Markus 14
14
Tauen pasipakatang to’ mauno’ lo’a i Yesus
Mat. 26:1-5; Lk. 22:1-2; Yoh. 11:45-53
1Jaji waktu nanga dinen duang aso poangpi to’ maramianga Palaloien, rami angkaanen roti yang na’anen araragi. Jaji gulungan imam baraa’en, gulungan toa adaten sipakat, pasipakatang manyari akal to’ mauno’ lo’a i Yesus. To’ manyuro’ sala’ lo’a i Yesus mainto’ andian kasala’anna yang pandeen idukum mate. Pal. 12:1-27. 2“Na’anki’ pande,” ingka kenang, “manu lo’a di aso rami-ramiin, di tau babangkulungen. Ona’ manyuro’ aru,” ingka kenang jarumda’, kole’a atakut ira lo’a tau bayu’en.
I Yesus dainyaki di Betania
Mat. 26:6-13; Yoh. 12:1-8
3Jaji i Yesus angkaan di Betania di saona i Simon dinen, tau akudungenjo. Jaji angkaan inang rabarik, andian babainye sera mondok mawa sabotol isi’a inyak yang maamen bauna. Jaji botola dinen batu pualam. Inyakapi jalu baragaan tapat, inyak narwastu yang saja barese. Jaji dapoloi botola inyak narwastuun dinen, jaji barik dainyakang lo’a i Yesus, daolongang di uluna. Lk. 7:37-38.
4Mamin dinen, gulungan tau angkaanen inang, dabele awan dinen, ajau’ nyawana. Jaji manjarum, “Ai ratina daparugina inyak dinen? Suba de’i ipet. 5Kule’ labi tiga ratus dinar dini. Suba de’i daunjukang ragana lo’a tau masikinen, baru’ mandua’,” ingka kenang jarumda’ pasala’en lo’a babainye dinen.
6Jaji barik manjarum i Yesus, “Bele koronga. Ai ratina mangarunin lo’a, mamase’angin? Basana dinen palin maam lo’ku’,” ingka kenang lo’da’. 7“Kole’a gulungan tau masikinen, andian lapoang. Aso inde poang kamainya’annin pande igulungi ikin. Poangsi daiak diri’ku’ okanak salaun-launna lalako’ku’ nannin,” ingka kenang lo’da’. Ul. 15:11. 8“Akaus atena mangasaanga lo’ku’. Daia dinen dainyakina mantuariku’, itiang mangamasang ikuburku’ ona’ di mateku’. 9Kujarumang tapat-tapat lo’in, disa ona’ dajarumanga Dongo Maamen maira tatak banuaan inyaunga galung suanen, to’ dajarumang bea basana babainye dinen. Daparandamang babainye dinen,” ingka kenang i Yesus manyautina lo’da’ yang ira arasiin lo’a babainye dinen.
I Yudas sipakat nanna imamen to’ maduang lo’a i Yesus mainto’ dakule’a datingkam
Mat. 26:14-16; Lk. 22:3-6
10Maminna dinen i Yudas Iskariot dinen, yang di dua belasen, daia lamba’ to’ maduang lo’a i Yesus lo’a ambata imam baraa’en mainto’ dakule’a datingkam. 11Jaji dadalinga barik kole’da’ dinen imam baraa’en, sasau tapat nyawada’, kole’a i Yudas to’ manggulungi lo’da’. Malola’ani bayada’, to’ danoang duit lo’a i Yudas dinen. Jaji i Yudaspi dinen manyari akal mainto’ dakule’a datingkam dinen i Yesus.
I Yesus angkaan Rami Palaloien nanna palola’a
Mat. 26:17-30; Lk. 22:7-23; Yoh. 13:21-30; 1Kor. 11:23-25
12Jaji di ramina roti na’anen araragi, aso mulakataan, di nanga tauen mauno’ anak dombaan itiang maramiang Palaloien, manjarum barik gulungan palola’a lo’a, “Disa ona’ kadakuun kosannam mangamasang lo’u itiang angkaan rami Palaloien?” ingka kenang palola’a lo’a.
13Jaji dasuro’ palola’a, “Daikin duaan,” ingka, “ona’ intamakin lo’a banuaan, andian sidua’en nannin babaka lamba’en yang manyan jawi nanna isi’ danumen. Malola’ poangkin. 14Jaji barik intama ona’ lo’a saoen, katoanang lo’a toa saoen inang, Manjarum Guruka’, disa kosan tamoeen, kosanku’ angkaan rami Palaloien nanna palola’ku’? ikin ona’ lo’a. 15Maminna barik manjarumin dinen, to’ dapayoang lo’in kamar iboen yang baraa’en, yang maminen dakamasang. Inangkin mangamasangen jalu kaanka’,” ingka kenang i Yesus lo’da’.
