Matiu 1
1
Yisa Masiya a Baa nin U Yaajam a bɔr
(Lug 3:23-38)
1Yisa Masiya#1:1 Masiya a taai le ye ufeer. a baa nin u yaajam a piinim a gbɔŋ sɔ. U ye Defid a yaabil le, le Defid mu ye Abiraham a yaabil:
2Abiraham le nan ma Azig,
le Azig ma Jekɔb,
le Jekɔb mu ma Juda nin u watiib.
3Juda nan ma Perezi nin Zera, wan a na nan ye Tamar nan;
le Perezi nan ma Hezironn,
le Hezironn ma Ram.
4Ram le nan ma Aminadab,
le Aminadab ma Nasonn,
le Nasonn mu ma Salimɔnn.
5Salimɔnn le nan ma Bɔɔzi, wan a na nan ye Rahab nan,
le Bɔɔzi ma Obed, wan a na nan ye Ruf nan,
le Obed mu ma Jesi.
6Jesi le nan ma ubɔr Defid.
Le Defid mu ma Solomɔnn, wan a na nan ye Yuriya a poo-n.
7Solomɔnn le nan ma Rehoboam,
le Rehoboam ma Abija,
le Abija mu ma Asa.
8Asa le nan ma Jehosafa,
le Jehosafa ma Jehoram,
le Jehoram mu ma Uzaya.
9Uzaya le nan ma Jotam,
le Jotam ma Ahazi,
le Ahazi mu ma Hezekaya.
10Hezekaya le nan ma Manaasa,
le Manaasa ma Amonn,
le Amonn mu ma Josaya.
11Le Josaya ma Jekonaya nin u watiib, baah nan choo Iziral yaab ki ta bi jon Babilɔnn n-yonn man nin.
12Baah nan choo bi ki ta bi jon Babilɔnn nan a bɔɔn bu,
le Jekonaya ma Salatiɛl,
le Salatiɛl mu ma Zerubabel.
13Zerubabel le nan ma Abiud,
le Abiud ma Elayakim,
le Elayakim mu ma Azor.
14Azor le nan ma Zadog,
le Zadog ma Akim,
le Akim mu ma Eliud.
15Eliud le nan ma Eliɛzar,
le Eliɛzar ma Matann.
Le Matann ma Jekɔb.
16Jekɔb le nan ma Josef, wan a poo nan ye Meri-n, le Meri ma Yisa wan wee bi yi u ke Masiya nan.
17Naah nan nyan Abiraham a yonn ki nan kpaa Defid a yonn bi nan ye yaajam piig nin bina le. Le Defid a yonn ki tan kpaa n-yonn man wee bi nan chor bininfob ki jɔɔ bi chaa Babilɔnn nan, bi nan ye yaajam piig nin bina. Le Naah nan nyan iyaayoo ki tan kpaa Masiya a maalim a yoo, bi mu nan ye yaajam piig nin bina le.
Baah ma Yisa Masiya man
(Lug 2:1-7)
18Baah nan ma Yisa Masiya man sɔ: U na Meri nan ye Josef a jakpeŋ le, amaa baa la nan kɔɔn tabi, le bi nan kan ki miin Meri jɔɔ lipool le. Kasi a Naaŋ a pɔɔm bu. 19Josef wan nan ye u chalin nan ye uninfo buchinn le, mambu, waa nan ban un nyan ti npaan nin ni, wee Meri n ji ifa, amaa u nan lol u sufu ni ke waa ji yin kɔɔn wi. 20Amaa waah ni nan tiɛr ni niɛ nan bu-n, le Uwonbɔr a malaka degirin u bu tidindɔgin ni, le ki nan bei u ke, “Fin Josef wan ye Defid a yaabil nan, laa san bijawaam ke a ta Meri kun ki tan ŋaa u a poo,#1:20 Juu yaab a kaalin, ni ye kijakpeŋ kaa laa kɔɔ u chal bu wee ki choo lipool ke, nsiim kaa chee sei u nin un ji kal u chal nmɔn bu. nan bu-n waah jɔɔ lipool lan ni, Kasi a Naaŋ a pɔɔm le che u choo lipool nmɔn. 21U na li maa kibijag, le a yin ki yinl ke Yisa, nan bu-n u na li nyan u ninfob bi toonbirin.”
22Ni niɛ nan biɛn nan tun ke nin gbeen nan wee Uwonbɔr nan che u linlenu nan pag ni bu-n ke: 23“Lig! Usapɔɔn wan kaa nyi uja na li choo lipool ki maa kibijag, le bi na li yin u yinl ke Imanuel.”#Azaya 7:14 Ni taai le ye, “Uwonbɔr be nin ti.”
24Josef kaah nan nan fii njiɛmin n-yonn man ni, le u tun ke Uwonbɔr a malaka kaah bei u ke un tun man ni, le ki ta Meri kun tan ŋa u poo. 25Amaa waa la nan ta u ki ŋa u poo nin waah nan nan ma kibijagin. Le Josef yin u yinl ke Yisa.
Одоогоор Сонгогдсон:
Matiu 1: KUGL
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Komba New Testament © Bible Society of Ghana, 2014.