য়হোশু 4
4
প্যারাপাকো সোতা লুংটুইবি
1তাংসা জ্যাবি য়র্দন জোরা ত্যাপুনতেনুওয়া পরমপ্রভুহা য়হোশুহিংয়া জাংয়ে, 2“তাংসা জিরিসো ইচো ইচো জোমসা বার্চো পোজা দিংঙাবি জেং। 3য়র্দন জোরাকো প্যাকো হাংতা পাউবি জাদিংমমে, আকু জায়গাসো বারুং লুংটুইবি য়োকো আবিহিং আজ্ঞা জোয়ে। আকু লুংটুইবি পুমসা হিনি লিসুংকো বাস য়ুংওয়া তাম্বু বানাইওয়া জায়গাতা একো তামসা আবিহিং জাং।”
4আত্রংহা য়হোশুহা আপনিকো জেংওয়া বার্চো পোজাবিহিং মোউমসা জাংয়ে, 5“পরমপ্রভু নাবিকো সেংজাকো করারকো সন্দুককো নাগাইতা য়র্দনতা হোতু, আসা তাংসা ইস্রাইলবিকো জিরিকো সোতা ইরুং-ইরুং লুংটুই আপনি আপনিকো বুচুংতা পুউমসা পা। 6পরমপ্রভুহা হাং জোমি নিমমে, আকু নুওয়াং ই লুংটুইবিহা দিংঙাবিহিং প্যারাতাংপারোওয়া। দেপাওয়া দিনবিতাহা হাত্রং নাকো চেংওয়া চেমেবি ই লুংটুইকো অর্থবি হাংমমে তামসা উইরোওয়া, 7আত্রংহা নাবিহা জাংরোওয়া, কি প্রভুসেংজাকো করারকো সন্দুকহা য়র্দন জোরা ত্যানুওয়া জোরাহা বাংওয়ারাং য়োইচপুমগা। ই লুংটুইবিহা ইস্রাইলকো দিংঙাবিহা ইতাহা হাং জিংপুমমে, হাত্রংদো আকো প্যারাতাংপারোওয়া।”
8আকু পোজাবিহা য়হোশুকো আজ্ঞাহিংয়া পালন জোয়ো। পরমপ্রভুহা য়হোশুহিং আজ্ঞা জোমি ত্যাবাপা আবিহা তাংসা ইস্রাইলকো জিরিসো ইচো ইচো জোমসা য়র্দনকো প্যাকোসো বারুং লুংটুইবি য়োয়ে আসা তাম্বু বানাইওয়া জায়গাতা পুপুমসা আউতা এহে। 9য়র্দনকো প্যাকোতা করারকো সন্দুক পুমসা পাউবিকো জাওয়া জায়গাতারে য়হোশুহা বারুং লুংটুইবি জাপায়ে। (আকু লুংটুইবি হিনি চোইপা আউরাতাং নিও) 10দিংঙাবিহিং হেপা হেপা জোকো তামসা সেংজাহা য়হোশুহিং জাংমমে, আকু তাংসা মাজিংনু চোইপা করারকো সন্দুক পুউওয়া পাউবিহা য়র্দন জোরাকো প্যাকোতা জায়ে। মোসাহা য়হোশুহিংয়া এপারাং জাংওয়া নিমগা। দিংঙাবিহা সেনে-সেনেপা জোরা ত্যায়ে। 11তাংসা নুব্যা দেকানতেনুওয়া সেংজাকো করারকো সন্দুক পুমসা তেইওয়া পাউবিহা দিংঙাবিকো নাগাই নাগাই হ্যায়ে। 12মোসাকো জাংমি ত্যাবাপা দোসরা দিংঙাবিকো নাগাই নাগাই রুবেন আসা গাদকো জিরি আসা মনশ্শেকো আধি জিরিকো দিংঙাবি লুইসুকো তৈয়ার জিংমসা জোরা ত্যায়ে। 13প্রভুসেংজাকো নাগাইহা প্রায়: চাল্লিশ হাজার পোজা দিংঙাবি লুইসুকো সোতা তৈয়ার জিংমসা জোরা ত্যামসা য়রিহো আবেইকো ওয়াংবোইতা দেকায়ে। 14আত্রংকো দিন পরমপ্রভুহা হাং জোমমে, আকো কারণ ইস্রাইলিবিকো প্যাকোতা য়হোশুহা ইচো টেবো দিংঙা ত্যাবাপা জিংপুয়ে। আকো পুরা জীবনকালতা মোসাহিং ত্যাবাপা আবিহা আকুহিংয়া আদর জোয়ে।
15-16আকো নোইতাহা সেংজাহা য়হোশুহিং করারকো সন্দুক পুউওয়া পাউবিহিং য়র্দনসো নোপামসা ওয়োংকো আজ্ঞা জোকো খুইয়ে। 17য়হোশুহা এপারাং জোয়ে। 18পরমপ্রভুকো করারকো সন্দুক পুউওয়া পাউবিহা জোরাকো আরিতা দেকানুহা জোরাহা ন্যাসারাং নাগাইকো ত্যাবাপারাং বাংয়ে। আসা জোরাহা ন্যাসারাং আরি চোইপা মেইপুয়ে।
19নাগাইকো তারিকো সাত্যায়ুতা দিংঙাবিহা য়র্দন জোরা ত্যায়ে আসা য়রিহোকো নুব্যা কাটুকো গিলগাল জায়গাতা তাম্বু বানাইয়ে। 20য়হোশুহা আউতা য়র্দন জোরাসো য়োপাওয়া বারুং লুংটুইবি আউতা জাপায়ে। 21আকুহা ইস্রাইলকো দিংঙাবিহিং জাংয়ে, “দেপাওয়া দিনবিতা ই লুংটুইকো অর্থহা হাংগা তামসা হাত্রং নাবিকো চেংওয়া চেবেবি উই, 22আত্রংহা ইস্রাইলিবিহা সেক্কোওয়া মোংটোসো য়র্দন জোরা পেংওয়া নুওয়াং আবিহিং হিংপা। 23য়াংবিকো সোতা আলুইওয়া ঝাহাদি সিপামি ত্যাবাপা য়র্দন জোরাকো তিরে য়াংবি মাপেংনু চোইপা পরমপ্রভু য়োংকো সেংজাহা সিপাপুমগা তামসা আবিহিং জাং। 24আকো সোতা প্রভুসেংজাকো সেহা হাসেকো মহান নিমমে তামসা বাসিমতিকো তাংসা দিংঙাবিহা গেরোওয়া আসা হাত্রংদো নাবিহা পরমপ্রভু আপনিকো সেংজাহিংয়া আদর জোরোওয়া।”
നിലവിൽ തിരഞ്ഞെടുത്തിരിക്കുന്നു:
য়হোশু 4: TXO
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
2026 Bible Society of India in association with India Evangelical Mission