Madiu 4
4
Yesu 'ana toona Seitani 'enega
(Maki 1:12-13; Luke 4:1-13)
1 #
Ib 2:18, 4:15 Gete 'enega Yaubada Yaluyaluwana Yesu 'i'au'ewena ga 'itauyena sena mitawa daitaya be 'enega 'ana toona Seitani 'enega 'ida loba. 2Ga 'asiyata poti solanaya nigeya 'i'e'ai, ga 'enega 'ibotana sinabwana.
3Ta totoona nina 'iapwesama ga 'igwae, “'Eguma 'oyo Yaubada natuna, gulewa getedi 'uloinedi be sida emasula.”
4 #
2 Loi 8:3
Ta Yesu 'igwae, “Buki Tabu solanaya loina 'imiyami 'aene,
‘Tomota yawasidi nigeya masula namo 'enega,
ta esi Yaubada 'ina onao maibo'adi 'ediyega.’”
5'Enega Seitani Yesu 'i'au'ewena ga 'itauyena Yelusalema, ga Anuwa Tabu tabwana 'ai'ailaya 'itu'eyena, 6#Sam 91:11, 12ga 'ena 'ieonena, 'igwae, “'Eguma 'oyo Yaubada Natuna, gete 'enega 'usosobu, ta geya'abo 'uesiesilae. Manuna Buki Tabu ni'atu 'isimana, 'igwae,
‘Yaubada 'ina aniloseyao 'ida loinedi be si'ita'i'isiyo’,
be wate 'igwae,
‘Nimadiyega sida 'aaliyo, be 'enega geya'abo 'aeyo siesiesilae gulewa 'ediya.’”
7 #
2 Loi 6:16
Ga Yesu wate 'igwae, “'Ebweu wate ona Buki Tabu 'ena 'imiyami, 'igwae,
‘Geya'abo 'imu 'Inapwana Yaubada 'utootoo.’”
8Ta Seitani Yesu 'i'au'ewena 'oya sinabwana etaninaya ga gote 'ena 'ebeloina esaesa bale'uya maibo'adi Yesu 'ie'itena 9ta wate 'itoo limena, 'igwae, “Sena gote maibo'adi yada 'ebwa'eyo. 'Eguma 'ube'u sanamwa'uta be 'eguya 'ubwabwago, 'enega 'ebeloina nidi yada 'ebwa'eyo.”
10 #
2 Loi 6:13
'Enega Yesu 'i'enapa'alina, 'igwae, “Seitani, 'upilisinegu! Buki Tabu solanaya loina 'imiyami 'aene,
‘'Imu 'Inapwana Yaubada namo 'ena 'uda bwagobwago be taunamo 'ina ona 'uda ematamatanedi.’”
11 #
Ib 1:14
'Enega Seitani Yesu 'ipilisinena, ga muliyega aniloseyao siapwesa ga silemena.
Yesu 'ina guinuwa 'ie'ale sena Galili 'ena
(Maki 1:14-15; Luke 4:14-15)
12Ta muliyega Yesu ale 'inonona 'aene Yoni deliya sisa'una, 'enega 'iila ga 'itauya Galili 'enaya. 13'Enega Nasaleta 'ipilisinena ga 'ilo'asa Kapaneumi le'awinaya, nate susu Sebuloni be Napitalai 'idi bwa'a. 14Yage gete manuna palopita Aisea lowaenei 'igimisimana ga Buki Tabu 'ena 'i'etoladina, 'igwae,
15 #
Ais 9:1-2
“Sebuloni be Napitalai 'idi 'asao nate ola be bwasi Yolidani gamwagamwanidiya, taudi nigeya me Yudia 'idi sena, 'ana esana Galili.
16Taudi guguyoi 'ina sena 'ena simiyami, ta esi gete tuga maedana sinabwana ni'atu si'itena.
Manuna lowa mwawasa 'ina sena to'umalina 'ena simiyana,
ta gete tuga maedana ni'atu 'ediya 'isae.”
17Tuta gote 'enega Yesu 'ina guguya 'ie'ale ga 'igwae, “'Imi guinuwa to'umalidi 'ediyega wada nuwa'ebuni, manuna 'iabe be Yaubada 'ietoloina 'edaya.”
Togomana ata Yesu 'ibwauyedima
(Maki 1:16-20; Luke 5:1-11)
18'Enega 'ebweu tuta Yesu ola Galili le'awinaya 'iwadawada'e ga togomana siteluwa matasina 'i'itedi 'idi gomana siyauyauye, 'ebweu Saimoni, tauna watece sieesena Pita, ta tasina 'ana esana Anidulu. 19'Enega 'ibwauyedi, ga 'igwae, “Wamuliyegu be tomota wada 'onadi.” 20Gote 'ena 'idi gomana sipilisinena ga Yesu simuliyena.
21'Enega wate 'iawadawada'e ga togomana sitetoi wagaya 'idi gomana sigibugibubudi 'i'ita lobedi, taudi Yemesa be Yoni be tamadiya, tauna 'ana esana Sebedi. 'Enega Yesu Yemesa nina matasina 'ibwauyedima, 22ta sitoolo ga waga be tamadiya sipilisinena, ta Yesu simuliyena.
Yesu tomota yaudi 'ilemedi
(Luke 6:17-19)
23Yesu Galili maibo'ana 'iasakowasiyena, ta 'idi anuwa tapwalolo 'ediya 'iloguguya, ta tetela bobo'ana Yaubada 'ina loina manuna 'isimasimane, ta wate tomota 'adi le'oasao 'ediyega 'igiebobo'anedi maibo'adi. 24'Enega Yesu tetelina 'i'elelewana Silia 'asanao maibo'adi 'ediya, 'enega tole'oasao yaudi sime'eme'edi 'enaya, taudi sile'oasa sinabwana ta oodi si'elo'elouya, be taudi yaluyaluwa bi'i sigie kabaleyedi be taudi 'adi le'oasa lobwebwai, be wate tokweno, ga Yesu 'igiebobo'anedi maibo'adi.
25Gete manuna boda sinabwana Yesu simuliyena. Galiliyega be Dekapoliyega be Yelusalemega be Yudiaega be wate Yolidani mali esenega.
നിലവിൽ തിരഞ്ഞെടുത്തിരിക്കുന്നു:
Madiu 4: dob
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2013, Wycliffe Bible Translators, Inc. All rights reserved.