য়হোশু 5
5
1পরমপ্রভু তাংসা ইস্রাইলকো দিংঙাবি মাপেংনু চোইপা য়র্দন জোরাহিং সেক্কোউপা জোপুওয়া নুওয়াংহা য়র্দনকো দিব্যাকো তাংসা এমোরি জাইপুবি আসা ভুমধ্য ঝাহাদিকো আরিকো জাইপুবি তাংসা হিংয়ে। আবিহা চুসুংপুয়ে, আসা ইস্রাইলিবিকো কারণসো আপনিকো সাহস য়াংপুয়ে।
গিলগালতা খতনা জোওয়া
2আত্রংহা পরমপ্রভুহা য়হোশুহিংয়া জাংয়ে, “লুংটুইবিকো কাত্রিবি বানাইমসা ইস্রাইলিবিকো খতনা জো।” 3আত্রংহা য়হোশুহা প্রভুসেংজাকো জাংওয়া সেই জোয়ে, আসা খতনাকো য়্যাগ্যই তাওয়া জায়গাতা ইস্রাইলিবিকো খতনা জোয়ে। 4-6হাত্রং ইস্রাইলকো দিংঙাবি মিশ্র দেশহিং হুইতে, আত্রংহা তাংসা পোজাবিহা খতনা জিংপুনতেমগা। আদো চিচ্চোওয়া জায়গাতা তেইদিংনুকো চোল্লিশ বর্ষাকো নাপোতা কেওয়া চেংওয়াবিকোহা খতনা মাজিংয়াংমগা। আকু সময় পেংপুনতেনুওয়া হাসে ইচো পোজা দিংঙাবি মিশ্র দেশসো নোপানুওয়া লুইসুওয়া উমের নিমমে, আবিহা তাংসা সিপুনতেমগা, হাংপাতানাহা আবিহা প্রভুসেংজাকো আজ্ঞা পালন মোজোতো। আকুহা আবিহিংয়া আপনিকো নাপোইওয়া অনুসার আবিকো আটা-আজাহিং পিচারো তাওয়া প্রতিজ্ঞা জোওয়া আশিষিত আসা প্যইপ্যইওয়া দেশ কাংকো মিচাতো। 7আকো সোতা আবিকো জায়গাতাহা আবিকো চেংপাওয়া চেংওয়াবিকোহা য়হোশুহা খতনা জোপায়ে, হাংপাতানাহা আবিহা চিচোওয়া জায়গাতা তেইদিংনুওয়া খতনা মাজিংওয়াকো সোতা বেখতনারাং নিমগা।
8খতনা জোপুনতেনুকো নোইতাহা মাকা মাসাংনু চোইপা আবিহা আপনি আপনিকো তাম্বু তাম্বুবিতারাং য়ুংয়ে। 9পরমপ্রভু য়হোশুহিংয়া জাংয়ে, “হিনিহা কাহা নাবিকোসো মিশ্রতা জিংওয়া নিন্দাহিংয়া য়াংপাপুমি নিও।” আকো সোতা আকু জায়গাকো মিংহা গিলগাল এয়ো, আকু মিংহা নেচোইপা চলেদিংয়ো।
10ইস্রাইলিবিহা য়রিহোকো আবেইকো গিলগালকো ওয়াংবোইতা তাম্বু বানাইমসা য়ুংনুকো সময়তাহা আকু তারিকো চৌদ্দ দিন নিস্তার মানক্যা #5:10 নিস্তার মানক্যা মানাইয়ে। 11আকো জুকুংহা হানিরোমা নাগাই আবিহা কনান দেশতা নিংওয়া চাওয়া-আংওয়া, অখমিরি কোব্রেং আসা হোওয়া অন্নাকো অংসেবি চায়ে। 12আবিহা আকু লোইতা নিংওয়া চাওয়াকো সাইয়ুসোহা মন্না হুইকোরে বন্দ জিংপুয়ে আসা ইস্রাইলিবিহা আকুহা ন্যাসারাং মামুংপা জিংপুমসা মায়াচাতো।
য়হোশু আসা তালওয়ার পুুুূউওয়া দিংঙা
13য়হোশুহা য়রিহোকো আবেইতা নিনুওয়া একব্রি আকুহা ইচো দিংঙা খুইতা তালওয়ার চুংমসা আপনিকো নাগাইতা জাওয়া তিংয়ে। য়হোশুহা আকো আবেইতা হ্যামসা উইয়ে, “নাতিহা কাবিকো ব্যারোগা না দুসমানগা?”
14আকু দিংঙাহা জাংয়ে, “কাহা ব্যারোরে মোকো, দুসমানরে মোকো! কাহা প্রভুসেংজাকো সিপাইকো সেনাপতি জিংমসা কাহা ইতা লেমি নিও।”
য়হোশুহা লিতা মোংটোতা চুনুইমসা আকুহিং নোংয়ে আসা জাংয়ে, “উটকেওয়া কাহা নাকো ডেইয়াগা। নাতিহা কাহিংয়া হাং আজ্ঞা জোকোগা?”
15আত্রংহা প্রভুসেংজাকো সেনাপতিহা জাংয়ে, “নাকো কোকোইকো কোরোং লু, হাংপাতানাহা নাতিহা পবিত্র জায়গাতা জাদিংয়ো।” য়হোশুহা এপারাং জোয়ে।
നിലവിൽ തിരഞ്ഞെടുത്തിരിക്കുന്നു:
য়হোশু 5: TXO
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
2026 Bible Society of India in association with India Evangelical Mission