য়হোশু 3
3
ইস্রাইলিবিহা য়র্দন জোরা পেংওয়া
1য়হোশু আসা ইস্রাইলিকো তাংসা দিংঙাবিহা আকো জুকুং হাপকুংসো লোয়ে আসা সিত্তিম জায়গাহিং হুইতেমসা হোপুয়ে। আবিহা য়র্দনতা ওয়াংয়ে আসা জোরা পেংদাংনুওয়া আবিহা আউতারাং খুউইমসা তাম্বু বানাইমসা য়ুংয়ে। 2সাসুংয়ুকো নোইতা অগুওয়াবিহা তাম্বুকো প্যাকোসো হোয়ে, 3আসা দিংঙাবিহিং জাংয়ে, “হাত্রং নাবি পাউবিহিং পরমপ্রভু নাবিকো সেংজাকো করারকো সন্দুকহিং পুউওয়া তিং, আত্রংহা তাম্বু গোইমসা আবিকো নুনুই হুইপু। 4নাবিহা নাগাইহা ইতা মোংয়াংমগা আসা আবিহা ন্যাতা তিংপারোওয়া। আদো সন্দুককো আবেইতা মোহো, আকো এক কিলোমিটার বার্গাং কাচি য়ুং।” 5য়হোশুহা দিংঙাবিহিংয়া জাংয়ে, “আপনিহিং ছোসোপা জো, হাংপাতানাহা পরমপ্রভুহা নাকো নাগাইতা আআংপেপেচপুওয়া কামবি জোরোওয়া।” 6আকো নোইতা আকুহা পাউবিহিংয়া করারকো সন্দুক পুউমসা দিংঙাবিকো নাগাই নাগাই তেইকো তামসা খুইয়ে। আসা পাউবিহা এপারাং জোয়ে।
7পরমপ্রভুহা য়হোশুহিংয়া জাংয়ে, “হিনিহা কাহা ই জো, আকো সোতা ইস্রাইলকো দিংঙাবিহা নাতিহিংয়া টেবো দিংঙা তামসা আদর জোরোওয়া আসা মোসাহিংপা নিমি ত্যাবাপা কা নাতিহিংপা নিও তামসা নাতিহা সিদা চ্যইরোওয়া। 8করারকো সন্দুক পুউওয়া পাউবিহিংয়া জাং, কি জোরাতা দেকানুওয়া আবিহা জোরাকো আরিতা হোমসা জাকাকো।”
9আত্রংহা য়হোশুহা দিংঙাবিহিংয়া জাংয়ে, “ইতা ওয়াংমসা পরমপ্রভু নাবিকো সেংজাহা হাং জাংমমে, হিং। 10নাবি নাগাই গ্যইপুমসা হ্যাদিংনুওয়া আজিপ্পারাং কনানী, হিত্তি, হিব্বি, পরিজ্জি, গির্গাশি, এমোরি আসা য়বুসিবিহিংয়া প্রভুসেংজাহা ঘিরোওয়া। আকো সোতা ঙাজ্যইং সেংজাহা য়োংকো প্যাকোতা নিও তামসা নাবিহা গেরোওয়া। 11হাত্রং পুরা বাসিমতিকো প্রভুসেংজাকো করারকো সন্দুক নাকো নাগাই নাগাই য়র্দন জোরা পেংপুমসা হ্যা, 12আত্রংহা ইস্রাইলকো তাংসা জিরিসো ইচো ইচো জোমসা বার্চো পোজাবিহিং জেং। 13পুরা বাসিমতিকো প্রভুসেংজাকো করারকো সন্দুক পুউওয়া পাউবিহা হাত্রং তিতা কোকোই এ্যহ, আত্রংহা য়র্দন জোরাকো তিহা য়োইচপুরোওয়া আসা ইচো জায়গাতা জমা জিংচপুরোওয়া।”
14আকো সোতা হাত্রং য়র্দন জোরা পেংকো দিংঙাবি আপনি আপনিকো তাম্বুবি য়ো, আত্রংহা পাউবিহা করারকো সন্দুক পুমসা দিংঙাকো নাগাই নাগাই হ্যায়ে। 15অন্না য়োওয়া সময়তাহা ব্যান্যা হ্যাচাংমি, আদো সন্দুক পুওয়া পাউবিহা য়র্দনতা দেয়োংমসা আবিকো কোকোইসো আরিকো তিতা তেয়ানতানি 16জোরাহা য়োইচপুয়ে আসা সিওপারাং য়ুতারাং সার্তানকো আবেই আদম শহর কাটুতা চোইপা দেকামসা তিহা জমা জিংপুয়ে। লেতা সিপুওয়া ঝাহাদিতা বাংওয়া তিহা য়োইচপুয়ে আসা দিংঙাবিহা য়রিহো শহরকো আবেইসো ত্যাকো ছুয়ে। 17দিংঙাবিহা সেক্কোউওয়া মোংটোসো তেইমসা জোরা ত্যানুওয়া করারকো সন্দুক পুউওয়া পাউবিহা য়র্দন জোরাকো সেক্কোউওয়া প্যাকোকো জায়গাতা জায়ে। তাংসা দিংঙাবি নুব্যা মেদেকানু চোইপা পাউবিহা আউতারাং জায়ে।
നിലവിൽ തിരഞ്ഞെടുത്തിരിക്കുന്നു:
য়হোশু 3: TXO
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
2026 Bible Society of India in association with India Evangelical Mission