14; Yl. 2:10; JD. 6:13.
ingka kenang Jaruma Alatala yang datulisangenjo dinen. 26Nanga dinen barik to’ dakitaak kole’a tauen, to’ mondokak di’en Anak Mantuariin di domen nanna kuasaku’, nanna kamaamanku’ yang palin arawangen. 27Gulungan malaikaten to’ kusuro’ mangapulungang lo’a tau yang maminen daile’i dari maira tatak banuaan inyaunga galung suanen,” ingka kenang manjaruma i Yesus lo’da’. Dan. 7:13; JD. 1:7.
Tanda to’ mondoka musim sisiaken dasama’ang lo’a tanda to’ mondoka i Yesus kaduang kaliin
Mat. 24:32-35; Lk. 21:29-33
28“Balajarkin dari soal akat araan. Jaji di musim dinginen, akat araanpi dinen kosan daunna. Poangsi mainso’ to’ musim sisiak, gulungan daanna dinen padari alowe’, laloang aradaun barik. Jaji mamin ikita awan dinen, itamu barik iki’. Tandana lalo kole’a mamin mainso’ musim sisiaken. 29Jaji gulungan jalu to’ adariin di’en, ka’ kenanga. Ikita ona’ adarina jaluun dinen, tandana lalo. Itamu barik mamin ada’a bayana pamondokku’. Mamin mainso’ to’ adariin. Mainso’a dinen sama’a, awan lalo jalu mamin mondok di baba’ mambanganen. 30Kujarumang lo’in tapat-tapat, nampina akaus adariin jalu kujarumangen dinen, nampi bua talalo tau tio’en di tataka tau maitaan dinen. 31Suanen di’en ona’ to’ talalo inyap. Duniaanpi ka’ kenanga. Poangsi gulungan jarumku’ di’en na’an mainya’ inyap. Tetap adari kausana,” ingka kenang i Yesus lo’da’.
Kosan tau manamu asona adarina
Mat. 24:36-44
32“Asona adarina jalu kujarumangen dinen, kosan tau manamu. Malaikatenpi di Surga na’an manamu. Daiak di’en, Anaka Alatala na’an bea kutamu. Suma poang yang manamuun, Amaku’ yang manamuun to’ adarina. Mat. 24:36. 33Jaji daikin jaga ikin, kole’a na’an itamu ikin bayana. 34Jalu dinen awan lalo tau to’ anyap lamba’. To’ tarangkat dinen, dameang tugas lo’a gulungan suro’anna yang darantangen dinen. Gulungan ambata suro’anna dameang karajana sera-serana. Jaji tau maruangi mambanganen dasuro’ jagai maam-maam mainto’ datamuna mole’a paraampuanna. Mat. 25:14; Lk. 12:36-38. 35Daikinpi ka’ kenanga. Jagai ikin kole’a na’an itamu ikin bayana to’ mole’a toa saoen. Na’an itamu makapen. Na’an itamu lalo tanga’ malam atau malam-malam. 36Ada’ sampai sadinga poang mondoka patanga’an tindo’in. 37Jarumku’ di’en yang kujarumangen lo’in, kujarumi kausanin. Bajagakin kausanin,” ingka kenang i Yesus lo’da’.
നിലവിൽ തിരഞ്ഞെടുത്തിരിക്കുന്നു:
Markus 13: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997