16Jaji barik ira dinen intama lo’a banuaan, awan dinen tapat, awan daasanen kole’a i Yesus lo’da’. Jaji dakamasang jalu kaanen to’ maramiang aso Palaloien.
17Jaji mondok pamamalamen barik, mondok i Yesus nanna palola’a. 18Jaji ira dinen babangkulung inang angkaanen rabarik, “Jaji manjarumak tapat-tapat,” ingka kenang i Yesus lo’da’. “Diantaraka’ pakawanen di’en andiankin sera yang to’ maduangen lo’ku’ mainto’ dakule’ku’ datingkam kole’a musuku’,” ingka kenang. “Tau angkaanen nanka’ bua,” ingka. Msm. 41:10.
19Dadalinga jaruma dinen, ira dinenpi susa ateda’. Jaji mulai mangatoani sera-serana, “Iakaka?” ingka kenang lo’a i Yesus.
20Jaji manyauti barik i Yesus lo’da’, manjarum, “Andian di antaraka’ dua belasen. Na, tau din yang sarata manyalapangen rotiin di mangkoken nanku’, dinen lalo iaan,” ingka kenang i Yesus lo’da’. 21“Daiak di’en Anak Mantuariin tentu talalo ona’ mate awan lalo ambata bayana datulisangen ilalam Jaruma Alatala. Poangsi mase’ tapat tau yang maduangen lo’ku’ mainto’ dakule’ku’ datingkam kole’a musuku’. Labi maam na’an memen daparanakang,” ingka kenang lo’da’.
22Jaji angkaan ira inang barik i Yesus mala dinen rotiin dado’aang. Mamin dinen dabala’-bala’, dameang lo’a palola’a. “Na di’en,” ingka, “roti di’en mantuariku’. Angkaankin,” ingka kenang lo’da’. 23Mamin dinen dala sawan dinen. Jaji dado’aang, laloang dapanyorongang lo’da’. Mamin dapanyorongang, samuana mainyum dari sawan dinen. 24Jaji manjarum bapi lo’da’, “Na di’ angguren di’en,” ingka, “ialalo dara’ku’ yang manyautiin lo’a dosana tau bayu’en, yang manatap bayaan,” ingka kenang i Yesus lo’da’. Pal. 24:8; Yer. 31:31-34. 25“Manjarumak tapat-tapat lo’in, asel bua angguren na’anku’ lalo mainyum lagi’. Mainyum na’an mainyum tabalikku’,” ingka, “mainyum danum anggur baruun di kangkamanna Alatala,” ingka kenang i Yesus lo’da’.
26Mamin dinen laloang banyanyi dinen nyanyian Masmur. Mamin banyanyi dinen tarangkat barik lo’a ukit Saitun.
I Yesus manjarumang memen kole’a i Petrus ona’ to’ manasal
Ul. 33:9-11; Mat. 26:31-35; Lk. 22:31-34; Yoh. 13:36-38
27Jaji barik i Yesus manjarum lo’da’, “Daikin di’en to’ bibitak kausin ona’,” ingka kenang i Yesus lo’da’. “Kole’a andian bayana memen yang datulisangen ilalam Jaruma Alatala yang manjarumangen mateku’,
Panguluan dombaan to’ kuduno’. Laloang gulungan ambata dombaan to’ tambor-ambor,
ingka kenangjo ilalam Jaruma Alatala. Sak. 13:7. 28Poangsi daiak di’en, maminak tio’ balik, to’ lamba’ak tajolo lo’in lo’a Galilea,” ingka kenang i Yesus lo’da’. Mat. 28:16.
29Jaji barik manjarum dinen i Petrus, “Kapisi bibitak kausa ira bokanen, daiak na’anak,” ingka kenang i Petrus.
30“Na’an. Manjarumak tapat-tapat lo’u, malam di’en bua nampina manunturunguk manuken duang kali, maminko manasal lo’ku’ talung kali,” ingka kenang i Yesus lo’a i Petrus.
31Poangsi i Petrus dinen insang kaya manjaruma, “Kapisi sarata nannu mateku’ na’anak manasal,” ingka kenang i Petrus lo’a. Kenang kausa ira manjarumen.
I Yesus bado’a di Getsemani
Mat. 26:36-46; Lk. 22:39-46
32I Yesus nanna palola’a lamba’ lo’a kosan asan yang Getsemani. Jaji mondok barik inang, i Yesus manjarum lo’a palola’a, “Indi’angkin aduduken,” ingka. “Marungkin indi’ang. To’ lo’a dinenakpi bado’a,” ingka kenang. 33Jaji yang daawaan barik, suma poang ari Petrus, i Yakobus nanna i Yohanes. Laloang atena dinen mulai to’ susa, to’ atakut. 34Jaji manjarum lo’da’, “Daiak di’en nyawaku’, laan parasaku’ di’en, awan jalu to’ mateenak,” ingka kenang. “Indi’angkin poang maruangiin,” ingka kenang lo’da’ taluun.
