য়হোশু 14
14
য়র্দন দিব্যাকো জায়গাবি
1নেহা লাওয়া নুওয়াংতাহা য়র্দনকো দিব্যা কাটুতা নিওয়া কনান দেশ ইস্রাইলকো দিংঙাবিকো প্যাকোতা পোওয়া জায়গাবিহা ইরাংগা। এলাজার পাউ, নুনকো চেংওয়া য়হোশু আসা ইস্রাইলি জিরিকো প্যাপ্যাম্যাম্যা-প্যাপ্যাম্যাম্যাকো অগুওয়াবিহা আকু দেশহা দিংঙাবিকো প্যাকোতা পোপিমি নিমগা। 2পরমপ্রভুহা মোসাহিং আজ্ঞা জোওয়া সেই য়র্দনকো দিব্যা কাটুতা নিওয়া ল্যইতেওয়া দেশহা আকু কুচো আসা আদি জিরিবিকো প্যাকোতা চিট্ঠা বাডোইসুমসা পোসুয়ে। 3-4য়র্দন নুব্যা কাটুকো জায়গাহিংয়া নাগাইসোরাং অড়াই জিরিবিকো প্যাকোতা পোপুনতেমগা। (য়োসেবকো নিহসো চেংওয়া নিহসো জিরি মনশ্শো আসা এফ্রাইমহিং পোপিওয়া নিমগা।) আত্রংহা মোসাহা লেবিবিহিংয়া আকু জায়গাকো হানি মোংতোরে মিচাতো। আকো বদলিহা আবিহিং য়ুংকো সোতা শহরবি আসা আকো পিকা-এতাবি আসা লুকাবি ল্যাচোইকো জায়গা পিচায়ে। 5প্রভুসেংজাকো মোসাহিং আজ্ঞা জোমি ত্যাবাপা ইস্রাইলকো দিংঙাবিহা জায়গাবি পোসুয়ে।
কালেবহা হেব্রোন মুংচাওয়া
6সাইয়ুহা য়হুদাকো জিরিকো লেরা দিংঙাবিহা গিলগাল য়হোশুকোতা লেয়ে। আকো প্যাকোতাহা ইচো কনজ্জি য়পুন্নেকো চেংওয়া কালেবহা আকুহিংয়া জাংয়ে, “প্রভুসেংজাকো ডেইয়া মোসাহিংয়া পরমপ্রভুহা কাদেশ-বর্নতাহা কা আসা নাকো প্যাকোতা হাং জাংমমে, আকুহা নাতিহা গেমগা। 7প্রভুসেংজাকো ডেইয়া মোসাহা কাহিং কাদেশ-বর্নসো ই দেশতা জাসুস জোকো নিংপুনুওয়া কাহা লোকাই নিহকাইকো লো নিমগা। কাহা আকুহিংয়া কুং কোইওয়া আজিপ্পা নুওয়াং আকুহিং ল্যারেয়ে। 8আদো কাহিংপা হোওয়া ইস্রাইলিবিহা য়োংকো দিংঙাবিহিংয়া চুসুংপাপুয়ে, আদো কাহা দেংমসা পরমপ্রভু য়োংকো সেংজাকো আজ্ঞা মানেয়ে। 9কাহা এপা জোওয়াকো সোতা মোসাহা কাহিংয়া প্রতিজ্ঞা জোওয়া নিমগা, কি কুং তাংবা এওয়া দেশ আজিপ্পারাং কা আসা কুং সন্তানবিহা পুংজিকো রুপতা মুংচারোওয়া, হাংপাতানাহা য়াংবিহা পুরা তুংসিংসোরাং য়োংকো সেংজাহিং দেংমসা আকো নুনুই হুইমি নিও। 10আদো নেহা কাং, পরমপ্রভুহা মোসাহিং এপা জাংওয়াহা পঁয়তাল্লিশ বর্ষা জিংপুনেয়ো। আত্রংকো সময়হা ইস্রাইলিবিহা চিচ্চোওয়া জায়গাকো প্যাকোতা য়ুংসোই-তেসোইদিংমগা। আকো নোইতা হিনি চোইপা পরমপ্রভুহা আপনিকো প্রতিজ্ঞা অনুসার কাহিংয়া ঙাজ্যইংরাং এমি নিও। কাহিং কাং! কাহা ডিকাইসো ঙানিং চোইয়ানতেয়ো, 11আসা মোসা নিংপুনুওয়া কা হাসেকো বুইচুইপা নিমমে, হিনিরে এসেকোরাং বুইচুইপা নিও। লুইসুকো সোতা বাইরে হ্যাকো কুং সেহা আত্রংকো সময়তা হাসে নিমমে, নেরে এসেকোরাং নিও। 12নেহা কাহিংয়া আকু য়্যাগ্যইকো দেশ পিচাপুই, হানি পরমপ্রভু কা আসা কুং দিংঙাবি আপনিকো নুওয়াং জাংরেনুকো দিন কাহিং পিচারো তাওয়া প্রতিজ্ঞা জোমি নিমমে। কাবিহা আত্রংকো সময়হা নাবিহিংয়া জাংমি নিমগা, কি অনাকি তাওয়া দৈত্যবি বেওয়া আউতাহা টেবো টেবো পার্খালবি লাগাইওয়া শহরবিতা য়ুংমগা। জিংকোরে ছুরোওয়া, সেংজাহা কাহিংপা য়ুংকোদোওয়া আসা আকো য়্যইদি অনুসার কা আবিহিং ঘীরোওয়া।”
13য়হোশুহা য়পুন্নেকো চেংওয়া কালেবহিং আশিষ পিচায়ে আসা হেব্রোন শহর আকুহিং পুংজিকো রুপতা পিচাপুয়ে। 14হেব্রোনহা নেরে কনজ্জি য়পুন্নেকো চেংওয়া কালেবকো সন্তানকো খুইতা নিও, হাংপাতানাহা আকুহা দেংওয়াকো সাথ পরমপ্রভু ইস্রাইলকো সেংজাকো আজ্ঞা পালন জোমি নিমগা। 15আকো নাগাইহা হেব্রোনহিংয়া ক্রিয়াত-অর্বাকো শহর তামসা জাংমগা। (অর্বাহা অনানিবিতাহা হাংসুরোমা টেবো নিমগা।) আকো নোইতাহা দেশতাহা তিমেপা জিংপুয়ে।
നിലവിൽ തിരഞ്ഞെടുത്തിരിക്കുന്നു:
য়হোশু 14: TXO
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
2026 Bible Society of India in association with India Evangelical Mission