Markus 13
13
Yeesu vi'ii Wuro Allah Seniingo no yibbintee
(Matta 24.1-2 ; Luka 21.5-6)
1Yeesu e vurtoo *Wuro Allah Seniingo, sey go'oto nder *almaajiri'en ma'ako vi'i mo :
— Moodibbo, hina ɗe'e kaaƴe mawɗe ɗe ɗum mahari ngo'o wuro ! Rah no ngo vooɗri.
2Sey Yeesu vi'i mo :
— A yi'ii ndi'i mahadi mawndi naa ? Walaa haayre ɗaletee dow woɗnde, ɗe fuu ɗum yibbiney ɗe.
Torraaji e caɗeele gareyɗum
(Matta 24.3-14 ; Luka 21.7-19)
3Yeesu jooɗii dow *vaamnde Jaytunje, o hu'uci e *Wuro Allah Seniingo, sey Biiturus e Yaakuubu e Yahayya e Anndaraawus njahi to ma'ako kamɓe tan, ɓe ƴami mo, ɓe mbi'i :
4— Yecca min, ndeye ku'uje ɗeen laatoto ? Kaye alaama hollata ɗum ɓadake waɗgo ?
5Yeesu toontii ɓe vi'i :
— Kakkilee, to' goɗɗo majjin on. 6Yimɓe ɗuuɗɓe no ngarey e innde am, ɓe mbi'a : « Miin woni *Almasiifu », ɓe majjina yimɓe ɗuuɗɓe. 7To on nanii habaru konuuji ɓadiiɗi e goɗɗuɗi, to' on kul, gam doole ɗum waɗa, ammaa naa ɗum timmoode duuniyaaru tawo. 8Lenyol no ummanto lenyol, laamu no ummanto laamu. Veelooji e dimmbaaki lesdi no mbaɗey nder jaaje feere-feere. Ɗum ɗoon fuu, ɗum kama fuɗɗoode ŋatawre danygol tan.
9Ndeenee ko'e mooɗon, gam yimɓe no kokkey on nder juuɗe mawɓe ceri'a, ɗum fiya on nder *cuuɗi-ga'ajorɗi, ɗum ndarna on yeeso aardiiɓe lesdi e laamɓe sabu innde am, gam laatanooɗon yam caaydu'en yeeso maɓɓe. 10Doole leƴƴi duuniyaaru fuu nga'ajinee *Habaru Belɗum tawo. 11To ɗum nanngii on, ɗum yaharii on yeeso laamu, to' on ngaanno dow ko mbi'oton. To wakkaci ɗuum warii, on keɓey ka mbiiɗon, gam naa ɗum onon mbolvata, ammaa ɗum *Ruhu Ceniiɗo. 12Neɗɗo no hokkitirey dimdaaɗo muuɗum waree, baaba maa no hokkitirey ɓiyum. Ɓiɓɓe no ummanto danyooɓe mu''en, ɓe mbaɗa ɗum wara ɓe. 13Yimɓe fuu no nganyey on, gam on tokkuɓe yam. Ammaa munyɗo faa timmoode no hisnete.
Torraa kalluka no warey
(Matta 24.15-28 ; Luka 21.20-24)
14— Wakkaci e wara nde ngi'oton « fii nyidduɗum kulniiɗum » e darii yaayre to haanaa ɗum daroo. Jannguɗo ɗum fuu sey fahama ma'ana ma'ajum. Ndeen ɓe ɗum tawi nder lesdi *Yahuudiya fuu, sey nyaarda baamle.#13.14 Daaniyel 9.27 ; 11.31 ; 12.11 15Mo ɗum tawi dow suudu fuu, to' jippoyo, koo vi'a no nattey nder ma'aru hooƴa goɗɗum. 16Mo ɗum tawi nder ngesaa, to' so''o hooƴa koltal muuɗum. 17Kayco rewɓe saawɓe e bambuɓe nder balɗe ɗeen ! 18Mbaɗee do'aare to' fii ɗuum waɗ nder dabbunde. 19Gam nder balɗe ɗeen ɗum waɗey torraa kalluka, iri ka ɗum meeɗaay waɗgo gada duuniyaaru tagaa faa jo'oni, ka fuɗɗitataa boo waɗgo faa abadaa. 20To Allah ustaayno balɗe ɗeen, daa walaa kiseynooɗo. Ammaa gam ɓeen suɓaaɓe ma'ako, o ustiri balɗe ɗeen.
21Wakkaci ɗuum, to goɗɗo vi'ii on : « Raa Almasiifu ɗo'o », koo : « Rammo ɗaa'e », to' on njaɓ. 22Gam almasiifu'en fewre'en e annabo'en fewre'en no mburtoyto, ɓe mbaɗa alaamaaji e kuuɗe kaayniiɗe, gam ɓe majjina yimɓe, faa e suɓaaɓe, to ɗum waɗoto. 23Kakkilee, ndeenee ko'e mooɗon ! Mi yeccake on ɗum, ɗum fuu ila ɗum waraay tawo.
Bittoyki Ɓii-Neɗɗo
(Matta 24.29-31 ; Luka 21.25-28)
24Ammaa nder balɗe ɗeen ɓaawo kan ɗoon torraa kalluka, naange no niɓɓey, lewru boo no woorey yaynaago. 25Koode no njanoyey gada dow, baawɗeeji gonɗi dow fuu no ndimmboto.
26Wakkaci ɗuum, ɗum yi'ey *Ɓii-Neɗɗo e wara nder duule. O wardey e baawɗe mawɗe e teddungal. 27O liloyey malaa'ika'en ma'ako buttulli duuniyaaru nayi fuu, ɓe kawrita suɓaaɓe ma'ako, gada to duuniyaaru fuɗɗiri faa to ndu heyri.
Ko ƴibbi ekkitinta
(Matta 24.32-35 ; Luka 21.29-33)
28Pahamee ko ƴibbi hollata : to licce ma'aki puɗɗii vilitgo, on anndi ndunngu ɓadake. 29Noon boo to on ngi'ii ku'uje ɗeen e mbaɗa, anndee *Ɓii-Neɗɗo ɓadake vittoygo, emo ɗoon ha'ade dammugal. 30Emi vi'a on goonga : ndu'u jaamaniiru timmataa, sey to ku'uje ɗeen fuu mbaɗii. 31Dow e lees no timmey, ammaa bolle am timmataa faa abadaa.
Walaa annduɗo nyannde bittoyki Almasiifu
(Matta 24.36-44)
32Ammaa walaa annduɗo nyalaande koo wakkaci nde fii ɗuum waɗata, koo malaa'ika'en wonɓe dow, koo *Ɓiɗɗo boo anndaa, *Baabiraawo mo dow tan anndi. 33Kakkilee, ndeenee, gam on anndaa wakkaci nde o warata. 34Ɗum nanndii e neɗɗo baɗeyɗo jahaangal. Wakkaci o ɗalata wuro, o reenni ngo maccuɓe ma'ako, o hokki koo moye kuugal muuɗum, o vi'i deenoowo dammugal daroo reena. 35Gam ma'ajum, njooɗee ndeenee, sabu on anndaa wakkaci nde jawmu wuro oon wartoyta, koo ɗum futuro, koo caka jemma, koo fajiri, koo subaka. 36To' o wartu o juha on, o tawa on ɗaani. 37Ka mbi'imi on, kanka mbi'eymi koo moye : njooɗee, to' on ɗaano !
Одоогоор Сонгогдсон:
Markus 13: fuq
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2015, Wycliffe Bible Translators, Inc. All rights reserved.