35Jaji lamba’, na’an bajao’ lamba’a, dasunsumang kalena lo’a tana’en bado’a. Jaji ilalam do’ana dinen mamita lo’a Alatala mainto’ dakapi’anga parinsa’en to’ mondoken dinen, mainto’ na’anen mondok lo’a, na’an adari. 36“Ama’e, Ama’ku’, bado’aak. Ti’ dapat ikapi’ang yang jalu ajau’en to’ adariin lo’ku’ mainto’ na’anna mondok lo’ku’, ikapi’ang,” ingka kenang. “Samuana pande kausa poang adariin lo’u. Poangsi daiko poang panamunu yang ipakaien. Daiak na’an ipakai,” ingka kenang i Yesus ilalam do’ana.
37Mamin dinen rabarik i Yesus mole’ lo’da’ taluun, tindo’ ira. Jaji manjarum lo’a i Petrus, “O Simon, asi tindo’u? Na’an ikule’ iko maruangi sajam poang launna? 38Arungko manyagai, arung bado’a mainto’ na’annu akaru ona’ manyuro’ alao’ lo’a dosaan. Tapat mainya’ nyawaka’ to’ malola’ani panamu maamen. Poangsi alowe’ dinen panamu diri’ka’. Badidit malola’ani jalu maamen. Ialalo arung bayokka’ bado’aan,” ingka kenang lo’a.
39Jaji tabalik bapi kaduang kalina. Awan din bua bado’ana. 40Mamin dinen mole’ bua lo’da’. Tindo’ bapi ira, kole’a alolo’ tapat matada’. Jaji na’an lagi’ datamu ira manyauti.
41Jaji katalung kalina mole’ bapi lo’da’, “Tindo’kinpi, sangarian ai? Jaji tindo’en, asadingkin. Di’ to’ mondok bayana. Iak di’en Anak Mantuariin, daduangak lo’a tanganda’ tau bokanen,” ingka kenang. 42“Asadingkin, se’. Tarangkatki’. Mondok lalo tau to’ maduangen lo’ku’ mainto’ dakule’ku’ datingkam kole’a musuku’,” ingka kenang i Yesus lo’da’.
I Yesus datingkam
Mat. 26:47-56; Lk. 22:47-53; Yoh. 18:1-12
43Jaji barik mansangapi manjaruma i Yesus, mondok lalo i Yudas yang di dua belasen dinen. Andian bea tau tambaan nanna i Yudas dinen ambata tau babangkulungen yang dasuro’en kole’a gulungan imam baraa’en, gulungan toa adaten, gulungan toa-toaan. Andian yang mawa basiin, andian yang mawa balantanen. 44Jaji i Yudas de’i dameang tanda lo’da’, “Intain ona’ kusumen, dinen yang iaan. Tingkam ikin. Awa ikin maam-maam,” ingka kenang lo’da’. 45Jaji mondok lo’a dinen, mainso’i Yudas, “Pa’ Guru,” ingka kenang, laloang dasum. 46Laloang mondok ira tau dasuro’en laloang manangko’ lo’a i Yesus, datingkam. 47To maningkam dinen, andian bea tau ibiringaan, manarik basina dinen, dasapa’ talingana pangkama imam baraa’en. Akatu talingana.
48Jaji manjarum barik i Yesus lo’da’, “Asi to’ mawa basinin, mawa ambata balantannin? Iasanangak to’ ikin parampas? 49Padahal mairaso majarku’, sidua’ku’ nannin di sao sambayangen. Nanga dinen ti’ to’ itingkamak ikin, suba na’an ikule’ak itingkam ikin,” ingka kenang i Yesus lo’da’. “Poangsi maam. Arung ipadari gulungan baya yang datulisangen ilalam Jaruma Alatala,” ingka kenang. Lk. 19:47; 21:37. 50Maminna dinen, gulungan palola’a dinen samuana marantang unjang lo’a, arari.
51Jaji barik andian babaka seraan, anak baru yang malola’en lo’a i Yesus. Daia dinen mamakai ampuro kain lenan, dalilitang di mantuarina. Jaji barik ira dinen to’ maningkam lo’a, mamin datangko’, 52dararak poang dinen kainna, arantang di tanganda’. Tulendang poang rarina.
I Yesus daawa mamutusi
Mat. 26:57-68; Lk. 22:54-55,63-71; Yoh. 18:13-14,19-24
53Maminna dinen, i Yesus daawa lo’a imam baraa’en. Jaji akombong inang samuana Paurusen, ambata imam baraa’en, ambata toa-toaan, ambata toa adaten. 54Jaji barik i Petrus malola’ lo’a i Yesus dari bajao’en sampai mondok jaji ilalam pakara imam baraa’en. Mondok ilalam pakara, aduduk inang mamindu nanna tau panyagaien inang.
