DOWLLO 1
1
1O Theophilas rukri reeppi laaika thu neiji Jisu nongtlot leh kpurchuk mdo pṭhunna ki parteel dok chnu, 2Mma mhunkal dok du khim khai, Mma do kchol dok kenyee rek hin pthla kchiir ri paureen mhin thaanni mpiik dok dilthaan ki. 3Nii som plii lik thu mhin inni ktardet da, ungta Isowr Kruwngpaam mlei thu theda, Mma ngi knempok mparteel diltha mdaksaa ava kring daat kdingi the pik lamda. 4Ungta Mma ngi ma am ṭhi slii lam thung ngi mhin inni theda, “Naanni Nei kihinki ado aryaak in ava arda in. 5Mleija Johonva dii ngi baptis ptlotda, pdainu naanna mpha mruk diltha pthla kchiir ri baptis akuptlot chraan.”
Jisua Parwaan tha mdo Arjuklo
6Ava leiji mmaanni mthlen kurku in mpha thu Mhin khewl chlam da, “Mukpu mpha ava thungva Isreel mii rek hin Kruwngpaam ava pinlet pik namo?” 7Mma ngi mhin inni theda, “Kpah Mma mdak katti mdo palreen mpha mdit mata mkum ava naan do dee rang ava pme. 8Pdainu pthla kchiir ri naan leen murjun mpha thu rutan arlaang chnaandi, ungta naanni Jerusalem thu ungu Judia leh Samaria mkheng thu ungu dultipaam mṭutna kpha dekki sakhi pii naandi. 9Ungta Mma ngi hava mthe dok le, mmaanni msut daat arlaanni, Mma hunṭhi chda, ungu armeiji mmaan dosut na thungki lou chdokda. 10Ungta Parwaan tha Mma kuhungkal mmaanni msut rim daat arlaanni, asuwn, phrik kturrown kpowl dang ngi kurthlong miilai knii mbe thaanni rip daat lamda, 11ungu the lamda, “Galil mii rek, talu leiji naanni parwaan hansuw inti krip daat in pti? Naan hinki parwaan tha mdo arjulo Jisu hava ngi, parwaan tha mhun ado dee in lulu ngi Mma kurjung ra.”
Judas Chang kdon
12Ava dilli mmaanni Jerusalem ktinel, sabath nii khat lamra karlat, kruwn mdo dit ava lownki Jerusalem tha mdil kinle lamda. 13Ungta mmaanni mvanlu in mpha thu Pitor ungta Johon ungu Jeems leh Andrija, Philip leh Thomas, Bartholomio leh Mathi, Alphias chapa Jeems, ungta muplung klut langlang Simon, Jeems chapa Judas hava maan amna ndaat tuwn knung reepki innka tuwn hangkal lamda. 14Havale mkheng ngi snu rek leh Jisu nuh Mery ungu mnaopale tu kilṭhi ngi plung khdaatti kṭhil cha thu plung plut lamda.
15Ava nit lik thung ngi Pitor ri mu u mnao rek arlakki ripda, ungu theda, (Kurtuwl mii rekka arjaa khat som knii arveel kurthuwk.) 16“Ku u knao rek, Jisu kukjowng thung ngi mmaan rukrit pik Judas mlei thung ngi Devid mdak katti pthla kchiir ri alraang mdo the dok laaika ava mkurkhumna. 17Mleija mma narlak inni mdo tai dok, ungta hava nong ktlo thung ngi mtum mdo phaak chaak dok 18(Tunva hava miilai nong tlot ṭhat maki mnah ava ngi bil khat renda; ungta mluwthip tha kurlupda, mpoi kuida mthung mikril mkheng thuwkda. 19Ungta ava Jerusalem thung ngi ka am mii mkheng ngi deida, ava leiji bil ava mmaan pauvi Akeldama, ditta Hii bil dilamda.)
20Mleija Laa rek Laaika thung ngi hanto kjitda,
‘Mma amna tlong chaso,
ungta ava thung ngi ku khat lee am mso;’
ungu ‘Mma nong nga ktlok khatti alou chaso.’
21Ava leiji nen narlakki Mukpu Jisu ngi lutda duwn mthuw mpha mkheng thung ngi, nen tkurthlo ṭhiin mii rek thungki khat, 22Johon baptis ptlot nit ki ngi pṭhunda, Mma mhunkal nit kpha thung ngi nen narlak inni ka am, hava mii rek thungki khat ava ngi, nen tu kilṭhi ngi Mma rinkarheel naki sakhi khat kurthuwk ra.” 23Ungta mmaanni miilai knii Jastas tdit Barsabas mdo dit Joseph leh Mathi ava mmaiṭhuwm inni thii lamda. 24Ungta mmaanni ṭhil lamda the lamda, “Mii rek plung ril mkheng kdei Mukpu, Judas ava ngi mdil mdo kinlet daak, ava kat mun thung ngi kchet ra, hava nong ktlo thu ungu kenyee nong ktlora 25mma kchang kdonra hava miilai knii thungki khat ado kchol ava mhai tdet chaan.” 26Ungta mmaanni mmaan mlei thung ngi pchel piik sut nlamda, ungbi Mathi tun tlada; ungu mma kenyee rek sowm lei khat arlakki plut lamda.
Одоогоор Сонгогдсон:
DOWLLO 1: LAMKBSI
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.