55Jaji barik dasari saksi kole’a ambata imam baraa’en, kole’a samuana Paurusen, yang tau manyaksiin lo’a kasala’anna i Yesus mainto’ idukum mate. Isari saksi lo’a dinen, na’an dadua’ang. 56Kole’a andianpi tau manyaksiin, tau panganungen, na’an sikule’ jarumda’ manyaksiin. 57Andian tau akadeng panganunga manyaksiin, 58“Andian idalinga ikam jaruma i Yesus ingka, Saona Alatala di’en, yang dapolaan kole’a anak mantuariin to’ darurun. Laloang dalam talung asoon, ingka to’ dapola bapi yang na’anen dapola anak mantuariin,” ingka kenang tau pauluun dinen maduanga lo’a i Yesus. Yoh. 2:19. 59Kapisi poang kenang manjaruma dinen tau pauluun, na’an lapoangpi sikule’ jarumda’.
60Mamin dinen, akadeng dinen imam baraa’en itanga’-tanga’ tau bayu’en matoani lo’a i Yesus, “Ai lo’a saksina ira di’en maduanga lo’u? Kosan daiko sautinu?” ingka kenang.
61Poangsi na’an kakaji’ i Yesus. Jaji barik dinen, “Ai daiko? Daiko lalo Kristus, Anaka Alatala yang ipudiin?” ingka kenang.
62Jaji barik dasauti kole’a i Yesus, “Iak lalo. Ka’ bea ona’ ikitaku’ ikin. Iak Anak Mantuariin ikitaan aduduk di biring katona Tau Bakuasaan,” ingka kenang. “Andian bua ona’ ikitaku’ ikin mondok di domen,” ingka kenang i Yesus manjaruma lo’da’. Dan. 7:13.
63Maminna dinen barik, imam baraa’en dinen, daripak sape diri’a dinen lasana ajau’a nyawana mandalingana jaruma i Yesus dinen de’i. Im. 21:10. “Ai lagi’ isaksiin iki’ balik-balik pasikatoanang iki’? 64Itamu lalo iki’ mamin idalinga pajau’-jau’a lo’a Alatala,” ingka. “Ai kaputusanka’?” ingka kenang.
Jaji barik samuana sama kaputusanda’, dalao’i ukum mateen. Im. 24:16. 65Jaji mulai barik, sapa dua dinen malasui lo’a. Dakaputi lindo’a laloang dababal sarata manjarum, “Suba asan kira-kira, intain mabalen lo’u?” ingka kenang. Gulungan panyagaienpi dinen laloang mawa lo’a, laloang datampar.
I Petrus manasal lo’a i Yesus
Mat. 26:69-75; Lk. 22:56-62; Yoh. 18:15-18,25-27
66Jaji waktu nanga dinen i Petruspi andian inyaung di pakar saoen mamindu di apiin nanna gulungan panyagaien. Jaji barik andian suro’anna imam baraa’en, babainyeen yang mondok. 67Dakita barik i Petrus maminduun, dabele-bele, “Daikopi dinen balu’-balu’ kawanna i Yesus tau Nasaret dinen,” ingka kenang lo’a i Petrus.
68“O na’an kutamu ratina jarumu,” ingka kenang manasala. Mamalin bapi di mambangan pakaren.
69Dabele bapi inang kole’a suro’an babainyeen, manjarum bapi lo’a tau di biringaan, “Tau di’en balu’-balu’ tau nanda’ bua,” ingka kenang. 70Laloang asasal bapi daia.
Mamin dinen, na’an balaun, gulungan tau ibiringaan dinen manjarum lo’a i Petrus, “Daiko tentu tau nanda’ kole’a daikopi tau Galileaan,” ingka kenang.
71Rabarik, i Petrus dinen asasal bapi. Sampai dinen mamang kalena atas asanna Alatala, “Saja na’an kukilala mantuari dinen yang ijarumangen ikin,” ingka kenang. 72Laloang manunturunguk barik manuken dinen kaduang kalina. Jaji daparandam barik jaruma i Yesus nanga sijarumanda’ dinen lo’a soal to’ manasala de’i, “Nampina manunturunguk manuken duang kali, daikopi to’ mamin talung kali manasalu lo’ku’,” ingka kenang i Yesus pamamalamen. Jaji barik daparandam dinen, laloang anangis dinen i Petrus.
നിലവിൽ തിരഞ്ഞെടുത്തിരിക്കുന്നു:
Markus 14: EBE
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright New Tribes Mission 1997